Аҽы жәлала иҩуеит рымҳәои: Аԥсны акультура ӡырызгоз Џьоџьа Ферыз

341
(ирҿыцуп 09:22 15.06.2020)
Кәтол ақыҭан инхоз, зыԥсҭазаара зегьы Аԥсны акультура аӡыргара иазызкыз, аҭаацәаратә ансамбль аԥҵаны измаз Џьоџьа Ферыз изкуп Sputnik аколумнист Елеонора Коӷониаԥҳа иахьатәи ланҵамҭа.

Саб диқәлан, аха иареи сареи ҳаиҩызцәан. Ахәыҷы иҿы дхәыҷын, аду иҿы ддуун ззырҳәоз иакәын санҵамҭа афырхаҵа Џьоџьа Ферыз. Дауцәамкәа, дкьаҿцәамкәа, зхы шлаӷәаӷәаӡа иҟаз ауаҩы лаша ҳқыҭа Акультуратә хан дахагылан сара дысгәалашәонаҵы. Џьоџьа Ферыз - абас акәын ишишьҭаз иара, ари аҩыза ахьӡгьы уаҳа уаҩы имамызт ҳқыҭаҿы, уаҳа дара ирыжәлантәызгьы даҽаӡә дынхомызт Кәтол ақыҭан.

Аҭаацәа ирхаҭарнаку ишсарҳәахьоу ала, Џьоџьа шьҭрала Отаԥтәин, данқәыԥшӡаз имҵадырсыз иаҳәшьа дызгаз дрымхны данига, рқыҭаҿы инхоз амҵарсра ҟазҵазгьы иқәнага данақәиршәа ашьҭахь, иуацәа ахьынхоз Кәтолҟа нхара ҳәа дааит. Акыр ҟыба-ӡыба ихигазаргьы, Џьоџьа ҳқыҭауаа бзиа ирбоз, зыхьӡи зыжәлеи еидкыланы ирҳәоз уаҩны дҟалеит. Иара уахьиҿаԥшуаз ихы-иҿы еснагь илашон, аха иаҳәшьа лыхьчара иазку аҭоурых иаанарԥшуеит ҩнуҵҟала алеишәа змаз уаҩны дшыҟаз. Уи иҟазшьа иабзоураны анхаҩрагьы, аҟазарагьы, ахшара бзиа рааӡарагьы илшеит.

© Foto / из семейного архива семьи Ферзба
Џьоџьа Ферызбеи иԥшәмаԥҳәыс Светлана Ҵнариаԥҳаи

Сықәра цо ианалага, еиҳагьы ихьаазго салагеит сызхааныз ауаа нагақәа ргәалашәара, исылшонаҵы, урҭ рыбзырӡы аԥхьаҩцәа ирыдызгалаларцгьы сҭахуп.

Ферызаа рҭаацәа ҭаацәара дуун, Џьоџьа иԥшәмаԥҳәыс Светлана Ҵнариаԥҳаи иареи ирааӡеит хәҩык ахшара: Џьулетта, Анри, Анета, Нонна, Оҭар. Рыхәҩыкгьы рыԥсҭазаара Аԥсны акультура аӡыргара иазыркит. Џьоџьа аус ахьиуаз аклуби ҳашколи еидгылан, хҭацәыхак шаасоуз, уахь снеиуан. Исҳәарц сылшоит Џьоџьа схәыҷаахыс ҩызас дсыман ҳәа.

© Foto / семейного архива семьи Ферзба
Џьоџьа Ферызба еиҿкааны имаз аҭаацәаратә ансамбль изныкымкәа аицлабрақәа иалахәын, уантәи аиааира рымамкәа иаауамызт

Усҟантәи аамҭазы акультура аусқәа акыр еиҿкаан, лассы-лассы аклуб иаҭаауаз атеатрқәеи ашәаҳәаратә коллективқәеи рыдагьы, еиҿкааны иҟан ақыҭа ахор. Сызхаану аамҭазы Кәасҭа Ченгьелиа иакәын ахор еиҳабыс иамаз. Ферызаа кәтолтәи ахор иалан, аха уи адагьы, дара рҭаацәаратә ансамбль хазы иқәгылон.

Исгәалашәом абас зҳәоу еиқәшәаз, ҟазарала еибаркыз даҽа ҭаацәарак ҳара ҳқыҭаҿы. Џьоџьа иԥа, Аԥсны Жәлар рартист Анри Ферызба ишигәалашәо ала, иаб Џьоџьа ақыҭаҿы игылаз ауахәама ахыбраҿы ашәаҳәара злаз ахацәа еизганы ахор еиҿкааны иман. Бжьаратәла арҭ аҭысқәа 1960–тәи ашықәсқәа ирыҵаркуеит. Урҭ арепетициақәа рахь ихәыҷқәагьы игон. Занааҭла Џьоџьа ақыҭанхамҩатә ҵаран имаз, аха шьҭрала, иаб, иабду уҳәа зегь шәаҳәаҩцәан рҳәеит. Иԥшәмаԥҳәысгьы ашәаҳәаҩцәа ирылиааз лакәын, убри аҟынтә уаха ианааилатәоз рашәа шьахәқәа аацәырыргон Ферызаа рҳәоит урҭ ирзааигәаны инхоз ауаагьы.

Ферызаа рҭаацәаратә ансамбль аиҿкаашьа аҭоурых далацәажәо, Анри Ферызба игәалаиршәоит уи зыбзоуроу Иван Ақырҭаа шиакәу. Иара усҟан Кәтол ахор азыҟаиҵарц днарыԥхьеит. Арепетициақәа рышьҭахь Иван Аҟәаҟа данзымаалак, Џьоџьараа рҿы ԥхьара даангылон.

© Foto / Предоставлено Элеонорой Когониа
Елеонора Коӷониаԥҳа Џьоџьа Ферыз идылгалаз Ӡаӡ Дарсалиа ипиеса "Аныхеи агәҭыхеи" иалху аспектакль қәҿиарала иқәдыргылеит Кәтоли Џьгьардеи ақыҭақәа рҿы

"Уаххьа ашьҭахь аҭаацәа ҳашәақәа анаацәыраҳга, Ақырҭаа даршанхеит иибаз, инеибеиԥшны зегьы абжьы ҳханы, ашәа еинрааланы ишеицаҳҳәаз аниба, иаразнак аидеиа ааизцәырҵит хаз иҟоу аҭаацәаратә ансамбль аиҿкаара", - ҳәа игәалаиршәоит Анри.

Убри нахыс, Кәтолтәи ахор анаҩсангьы, Ферызаа рансамбль инеиԥынкыланы асценахь ицәырҵуан аибашьра иалагаанӡа. Џьоџьа иҭаацәеи иареи ааԥхьара роуан еиуеиԥшымыз афестивальқәа рахь, актәи аҭыԥқәа мгаӡакәагьы игьежьуамызт. Иқәгылахьан дара Москва "Колонный зал" ҳәа иахьашьҭаз, москваа уамашәа ибаны напеинҟьарыла иалыркааит аԥсуа ҭаацәаратә ансамбль.

Џьоџьа ашәаҳәара дшазҟазаз еиԥш, акәашарагьы дазҟазан, иара асцена данаақәлалакгьы, дԥыруашәа дазыласны иԥсуа кәашаратә елементқәа наигӡон.

Сажәабжь афырхаҵа иеиԥш зеиԥшу иахьа Кәтол акәым, иара ҳтәыла ахьынӡанаӡааӡо дузымԥшааргьы ауеит. Дуаҩ наган аиашазы. Имариоума аҟазара, аколхоз, ацәгьа-абзиа, ақыҭанхамҩа, ахшара рааӡара уҳәа зегь еидкыланы рбара, имариоума ухьӡ-уԥша камыжькәа аԥсҭазаара анысра?

Уажәшьҭа сазааирц сҭахуп сара сыгәра ганы Џьоџьа Ферыз аспектакль аҿы ароль ахәмарра дшақәшаҳаҭхаз атәы. Ашкол санҭаз сҩызцәа алархәны аспектакль ақәыргылара сҽазысшәахьан, уи ашьҭахь атеатртә институт сҭаларц сгәы излаҭаз ала, адуцәа злахәыз аспектакль сазхәыцуан.

© Foto / Предоставлено Элеонорой Когониа
Аспектакль "Аныхеи агәҭыхеи" рыманы гастрольла Џьгьарда ақыҭа ианыҟаз

1980 шықәсазы ашкол салгеит, шықәсык аус зуан Кәтол агәаны игылоу ашәыр адкыларҭаҿы. Усҟан аус шууаз азы аршаҳаҭга умамкәа аҵарахьы ушәҟәқәа узалаҵомызт. Аус ахьаҳуаз ҳаибабон ақыҭа аиҳабыра рҿы аус зуазгьы ҳаргьы. Ҽнак Џьоџьа идызгалеит "Ақыҭа спектакль" захьӡыз апроект. Аклуб аиҳабы Џьоџьа ари аидеиа игәаԥхеит.

Абасала, сҩызцәа Емма Чагәааԥҳаи, Закан Табаӷәуеи, Џьоџьеи, сареи Ӡаӡ Дарсалиа исоциал-бзазаратә пиеса "Аныхеи агәҭыхеи" ақәыргылара ҳалагеит. Арепетициақәа  аклуб аҿы иҟаҳҵон, сабша ҳамамызт, мҽыша ҳамамызт, ҳидеиа анагӡара ҳаҿын. Аспектакль ақәыргылараҿы адгылара ҳаиҭон атеатр бзиа избоз Водик Џьынџьал. Аусура ашьҭахь аҩныҟа смааӡакәа аклуб ахь сцон. Џьоџьа иакәзар, минуҭк дагхарангьы дыҟамызт.

© Foto / Предоставлено Элеонорой Когониа
Елеонора Коӷониаԥҳа, Џьоџьа Ферыз, Емма Чагәааԥҳа

Анри Ферызба иаб дихлафаауа ишиҳәо еиԥш, "дычмазаҩызаргьы, асцена иқәлатәуп ануҳәалак, дкаххаа дааҟалон". Ари зхысҳәаауа, Џьоџьа арепетициа дагханы иҟаломызт, аха грак иман - атекст ихашҭуан. Абри апроблема аӡбара Џьоџьа дадигалеит иԥҳа Анета, ҳшыхәмаруаз, ииҳәашаз анааихашҭлакгьы, исуфлиор лахь ихы нарҵысны ишиҵаҳәатәыз лирбон.

"Аныхеи агәҭыхеи" апремиера ҟалараны ишыҟаз, иаалырҟьаны санду лдунеи лыԥсахит. Ақыҭа зегьы ирыларҳәахьан аспектакль шыҟалоз, уи аус рнапы ианын абригадирцәа. Ажәакала, кәтолаа апремиера иазыԥшын маитәи аныҳәақәа рзы. Санду анышә данарҭа адырҩаҽны, Џьоџьа Ферзба даҽа кәтолтәык дицны ҳгәашә иаалагылт. Саб изҿырҭит. Сара иаразнак издырит аԥсра ашьҭахь асценахь сцәырҵра ишазкыз. Иааицәажәақәан, саб "бца брыцны" ҳәа са сахь ҿааиҭит.

Кәтолтәи аклуб уааԥсырала иҭәын ҳара ҳаспектакль апремиераҿы. Хымԥада, декорациала ҳаиқәшәамызт, аха иаҳшәаҳҵашаз ҳархиахьан, ҳсуфлиор Анета лтекст кны акулиса даватәан. Наҟынтәи театр дук аазшәа ирыдыркылеит ҳқыҭауаа аспектакль. Анапеинҟьабжьқәа еихсыӷьуамызт. Ҳаргьы ҳхы ду беиа ибо ҳааҟалеит, еиҳаркгьы Џьоџьа длашон апремиера ашьҭахь.

© Foto / Предоставлено Элеонорой Когониа
Асценаҿы Ӡаӡ Дарсалиа ипиеса "Аныхеи агәҭыхеи" аҟны арольқәа назыгӡоз Џьоџьа Ферызбеи Елеонора Коӷониаԥҳаи

Абри анаҩс, "ҳамҵәыжәҩақәа" аазар акәхап, Џьоџьеи сареи Џьгьарда гастроль ҳасабла ҳцарц ҳаӡбеит ҳақәыргыламҭа ҳаманы. Ақәгылара иазалхыз амш аҽны Џьгьардатәи аклуб уааԥсырала иҭәын, ақыҭауаа, ашколхәыҷқәа уҳәа еизаны иахәаԥшит ирыдаҳгалаз аспектакль. Араҟагьы шьахәла ҳрыдыркылеит, уимоу, асасцәа ааит рҳәан, ашкол ахыбраҿы ачеиџьыка дырхиеит. Ашьҭахь сара атеатртә институт сҭалеит, убри аҟынтә уаҳа аспектакльқәа ықәҳаргылартә иҟамлеит, ус акәзаргьы, сара сзы иреиӷьу гәалашәароуп уажә еиҭасҳәо.

Иахьа иџьасшьоит Џьоџьа дуӡӡа, сара сыгәра ганы арҿиартә ус еиҿылкаауеит ҳәа адгылара ахьсиҭоз, иџьасшьоит зхахәы шлаз, аха гәыла иқәыԥшыз аҟаза заҟа дҳаракыз, заҟа дгәыҭбааз. Аибашьра ашьҭахь имаҷны ҳаибабон Џьоџьеи сареи, аха ихшара рыла асалам ҳабжьысуан. Џьоџьа Ферызба идунеи иԥсахит 80 шықәса дшырҭагылаз 2005 шықәсазы. Идунеи иԥсахит, аха зырҳара уадаҩу ахьӡ ду нижьит. Абри акәхап аԥсҭазаара аҵакгьы.

© Foto / семейного архива семьи Ферзба
Џьоџьа Ферызба

P.S. Сколонка азы афотосахьақәа реизгаразы снеит сааигәара инхо Анри Ферызба иҩнаҭаҿы. Уи иԥшәмаԥҳәыс Аԥсны Жәлар рартистка Роза Чамагәуаԥҳа асас дахь длызнеизшәа слыдылкылт. Зегь реиҳа иџьасшьаз аҭаца абас афотосахьатә документқәа еиқәырҷаб иахьлымаз ауп. Иахьа дара рҭаацәара, егьырҭ Џьоџьа ихылҵыз зегь реиԥш, ашәаҳәаратә, акәашаратә культура иацырҵоит. Аҽы жәлала иҩуеит рымҳәои…

Иара убас шәаԥхьар ҟалоит:

341
Абхазская свадьба

Ацәгьеи абзиеи, ма ачымазара ҿки уи иҟанаҵо анырреи

308
(ирҿыцуп 18:13 28.09.2020)
Ҳазҭоу ашықәсазы адунеи зегьы иахыҵәаз акоронавирустә чымазара ҿкы аԥсуаа ҳабзазареи ҳатрадициақәеи ишырныԥшыз дазааҭгылоит Sputnik аколумнист Елеонора Коӷониаԥҳа.
Ацәгьеи абзиеи, ма ачымазара ҿки уи иҟанаҵо анырреи

Уаанӡа аибашьра ҟалаанӡеи иахьатәи аамҭеи шаҳҳәоз, уажәы Ковид-19 цәырҵаанӡа иҟаз-ианыз ҳәа ацәажәара ҳалагеит. Ҳгәаҳҽанӡамкәа ҳаԥсҭазаара иалалаз агәыргьынчмазара шьаҭанкыла ҳсоциалтә-культуратә ԥсҭазаара ахаҿра аԥсахуама уҳәо аҟынӡа инеит. Аԥсуаа ҳацәгьеи ҳабзиеи иааннакыло аҭыԥ акыр иӷәӷәоуп, ианахҳарҟьо шырацәоугьы. Аҵыхәтәантәи аамҭазы ачымазара ҿкы аҽарӷәӷәеит, аԥсыҭбарақәагьы ҟалеит.

Иахьатәи аамҭазы иҳалаҳәоуп дырҩагьых акарантинтә ԥҟарақәа рыхәҭак шыргьежьу. Жьҭаара 5 инаркны, ауаа рацәа злахәу ачарақәа, аиныхрақәа, аԥсхәрақәа уҳәа рыркьаҿреи уимоу раанкылареи азгәаҭоуп. Ковид-19 цәырҵаанӡа аԥсуаа ҳчараушьа саназхәыцуа, абас акы шаҳԥеиԥшыз ҩашьомызт сгәахәуеит. Иубаратәы иҟан ахарџь рацәа зыхҭынҵаз аҵаул чарақәа аԥшьганы ишҳамаз.

Аиашазы, урҭ ачарақәа ауаажәлар рматериалтә ган иазышьҭымхуа иҟан. Иҟасҵаз аҭҵаарақәа рыла, ачара аураҿы ахарџь зго еиҳаракгьы, аҭаца лҭыԥ архиара, амузыкатцәа рааԥхьара, аҭаца лыҵкы, насгьы уи дахьыкҿадыргыло иахҭнырҵоз зекономика хьысҳау атәылазы акыр иџьашьахәуп. Избан изыруаз ачара дуқәа? Избанзар, ачара хәыҷы аҿы хыхь еиқәсыԥхьаӡаз ирыхҭнуҵо мацара азыхҩа-иазхымҩа ахаршә инарго. Ачара афеида амазарц, мамзаргьы ауал рықәымшәарц азы, инеиҵыхны иҟарҵоит, ауаа рацәа неир инанагогьы еиҳахоит азыҳәан. Ҳара ҳчарақәа урыхәаԥшыр, иҭышәынтәалоу Европатәи аҳәынҭқаррақәа рҿы рхы иақәнадмырго аныхтә наҳхуеит, нас аԥсшәа заҳҳәо зегь инараҳәаны уалда ҳаилгарц азы. Уажә аабыкьа издыруаз хаҵак ааԥхьаратә билеҭ изааит. Даԥхьеит, деиҭаԥхьеит, аха ачара иазҳәаз азусҭцәаз изеилымкааит. Абри зегь иаанарԥшуеит, ҳарҭ ҳхыза заҟароу ҳзымдыркәа ҳшьапы шеиҵаҳхуа. Ауаа рацәа адгаланы, ачара ду уны, ахаршә иаарго ҳақәгәыӷны аплан шьҭаҳхуеит.

Ачымазара анцәырҵ, акарантин џьбара анҳалаҳәаз иаанкылан ачарақәа, зматериалтә бзазара хьысҳаз ауаагьы, "оф, гәышьа" рҳәеит. Иаҳбо ҳалагеит, аҭаца даазго иаармаҷны, ҭаацәашәала ачара маҷқәа руа ишалагаз. Ачымазара шыҟоугьы, аԥсҭазаара аангылом, арԥарцәа аҭаацәара иалалароуп, аҭыԥҳацәагьы рразҟы рбароуп, убри аҟынтә, аҵаул чарақәа ракәымкәа, ахашәала ҳазымхәыцкәа, илахҿыхны, агьама аҭаны, амала ирмаҷны амҩа азылаҳхыр аринахысгьы ҳарманшәалоит.

Иахьа уажәраанӡа, агәыргьынчмазра агәра зымгоз рацәаҩызаргьы, аԥсыҭбрақәа ҟало ианалага, насгьы, ачымазцәа рхыԥхьаӡара ианацла, амилаҭтә традициақәагьы аҽыԥсахрақәа шроуз убо иҟалеит.

Аабыкьа акыр исзааигәаз сгәакьацәа рашҭаҿы аԥсра ҟалеит. Абжьааԥны еиԥш акәымкәа, аԥсы анышә дамардеит адырҩаҽны, уаанӡа акәзар, ԥшьымш, хәымш иргон, насгьы аԥсы дыкҿанаҵы акрыфара аԥшьыргон. Абри зегьы аԥшәма изы имариам усуп аматериалтә ган ала ҳазнеиуазар. Аԥсыжраҽны аҵәуарахь инеизгьы игәыцхәцәази ааигәа инхо агәылацәеи ракәын. Раԥхьаӡа акәны, ачымазара ҿиеижьҭеи игәасҭеит, асабрадақәеи, анапҭарԥақәеи ныҟәызгоз шырацәаҩыз, урҭ рхыԥхьаӡараҿы иҟан анхаҩцәагьы.

Ажәакала, асабраданыҟәгара ҳаԥсыжраҿы уаҩы иџьеимшьо иааҟалеит. Абарҭқәа рыдагьы, иааигәаны аидгылара мап ацәыркуа иашалагаз убон. Аидышшыларагьы анкьеиԥш акәымкәа, ҳәсагьы хацәагьы рхы аарҵысны инеивысуан. Аԥсы данырж ашьҭахь, ахҭәаларахь ицазгьы рацәаҩым, ауаа рӷьырак рмашьынақәа инарықәтәаны ирласны ицеит.

Ишахәҭаз еиԥш, аԥсы дызҵәыуарҭаз роуп сҳәар ауеит аҽны уа избоз. Абарҭқәа зегьы иаадырԥшуеит, Ковид-19 иаԥсахыр шалшо ҳкультураҿы имыцхәны иаланагалаз ахырҟьарақәа. Акырынтә иазгәаҳҭахьеит, ишакәым аԥара шнаҳхуа, ҳацәгьеи ҳабзиеи аҳаҭыраз, убри аан, иаҳцәыуадаҩуп ауаҩы абжьааԥны уадаҩрак, ма ачымазара анимоу ацхыраара иҭара, мамзрагьы "ушԥаҟоу" ҳәа анкьеиԥш аҩныҟа изенира.

Иахьа иҳалалаз ачымазара алеишәа цәгьоуп, ауаа рацәа реизара бзиа иабом, убри аҟынтә, ҳҽаҳаршьцылар бзиан, амаҷ ҳаҽҭагӡаны, ацәгьеи абзиеи ишақәнаго амҩаԥгара. Иаҳҭахы, иаҳҭахым ачымазара ҿкы иаԥсахит ҳабзазашьа, уаанӡа аԥсуа хацәа ианеибабоз аҵәахҳәа игәыдеибакылозҭгьы, уажәы уигьы иаҟәыҵуа иалагеит. Абригьы ҳара иҳацәтәымыз традициан. Ауа, иуа, кьантыжә маҟа ҳәа, зынӡа иаҳгәакьамыз рыцәгьеи рыбзиеи ҳҽалаҳажьуазҭгьы, ачымазара аныҿиа уигьы ҳармаҷит, иахьа аԥсрахьы ҩынтә акәым, знык анеира згәаӷьуа рацәаҩым.

Абарҭқәа зхысҳәаауа, издыруада абри иҳалагьежьуа ачымазара ҳхы ҳнардырырц аҭахызар? Машәыршәа акыр ҟалома аԥсҭазаараҿы? Иҳамаз атрадициа бзиақәа нкажьны, иҳацәтәымыз шьҭԥаа иҳаманы ҳдәықәлеит. Ковид-19 убарҭ зегь рыҭра иҭанацалар алшоит, аҽырцәгьаны излаҳалагьежьуа ала.

Автори аредакциеи ргәаанагарақәа еиқәымшәозар алшоит.

308

"Аԥшӡа" насыԥда дшаанхаз: арԥыс изку ажәабжьк

244
(ирҿыцуп 14:20 26.09.2020)
Анасыԥдара иазку аҭоурых иадыруа ахҭысқәа аиҳарак аҭыԥҳацәа роуп изыхҳәаау, аха уи иаанагаӡом арԥарцәа рразҟы арыцҳара акьысуам ҳәа. Иахьа ишәзеиҭаҳҳәо ажәабжь зызку, қыҭак аҟны "Аԥшӡа" ҳәа жәаҩыла аҭыԥҳацәа илаԥшықәҵаны ирымаз, аԥсҭазаара "злахәмарыз" аҷкәын иоуп.

Саида Жьиԥҳа, Sputnik

"Аԥшӡа" - ари ахьыӡ ҷыда ауп акәымзар, ихьӡ хаҭа аӡәгьы иҳәомызт, уи аҟазшьарбада ари аҷкәын иоура, иҭбаара, ибла иаҵәа, иччаԥшь ихнаххьаз рхаҿы дырзаагомызт азы.

"Аԥшӡа" ажәеизатәи акласс аҿы дтәан, Асовет Еидгыла аррахь иаанаԥхьараны иҟаз арԥарцәа дрыцны амедицинатә гәаҭарақәа данырхысуаз. Убасҟан аҳақьым иабжьеигеит аурологиа аганахьала ихы гәеиҭарц, аха иԥхашьаз, 18 шықәса ирықәыз аҷкәын иҭаацәа рҿы иӡеит ари апроблема атәы.

"Аԥшӡа" Украина арра анихигоз ӡынрак азы ӷәӷәала дычмазаҩхеит. Ишоура акраамҭа имтәо ианалага, арратә ҳақьымцәа агәаҭарақәа жәпакы дырхыжьны, ипроблема аҽшарцәгьаз, наҟ-наҟ ахшара дшимоуа атәы рҳәеит. Хымԥада, ақәыԥшра иҭагылаз арԥыс, арҭ ажәақәа ирыҵаз аразҟыдара ихахьы иаразнак иааимгеит. Аамҭа анца ауп данрызхәыц.

"Аԥшӡа" аишьцәа дреиҵбан азы, аб игәараҭа иазынхоз иара иакәын. Хәҩык ахшара рахьтә иара ида аҭаацәарақәа аԥырҵахьан. "Уқәра цоит, уԥшӡарагьы наӡаӡа иаанхаӡом, аԥҳәыс даага", - ҳәа аӡәаӡәала дыхҭаркуа иалагеит рашьа 35 шықәса рҟынӡа даннеи.

"Бареи сареи ҳаибагар ҟалаӡом, аха бзиа бсамхабеит, ишԥаҟасҵари?" - ҳәа лаиҳәалон "Аԥшӡа" иаҳәшьа ланхәыԥҳа, дара рахь аангылара данцалоз. Аҿар рымаӡақәа анрыҵырх, ирылабжьеит "ари маҳагьароуп" ҳәа раҳәауа. Уи аахыс 20 шықәса ҵит, анхәыԥҳа хаҵа дцеит, ҩыџьа аԥҳацәа лоуит, аха лыԥшәма инапы шьҭихуан азы лычҳара анхыжжыла, лҭаацәагьы "ҳаԥҳа даҳшьума" рҳәан ддәылганы аҩныҟа дааргеит.

"Аԥшӡа" лара лахь хымԥада уажәшьҭа акагьы дақәгәыӷуамызт, аха даҽаӡәгьы длыхәаԥшӡомызт аиҳарак ипроблема иахырҟьаны.

Ныҳәак аҽны, "Аԥшӡа" иаҳәшьаԥа дицны днанагеит ихәыҷреи, иқәыԥшреи ахьихыигоз агәараҭахь.

Аишәа рхианы, "иуҭахыу акыр ыҟоума" ҳәа ивагьежьуаз "анкьатәи ибзиабара" зегь акоуп игәаӷьны ила дҭаԥшуамызт, иаргьы ихы ларҟәны, акәын аҭак шлиҭоз, аха убасҟан илашәыз иоуп изымбаз рҩыџьагьы рцәаныррақәа шҿыхаз.

Аҿыҵгақәа ҟаҵо, зны имашьына акы агушәа, ҽазны акы ихашҭызшәа иблахкыга дибарц азы "Аԥшӡа" лассы-лассы амҩа дықәлон уахь.

Шықәсыбжак ааҵуаны, ацәаныррақәа ирзымиааиз "Аԥшӡеи" анхәыԥҳаи маӡала еиқәшәо иалагеит. "Аԥҳәыс дааугар, агәра усыргоит ҳаизыҟазаашьақәа рҵыхәа шыԥҵәо" ҳәа иалҳәалон лара, иахькылнаго еилылкаауан азы. Арҭ ажәақәа "Аԥшӡа" рҭак ҟаиҵомызт, игәалаҟазаара бжьырхуан ауп…

Ҽнак "Аԥшӡа" ибзиабаҩ рымаӡаҭыԥ ахь дымнеиӡеит. Уи акырӡа игәнигеит, машәырк лыхьзар ҳәа дшәан, еиҭа ҿыҵгак ԥшааны дрызцеит. Асас абжьааԥнеиԥш аишәа издырхиеит, аха "иуҭаху акыр ыҟоума" ҳәа уажәтәила ивагьежьуаз иаҳәшьаԥҳа ҳәыҷы лакәын. Аӡәгьы ианимаҳауаз "баҳәшьаду дабаҟоу" ҳәа данлазҵаа, "лгәы бзиам, диоуп" ҳәа иаҭалкит. Арҭ ажәақәа ишоура харгалеит, игәы идырхьит, аха дахьышьҭаз ауадахь дызлаҩналози…

Анхәыԥҳа ақалақьтә џьармыкьа аԥхьа лыԥсы лылшәшәаны данкаҳа, дызбаз ауаа атакси ала ахәшәтәырҭахь дрышьҭит. "Ишакәым бкыдҟьеит, сыӡӷаб, ахәыҷы деиқәымхеит" ҳәа аҳәса рҳақьым зыԥсы ааиз лахь лҿанаалха, анхәыԥҳа еиҭа ахчы лхы нылаҳаит. Ахәылбыҽхан, аԥҳәыс лхьаақәа анеиқәтәа аҩныҟа дааит.

"Сара аҭаацәара сзаламлоз ахшара дсоуӡом, џьоукы рыӡӷаб лыгәнаҳа сықәсымҵап ҳәа акәын, бызлацәажәо схаҿы исзаагом, иҵабыргыцәҟьоума?" - ҳәа ибзиабаҩ лахь изҵаарақәа ҵыхәаԥҵәара рмоуит ианеибаба. Иажәақәа идыргәааз аԥҳәыс, ихаимҵозар дзызҵаашаз аҳақьым дазусҭоу аалырԥшит.

"Нан, угәынамӡара еилыскаауеит, аха аԥҳәыс ус анлыхьуа ыҟоуп, амала алаҳәара сахьымӡеит лцәа ҩыџьа асабицәа шалаз, дыццакцәаны дцеит", - ҳәа ахаҵа ихы иаднамкылоз ажәақәа иалҳәеит.

Хара имгакәа, "Аԥшӡа" иқәыԥшраан изықәгылаз адиагноз аҭҵаара далагеит. Москваҟа дахьцаз: "Ауаҩы ахьҭа илаланы даныҟоу егьа проблема изцәырҵуеит, аха уи иаанагаӡом ачымазарақәа зегьы хәышәтәышьа рымам ҳәа. Уара угәы бзиоуп", - ҳәа иарҳәеит уаатәи аҳақьымцәа.

Ибзиабаҩ лҿаԥхьа ишьамхы арсны аҭамзаара шьҭеиҵеит "Аԥшӡа", аҳақьымцәа ирҭахьаз ақьаадқәагьы лнапы инаиркит. Аха изхәарҭоузеи…

"Аԥшӡа" ибзиабаҩ машәырла лыԥсҭазаара ҿахҵәеит. Иара иахьагьы иԥсы ҭоуп, лара дшиџьабоз уаҳа аҭаацәара даламлеит. Ишьапы дахьынӡананагоз аҿыҵгақәа ԥшааны иаҳәшьаԥацәа рахь дцалон, абаҳча дҭысуашәа ҟаҵаны раҳәшьаду лҳаҭгәын аԥхьа днатәалон…

Илашәыз иакәын урҭ ацәаныррақәа зымбоз…

244

Раионк аԥсҭазаараҟынтә: Гамгьиа авирус змоу Гал рыхәышәтәразы

0
(ирҿыцуп 20:03 28.09.2020)
Гал араион ахәышәтәырҭа хада аҳақьым хада Асҭамыр Гамгьиа арадио Sputnik аефир аҿы еиҭеиҳәеит акоронавирус змоу рзы Галтәи ахәышәтәырҭаҿы хазы аҭыԥқәа раартра аус шцо атәы.
Раионк аԥсҭазаараҟынтә: Гамгиа авирус змоу Гал рыхәшәтәразы

Аԥсны ахада ауааԥсыра акоронавирус рацәыхьчаразы акоординациатә штаб аӡбара шьаҭас иаҭаны аусԥҟа инапы аҵаиҩит. Уаҟа иазгәаҭоуп жьҭаара 5 инаркны массала аспорттә, агәмырҿыӷьратә, ацәыргақәҵатә уснагӡатәқәа ахыбрақәа рыҩнуҵҟа рымҩаԥгара мап ацәкра. Иара уи адагьы, агәабзиарахьчара аминистрра жьҭаара 15 рҟынӡа анапы ианҵоуп Аԥсны, Аҟәа ақалақьи араионқәеи иахьрыҵанакуа иҟоу амедицинатә усҳәарҭақәа рҟны авирус змоу ахаҿқәа рнагарҭа ҭыԥқәа разырхиара.

"Амза 15 рҟынӡа еиқәыршәатәуп аҟәша. Иҳаԥшааит аҭыԥ. Усҟан ацхыраара лас астанциа ахьыҟаз аҭыԥ аҿы 10 каруаҭк алаҳхырц азы. Асмета ҟаҳҵеит, иаҭаху азы ашәҟәқәа ҳҩит, иааиуа амшқәа рзы иҳашьҭуеит. Иаарласны ашоура змоу зегьы убри аҟәшахьы инаганы, акоронавирус азы анализқәа ҟарҵаанӡа уа иҟалоит. Аҳақьымцәа уаҟа аус зуло алҳаԥшаахьеит, амедиаҳәшьцәа ракәзар, урҭгьы ҟалоит. Иааиуа амзазы Гәдоуҭатәи ахәышәтәарҭахь иҳашьҭраны иҟоуп бригадак, урҭ еиқәҳаршәахьеит. Сгәы ианаагоит аҳақьымцәа уаарыдтәалан ишрыхәҭоу аинформациа дара рҟынӡа инаугар, аҿкы ахәышәтәра ҳҭахым ҳәа зҳәо даара имаҷхоит. Аибашьраан доусы иара иус идыруан, уажәы аҭынч ԥсҭазаараҿгьы џьара гәаҟрак ҟалар, аҳақьымцәа ирдыруазароуп дара рыда ажәлар ԥсыхәа шрымам", - ҳәа еиҭеиҳәеит Гамгьиа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы.

Иара убас шәаԥхьар ҟалоит:

 

0