Аԥҳәыс лыпатуи ахаҵа ицәгьахәыцреи: иҟалахьоу ахҭыс

Аԥҳәыс лыпатуи ахаҵа ицәгьахәыцреи: иҟалахьоу ахҭыс

1906
(ирҿыцуп 10:07 21.06.2020)
Sputnik аколумнист Елеонора Коӷониаԥҳа "Аҭыԥҳа аҵәца даҩызоуп: зыԥшӡара злахьынҵа ареиқәаҵәаз аԥҳәыс лызхәыцра" ҳәа хыс измаз лколонкаҿы Лахьыцәгьа ҳәа зыӡбахә лымаз аԥҳәызба лҭоурых Саида Жьиԥҳа даҽа ԥҳәызбак дзықәшәаз лгәаланаршәеит. Уи лҭоурых иахьа иаҳзеиҭалҳәоит.

Саида Жьиԥҳа, Sputnik

Ажәытәан арԥыси аԥҳәызбеи рынасыԥ ачаԥараҿы ақьаӷьариа дыбжьацәажәон, ауа-ҭахыла зҳәаз еиԥш аҿар еибырҭон, аха иҟан зхала еибадырны, абзиабара зыбжьаланы аҭаацәара аԥызҵозгьы. Убарҭ иреиуан зхәыҷаахыс еибадыруаз, ашкол еицҭаз ҷкәынаки ӡӷабки (рыхьӡқәа "М", "К" ҳәа иҟаз сажәабжь аҿы). Аҿар бзиа ишеибабоз 15-16 шықәса анырхыҵ ирыҵырхит, аха "арҭ хәыҷқәоуп" ҳәа аӡәгьы агәра игомызт рцәаныррақәа шҵабыргыз.

Арҭ ахәыҷқәа рҭаацәарақәа нхарала еизааигәан, ацәгьеи абзиеи рҿы амаҵ еицыруан. Аха адуцәа рхәыҷқәа ирыбжьаз атәы рзымдыруашәа ҟарҵон, ԥсуаҵас аргамара ԥхашьаран.

Аԥсҭазаараҟны зны-зынла ишыҟалало еиԥш, бзиа еибабоз ҩыџьа ахԥатәи ахаҿы дрыбжьалеит. "М" 18 шықәса анылхыҵ, дыԥҳәызба наӡаны даншәы, лыԥшреи лсахьеи ихнахуаз арԥар рацәаҩхеит. Иҟан Нхыҵ Кавказынтәи иааны лнапы иаҳәозгьы. Аха лара лыԥсҭазаара здылҳәалар илҭахыз "К" иакәын, уи ида аӡәгьы лхахьы даалгомызт. Аԥҳәызба лхатә ҩыза иалхра азҵаара шылӡбахьазгьы, зегь акоуп длыцрыҵуамызт рқыҭа егьи ацуҭа аҟнытә илеиҽырбоз "Д". Акраамҭатәи иҽазышәарақәа рышьҭахь, иара "М" длызгәамҵны, лҩыза ԥҳәысс дигоит. Аамҭакы ашьҭахь "М"-и "К"-и еибагоит.

Егьа умҳәан, аԥсҭазаараҿы зегьы уара ишуҭаху иҟалом, уи ахатәы ԥҟарақәа амоуп. Арҭ рыҩџьагьы хәышықәса еицынхон, аха ахшара дрымамызт. Убри аамҭазы "Д" иԥа хәыҷы дыхбыџхахьан.

Ҽнак, зыӡбахә сымоу афырхацәа, чарак аҿы еиқәшәоит. "Д" иԥшәмаԥҳәыси "М"-и ианқәыԥшыз еиҩызцәан азы, уажәгьы агәыбылра рыбжьан. Аҳәса рызхара еицәажәонаҵы, ахацәа рқьафқәа ҟарҵеит. Ачара ахыркәшамҭаз, зшьапы аарла инанагоз "Д" "М" лааигәа днеины ибжьы ныҵакны лара лахь имаз абзиабара шҿымцәааз налеиҳәеит, лҩызагьы (иара иԥшәмаԥҳәыс) "игәы дшықәгылаз" нациҵеит. Аҩы иашьыз аиацәажәара акәым, дахьиҿаԥшуаз амца лкуан, аха ауаа акы рыдырбалар ҳәа дшәаны, диҿаччозшәа ааҟаҵаны, дынидҵит. "Д" "М" лахь имаз абзиабара атәы рдыруан иԥшәмаԥҳәыси "К"-и, аха урҭ хырҩа арҭомызт анкьа иҟаз, иахьанӡа ицәаныррақәа рыԥсы шҭоу абардыруаз акәымзар…

Ауха, "М" лыԥшәма иалҳәарц лҽазылшәеит "Д" ихымҩаԥгашьа атәы, аха илзымгәаӷьит, "уаҳа ҳабаибабо" ҳәагьы лгәы иаанарго.

Ари ахҭыс ашьҭахь мчыбжьык ааҵуаны, "М" лаҳәшьеи лареи ҩаԥхьа Гәдоуҭа аҳәса рҳақьым лҟнытә аҩныҟа ишаауаз, амҩабжа автобус акәыр ԥжәеит. Ауаа зегьы ҭыҵны, ҳазгарыда ҳәа иниас-ааиасуаз амашьынақәа рахь рнапы рҟьон.

Уамак мҵыкәа, "М" лаԥхьа иаанҿасуеит амашьына лас "Москвич". Азнык азы дгәырӷьаҵәа дааҟалан, аха аԥсҟы зкыз данылба иламхацәгьахеит. "Ибыхьзеи бара, "Д" дыбзымдырӡеи, бааи арахь" лҳәан, лаҳәшьеиҵбы амашьына аԥхьа днақәтәеит. "Д" иблақәа ыргызмалны, асаркьала "М" лыбла дышхыԥшылоз мацара амҩа ианын. Лара уажәы-уажәы лаҳәшьа акы длазҵаауа, зны адәахьы дыԥшуа лхы ахылгон. Арахь агәҭынчымра лнаҭон, лаҳәшьа ланшьцәа дрызцон азы ирлас дахьлыбаауаз. Аха ҿыҵгас иҟалҵарызеи сылбаауеит лҳәарц, амҩа хәылбыҽхан данхалар аҵкыс, "исычҳап" ҳәа лҽырԥсны дтәан. Аиаҳәшьа данҭыҵ ашьҭахь, "Д" "аҩсҭаа дихалазшәа" иҟазшьа иаразнак аҽеиҭанакит. Амашьына ырццакуа, уаҩ иахьиҿахырсҭамыз иҿынеихеит. Анаҩс иҟалаз аԥхьаҩцәа еилышәкааит…

"М" илыхьыз лҿы илзамырҳәо, арахь дҵыкәкәаны дцо аԥсра ахықә дықәгылеит. Аҽшьра ианақәылк, еилылкааит лцәа лтәымкәа дшыҟаз. "К" акыр шықәса аҵеи иира дазыԥшын азы, игәырӷьара ҵҩа амамызт, иԥҳәыс лгәамбзиарақәагьы уи иаҵиган, игәы рҭынчны абра иҽазыҟаиҵо далагеит. Жәымз рышьҭахь аҭаацәараҟны диуеит аӡӷаб хәыҷы. Алыиаа дзауыз ирыдырныҳәаларц асасцәа рыднагало иалагеит, хымԥада, ари ахҭыс лаҩлыжьуазма "М" лҩызагьы, "Д" иԥшәмаԥҳәыс…

"Аҩсҭаа" аҩны инеира аиҭаԥсра илзаҩызахеит, аха иқьаф ҟаҵаны, иблақәа цырцыруа иԥа динасыԥхарц азы лысаби лгара аниҿаҟәа, убрааҵәҟьа лыԥсы лылшәшәаны дкаҳаит.

"М" лыблақәа анхылт, "аҩсҭаа, аҩсҭаа" ҳәа аҳәҳәара далагазаап, аха лҭаацәа, "ари анцәа дылҭаазар ҟалап" рҳәан, уи ашьҭахь "ԥсуаҵас" лыхәшәтәра иалагеит.

"Д" иабаидыруаз, иԥа изы "ииҳәаз" аӡӷаб хәыҷы иара дышиԥҳаз. Шәара шәазхәыц закәытә гәнаҳароу, ари ахаҵа ҩаԥхьа ихы иаҭәеишьаз, раԥхьа идырны, уажәы изымдыркәа…

"М" лыԥҳа хышықәса лхыҵуан лыԥшәма "К" машәырла данҭаха. Аԥҳәыс еиба лыԥшәма ишықәсцәымза шьҭыхны, Москва инхоз лашьа иахь дцеит.

Ари аҭоурых 2002 шықәсазы ахԥатәи акурс аҿы сантәаз исзеиҭалҳәеит Гагрантәи Аҟәаҟа сцоит ҳәа сзықәтәаз автобус аҿы исыватәаз, 70-ҟа шықәса зхыҵуаз аԥҳәыс бырг.

- Бҭаацәароума сыӡӷаб?

- Мап!

- Бзиа иббо иакәымкәа, бара бзиа бызбо бицца, нан, аԥсҭазаараҿы ус еиҳа еиӷьуп, - насаҭалкит усҟан уи аԥҳәыс. Абас ауп ҳаицәажәарагьы ахы шыҵнахыз усҟан.

"М" рыцҳа "К" акагьы изымдыркәа нарцәыҟа дахьцаз заҵәык акәын лгәы зырдоз ари аҭоурых аҟны. Насгьы лара илыллыршеит лыԥҳа "аҩсҭаа" ила дамбакәа дааӡаны, аҵара лырҵаны, илынасыԥхаз аурыс ҷкәыни лареи Европаҟа нхара рышьҭра.

"Д"? Уи иразҟхеи? Автобус исыцақәтәаз аԥҳәыс бырг лахь сызҵаарақәа ҵыхәаԥҵәара рымамызт.

Асахьаҭыхҩы Леиуарса Быҭәба иусумҭа Мифы и Легенды Абхазии
Асахьаҭыхҩы Леиуарса Быҭәба иусумҭа "Мифы и Легенды Абхазии"

"Аҩсҭаау"? Џьаҳаным иҭыԥхеит. Иԥҳәыси иареи еилыҵит, аҩыжәра ҵиган, жәабаҟа шықәса раԥхьа аҵеиџь аҟнытә аӡы ааигоит ҳәа дахьнеиз, дҭаҳан, дынҭаԥсы дцеит.

Уаҳа акагьы сазымҵааит. "Уи аҽны слыцны аҩнынӡа сцазҭгьы, абас ҟамларгьы ауан" анылҳәа, еилыскааит сзыдтәалаз "М" лаҳәшьа шлакәыз.

Аиаҳәшьа рыцҳа, "М" уи аҽны илыхьыз анылдыр, ахәшәтәырҭа дҭашәазаап, лара ааигәа аҭаацәара далалан, лцәалтәымкәагьы дыҟан, аха илнырыз ахы ацәымӷреи, "М" лахь арыцҳашьареи лыпсихика ԥхасҭанатәеит, дыззыԥшыз асабигьы деиқәымхеит.

"М" ауасиаҭ нлыжьхьан, адунеи анылԥсахуа, лыԥсыбаҩ былны, аццышәқәа "К" иҳаҭгәын иаваржырц. Ус иагьыҟарҵеит.

Автобус аҿы исыватәаз аԥҳәыс бырг "бзиа иббо иакәымкәа, бара бзиа бызбо бицца, нан" ҳәа илҳәаз ажәақәагьы уажәоуп еилыкка рҵакы схаҿы ианааи! Усҟан "М" "Д" диццазҭгьы, абас ҟаларызма?! Аха абзиабара мыжда…

Иара убас шәаԥхьар ҟалоит:

Автори аредакциеи ргәаанагарақәа еиқәымшәозар ҟалоит.

1906

Аҟәантәи Калдахәаранӡа, ма акоронавирус агәра гара шаҳҭахым

232
(ирҿыцуп 13:28 27.10.2020)
Аԥсуаа акоронавирус гьангьаш ҳашҭа иҭалаанӡа аԥсы шҭоу агәра агара ҳҭахым ҳәа агәаанагара лызцәырҵит Sputnik аколумнист Елеонора Коӷониаԥҳа, Аҟәантәи Калдахәараҟа дцан данааи ашьҭахь.
Аҟәантәи Калдахәаранӡа, ма акоронавирус агәра гара шаҳҭахым

Ҽаҩраҭагалан иаҳнаҭаз аԥхарра лшара бзиоуп еимҟьарак аныҟоу ақыҭа аҭааразы. Ачымазара ҿкы анеилагьежьуа аамҭазы, амҩа ақәлара гәаӷьыуацәагәышьоуп, аха ус акәзаргьы, аԥкра амҩаԥгаразы иҟоу ахархәагақәа ҳасаб рзыуны, ахәаша амҩа ҳақәлеит ҳқыҭахь сыԥшәмеи сареи. Аидарагьы ҳаман азы атакси ҳаԥхьеит авокзал аҟынӡа ҳцарц. Иааит атакси, аха амашьынарныҟәцаҩ асабрада захьӡу ихамызт. Ҳанҭатәеит ҳара сабрадала ҳаиқәных. Авокзал аҿы, игәасҭеит аԥсуа аруаа гәыԥҩык шеицыз, урҭ зегьы асабрадақәа рхан. Авокзал аҿы игылаз Аҟәа-Ԥсоу ҳәа зныз амаршруттә такси ҳанҭалеит. Арныҟәцаҩ, Анцәа иҟәырхуп усгьы акгьы ихамызт, аха амашьына иҭатәаз рахьтә аӡәы-ҩыџьа ракәын асабрадақәа ныҟәызгоз. Акарантин шыҟоу здыруа, асабрада зҿаз ԥҳәыск сынлыдтәалеит.

Амашьынарныҟәцаҩ қәрала 60-ҟа шықәса дрықәзаргьы ҟаларын, аха ихымҩаԥгашьала Ковид-19 адунеи ишықәу имаҳацзаргьы ҟалап угәахәуан. "Зегь шәтәама?" иҳәан имашьына аус наируит, "асабрадақәа шәхашәҵа" ҳәа дҵакгьы ҟаимҵеит. Амҩа ҳақәлеит. Зегь реиҳа ишәарҭахаз, аԥсҟы зкыз амашьына ширныҟәоз акәын. Исыватәазгьы саргьы ҳгәы нҭыԥсаауан, иаалырҟьан аџыхҳәа иаангылон зныҟәашәа ццакыз амашьына. Дабаццакуеи ҳныҟәызго уҳәарын, убас аҽыҩқәа аныҵдырҟьо еиԥш имашьына анааирҭрыслак.

Амҩан иҳаԥхьагылоз аидарамҩангага машьынақәа амҩа анирымҭалакгьы, ишшәарҭазгьы дрывсыр иҭахны амҩа егьи аганахь ихы аарихалон. Ишамуаз анибалакгьы, аџыхҳәа даангылон. Амҩан иҳавсуаз амашьынақәа ирҭатәаз рахьтә сабрадала еиқәшәазгьы ыҟан, аха шамаха ауаа рацәа зҭатәаз амашьынақәа рпассаџьырцәа зегьы иныҟәыргомызт, иахьа ҳаԥсҭазаара иахәҭакхаз -асабрада.

Аҟәа инаркны Калдахәаранӡа ҳнеиаанӡа адәахьы ахәаахәҭра иаҿыз ауаа ракәзар, акарантин акашәа имбакәа адунеи ишықәу убаратәы иҟан. Ашәыр, ақәыр уҳәа реиԥш иҟоу адәахьы иқәыргылан изҭиуа анапҭарԥагьы асабрадагьы рааигәара ишнарымго иаразнак иубоит.

Схәыцуан, абырсҟак аԥсыҭбара аныҟоу абарҭ мшәаӡо ҳәа. Мап, имшәозар акәхап, мамзар ас ҟалашьас иамоузеи? Иаҳаулакгьы амҩатә машәыр ҳақәымшәакәа Калдахәара аангыларҭаҿы ҳнеит. "Уныҟәашәа бааԥсуп амашьынарныҟәцаҩ, ухаҵкы", сҳәеит ҳанҭыҵуаз. "Ибҳәо закәи?", иааџьеишьеит иара.

Ҳахьынҭыҵыз игәаҳҭеит аангылараҭаҿы игылоу адәқьан шарку. Ашьҭахь излеилаҳкааз ала, уаҟа аус зуаз ачымазара рхьысит. Ковид-19 ари ақыҭаҿгьы иаагәышьеит сгәахәит "анхәа лыбз" еиԥшу Калдахәаратәи архәра ҳаҿаланы ҳаҩныҟа ҳҿанынаҳха.

Ақыҭараҿы ҭынчроуп, амҩа шамаха уаҩ данны убомызт. Ачымазара ҿкы аҽацәыхьчаразы ҳара ҳахьынхо аҭыԥ даара иманшәалоуп. Аԥкрақәа инарықәыршәаны, агәылара, азлара џьаргьы ҳамнеит, ҳара ҳахьгьы уаҩ дмааит. Ақыҭауаа рӷьырак Гагра аус руеит, хәылбыҽхала рыҩныҟақәа рахь ихынҳәуеит, убри аҟынтә, ҳазқәынхо ахәы ҳаракы ачымазра халар ауеит аԥкрақәа ирықәымныҟәар ҳуааԥсыра.

Амҽышаҽны Аҟәаҟа ҳдәықәлеит. Аангылараҭаҿы ҳанааи адәқьан шаркыц иаркын. Дук хара имгакәа атакси аангылт "амаршрутка ахәала шәызгоит" аниҳәа, ҳанҭалеит ҳсабрадақәа наҳҿаршәны. Араҟагьы, амашьынарныҟәцаҩгьы, иватәазгьы аԥкра амԥангьы иҟамызт, амала амашьына арныҟәцаҩ ашьшьыҳәа даауан, сгәы мыҭрыскәа Аҟәанӡа ҳааигеит.

Аҟәа санналаԥш асабрадақәа шырацәаз иаразнак иаагәасҭеит. Ақалақь транспорт аныҟәцаҩцәа аԥҟарақәа ишрықәныҟәо иаразнак иубоит. Атроллеибус иҭаз реиҳараҩык сабрадала еибыҭан.

Авирус абҵара анҵәамҭазы аҽаӡар алшоит рҳәоит, аха сныҟәара ишыснарбаз ала, еиҳарак аҳҭнықалақьуаа роуп арҭ аԥҟарақәа ирықәныҟәо, егьырахь амҩан избақәоз рыла, акарантин ирылаҳәо ашьҭахь, ачымазара ацәаара ԥсыҽхоит аҳәара уадаҩуп.

Калдахәара саныҟаз Гагра инхо сыуацәа ҭелла исарҳәеит "Гагрыԥшь" ачара мҩаԥыргон ҳәа. Абас ҳаҟоуп ҳарҭ аԥсуаа, авирус гьангьаш ҳашҭа иҭалаанӡа аԥсы шҭоу агәра агара ҳҭахым.

Автори аредакциеи ргәаанагарақәа еиқәымшәозар ҟалоит.

Иара убас шәаԥхьар ҟалоит:

232

Кьасоу Ҳагба: ауаҩы иԥсҭазаара аҵакы аиуеит, ихы мжьакәа, иус ишахәҭоу дазнеир

39
(ирҿыцуп 14:02 24.10.2020)
Иахьа имшира азгәеиҭоит Самсон Ҷанба ихьӡ зху Аԥсуа ҳәынҭқарратә драматә театр актиор, Аԥсны акинемотографцәа реидгыла ахантәаҩы, ауаажәларратәи аҳәынҭқарратәи усзуҩы Кьасоу Ҳагба.

Аԥсны Акинематографистцәа реидгыла ахантәаҩы, актиор Кьасоу Ҳагба Sputnik акорреспондент аинтервиу лыҭо, дазааҭгылеит ихәыҷра ашықәсқәеи, ирҿиаратә мҩа шалагази, иаликаауа аспектакльқәеи, инаигӡахьо арольқәеи ртәы.

Наала Гәымԥҳа, Sputnik.

Кьасоу Ҳагба аиицәажәара анхациркыз, гәыблыла ихәыҷратәи ашықәсқәа игәаларшәеит.

"45 шықәса инарзынаҧшуа ақалақь аҟны сшынхогьы, ҧхыӡла ақыҭа ауп избо. Схәыҷреи сқәыҧшреи зегьы сқыҭа иадҳәалоуп. Саныхәыҷыз саб дҳаҧхеит, сан хҩык ахшара ааӡатәыс ҳлоуит. Есымшааира Анцәа диҳәон, игәра лгон. Аџьабаа ӷәӷәаны илбеит ҳааӡараҿы", - иҳәеит иара

Кьасоу Ҳагба қәҿиарала дҭалоит, дагьалгоит Ш. Русҭавели ихьӡ зху Қырҭтәылатәи Аҳәынҭқарратә Атеатралтә Институт.

© Foto / из личного архива Кьасоу Хагба
Кьасоу Хагба

"Афбатәи акласс ааныжьны сҭалеит уахынлатәи ашкол. Ажәабатәи акласс саналга, исыӡбеит сактиорхарц, сҭаларц Атеатралтә институт. Акино, атеатр, акультура рахь агәыблыра сзыркыз ҳәа исыҧхьаӡо, сызхәаҧшуаз акиносахьақәа, актиорцәа уаҟа рыхәмаршьа атәы ауп. Уи аҩыза алшара ҳаман, лассы-лассы ҳқыҭа иаҭааны афильмқәа ҳдырбон. Раҧхьаӡакәны актиорк иаҳасабала асценахь сцәырҵит Аинститут аҭаларазы аҧышәара анасҭоз амш аҽны. Аҧышәара лыдылкылон Нелли Ешҧҳа. Исыдылҵеит аетиуд ақәыргылара. Мчыбжьык ашьҭахь сааины, ашәарыцараҟны слеи сареи ҳзыниаз ахҭыс ала илыдызгалеит. Уи даара ахәшьара бзиа алҭеит, убас сҭалеит Қарҭтәи Атеатралтә институт", - ҳәа игәалаиршәоит.

Актиор Ҳагба: сзыхьӡаз ахәыҷы намысла, уаҩышәала, ԥсыуала иҟасҵон>>

Кьасоу Ҳагба имаҷымкәан инаигӡахьеит асценатә рольқәа, ихадароу ахаҿсахьақәа. Урҭ рахьтә: Молчалин ("Зыхшыҩ зызрыцҳароу" А. Грибоедов), Аԥсҳа Леон ("Аԥсҳа Леон" А. Агрба), Цезарь ("Иули Цезарь" У. Шекспир), Махаз ("Махаз" Ф. Искандера, ареж. В. Ақаҩба), Тартиуф ("Тартиуф" Мольер, ареж. К. Хачегогу), Лаимен ("Ашьха Морган аҟынтәи хланҵы" А. Миллер, ареж. В. Ақаҩба), Џьонни Паттинмаик ("Адгьылбжьаха Кинишмаҟынтәи ахымхәа" Макдонаха, ареж. В. Ақаҩба). "Кьоџьаа рҭыӡшәа" Гольдони (Исидоро), "Брисбенынтәи аемигрант" Шехаде (Ашькылкҩы, ареж. В. Ақаҩба), "Аӡыцәа шкәакәа" В. Касланӡиа (Зафас, ареж. В. Ақаҩба), "Ацынҵәарах" Б. Шьынқәба (Хамыҭбеи Чачба).

© Foto / из личного архива Кьасоу Хагба
Кьасоу Хагба

"Раҧхьаӡакәны ихадоу ароль сыхәмарит Вампилов ипиеса ала иқәыргылаз аспекталь "Аҭӡамц" аҟны. Уаҟа ихадароу апрокурор ироль насыгӡон. Ари ақәгылара сдипломтә усумҭа акәын, ибзианы ирыдыркылеит. Анаҩс Аҧсны ирацәаны ақыҭақәа ҳарҭааны идҳарбеит", - ҳәа азгәеиҭоит Кьасоу Ҳагба.

1978 шықәса раахыс С. Ҷанба ихьӡ зху Аҧсуа аҳәынҭқарратә драматә театр аҟны иҟаз афольклортә ансамбль "Уарада" дасолистын. 1999 шықәса инаркны 2000 шықәсанӡа Аҧсны Акультура Аминистрс дыҟан. 2002 шықәсазы Аҧсны Аҳәынҭқарра Апарламент адепутатс дыҟан. Кьасоу Ҳагба С. Ҷанба ихьӡ зху Аҧсуа ҳәынҭқарратә драматә театр иаҧхьагылоу актиоруп.

© Foto / из личного архива Кьасоу Хагба
Кьасоу Хагба

Актиор ихаҿы иаанхаз, еиҳа игәалашәарақәа иаарылыҳәҳәо иҟоу Швеицариа иқәдыргылаз аспектакль ауп. Уи атәы ҳзеиҭеиҳәеит актиор.

"Аҧсны Аџьынџьтәылатә еибашьра алагара мызқәак шагыз, Швеицариа атәылаҟны агастрольқәа ҳаман. Уи иреиӷьу агастрольқәа ируакуп сара сзын. Гиульден ипиесала иқәыргылан "Кьоџьаа рҭыӡшәа" заыхьӡыс аспектакль. Иқәиргылеит Валери Михаил-иҧа Ақаҩба. Ари раҧхьаӡатәи Аҧсуа театр аҳәаанырцә ақәгылара акәын. Аспектакль ахы инаркны аҵыхәанӡа аҧсышәала имҩасит. Ахәаҧшцәа аспектакль алагаанӡа ирзеиҭарҳәеит уи аҵакы зызкыз, аҭоурых. Иџьоушьаша, абызшәа шырзеилымкаауазгьы, ахыбра зегьы ҭәын, ҭыҧк ҭацәны усгьы иубомызт. Аспектакль ашьҭахь ахәаҧшцәа зегьы ҳадеизаланы ҳнапынҵамҭа иаҳәон", - ҳәа игәалаиршәоит актиор.

Асцена Кьасоу Ҳагба изыҳәан ҧсҭазаароуп, идунеи шьаҟа ӷәӷәаны иаҵагылоуп.

"Асцена уанықәгыла нахыс, ахәаҧшҩи уареи шәеимадара ацәажәара уалагаанӡа,уҩнуҵҟатәи уҧсҭазаара иахылҵуа ацәанырреи дареи еиқәшәаны ианеилаҵәалак, нас ауп амшын иху аӷбеиҧш уаманы аҿанынанахо. Уроль нагӡаны уаналгалак, ахәаҧшҩы ибла ихубаало аҧхарра иабзоураны, еиҭах сыхәмарындаз ҳәа агәаҳәара узцәырҵуеит. Зегь реиҳа ихадароу, ауаҩы ихы мжьакәа, дызҿу аус ишақәнагоу даназнеиуа, убасҟан ауп иҧсҭазаара аҵакы анаанахәо, алҵшәа анаиуа. Амилаҭ ҟазара - уи ҳара ҳӡырызго, ҳхаҿра, ҳдунеи зегьы идзырбо акакәны иҟоуп", - ҳәа азиҧхьаӡоит иара.

Кьасоу Ҳагба бзиа ибаны, имч-илшара зегьы изанааҭ иазкны, иахьа уажәраанӡа мааҧсарада аус иуеит.

39

Аԥсны 68-ҩык аҿкы рыдырбалеит, ҩыџьа рыԥсҭазаара иалҵит

11
(ирҿыцуп 20:10 29.10.2020)
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 4126-ҩык ыҟоуп. Урҭ рахьтә ргәы бзиахеит 2170-ҩык, рыԥсҭазаара иалҵит 38-ҩык.

АҞӘА, жьҭаара 29 - Sputnik. Иҳаҩсыз уахыки-ҽнаки рыла COVID-19 зцәа иалоу реилкааразы атестқәа 427 ҟаҵан, урҭ рахьтә акоронавирус аарԥшын 68 тест рҟны ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Аоперштаб иара убас иаанацҳаит жьҭаара 29 рзы Гәдоуҭатәи агоспиталь аҿы лыԥсҭазаара дшалҵыз 1976 шықәсазы ииз апациент. Лара ахәышәтәырҭа дҭашәеит жьҭаарамза 13, лыԥсыԥ лагаҩагара акыр илцәыцәгьаны, ҩганктәи агәыҵәкра лыманы. Иақәнагаз атерапиа шлзымҩаԥыргозгьы, жьҭаара 29 рзы лдунеи лыԥсахит.

Жьҭаара 29 рзы рзы иԥсыԥ лагаҩагара акыр ицәыцәгьаны, ҩганктәи агәыҵәкра иманы аҟәатәи амобильә госпиталь аҟны ишьҭаз апациент иԥсҭазаара далҵит, иақәнагаз атерапиа шизымҩаԥыргозгьы.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 135-ҩык ауааԥсыра, урҭ рахьтә 113-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 29-ҩык, ибжьаратәуп - 36-ҩык, илҩаауп 13-ҩык апациентцәа. Гәдоуҭатәи агоспиталь иҭашәеит 11-ҩык ачымазцәа.

Аҟәа асасааирҭа "Аиҭар" ашҭаҿы иаадыртыз амобилтә госпиталь аҟны ишьҭоуп акоронавирус зыдбалоу 55-ҩык апациентцәа. 51-ҩык рҭагылазаашьа бжьаратәуп ҳәа иԥхьаӡоуп, ԥшьҩык рҭагылазаашьа бааԥсуп.

Ауааԥсыра COVID-19 рацәыхьчаразы аоперативтә штаб ажәлар рахь ааԥхьара ҟанаҵоит ачымазара ҿкы рымкырц азы иахәҭоу аԥҟарақәа зегьы ирықәныҟәаларц.

Акоронавирус иазку ажәабжьқәа зегьы шәрыԥхьар ҟалоит абра>>

11
Атемақәа:
Ачымазара ҿкы – акоронавирус Аԥсни адунеи аҿи: иалкаау