Асцена амца азыркуа: акәашаҩ Џьон Хәынҵариа иҭоурых

290
(ирҿыцуп 13:01 01.03.2020)
Аҳәынҭқарратә акәашаратә ансамбль "Шьараҭыни" Гагратәи ашәаҳәаратәи акәашаратәи коллектив "Афырҭыни" рҿы ахкы назыгӡоз, иахьа ахореографиатә студиа "Пицунда" аиҳабыс иамоу, Аԥсны акультура зҽаԥсазтәыз аусзуҩ Џьон Хәынҵариа акәашара иԥсҭазаара ишахәҭакхаз еиҭеиҳәеит.

Sputnik, Саида Жьиԥҳа

Џьон Хәынҵариа диит Гагра араион Лӡаа ақыҭан, амузыкатә ҭаацәараҟны. Иаб Гьаргь Алықьса-иԥа дмырзаканарҳәаҩын, иан Нелли Михаил-иԥҳа Хәытԥҳа дкәашаҩын. Дара хҩык рԥацәа рахьтә, аиҳаби аиҵби рҟазара рымардеит. Аԥсны ихьӡ ззымдыруада Жәлар рартист Оҭар Хәынҵариа, Џьон иакәзар, аамҭа-аамҭала еицырдыруа ансамбльқәа рҟны ахкы наигӡон.

Государственный ансамбль народного танца Шаратын
© Sputnik Томас Тхайцук

Џьон Лӡаатәи ашкол данҭаз инаркны асцена дашьцылахьан. Уаҟа музыкантс аус иуан иашьеиҳабы Оҭар Хәынҵариа, еиҿкаангьы иман ахори акәашаратә гәыԥи.

"Сашьеиҳабы иаԥиҵаз ахореографиатә гәыԥ аҟны ахкы насыгӡон. Иара убас усҟантәи аамҭазы Аԥсны зҽаԥсазтәхьаз артист Баграт Багаҭелиа ифольклортә ансамбль "Кьараз" аҟны скәашон. Ажәакала, сашьеиҳабы музыкантс дахьыҟаз аколлективқәа саргьы срылахәын. Иара иоуп сҟазара ашьаҭа зырӷәӷәазгьы", - иҳәоит Џьон.

1980 шықәсазы арԥыс ашкол даналга, дҭалоит Аҟәатәи акультуралашаратә ҵараиурҭа, ахореографиа аҟәша. Убри аамҭазы аҳәынҭқарратә акәашаратә ансамбль "Шьараҭынгьы" даднакылоит.

"Иахьеиԥш исгәалашәоит "Шьараҭын" сахәҭакны раԥхьатәи сықәгылара. Уи цәыббра 9, 1980 шықәсазы, Аԥсуа ҳәынҭқарратә адраматә театр аҟны акәын. Аконцерт аҳәынҭқарра аиҳабыра рзы еиҿкаан. "Аҿар рыкәашара" захьӡыз ақәгылараан ахкы насыгӡеит акәашара хәҭак аҿы. Асценахь санцәырҵ убас сгәы хыҭхыҭуан, аҳауа сзымхошәа збон. Аха аҵыхәтәаны, ахәаԥшцәа рнапеинҟьабжь ансаҳа, лабҿаба шақәцәҟьаз снырын, сыҽсырҭынчит", - еиҭеиҳәоит акәашаҩ.

"Шьараҭын" дацны Џьон Хәынҵариа агастрольқәа рахь дцахьан СССР, Европа, Африка атәылақәа жәпакы рахь. Знызаҵәыкгьы аԥхьахәтә ҭыԥк иаԥсамхакәа имхынҳәыцызт.

"Шьараҭын" аҟны дахьынӡакәашоз, Џьон алыхәҭа дкылхны артистра илихит ансамбль асахьаркыратә напхгаҩы Едуард Бебиа. Иара убри аколлектив аҿы музыкантс иҟаз Оҭар Хәынҵариагьы иашьеиҵбы илаԥш шихыз ихын.

"Едуард Бебиа лакәтә хаҿсахьаны дсыԥхьаӡон аколлектив ахь снеиаанӡа. Ансамбль санаднакыла сгәырӷьара ҵҩа амамызт. Идеалс исыман "Шьараҭын" ахкынагӡаҩцәа Валери Ҭаниа, аишьцәа Хьециаа, Лавренти Цколиа. Арҭ алегендартә кәашаҩцәа арываҟәылара мариамызт, аха дара реиԥш сҟалар сҭахын. Сашьеиҳабы Оҭар, уи сырҵаҩцәа иреиҳаз иакәын. Иара иоуп сзааӡаз, ауаҩра сылызхыз. Сганахь иааирԥшуаз аџьбарара иабзоураны иснырит изакәыз аҭакԥхықәра асценаҿы адагьы, аԥсҭазаараҿгьы", - иажәабжь иациҵоит Џьон Хәынҵариа.

"Шьараҭын" алахәцәа зегьы ҭаацәак еиԥш еизыҟан, аӡәи-аӡәи еихӡыӡаауан, еицхыраауан. Аконцертқәа раан, аиҳарак Аԥсны анҭыҵ аиҳаби аиҵби еизыӡырҩуан, еилабжьон. Агастрольқәа ахҭысқәа рыла ибеиан, иҟан алахҿыхреиԥш, агәшәарагьы зыцқәаз.

"Зны, Шәача ԥсшьарҭа ҩнык аҟны атуристцәа рзы аконцерт мҩаԥаагон. "Аҟама кәашараан", уажәшьҭа дазусҭоу сгәалашәом, аха хкынагӡаҩык аҟама андәықәиҵа, адашьма иахаԥырны ахәаԥшцәа ахьтәаз ицеит. Ахԥатәи ацәаҳәаҿы итәаз хаҵак ижәҩахыр иалалеит. Ҳааилауаҭырит ҳазегьы, аха иҷаԥшьоз аҳақьымцәа ирлас ацхыраара ирҭан, азал ахь деиҭахынҳәын, аконцерт ахәаԥшра иациҵеит. Аҵыхәтәаны, "сара џьаргьы сашшуам, ари машәыруп, шәаргьы ишәҭахымызт, амала абри исылалаз аҟама гәаларшәагас, ҳамҭас исҭахын иҳәеит". Хымԥада, мап ицәаҳкуазма. Ҽаӡәызар аус ҳақәиршәаргьы ҟалон", - ахҭыс игәалаиршәоит акәашаҩ.

Усҟантәи аамҭазы ансамбльқәа лассы-лассы ақыҭақәа ирҭаауан. Иҟалалон ахәаԥшцәа аконцерт шцоз асцена иқәланы артистцәа ирыцкәашо ианалагоз. Мамзаргьы, акәашарақәа рыбжьара, "аконцерт ашьҭахь џьаргьы шәымцан, ачеиџьыка ҟалоит" ҳәа анҿырҭуазгьы.

"Аиашазы, ақыҭақәа рахь ҳанцоз бзиа иаабон. Избанзар аҭыԥантәи анхацәа акалашәа ргәы былуан. Асценахь иҳацкәашарц ихалон. Уи аԥҟара еилагаран, аха акгьы ҳҳәаӡомызт, ргәы дҳмырхьырц азы. Знызаҵәыкгьы иҟамлацызт қыҭак аҟынтәи ашьтәа ҳзымшькәа ҳхынҳәны. Чарак, жәлар рныҳәа дук иаҩсуа аишәақәа дырхион. Ҳаргьы лафны ас еиԥш иҟаз аусмҩаԥгатәқәа "аконцерт ахԥатәи аҟәша" ҳәа ҳашьҭан", - еиҭеиҳәоит артист.

Венера Чагәаа. Архивтә фото
© Фото : из личного архива Венеры Чагава

Џьон аррамаҵура дахысит Қарҭ, Кавказынҭыҵтәи арратә округ, Абираҟҟаԥшьтә ашәаҳәаратәи акәашаратәи ансамбль аҿы. Араҟагьы акырӡа иԥышәа еизирҳаит.

Џьон Хәынҵариа 1980 шықәса анҵәамҭазы, Гагра ақалақьтә еилакы апартиа актәи амаӡаныҟәгаҩыс иҟаз Енвер Қапба иааԥхьарала, аԥсуа артистцәа гәыԥҩыуаак дрыцны Гаграҟа даауеит ақырҭцәа ирхәаҽуаз аԥсуа культура аԥсы ахаҵаразы. Араҟа иаԥҵахоит ашәаҳәаратәи, акәашаратәи ансамбль "Афырҭын". Акәашаратә гәыԥ сахьаркыратә напхгаҩыс даман Лев Қьецба, ашәаҳәаратә – Баграт Багаҭелиа, оркестр - Оҭар Хәынҵариа, Џьон ахкынагӡаҩцәа дреиуан, убас ихы ԥишәон хореографс.

"Усҟантәи аамҭазы азеиԥш ус иабзоураны "Афырҭын" Гагра араион акәым, Аԥсни анҭыҵи хьӡи-ԥшеи аманы иҟалеит. Адунеи атәылақәа жәпакы рахь ааԥхьара арҭон, жәларбжьаратәи афестивальқәа ирылахәхон. Ҳцахьан Европа, Америка. Ниу-Иорк ҳаныҟаз, аԥсуа диаспора ҳԥылеит. Ҳаихшаны аҭаацәарақәа ҳаргеит. Сара Арӡынаа сырҭан. Аконцертқәа раан рҽеидкыланы иаауан, рнапеинҟьабжь еихсыӷьуамызт. Ахаан исхашҭӡом, ҳаиԥырҵрагьы. Ниу-Иорк аҳаирбаӷәаза иҩныҩуаз агәынқьбжьы иахьагьы слымҳа ыҵнахаауеит, убриаҟара агәыԥжәара ацын", - игәалашәоит Џьон Гьаргь-иԥа.

Аколлектив Американтәи ианыхынҳә, хара имгакәа Аԥсны Аџьынџьтәылатә еибашьра алагеит. Џьон Хәынҵариа иашьцәеи иареи Џьон Дбар командаҟаҵаҩыс дызмаз Лӡаатәи арота иацны иалахәын ажәыларатә аоперациақәа жәпакы. Аибашьра адәаҟны ииуан аԥсадгьыл ахьчаҩцәа ргәы шьҭызхуаз Оҭар Хәынҵариа имузыкатә рҿиамҭақәа.

Аԥсны аҭынч ԥсҭазаара аназыхынҳә, Џьон Хәынҵариа Уасил Ақаҩба напхгаҩыс дызмаз Пицундатәи акәашаратә ансамбль "Аламыс" аҿы ицхырааҩыс дыҟан. Аҵыхәтәантәи хәышықәса иаԥҵаны имоуп ахәыҷтәы хореографиатә студиа "Пицунда". Арахь иныҟәоит ашколқәра иаҵанакуа ахәыҷқәа. Иахьазы астудиа иаҭаауа рхыԥхьаӡара шәҩык инарзынаԥшуеит. Ахәыҷқәа жәлар рыкәашара адагьы, ирҵарц рылшоит аестрадатә кәашарагьы.

© Foto / Саида Жиба
Џьон Хәынҵариеи иаԥҵаны имоу ахәыҷтәы хореографиатә студиа "Пицунда" ааӡамҭацәеи

"Х-гәыԥкны, аиҳабыратәи, абжьаратәи, аиҵбыратәи ҳәа иҳамоуп. Мчыбжьык хынтә жәлар рыкәашара аҟәша аус ауеит, убас хынтә аестрадатә кәашара аҟәша. Дарӷьажәҩаны дсывагылоуп, акәашара арҵаҩысгьы дыҟоуп сааӡамҭа Сурам Агрба. Акык-ҩбак аномерқәагьы еиҿкаауп. Араион аҿы имҩаԥгахо аныҳәақәа раан ҳхәыҷқәагьы алаҳархәуеит. Сгәазыҳәарақәа иреиуоуп абалет, атанго, афокстрот аҟәшақәа раартра, уи азы хымԥада ацхыраара ҳҭахуп кадрлеи, финанслеи. Иахьазы ҳҭагылазаашьа даара иуадаҩуп. Ахәыҷкәа ркостиумқәаҵәҟьа аҭаацәа рыда иаҳзаахәаӡом. Аха ҳгәы каҳажьуам, уимоу астудиа ашьаҭала ансамбль аԥҵарагьы сгәы иҭоуп", - игәҭахәыцрақәа ҳацеиҩишеит акәашара арҵаҩы.

Шьаҿа-шьаҿа аҟазара ду ахь амҩа иану ахореографиатә астудиа "Пицунда" аԥеиԥш шамоу умбарц залшом, абас еиԥш згәы былуа анапхгаҩы даныҟоу.

Иара убас шәаԥхьар ҟалоит:

290

Аҟәантәи Калдахәаранӡа, ма акоронавирус агәра гара шаҳҭахым

192
(ирҿыцуп 13:28 27.10.2020)
Аԥсуаа акоронавирус гьангьаш ҳашҭа иҭалаанӡа аԥсы шҭоу агәра агара ҳҭахым ҳәа агәаанагара лызцәырҵит Sputnik аколумнист Елеонора Коӷониаԥҳа, Аҟәантәи Калдахәараҟа дцан данааи ашьҭахь.
Аҟәантәи Калдахәаранӡа, ма акоронавирус агәра гара шаҳҭахым

Ҽаҩраҭагалан иаҳнаҭаз аԥхарра лшара бзиоуп еимҟьарак аныҟоу ақыҭа аҭааразы. Ачымазара ҿкы анеилагьежьуа аамҭазы, амҩа ақәлара гәаӷьыуацәагәышьоуп, аха ус акәзаргьы, аԥкра амҩаԥгаразы иҟоу ахархәагақәа ҳасаб рзыуны, ахәаша амҩа ҳақәлеит ҳқыҭахь сыԥшәмеи сареи. Аидарагьы ҳаман азы атакси ҳаԥхьеит авокзал аҟынӡа ҳцарц. Иааит атакси, аха амашьынарныҟәцаҩ асабрада захьӡу ихамызт. Ҳанҭатәеит ҳара сабрадала ҳаиқәных. Авокзал аҿы, игәасҭеит аԥсуа аруаа гәыԥҩык шеицыз, урҭ зегьы асабрадақәа рхан. Авокзал аҿы игылаз Аҟәа-Ԥсоу ҳәа зныз амаршруттә такси ҳанҭалеит. Арныҟәцаҩ, Анцәа иҟәырхуп усгьы акгьы ихамызт, аха амашьына иҭатәаз рахьтә аӡәы-ҩыџьа ракәын асабрадақәа ныҟәызгоз. Акарантин шыҟоу здыруа, асабрада зҿаз ԥҳәыск сынлыдтәалеит.

Амашьынарныҟәцаҩ қәрала 60-ҟа шықәса дрықәзаргьы ҟаларын, аха ихымҩаԥгашьала Ковид-19 адунеи ишықәу имаҳацзаргьы ҟалап угәахәуан. "Зегь шәтәама?" иҳәан имашьына аус наируит, "асабрадақәа шәхашәҵа" ҳәа дҵакгьы ҟаимҵеит. Амҩа ҳақәлеит. Зегь реиҳа ишәарҭахаз, аԥсҟы зкыз амашьына ширныҟәоз акәын. Исыватәазгьы саргьы ҳгәы нҭыԥсаауан, иаалырҟьан аџыхҳәа иаангылон зныҟәашәа ццакыз амашьына. Дабаццакуеи ҳныҟәызго уҳәарын, убас аҽыҩқәа аныҵдырҟьо еиԥш имашьына анааирҭрыслак.

Амҩан иҳаԥхьагылоз аидарамҩангага машьынақәа амҩа анирымҭалакгьы, ишшәарҭазгьы дрывсыр иҭахны амҩа егьи аганахь ихы аарихалон. Ишамуаз анибалакгьы, аџыхҳәа даангылон. Амҩан иҳавсуаз амашьынақәа ирҭатәаз рахьтә сабрадала еиқәшәазгьы ыҟан, аха шамаха ауаа рацәа зҭатәаз амашьынақәа рпассаџьырцәа зегьы иныҟәыргомызт, иахьа ҳаԥсҭазаара иахәҭакхаз -асабрада.

Аҟәа инаркны Калдахәаранӡа ҳнеиаанӡа адәахьы ахәаахәҭра иаҿыз ауаа ракәзар, акарантин акашәа имбакәа адунеи ишықәу убаратәы иҟан. Ашәыр, ақәыр уҳәа реиԥш иҟоу адәахьы иқәыргылан изҭиуа анапҭарԥагьы асабрадагьы рааигәара ишнарымго иаразнак иубоит.

Схәыцуан, абырсҟак аԥсыҭбара аныҟоу абарҭ мшәаӡо ҳәа. Мап, имшәозар акәхап, мамзар ас ҟалашьас иамоузеи? Иаҳаулакгьы амҩатә машәыр ҳақәымшәакәа Калдахәара аангыларҭаҿы ҳнеит. "Уныҟәашәа бааԥсуп амашьынарныҟәцаҩ, ухаҵкы", сҳәеит ҳанҭыҵуаз. "Ибҳәо закәи?", иааџьеишьеит иара.

Ҳахьынҭыҵыз игәаҳҭеит аангылараҭаҿы игылоу адәқьан шарку. Ашьҭахь излеилаҳкааз ала, уаҟа аус зуаз ачымазара рхьысит. Ковид-19 ари ақыҭаҿгьы иаагәышьеит сгәахәит "анхәа лыбз" еиԥшу Калдахәаратәи архәра ҳаҿаланы ҳаҩныҟа ҳҿанынаҳха.

Ақыҭараҿы ҭынчроуп, амҩа шамаха уаҩ данны убомызт. Ачымазара ҿкы аҽацәыхьчаразы ҳара ҳахьынхо аҭыԥ даара иманшәалоуп. Аԥкрақәа инарықәыршәаны, агәылара, азлара џьаргьы ҳамнеит, ҳара ҳахьгьы уаҩ дмааит. Ақыҭауаа рӷьырак Гагра аус руеит, хәылбыҽхала рыҩныҟақәа рахь ихынҳәуеит, убри аҟынтә, ҳазқәынхо ахәы ҳаракы ачымазра халар ауеит аԥкрақәа ирықәымныҟәар ҳуааԥсыра.

Амҽышаҽны Аҟәаҟа ҳдәықәлеит. Аангылараҭаҿы ҳанааи адәқьан шаркыц иаркын. Дук хара имгакәа атакси аангылт "амаршрутка ахәала шәызгоит" аниҳәа, ҳанҭалеит ҳсабрадақәа наҳҿаршәны. Араҟагьы, амашьынарныҟәцаҩгьы, иватәазгьы аԥкра амԥангьы иҟамызт, амала амашьына арныҟәцаҩ ашьшьыҳәа даауан, сгәы мыҭрыскәа Аҟәанӡа ҳааигеит.

Аҟәа санналаԥш асабрадақәа шырацәаз иаразнак иаагәасҭеит. Ақалақь транспорт аныҟәцаҩцәа аԥҟарақәа ишрықәныҟәо иаразнак иубоит. Атроллеибус иҭаз реиҳараҩык сабрадала еибыҭан.

Авирус абҵара анҵәамҭазы аҽаӡар алшоит рҳәоит, аха сныҟәара ишыснарбаз ала, еиҳарак аҳҭнықалақьуаа роуп арҭ аԥҟарақәа ирықәныҟәо, егьырахь амҩан избақәоз рыла, акарантин ирылаҳәо ашьҭахь, ачымазара ацәаара ԥсыҽхоит аҳәара уадаҩуп.

Калдахәара саныҟаз Гагра инхо сыуацәа ҭелла исарҳәеит "Гагрыԥшь" ачара мҩаԥыргон ҳәа. Абас ҳаҟоуп ҳарҭ аԥсуаа, авирус гьангьаш ҳашҭа иҭалаанӡа аԥсы шҭоу агәра агара ҳҭахым.

Автори аредакциеи ргәаанагарақәа еиқәымшәозар ҟалоит.

Иара убас шәаԥхьар ҟалоит:

192

Кьасоу Ҳагба: ауаҩы иԥсҭазаара аҵакы аиуеит, ихы мжьакәа, иус ишахәҭоу дазнеир

38
(ирҿыцуп 14:02 24.10.2020)
Иахьа имшира азгәеиҭоит Самсон Ҷанба ихьӡ зху Аԥсуа ҳәынҭқарратә драматә театр актиор, Аԥсны акинемотографцәа реидгыла ахантәаҩы, ауаажәларратәи аҳәынҭқарратәи усзуҩы Кьасоу Ҳагба.

Аԥсны Акинематографистцәа реидгыла ахантәаҩы, актиор Кьасоу Ҳагба Sputnik акорреспондент аинтервиу лыҭо, дазааҭгылеит ихәыҷра ашықәсқәеи, ирҿиаратә мҩа шалагази, иаликаауа аспектакльқәеи, инаигӡахьо арольқәеи ртәы.

Наала Гәымԥҳа, Sputnik.

Кьасоу Ҳагба аиицәажәара анхациркыз, гәыблыла ихәыҷратәи ашықәсқәа игәаларшәеит.

"45 шықәса инарзынаҧшуа ақалақь аҟны сшынхогьы, ҧхыӡла ақыҭа ауп избо. Схәыҷреи сқәыҧшреи зегьы сқыҭа иадҳәалоуп. Саныхәыҷыз саб дҳаҧхеит, сан хҩык ахшара ааӡатәыс ҳлоуит. Есымшааира Анцәа диҳәон, игәра лгон. Аџьабаа ӷәӷәаны илбеит ҳааӡараҿы", - иҳәеит иара

Кьасоу Ҳагба қәҿиарала дҭалоит, дагьалгоит Ш. Русҭавели ихьӡ зху Қырҭтәылатәи Аҳәынҭқарратә Атеатралтә Институт.

© Foto / из личного архива Кьасоу Хагба
Кьасоу Хагба

"Афбатәи акласс ааныжьны сҭалеит уахынлатәи ашкол. Ажәабатәи акласс саналга, исыӡбеит сактиорхарц, сҭаларц Атеатралтә институт. Акино, атеатр, акультура рахь агәыблыра сзыркыз ҳәа исыҧхьаӡо, сызхәаҧшуаз акиносахьақәа, актиорцәа уаҟа рыхәмаршьа атәы ауп. Уи аҩыза алшара ҳаман, лассы-лассы ҳқыҭа иаҭааны афильмқәа ҳдырбон. Раҧхьаӡакәны актиорк иаҳасабала асценахь сцәырҵит Аинститут аҭаларазы аҧышәара анасҭоз амш аҽны. Аҧышәара лыдылкылон Нелли Ешҧҳа. Исыдылҵеит аетиуд ақәыргылара. Мчыбжьык ашьҭахь сааины, ашәарыцараҟны слеи сареи ҳзыниаз ахҭыс ала илыдызгалеит. Уи даара ахәшьара бзиа алҭеит, убас сҭалеит Қарҭтәи Атеатралтә институт", - ҳәа игәалаиршәоит.

Актиор Ҳагба: сзыхьӡаз ахәыҷы намысла, уаҩышәала, ԥсыуала иҟасҵон>>

Кьасоу Ҳагба имаҷымкәан инаигӡахьеит асценатә рольқәа, ихадароу ахаҿсахьақәа. Урҭ рахьтә: Молчалин ("Зыхшыҩ зызрыцҳароу" А. Грибоедов), Аԥсҳа Леон ("Аԥсҳа Леон" А. Агрба), Цезарь ("Иули Цезарь" У. Шекспир), Махаз ("Махаз" Ф. Искандера, ареж. В. Ақаҩба), Тартиуф ("Тартиуф" Мольер, ареж. К. Хачегогу), Лаимен ("Ашьха Морган аҟынтәи хланҵы" А. Миллер, ареж. В. Ақаҩба), Џьонни Паттинмаик ("Адгьылбжьаха Кинишмаҟынтәи ахымхәа" Макдонаха, ареж. В. Ақаҩба). "Кьоџьаа рҭыӡшәа" Гольдони (Исидоро), "Брисбенынтәи аемигрант" Шехаде (Ашькылкҩы, ареж. В. Ақаҩба), "Аӡыцәа шкәакәа" В. Касланӡиа (Зафас, ареж. В. Ақаҩба), "Ацынҵәарах" Б. Шьынқәба (Хамыҭбеи Чачба).

© Foto / из личного архива Кьасоу Хагба
Кьасоу Хагба

"Раҧхьаӡакәны ихадоу ароль сыхәмарит Вампилов ипиеса ала иқәыргылаз аспекталь "Аҭӡамц" аҟны. Уаҟа ихадароу апрокурор ироль насыгӡон. Ари ақәгылара сдипломтә усумҭа акәын, ибзианы ирыдыркылеит. Анаҩс Аҧсны ирацәаны ақыҭақәа ҳарҭааны идҳарбеит", - ҳәа азгәеиҭоит Кьасоу Ҳагба.

1978 шықәса раахыс С. Ҷанба ихьӡ зху Аҧсуа аҳәынҭқарратә драматә театр аҟны иҟаз афольклортә ансамбль "Уарада" дасолистын. 1999 шықәса инаркны 2000 шықәсанӡа Аҧсны Акультура Аминистрс дыҟан. 2002 шықәсазы Аҧсны Аҳәынҭқарра Апарламент адепутатс дыҟан. Кьасоу Ҳагба С. Ҷанба ихьӡ зху Аҧсуа ҳәынҭқарратә драматә театр иаҧхьагылоу актиоруп.

© Foto / из личного архива Кьасоу Хагба
Кьасоу Хагба

Актиор ихаҿы иаанхаз, еиҳа игәалашәарақәа иаарылыҳәҳәо иҟоу Швеицариа иқәдыргылаз аспектакль ауп. Уи атәы ҳзеиҭеиҳәеит актиор.

"Аҧсны Аџьынџьтәылатә еибашьра алагара мызқәак шагыз, Швеицариа атәылаҟны агастрольқәа ҳаман. Уи иреиӷьу агастрольқәа ируакуп сара сзын. Гиульден ипиесала иқәыргылан "Кьоџьаа рҭыӡшәа" заыхьӡыс аспектакль. Иқәиргылеит Валери Михаил-иҧа Ақаҩба. Ари раҧхьаӡатәи Аҧсуа театр аҳәаанырцә ақәгылара акәын. Аспектакль ахы инаркны аҵыхәанӡа аҧсышәала имҩасит. Ахәаҧшцәа аспектакль алагаанӡа ирзеиҭарҳәеит уи аҵакы зызкыз, аҭоурых. Иџьоушьаша, абызшәа шырзеилымкаауазгьы, ахыбра зегьы ҭәын, ҭыҧк ҭацәны усгьы иубомызт. Аспектакль ашьҭахь ахәаҧшцәа зегьы ҳадеизаланы ҳнапынҵамҭа иаҳәон", - ҳәа игәалаиршәоит актиор.

Асцена Кьасоу Ҳагба изыҳәан ҧсҭазаароуп, идунеи шьаҟа ӷәӷәаны иаҵагылоуп.

"Асцена уанықәгыла нахыс, ахәаҧшҩи уареи шәеимадара ацәажәара уалагаанӡа,уҩнуҵҟатәи уҧсҭазаара иахылҵуа ацәанырреи дареи еиқәшәаны ианеилаҵәалак, нас ауп амшын иху аӷбеиҧш уаманы аҿанынанахо. Уроль нагӡаны уаналгалак, ахәаҧшҩы ибла ихубаало аҧхарра иабзоураны, еиҭах сыхәмарындаз ҳәа агәаҳәара узцәырҵуеит. Зегь реиҳа ихадароу, ауаҩы ихы мжьакәа, дызҿу аус ишақәнагоу даназнеиуа, убасҟан ауп иҧсҭазаара аҵакы анаанахәо, алҵшәа анаиуа. Амилаҭ ҟазара - уи ҳара ҳӡырызго, ҳхаҿра, ҳдунеи зегьы идзырбо акакәны иҟоуп", - ҳәа азиҧхьаӡоит иара.

Кьасоу Ҳагба бзиа ибаны, имч-илшара зегьы изанааҭ иазкны, иахьа уажәраанӡа мааҧсарада аус иуеит.

38

Уахыки-ҽнаки рыла 106-ҩык акоронавирус шрылаз аадырԥшит Аԥсны

15
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 4058-ҩык ыҟоуп. Урҭ рахьтә ргәы бзиахеит 2071-ҩык, рыԥсҭазаара иалҵит 36-ҩык.

АҞӘА, жьҭаара 28 - Sputnik. Иҳаҩсыз уахыки-ҽнаки рыла COVID-19 зцәа иалоу реилкааразы атестқәа 458 ҟаҵан, урҭ рахьтә акоронавирус аарԥшын 106 тест рҟны ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 137-ҩык ауааԥсыра, урҭ рахьтә 118-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 26-ҩык, ибжьаратәуп - 40-ҩык, илҩаауп 15-ҩык апациентцәа. Гәдоуҭатәи агоспиталь иҭашәеит жәҩык ачымазцәа.

Аҟәа асасааирҭа "Аиҭар" ашҭаҿы иаадыртыз амобилтә госпиталь аҟны ишьҭоуп акоронавирус зыдбалоу 51-ҩык апациентцәа. 47-ҩык рҭагылазаашьа бжьаратәуп ҳәа иԥхьаӡоуп, ԥшьҩык рҭагылазаашьа бааԥсуп. Амобилтә госпиталь аҟынтәи илҩаауп быжьҩык.

Ауааԥсыра COVID-19 рацәыхьчаразы аоперативтә штаб ажәлар рахь ааԥхьара ҟанаҵоит ачымазара ҿкы рымкырц азы иахәҭоу аԥҟарақәа зегьы ирықәныҟәаларц.

Акоронавирус иазку ажәабжьқәа зегьы шәрыԥхьар ҟалоит абра>>

15
Атемақәа:
Ачымазара ҿкы – акоронавирус Аԥсни адунеи аҿи: иалкаау