45 шықәса асценаҿы: акәашаҩ Галина Ажьиԥҳа лҭоурых

414
(ирҿыцуп 11:23 03.05.2020)
Еиуеиԥшым аколлективқәа рҟны 45 шықәса рыбжьара ахкы назыгӡоз акәашаҩ Галина Ажьиԥҳа лҭоурых ҳзеиҭалҳәоит Sputnik акорреспондент Саида Жьиԥҳа.

Саида Жьиԥҳа, Sputnik

Гәдоуҭа араион, Бармышь ақыҭан ҳаҭыр ду зқәыз, Аџьынџьтәылатә еибашьра Дуӡӡа аветеранцәа Лудиа Есыф-иԥа Ажьибеи Ефросиниа Расҭа-иԥҳа Папԥҳаи рҭаацәараҿы изызҳауаз быжьҩык ахшара рахьтә, Галина жәашықәса анылхыҵуаз инаркны акәашара далагеит Блабырхәатәи абжьаратә школ аҟны, Харитон Мимаҭ-иԥа Барцыц еиҿкааны имаз ахаԥшьагаратә коллектив аҿы.

Ахәыҷқәа убриаҟара абаҩхатәра рылан, аамҭа кьаҿк иалагӡаны Гәдоуҭа араион имҩаԥысуаз еиуеиԥшым аконкурсқәа раан аҳаҭыртә хьӡқәа ирыԥсахон. Аколлектив еиднакылон 20-ҩык ахьыбҿар, аха Харитон Барцыц зегьы дрыликаауан Галина. Лара лыԥшреи, лсахьеи, лыртәашьеи, акәашараан леиҭаҵшьеи рыла аҳәынҭқарратә ансамбль "Шьараҭын" данаалоит ҳәа леиҳәалон. Аԥҳәызба ашкол даналга, лырҵаҩы иабжьагарала дҭалоит Аҟәатәи аҵаралашаратә ҵараиурҭа. Адкыларатә ԥышәарақәа ирылахәыз, ансамбль "Шьараҭын" асахьаркыратә напхгаҩы, усҟантәи аамҭазы Аԥсны зҽаԥсазтәхьаз артист Едуард Бебиа даниба, "сара сҟны бкәашалоит" ҳәа ааԥхьара лиҭазаап.

Гьерзмааԥҳа: асценаҟны кәашарала уцәажәозароуп>>

"Сара сқәыԥшратә шықәсқәа раан ансамбль "Шьараҭын" аҿы икәашоз длакәтә хаҿсахьаны даҳԥхьаӡон. Убри аҟнытә Едуард Бебиа дуӡӡа ааԥхьара ансиҭа ԥхыӡушәа исзааит, ишҵабыргыз анеилыскаа сгәырӷьара ҵҩа амамызт", - илгәалашәоит акәашаҩ.

© Foto / предоставлено Галиной Ажиба
Акәашаҩ Галина Ажьиԥҳа - арыӷьарахьала аҩбатәи. Ансамбль "Кьараз".

Галина Ажьиԥҳа "Шьараҭын" аҿы дкәашон хышықәса, аҵаралашаратә ҵараиурҭа далгаанӡа. Ари аколлектив дацны агастрольқәа рахь дцахьан Тунис, Алжир, Марокко, Будапешт.

© Foto / предоставлено Галиной Ажиба
Акәашаҩ Галина Ажьиԥҳа - арыӷьарахьала игылоу

"Раԥхьаӡакәны "Шьараҭынаа" срыцны сахьцаз аҳәаанырцәтәи атәылақәа иреиуоуп Венгриа. Москва ацҳаражәҳәарҭаҿы ҳазегьы ҳгәы ҳҽанырҵеит, атәым ҳәынҭқарраҿы аанхара шыҟамло, уи аԥсадгьыл аԥсахра акәхоит ҳәа. Иҳаларҳәеит ҳзықәныҟәаша аԥҟарақәа. Ажәакала, уара ишуҭаху ухы мҩаԥургар ҟаломызт. Амала Будапешт ибзианы ҳрыдыркылеит. Асценахь ҳанцәырҵ ахәаԥшцәа рнапеинҟьабжь еихсыӷьуамызт. Номерк ҩынтә ҳаныкәашозгьы ыҟан ргәаҳәарала. Ақәгыларақәа рышьҭахь ҳанеицәажәоз, ирзеиҭаҳҳәон ҳахьынтәааз Кавказ шакәыз, ҳаԥсадгьыл Аԥсны шахьӡыз", - раԥхьатәи аҳәаанырцәтәи лконцерт далацәажәоит акәашаҩ.

Галина Ажьиԥҳа лгәы иаланы илҳәеит, Асовет Еидгыла иатәыз аколлективқәа аԥхьахәқәа ршараан иахәҭамкәа аҭыԥ шрырҭоз.

"Тунис ҳаныҟаз, "Шьараҭын" аԥшӡара аконкурс ҳалахәын. Аӡбаҩцәагьы ишырҳәоз ҳаҳауан, "арҭ актәи аҭыԥ иаԥсоуп" ҳәа. Аха аҵыхәтәаны аҩбатәи ҳарҭеит. Ус изныкымкәа иҟалахьан егьырҭ аҟазаратә конкурсқәа раангьы", - иацылҵоит лара.

Галина Ажьиԥҳа аҭаацәара даналала "Шьараҭын" нлыжьыр акәхеит. Аха иахьа уажәраанӡа лгәаҵа иҟәандоу ацәаныррақәа аҵоуп уи аколлектив аӡбахә анылҳәо. Харитон Барцыц лҟазара ашьаҭа аиркызар, еихазҳаз Едуард Бебиа иоуп. Арҭ аҩыџьагьы лыԥсҭазаараҿы иҷыдоу аҭыԥ ааныркылоит.

© Foto / предоставлено Галиной Ажиба
Асоло нарыгӡоит Галина Ажьиԥҳаи Славик Аибеи. Ансамбль "Кьараз".

Галина ҩышықәса Акаки Малиа напхгара зиҭоз Гәдоуҭатәи ансамбль "Риҵа" аҿгьы дкәашахьан. Дрыцны дцахьан Куба. Анаҩс аамҭакы ахкы налыгӡон Уасил Ақаҩба еиҿкааны имаз Пицундатәи акәашаратә ансамбль "Аламыс" аҿы.

© Foto / предоставлено Галиной Ажиба
Акәашаҩ Галина Ажьиԥҳа - арыӷьарахьала аҩбатәи. Ансамбль "Шьараҭын".

Ишдыру еиԥш, Гагра араион ашәҭыкакаҷра аамҭа ианҭагылаз араҟа аҳра уа иалаз ақырҭцәа ракәын. Аԥсуаа ркультура аӡыргара акәым, рықалақь иақәиҭымызт. 1980-тәи ашықәсқәа рзы, Гагра ақалақьтә комитет апартиа актәи амаӡаныҟәгаҩс иҟаз Енвер Қапба иааԥхьарала, араион аҿы еиҿкаахо иалагеит ашәаҳәаратәи, акәашаратәи ансамбльқәа, аестрадатә гәыԥқәа. Убасҟан иаԥҵахаз аколлектив "Афырҭын" ахкынагӡаҩцәа дыруаӡәкхеит Галина Ажьиԥҳагьы.

© Foto / предоставлено Галиной Ажиба
Акәашаҩ Галина Ажьиԥҳа - арыӷьарахьала игылоу

"Ансамбль "Афырҭын" акәашаратә гәыԥ асахьаркыратә напхгаҩыс даман Лев Қьецба, ашәаҳәаратә – Баграт Багаҭелиа, оркестр-Оҭар Хәынҵариа. Дара рыбзоурала аколлектив иахәҭакхеит аԥышәа змаз артистцәа. СССР атәылақәа рнаҩс, "Афырҭынаа" ҳаӡбахә рдыруа иҟалеит Америкеи, Европеи", - еиҭалҳәоит акәашаҩ.

© Foto / предоставлено Галиной Ажиба
Ансамбль "Кьараз"

Галина Ажьиԥҳа дазааҭгылеит, Аԥсны Аџьынџьтәылатә еибашьра ҟалаанӡа, Америка агастрольқәа рыманы ианыҟаз, уаҟа инхоз ҳџьынџьуаа рхаҭарнакцәа ишрыдыркылаз.

"Америка ҳаҟазаара иалагӡаны аконцертқәа жәпакы мҩаԥаагеит. Уахь инеиуаз ҳџьынџьуаа аҭыԥантәи ахәаԥшцәа ирылукаауан рцәаныррақәа рыла. Ахаан зҭоурыхтә ԥсадгьыл аҟнытә ԥсыуак дзымбацыз ҳабла ихыԥшылон. Исгәалашәоит Марина Ажьиԥҳа амҳаџьыраа ргарашәа "Шьышь-нани" анылҳәоз, азал аҿы агәынқьбжьы шгоз. Дара реиҳараҩык рхатәы бызшәа рыздыруамызт, аха гәыла ҳаилибакаауан. Даара ҳаҭыр ҳақәиҵеит Инал Казанба. Уи усҟангьы иӡбахә Аԥсны ирдыруан, иаби иареи ҳақьымцәан. Ҳџьынџьуааи ҳареи ҳаиԥырҵра атәы уҳәозар, уи шәҟәык иузҭагӡом. Аҽны Ниу-Иорк аҳаиртә баӷәазаҿы иҟаз зегьы ҳагәныркылазар ҟалап. Ҳаибарҵәыуо ҳаидыҵит, мап... ҳаидырхит", - илгәалашәоит Галина Ажьиԥҳа.

Аԥсны Аџьынџьтәылатә еибашьра ҟалаанӡатәи аамҭақәа данрыхцәажәо, акәашаҩ илҳәоит ансамбльқәа асовет тәылақәеи, аҳәаанырцәи агастрольқәа рахь ишцозгьы, Аԥсны ақалақьқәеи, ақыҭақәеи рҟынгьы ишықәгылоз. Аиҳарак аконцертқәа ргәы хыҭ-хыҭуа иазыԥшын ақыҭанхацәа. Ԥсыршьагас, гәырхашҭыгас ирзыҟалон артистцәа раара.

Галина Ажьиԥҳа дышқәыԥшӡаз арԥар рылаԥш лыдхалон. Ансамбльқәа рҿы акәашара даналага изныкымкәа дымҵадырсырцгьы иалагахьан. Аха лара дылразҟхеит Блабырхәатәи ашкол илыцҭаз, уи нахыс лааигәара уаҩ дназмышьҭыз Нури Габлиа.

"Сыԥшәма раԥхьаӡакәны асценаҿы ауп сахьибаз азы, зны заҵәыкгьы иааныжь имҳәеит, уимоу сҟазара ҳаҭыр ақәиҵон", - инаҵылшьит лара.

Аԥсны Аџьынџьтәылатә еибашьра ашьҭахь, Галина Ажьиԥҳа дахәҭакхеит Гагратәи афольклортә ансамбль "Кьараз".

Ҩыџьа аԥҳацәа ран, хҩык амоҭацәа ранду, иахьагьы асцена ду нылмыжьит.

© Foto / предоставлено Галиной Ажиба
Акәашаҩ Галина Ажьиԥҳа - арымарахьала аҩбатәи. Ансамбль "Кьараз".

Галина Ажьиԥҳа, хыхь ишаҳҳәаз еиԥш, еиуеиԥшым аколлективқәа рҿы дкәашон. Лара "Шьараҭын" аҿы ахкы лыцнаигӡон Аркади Чачхалиа. Иара Аԥсны Аџьынџьтәлатә еибашьраан дҭахоит. Пицундатәи "Аламыс" аҿы - Дика Дбар. Гагратәи "Афырҭын" аҿы - Џьон Бениа, "Кьиараз" аҿы - Славик Аиба. Убас акәашаҩ ажәа ԥхақәа рхылҳәаауеит асценеи аԥсҭазаареи рҿы ҩызара лзызуа Ирма Барцыцԥҳа, Марина Касланӡиаԥҳа-Аиба, Инга Ҵышәԥҳа, Римма Бениаԥҳа, Марина Дбарԥҳа, Манана Аргәынԥҳа, Иулиа Џьыкырԥҳа, Индира Малиаԥҳа.

© Foto / предоставлено Галиной Ажиба
Акәашаҩ Галина Ажьиԥҳа ансамбль дацны Америкатәи лгастрольқәа раан

"Ашәаҳәаратәи акәашаратәи ансамбль "Кьараз" абыргцәа рколлектив ҳәа иԥхьаӡан аамҭала. Иахьа угәы иамыхәарц залшом аҿаргьы жәлар ркультура иазҿлымҳаны иахьҳавагыло. Убас Сариа Узун-оглыи, Викториа Барцыцԥҳаи кәашаҩцәа қәыԥшцәаны иааҳавагылеит", - ҳәа азгәалҭоит Галина Ажьиԥҳа.

"Кьаразаа" абык еиԥш дырхагылан, ансамбль аԥҵаҩы, Аԥсны Жәлар рартист Баграт Багаҭелиа. Иара адунеи иԥсахижьҭеи ишьаҭа мырӡуа иааигоит анапхгаҩ ҿыц Алик Чуаз.

Гагратәи афольклортә ансамбль "Кьараз" Аԥсни, Урыстәылеи имҩаԥысуа аҟазаратә конкурсқәеи, афестивальқәеи рҿы Гран-при, мамзаргьы актәи аҭыԥ иаԥсамхакәа иҟамлацт. Аҭацаагара иадҳәалоу амузыкатә композициа ихнаххьеит шәҩыла ахәаԥшцәа.

Галина Ажьиԥҳа лажәақәа рыла, акәашарақәагьы аамҭа рныԥшуеит. Есааира иацлоит, мамзаргьы рҽырԥсахуеит аелементқәа.

Аха лара еиҳа лгәы азыбылуеит ажәытә аԥсуа кәашара. Уаҟа арԥыси аԥҳәызбеи еихыбаауа, аӡәи-аӡәи рыбла ахыԥшылара рзымгәаӷьуа, аамысҭашәала икәашоит.

© Foto / предоставлено Галиной Ажиба
Акәашаҩ Галина Ажьиԥҳа

Акәашара - ижәытәӡатәиу аамҭақәа рҟнытә иаауеит. Еиуеиԥшым ажәларқәа рҿы ицәырҵит аритуалқәа ирыдҳәаланы, еилыххоу аритмтә цәеижьҵысрала.

414

Аԥышәареи агәаҭарахыжьреи: Аԥсны атәылауаҩыс аҟалара шалшо

5
(ирҿыцуп 13:42 10.08.2020)
Sputnik ҷыдала аинтервиу азҭаз Аԥсны ахада ихаҭыԥуаҩ, атәылауаҩраз акомиссиа ахантәаҩы Бадра Гәынба далацәажәеит Аԥсны атәылауаҩра заур зылшо, уи азы процедурас изхыстәу ртәы.

Шықәсык ашьҭахь имҩаԥгахеит Аԥсны ахада иҿы иаԥҵоу атәылауаҩра аиуразы акомиссиа аилатәара. Иара хантәаҩра азиуеит Аԥсны ахада ихаҭыԥуаҩ Бадры Гәынба.

- Бадра Зураб-иԥа, иаҳзеиҭашәҳәа, Аԥсны ахада иҿы иаԥҵоу атәылауаҩра аиуразы акомиссиа аус шауа, аилазаара зеиԥшроу.

- Акомиссиа –еилацәажәаратә консультативтә органуп. Иара алахәылацәа –Апаспорт-визатә маҵзура, Аҳәынҭқарратә шәарҭадаратә маҵзура, Аҩныҵҟатәи аусқәа рминистерра, Адәныҟатәи аусқәа рминистерра уҳәа рхаҭарнакцәа роуп. Дара рахь ауп азыҳәа ҟазҵо ишәҟәқәа ахьынаҳашьҭуа. Атәылауаҩраз арзаҳалқәа ирыхәаԥшны аӡбамҭа адкылара абжьгаратә ҟазшьа амоуп. Аӡбамҭа атәыла ахада иахь инашьҭхоит. Иара иоуп акомиссиа алкаақәа ирықәшаҳаҭхар мамзаргьы мап ацәызкыр зылшо.

- Аԥсны атәылауаҩра заур зылшо иарбан категориақәоу?

- Раԥхьа иргыланы 18 шықәса ирҭысыз аҳәаанырцәуааи атәылауаҩра змам ахаҿқәеи роуп. Убри аан иҟоуп аԥҟарра – анхараз азин анроу инаркны атәылауаҩра аиуразы арзаҳал анашьҭранӡа жәашықәса иреиҵамкәа иҵхьазароуп еиԥымҟьарада Аԥсны рыҟазаара. Егьи акатегориахь иаҵанакуеит уаанӡа атәылауаҩра зманы еиҭаззышьақәмыргыло. Урҭ анхаразы рзин аҿҳәара хышықәсанӡа икьаҿхоит, Аԥсны атәылауаҩ хаҵас ма ԥҳәысс дызмоу рзы – хәышықәсанӡа.

- Арзаҳал акомиссиахь ианынашьҭха ашьҭахь аусқәа шԥеиҿкаахо? Атәылауаҩра аиура апроцедура шԥамҩаԥысуеи?

- Аматериалқәа акомиссиахь инашьҭхаанӡа агәаҭара иахыжьхоит. Уи адагьы хымԥада аҳәынҭқарратә бызшәеи Аконституциеи рдырразы аԥышәара ҭитәуп. Аԥышәарақәа мҩаԥысуеит Аиустициа аминистрраҿи Аҵара аминистрраҿи. Аԥышәара аформа дара аминистррақәа ишьақәдыргылоит.

- Аԥышәарақәа формалла имҩаԥысуоу азнеишьақәа рӷәӷәоу?

- Азакәан аҿы зегьы ирылацәажәоуп. Иаҳҳәап, аԥсуа хәыҷқәа зааӡо ран инагӡаӡаны аԥсуа бызшәа лзымдыруазар ауеит. Убри аан акомиссиа алахәылацәа азхьаԥшра арҭоит уи илааӡо шаԥсыуаау. Аха аиҳарак азакәан иавсуам.

- Шәара еиқәышәыԥхьаӡеит атәылауаҩраз азыҳәа ҟазҵар зылшо атәылауаа ркатегориақәа. Статистикала иарбан категориоу еиҳа азыҳәақәа назышьҭуа?

- Аиҳарак атәылауаҩра зцәыӡны еиҭашьақәзыргыло роуп. Урҭ ауаа ара иит, инхон, аха 1994 - 1999 шықәсқәа раан иҟамызт. Аиҳарак аурысқәа, аерманцәа, ақырҭцәа, Гал араион ауааԥсыра роуп. Урҭ ирҭахуп амилаҭ ишеиуоу аазырԥшуа ашәҟәы рымазар. Ажәлақәа Ҭарбаиа, Зыхәбаиа рҽазыршәоит аҭоурыхтә иаша аиҭашьақәыргылара.

- Атәылауаҩра аҭара мап ацәкра еиҳа мзызқәаны иамоузеи?

- Ихадоу мзызны иҟоуп амаҵзура ҷыдақәа рҟынтәи иҳауа аматериалқәа роуп. Урҭ атәылауаҩра аиура азин ҟарымҵозар ҳаргьы мап ацәаҳкуеит. Арахь иаҵанакуеит аҽа тәылак, Урыстәыла ада, атәылауаҩра амазаара. Убри аан азакәан аҿы иазгәаҭоуп аԥсуааи абазааи иарбан тәылауаҩракзаалак ирымоу иахьмырԥшыкәа Аԥсны атәылауаҩра роур ҟалоит.

- Акомиссиа уа иаанкылахома апроцесс?

- Азыҳәа ҟазҵаз аҽа шықәсык ааҵуаны аиҭазыҳәа ааишьҭыр ҟалоит. Азыҳәа аҟаҵаразы ԥкыра ыҟам.

- Акомиссиа шықәсык ҵуеит аилатәара мҩаԥымсижьҭеи. Абри аамҭала заҟа зыҳәа еизеи, иара асеиԥшгьы зыҟалеи?

- Акомиссиа аҵыхәтәантәи аилатәара мҩаԥган 2019 шықәса рзы. Настәи аҭагылазаашьа атәы сыздырам, исызшәаҳәом. Абри аамҭала еизеит 1500 зыҳәа. Ииасыз аилатәараан ирыхәаԥшын 74, урҭ рҟынтәи 64 рлахьынҵа ҵоураны иӡбан, 10 ма аамҭала ирнахан ма мап рыцәкын.

- Ишԥазыԥхьагәаҭоу акомиссиа ԥхьаҟатәи аусура?

- Ишьақәгылоу анормала ҩымз рахь знык ҳаиқәшәалароуп. Азыҳәақәа рхыԥхьаӡара рацәахар, иҟалоит еиҳа лассы-лассы ҳаиԥылыларгьы, аха макьаназы усеиԥш аҭахны иҟам.

Аиҿцәажәара мҩаԥылгеит Sputnik акорреспондент Асмат Ҵәыџьԥҳа.

5

Зусура ԥсыршьагас измоу: асахьаҭыхҩы Мадина Саманџьиаԥҳа лҭоурых

46
(ирҿыцуп 19:24 09.08.2020)
Ауаҩы иџьабаа иаԥхьаҟа иԥылоит гәыкала даназнеиуа, избанзар илауҵаз ауп иааурыхуа. Зусура ԥсыршьагас измоу, уадаҩрак ззаҵам асахьаҭыхҩы қәыԥш Мадина Саманџьиаԥҳа лҭоурых шәаԥхьа Sputnik аматериал аҟны.

Аамҭа анааилак ауаҩы иалихуеит иара игәы ззыбылуа ихатәы занааҭ. Иҟалоит изанааҭ ахь имоу агәыблыра иара изыҳәаны иԥсыршьаганы, иԥсҭазаара иаԥхьагыланы ианизыҟало.

Наала Гәымԥҳа, Sputnik

Мадина Саманџьиаԥҳа даныхәыҷыз аахыс асахьаҭыхра бзиа илбоит. Ашкол данҭаз ибзианы абаҩхатәра аалырԥшуан адизаини асахьаҭыхреи рҿы. Еиҿылкаауан, илырԥшӡон ашкол аҭыӡқәа. Иҭылхуа лсахьақәа, лара ишазгәалҭо ала, ԥсык-ԥсык рхоуп, ишлылшо ала илырцәажәоит. Инстаграм аҿтәи лдаҟьаҟны еиуеиԥшым лҭыхымҭақәа уԥылоит: апеизаж, ақалақь ахаҿра ӡырызго асахьақәа, ауаҩы иҭеиҭыԥш уҳәа ирацәаны. Мадина лырҿиара дазааҭгыло илҳәоит:

© Foto / предоставлено Мадиной Саманджия
Мадина Саманџьиаԥҳа лусумҭа

"Ҽнак снатәаны сахьак ҭысымхкәа ҟамлаӡацт. Сара сыԥсы алоуп асахьаҭыхра. Саныхәыҷыз сан исалҳәалон асахьаҭыхҩы ишилшо ишьҭа абри адгьыл аҟны ааныжьра. Убасҟан ауп ианалага зегьы, иахьа уажәраанӡагьы аангылашьа сымаӡам. Асахьаҭыхра сыԥсҭазаара иашьашәаланы ишыҟазгьы, сҭалеит апсихологиатә факультет, аха зегьы акоуп асахьаҭыхра касмыжьӡеит. Апсихологиатә факультет саналга ашьҭахь сҭалеит Аҟәатәи асахьаҭыхратә ҵараиурҭа. Сан лоуп аҟазара агәыблыра сзыркызгьы, лара занааҭла дсахьаҭыхҩуп".

Мадина зыпрофессионалтә ҟазара ҳараку специалиступ. Иахьа лара қәҿиарала аус луеит рҵаҩык иаҳасабала асахьаҭыхратә студиаҟны.

© Foto / предоставлено Мадиной Саманджия
Мадина Саманџьиаԥҳа лусумҭа

"Аграфикатә дизаин аган ала аус зухьеит жәаҩа шықәса. Уи ашьҭахь софистә усура аҽаԥсахит асахьаҭыхратә студиаҿы сусурала. Уаҟа сара срықәшәеит хыԥхьаӡара рацәала аҟазара злаз, еиуеиԥшым аганқәа рыла зҽазыҟазҵоз ауаа. Сара аеҵәа сызкыдԥаауамызт са сахь раԥхьаӡа акәны ҽазыҟаҵара иааиуаз "ахаан сымҭыхӡацт" зҳәоз, аҵыхәтәаны иҭыхымҭқәа ссирқәа иманы данцоз. Ауаҩы иџьабаа иаԥхьаҟа иԥылоит гәыкала даназнеиуа. Илауҵаз ауп иааурыхуа. Убасҟан сара еилыскааит арҵара ари шус дуу, иагьысҭахуп сышьҭа ари адгьыл аҟны иаанхарц", - лҳәоит асахьаҭыхыҩ қәыԥш.

Мадина қәҿиарала Москва иҭылҵааит аграфика иадҳәалоу аҵара. Аус луан Москва еицырдыруа аӡыргаратә хеилакқәа рыҟны. Аԥсны имаҷымкәан аус лухьеит дизаинерк иаҳасабала, убас Аҟәафон адизаинерс дыҟан. Лара лҭыхымҭақәа дырԥшӡоит иахьа Амшын аԥшаҳәа, акаҳуажәырҭақәа.

Урыстәыла аус анылуаз илырҳаит ирацәаҩны лусура иазҿлымҳау ауаа, асахьаҭыхра лҿызҵаарц зҭаху аҵаҩцәа.

© Foto / предоставлено Мадиной Саманджия
Мадина Саманџьиаԥҳа лусумҭа

"Москвеи Шәачеи аус анызуаз срабадырит аҟазацәа. Аҭыхра зҵарц зҭахыз алшара иман сыстудиахь амҩахыҵра. Сҭыхымҭақәа рыҟны апропаганда ҟазшьа аҭаны стәыла еснагь иӡырызгон. Ҳаԥсадгьыл аԥшӡара ҭызхуаз аҵаҩцәа, ҳәарада, иџьаршьон, ара иҟазшәа атмосфера рзаԥысҵон. Иахьа уажәраанӡа дареи сареи аимадара ҳабжьоуп, асахьа мацара иабзоураны Аԥсны агәыблыра ркит", - лҳәоит Мадина.

Аҵыхәтәантәи ашықәсқәа рзы Мадина аус луан Шәача. Уаҟа илыдылкылон аҵаҩцәа, аха аҭаацәара даналала дхынҳәит Аԥсныҟа. Иахьа Аҟәа ақалақь аҟны иаартны илымоуп лхатәы сахьаҭыхратә студиа. Лара лахь имҩахыҵуеит асахьаҭыхра зҵарц зҭаху зегьы, ахәыҷы инаиркны аду иҟынӡа. "Сара ахаан мчыла ауаҩы идысцалаӡом. Иара иалихуеит игәы иаҭаху асахьа, нас убри ҳахәаԥшны ҳҭыхуеит. Сусураҟны сыԥсы сшьоит, уи еиҳау цәанырра ыҟаӡам. Сахьак ҭыхны саналгалак, сгәы-сыԥсы еизҳауеит, иҭазгалоит ссоциалтә даҟьақәа рахь. Ауаа ахәшьара бзиа арҭоит, уи даара амотивациа снаҭоит", - ҳәа азгәалҭоит Мадина.

Асахьаҭыхҩы лусураҟны иуԥылоит дызлаҭыхуа амыругақәа рыхкы рацәаны. Урҭ зегьы доусы рыхьыӡқәа рымоуп. Лхы иалырхәо аҭыхгақәа зегьы еиԥшӡам, акы поуп, акы еиҳа ижәпоуп. Лҭыхымҭақәа зегьы ирыҵоуп агәалашәарақәа, доусы ирымоуп рхатәы хьыӡқәа. Лҭыхымҭа "Ацәанырра" зыхьӡу аҟны даарԥшуп зхы иақәиҭу, зцәаныррақәа ирықәиҭу, заԥхьаҟа ԥынгылак змам аҭыԥҳа лхаҿсахьа.

© Foto / предоставлено Мадиной Саманджия
Мадина Саманџьиаԥҳа лусумҭа

"Ари ахаҿсахьа арҿиара злоу ауаҩы изы зых иақәиҭу хаҿсахьоуп. Уи инапы злаку аус бзиа ибоит, ихы мшаҭа игәҭакахьы деихоит. Ари асахьа аҭыхра санаҿыз аамҭазы иаархәеит. Уажәы иҟоуп ақалақь Пермь ахатәы коллекциаҿы", - ҳәа дазааҭгылеит Мадина.

Мадина лҭыхымҭақәа аархәахьеит имаҷымкәан ауаа, убасгьы иҿарҵарц рылшоит ргәы иаҭаху асахьа. Лхаҭа лҭыхымҭакәа ҳамҭас лыуацәа, лҩызцәа, илзааигәоу ауаа ирылҭоит. Лара даара деигәырӷьоит лҭыхымҭақәа бзиа ибаны иахьрыдыркыло.

© Foto / предоставлено Мадиной Саманджия
Мадина Саманџьиаԥҳа лусумҭа

Еиҳа зҭыхра мариеи, аԥсабара акәу, мамзаргьы ауаҩы иҭеиҭԥш акәу ҳәа ҳанлазҵаа абас лҳәеит:

"Аԥсабара аҭыхра еиҳа имариоуп, избанзар уи иацу ахаареи, аԥшӡареи ауаҩы игәаҵанӡа иаразнак инеиуеит. Ауаҩы ихы-иҿы аҭыхра адагьы, иҭухроуп иара иҩныҵҟатәи иҟазшьа, игәаҭа, иҿаԥшылара. Убри зегьы анузаарԥш ауп, уанпрофессионалҵәҟьоу", - ҳәа азгәалҭоит Мадина.

Сынтәа Мадина Саманџьиаԥҳа Гагра ақалақь аҟны еиҿылкааит лҵаҩцәа хәыҷқәа рцәыргақәҵа. Уи азкын Аԥсны Жәлар рартистка Хьыбла Гьерзмаа лиубилеитә ныҳәа мшы.

Мадина лусумҭа: Аԥсны Жәлар рартистка Хьыбла Гьерзмаа

Мадина лаԥхьаҟа лгәы иҭоуп лхатәы цәыргақәҵа аиҿкаара.

Иара убас шәаԥхьар ҟалоит:

46
Семен Пегов

Минск иаанкылаз урыстәылатәи ажурналист Семион Пегов доушьҭуп

3
(ирҿыцуп 21:50 10.08.2020)
Ажурналист Семион Пегов Минск, нанҳәа 9 рзтәи аилаҩеиласрақәа раан дшаанкылаз атәы рылаирҵәеит "Комсомольская правда" акорреспондент Александр Коц.

АҞӘА, нанҳәа 10 - Sputnik. Минск иаанкылаз урыстәылатәи ажурналист Семион Пегов азинеилагаҩцәа ахьҭаркуа Ацентр аҟынтә доушьҭуп, абри атәы аанацҳауеит Sputnik Беларусь Telegram-канал.

Белоруссиа иҟоу Урыстәыла ацҳаражәҳәаҩ адырра ҟаиҵахьан, Семион Пегов аҩаша аҩныҟа дхынҳәырц шилшо.

Белоруссиа алхрақәа мҩаԥысит нанҳәа 9 рзы. Алхырҭатә ҭыԥқәа шадыркызҵәҟьа, Минск зиншьаҭада аҿагыларатә акциақәа ирылагеит Белоруссиа ақалақьқәак рҿы.

Ажурналист Семион Пегов Минск дааныркылеит нанҳәа 9 ауха. "Комсомольская правда" арратә корреспондент Александр Коц иӡыригеит
Пегов дшааныркылоз акадырқәа.

Белоруссиатәи амчрақәа рахь ааԥхьара ҟалҵеит RT, МИА "Россия сегодня" рредактор хада Маргарита Симониан. Лара Белоруссиа аиҳабыреи ҷыдала Александр Лукашенкои рахь ааԥхьара ҟалҵеит Семион Пегов дызлоу иаанкылоу ажурналистцәа рхы иақәиҭыртәырц.

Аԥсны ажурналистцәа Реидгыла Белоруссиа амчрақәа рахь ааԥхьара ҟанаҵеит Минск имҩаԥысуаз аҿагыларатә акциақәа раан иаанкыло ажурналистцәа рхы рақәиҭтәразы.

Семион Пегов – апоет, урыстәылатәи афедералтә телеканалқәа рырратә корреспондент, апроект WarGonzo аиҿкааҩ. Диит 1985 шықәса рзы. Иҩымҭақәа кьыԥхьын альманахқәа "Под часами", "Персона", "Современники". Пушкин ихьӡ зху афестиваль "С веком наравне-2008" алауреат, ашәҟәыҩҩцәа ҿарацәа р-Форум "Липки-2011"алахәыла. Семион Пегов 2008 - 2013 шықәсқәа рзы Аҟәа, ателекеилахәыра "Абаза-ТВ" аҟны аус иуан, "Нужная газета", "Чегемская правда", "Новый день" иҩымҭақәа ркьыԥхьуан.

Иара убас шәаԥхьар ҟалоит:

 

3