"Ахәыҷқәа бзиа иумбар, ашкол аҿы аус узуӡом": арҵаҩы Инга Шармаҭԥҳа лҭоурых

1277
(ирҿыцуп 17:58 05.10.2020)
Жьҭаара 5 - Арҵаҩы имш аҽны шәаԥхьарц ишәыдаагалоит зыԥсҭазаара абжеиҳан аҵара-ааӡаратә ус иазызкыз Гагратәи абжьаратә школ №1 аҵараҟәша аиҳабы Инга Виктор-иԥҳа Шармаҭԥҳа лҭоурых.

Зыԥсҭазаара абжеиҳан аҵара ааӡаратә ус иазызкыз Гагратәи абжьаратә школ №1 аҵараҟәша аиҳабы Инга Виктор-иԥҳа Шармаҭԥҳа шәҩык инареиҳаны лоушьҭымҭацәа иахьа иреиҳау аҵараиурҭақәа ирылганы еиуеиԥшым амаҵурақәа ныҟәыргоит. Зҵаҩцәа ирызгәдуу, рҵаҩыси, аныси ирзыҟаз Инга Виктор-иԥҳа иаҳзеиҭалҳәеит ари азанааҭ аҿы ада џьаргьы лхы шылымбо.

Саида Жьиԥҳа, Sputnik

Инга Шармаҭԥҳа Аԥснытәи Аҳәынҭқарратә университет далганы, агеографиа азанааҭ лоуны аусура далагоит Бзыԥҭатәи абжьаратә школ №2 аҟны, усҟантәи адиректор, аамҭала рҵаҩыс илымаз Борис Кьахьыриԥа иааԥхьарала. Анаҩс, 1992 шықәсазы Аԥсны Аџьынџьтәылатә еибашьра цонаҵы, Гагра араион ахы ианақәиҭха аԥсуа школ ҩаԥхьа аԥсы ахаҵаразы арахь аусура диаргоит гәыԥҩык арҵаҩцәа реиԥш. Усҟан лԥа еиҳабы ԥшьышықәса ихыҵуан, аиҵбы ҩба. Асабицәа ланхәа лнапы ианҵаны, илыдырҵаз ауалԥшьақәа рынагӡара лҽазылшәоит.

© Foto / из архива Инги Шармат
Гагратәи абжьаратә школ №1 арҵаҩратә еилазаара

"Гагра араион аӷа даналцаха, аԥсуа школ аартра ҳажәлар рзы аҵак ду аиуит. Уи ала ауаа агәыӷра рызцәырҵит уаҵәтәи амш азы. Арҭ аҭыӡқәа рҿы убриаҟара аԥхарра ыҟан, аусуреи, аҵараҵарази иаднакылаз ахҵәацәа рхьаақәа хызҽуаз. Аколлектив уалафахәыда акраамҭа аус ҳуан, аӡәи-аӡәи ҳаихӡыӡаауан. Доусы аҩны имаз афатә, ажәтә, ашәҵатәы еимаадон, имчымхаз ҳицхраауан. Аӡынра алашара аныҟамыз, амҿтәы ԥечкақәа амца рҭаҵаны ҳхәыҷқәа ахьҭа иаҳаркӡомызт. Исгәалашәоит ҳарҵаҩы Нанули Расим-иԥҳа Ҳагԥҳа аибашьра данцоз ҳлаӷырӡышо дшынаскьаҳгоз, аҽеиҭныԥсахлараан данаауаз шаҟа ҳлеигәырӷьоз хәыҷи-дуи. Абарҭ иуадаҩыз аамҭақәа раан ҳаҩнуҵҟа зышьаҭа аркхаз аӡәкра, аилибакаара, ҳаҭыр еиқәҵара иахьагьы ҳаибаркны ҳакуп", - лҳәоит арҵаҩы.

© Foto / из архива Инги Шармат
Инга Шармаҭԥҳа лҵаҩи лареи

Инга Шармаҭԥҳа раԥхьаӡа Гагратәи аԥсуа школ ахь аусура данаа директорс дыҟан Ҳараз Ҳаџьараҭ-иԥа Чамагәуа, аха ҩымчыбжь рышьҭахь иара машәырла иԥсҭазаара далҵуеит. Убри аҟнытә лара арҭ аҭыӡқәа рҿы раԥхьатәи лшьаҿақәа ҟалҵеит адиректор инапынҵақәа назыгӡоз Фатима Лыхәԥҳа лхылаԥшрала. Анаҩс ашкол директорс дахагылеит занааҭла игеографыз Илиа Ефим-иԥа Кәанџьариа.

"Илиа Ефим-иԥа сзанааҭ аҟны сшьақәгыларц азы аԥышәа дуӡӡа имаздеит. Иара иеиԥш зыхшыҩ ҵарыз, иҟәышыз ауаҩы иԥшаара уадаҩуп", - инаҵылшьит лара.

Илиа Канџьариа шықәсқәак рышьҭахь Гагра араион аҵара аҟәша дахагылоит, аԥсуа школ директорс дарҭоит Ҳараз Чамагәуа иҵаҩы, ари ашкол аушьҭымҭа Татиана Гьаргь-иԥҳа Мықәԥҳа.

© Foto / из архива Инги Шармат
Инга Шармаҭԥҳа лҵаҩцәеи лареи

"Иуадаҩыз аамҭақәа раан аԥсуа школ еибаркны илыман Татиана Мықәԥҳа. Аиаша ҳҳәозар, иҟан лхатәы бызшәа лыздыруам ҳәа илаҽԥнызҳәоз, аха агәра шәсыргоит ҿыла илзымҳәозаргьы гәыла дышцәажәоз. Шьала-дала ипатриотыз аԥҳәыс лааԥсара ӷәӷәоуп ари ашкол азы", - ҳәа азгәалҭоит Инга Шармаҭԥҳа.

Инга Виктор-иԥҳа Гагратәи аԥсуа школ ахь аусура данаа арҵаҩцәа хатәрақәа Лиусиа Владимир-иԥҳа Агрԥҳа, Венера Константин-иԥҳа Ҳагԥҳа, Анна Давид-иԥҳа Аргәынԥҳа, Сариа Емир-иԥҳа Хонелиаԥҳа уҳәа гәаартыла дрыдыркылеит. Ирылшоз аҿы рхы иеигӡомызт, арҵаҩ қәыԥш илхылаԥшуан, рԥышәа рымалдартә алшара лырҭон.

© Foto / из архива Инги Шармат
Инга Шармаҭԥҳа 2006 ш. лоушьҭымҭацәа

2000 шықәсазы, Татиана Мықәԥҳа лабжьгарала, Инга Виктор-иԥҳа дарӷьажәҩаны ашкол аҵараҟәша еиҳабыс длываларгылоит. Сынтәа 20 шықәса ҵуеит ари амаҵура ԥсыцқьарыла иныҟәылгоижьҭеи.

Инга Шармаҭԥҳа ашкол аҵаратә процесс амҩасшьа зегьы лнапы иҵылхуеит. Аурокқәа реихшанҵа, аметодикатә план инақәыршәаны аурокқәа разырхиара, аҵара ахаҭабзиара, ахәшьарақәа рылҵшәақәа, амаҭәартә олимпиадақәа рҽазыҟаҵара, ааӡаратә процесс ахылаԥшра аҭара, арҵаҩцәа ҿарацәа арыцхраара уҳәа ирацәаӡоуп дызхылаԥшуа. Ҳаиҿцәажәараҟны Инга Виктор-иԥҳа иазгәалҭеит агәахәара ду шылнаҭо иахьа рколлектив аҿы арҵаҩцәа ҿарацәа ахьеиҵагылаз. Дышқәыԥшугьы, ашкол адиректор Хана Гәынԥҳа Ҳараз Чамагәуа иаԥиҵахьаз аҵас бзиақәа еиқәырханы, уимоу еихаҳаны иаалгоит.

© Foto / из архива Инги Шармат
Инга Виктор-иԥҳа Шармаҭԥҳа

"Ҳара, сынтәа ҳагәҭакы наӡеит. Анцәа иџьшьаны Гагра ақалақь агәҭа иӷьазӷьазуа иҳаздыргылеит ашкол ҿыц. Аԥсуа хәыҷқәа аџьџьаҳәа ашҭа ҭдырҭәааит. Абриаҟара алшара анҳамамызгьы, ҳҵаҩцәа аҵареи, аспорти, акультуреи рҿи, аолимпиадақәа раани алҵшәа бзиақәа аарԥшны ҳашкол ахьӡ ҭыргон. Уажәы аҭагылазаашьа анҳау, агәра ганы сыҟоуп ҳмилаҭтә школ еиҳау аҩаӡарақәа рахь ишхало", - лажәа иацылҵоит арҵаҩы.

© Foto / из архива Инги Шармат
Гагратәи абжьаратә школ №1 арҵаҩратә еилазаара

Инга Шармаҭԥҳа арҵаҩцәа ҿарацәа дрызгәдууны рыӡбахә лҳәеит аҭоурых арҵаҩцәа Сариа Ԥлиаԥҳа, Омар Џьыкырба, агеографиа арҵаҩы Оскар Хынҭәба, абиологиеи, ахимиеи рырҵаҩы Шьамсиа Аҩӡԥҳа, аурыс бызшәеи алитературеи рырҵаҩцәа аиҳәшьцәа гәакьацәа Саидеи Иланеи Аҩӡԥҳацәа, афизикеи, аматематикеи рырҵаҩы Кристина Кәарҷиаԥҳа, англыз бызшәа арҵаҩы Милана Ахвледиани, апсихолог Сабина Махариаԥҳа. Аԥсуа бызшәеи алитературеи гәыла-ԥсыла ахәыҷқәа ирызназго, уажәшьҭа аԥышәа змоу Диана Задеԥҳа. Лааԥсара ахә шьауа, ашкол аиҿкааҩ Ларина Гәымԥҳа лыбзоурала араиони, анҭыҵи иарбанзаалак ахәыҷқәа злахәу усеиҿкаарак вбак амамкәа ишымҩаԥысуа лҳәеит. Арҵаҩцәа Флора Быџԥҳа, Светлана Ԥалԥҳа, Наталиа Кириакова, Лиана Дбарԥҳа, Наҭела Смырԥҳа, Хьыма Аҩӡԥҳа, Емма Басариаԥҳа, Роза Ақаҩԥҳа, Раџь Ҳаџьымба уҳәа 50-ҩык рҟынӡа ишьақәгылоу аколлектив шьала илзааигәоу реиԥш бзиа илбоит. Хымԥада статиак аҳәаақәа ирҭагӡаны зегьы рыӡбахә узыҳәом, аха ирдыруазар лҭахуп дшырзыҟоу.

© Foto / из архива Инги Шармат
Гагратәи абжьаратә школ №1 арҵаҩратә еилазаара

Инга Шармаҭԥҳа Гагратәи аԥсуа школ аҿы аус луеижьҭеи хә-класск аулыжьхьеит, хыԥхьаӡарала иуҳәозар шәҩык инареиҳаны аҿар аԥсҭазаара амҩа ду ианылҵахьеит.

"Сара анцәа иҭабуп ҳәа иасҳәоит соушьҭымҭацәа рахьтә аӡәызаҵәык дыԥхасҭамхакәа, зегьы азанааҭқәа роуны русурақәа рҿы, аҭаацәарақәа аԥызҵахьоу анреи абреи рылҵны иахьышьақәгылаз", - инаҵылшьит арҵаҩы.

Инга Шармаҭԥҳа иахьагьы хьыӡҳәала зегьы лгәалашәоит. Шәҩык рыхьӡ лымҳәазаргьы еиқәылԥхьаӡеит аҵараҿы зҽалзкаауаз Ахра Анқәаб, Ерик Габлиа, Мадина Ҭарԥҳа, Саид Мықәба, Дауҭ Агрба, Гәыранда Кәанџьариаԥҳа уҳәа.

45 шықәса еиԥмырҟьаӡакәа Бзыԥҭатәи абжьаратә школ №1 аҟны аус зуа Маиа Чыкәбарԥҳа
© Foto / Маиа Чыкәбарԥҳа лхатә архив аҟнытә

Инга Шармаҭԥҳа ажәытәи аҿатәи еиҿырԥшуа илҳәеит раԥхьаӡа аусура даналагози, аибашьра анцозтәи лҵаҩцәеи, иахьатәиқәеи дунеихәаԥшышьала ишеиԥшым.

"Асовет ҵаҩцәа аҵара иазҿлымҳан, усҟан аидеологиа ҽакын,  апатриотизм акәын шьаҭас иамаз. Аибашьра аамҭазтәи ҳҵаҩцәа ракәзар, урҭ убриаҟара сгәы ирыцҳанашьон, ишыхәыҷқәазгьы рыбла рҭаацәаратә хьаа хубаалон. Ус егьа иҟазаргьы, амлеи, ахьҭеи агәаҟрақәеи ириааины ауаҩра рылҵит. Иахьатәи ахәыҷқәа реиҳараҩык аԥсҭазаара бзиа рымоуп, зехьынџьара агәашәқәа рзаартуп. Уалс ирыду имаашьакәа аҵараҵара ауп", - лҳәеит арҵаҩы.

Инга Виктор-иԥҳа иахьа лоушьҭымҭацәа лгәы ишҭымҵуа еиԥш даргьы дырхашҭӡом. Аӡәызаҵәык ихы иаҭәаимшьацт машьынала дыҟазаргьы, даангыланы аԥсшәа ламҳәакәа ацара.

Инга Виктор-иԥҳа ашкол аҵараҟәша инаваргыланы хантәаҩра азылуоит Гагра араион аҵара аҟәша анапаҵаҟа еиҿкаау агеографиа амаҭәар азы аметодикатә хеидкыла.

Арҵаҩы, адунеи иалаҵәаз апандемиа далацәажәо иазгәалҭеит, аҵаратә процесс аанкылара ахәыҷқәа рдырра ишаныԥшыз. Иахьа асанитартә нормақәа ирықәныҟәо ирыгхаз иахьыргӡоит ҳәа иаҿуп.

Жьҭаара 5, арҵаҩы изанааҭ амш азы, Инга Шармаҭԥҳа абиԥара ҿа рҵареи, рааӡареи иазааԥсо зегьы гәык-ԥсыкала дрыдныҳәалеит. Ирзеиӷьалшьеит агәабзиара цқьа, рнапы злаку аус аҿы ақәҿиарақәа, аҭаацәаратә маншәалара, аизҳазыӷьра. Аҵаҩцәа ирзеиӷьалшьеит амҩа иаша алхны, рыԥсадгьыл иаԥсоу ҵеицәаны иазгыларц.

Инга Виктор-иԥҳа Шармаҭԥҳа лааԥсара ахә шьауа Гагра араион аҵара аҟәшеи, Аԥсны аҵара аминистрреи изныкымкәа аҳаҭыртә шәҟәыла далыркаахьеит.

1277

Дзаҭахыуи Аԥсны апрезидент: аҳәынҭқарратә напхгаразы агәаанагара

61
(ирҿыцуп 13:47 26.09.2021)
Аԥсны Аконституциа аиҭакрақәа азутәуп, апрезиденттә ҳәынҭқарраҟынтәи апарламенттә ахь ииастәуп ҳәа иҟоу агәаанагара ахҳәаа азиуеит, ихатәы зхәыцшьа ҳадигалоит аполитикатә ҭҵаарадыррақәа ркандидат, адоцент, Sputnik аколумнист Беслан Ҳагба.

Аԥсны аполитикатә ԥсҭазаара даара илахҿыхуп, иполитикымгьы ауаҩы ҳтәылаҿы имҩаԥысуа ауаажәларра-политикатә процессқәа днарызхьамԥшлар ауӡом, зҿлымҳарак нариҭоит. Ҳаԥсуа политика аинтерес арҭоит, идырцыхцыхуеит ҳполитикцәагьы, урҭ ршьапы еиқәыршәны итәаӡам, лассы-лассы ҳтәыла шырманшәалатәу, ишеиҿкаатәу ҳзеиҭарҳәоит, абжьгара ҿыцқәа ҳадыргалоит.

Аҵыхәтәаны абас еиԥш аԥхьагылара змоу идеианы политикцәак ҳажәлар ирыларҳәеит Аԥсны аҳәынҭқарра анапхгара ареформа азутәуп ҳәа, иалацәажәоит ҳтәыла иахьа иамоу аконституциатә еиҿкаара ашьаҭақәа ԥсахтәуп ҳәа.

Еимаркуеит-еиҿаркуеит Аԥсны апрезидентра аинститутгьы, иаҳҳәап, иҟоуп имаҷымкәа аполитикцәа, аекспертцәа ари аинститут аԥыхра иадгылоу, қәҿиарала ареспублика анапхгаразы Аԥсны иаҳа ианаалоит, иаҳа иақәнагоуп ҳәа ирԥхьаӡоит апарламенттә форма змоу анапхгара. Абри анҵамҭа автор игәаанагарала, иахьа Аԥсны анапхгараҿы иаҭахызаргьы еиҭакрақәак, апрезидентра аинститут аиқәырхара дадгылоит, иагьиԥхьаӡоит, апарламенттә формахь аиасразы ареспублика макьана иазыҟаҵам ҳәа, иазыҟаҵам иԥсыҽу аполитикатә институтқәа ирыхҟьаны, насгьы, иахьа ҳтәылаҿы ишьақәгылаз, макьана иҳаракым аполитикатә культура иалҵшәаны.

Иахьа Аԥсны аҳәынҭқарра анапхгара аформа аԥсахра ихымԥадатәу зҵаароуп ҳәа ҳазнеиаанӡа, иазгәаҳҭароуп, Аԥсны - макьана иқәыԥшу, ихьыԥшым тәылоуп, аԥсуа жәлар азинтә ҳәынҭқарра аргылараҿы ирымоу аԥышәара маҷӡоуп, насгьы, иаҳхамшҭлароуп, ҳҳәынҭқарра қәҿиарала аизҳара зынӡаск иазԥхьаҳәаақәҵаӡам, ари имариам, иуадаҩу акыраамҭатәи процессуп. Иахьа иҳазҳәаӡом ҳаамҭазтәи Аԥсны инагӡаны ашәарҭара аамҭа иҭысит ҳәа, милаҭҵас, ҳәынҭқарраҵас ҳшьақәгылара нагӡахеит ҳәа. Абарҭқәа азгәаҭаны ҳазнеироуп ҳреспублика иахьа иамоу анапхгаратә форма еиҭакрақәак аҳҭозар.

Аԥсны апрезидентра аҭоурых анализ иаҳнарбоит ари аинститут ҳтәылаҿы ашьақәгылара политикатә хҭыс дуны ишыҟалаз, насгьы, ҳаԥхьаҟа ҳҳәынҭқарра аргылараҿы иамоу аҵакы иҵегь иазҳалоит. Абар ҳаргументқәагьы, абас иҳаракны абри амчратә институт ахә заҳшьо.

Иҳамӡап, аҵыхәтәантәи ашықәсқәа Аԥсны аҳәынҭқарра анапхгара, амчратә система иаанахәеит мҽхакыҭбаалатәи акризис, иӷәӷәаӡаны икаҳаит анапхгара акультура, ахаҭабзиара. Аполитикатәи, аҳәынҭқарратәи аусураҿы илаҟәӡахеит алеишәа, маҷк иџьбараны иҳамхаҳәозаргьы, иахьа аԥсуаа ҳполитикатә ԥсҭазаара цәгьа еилататоуп, ҳмилаҭ реидгыларагьы даара иԥсыҽуп. Абас иуашәшәыроу, макьана иҟәарҽаруа ашьақәгылара иаҿу аҳәынҭқарра даҭахуп амчратә система еиҿызкааша, атәыла аконституциатә шьақәгылара ахылаԥшра назыгӡаша, насгьы, адунеижәларбжьаратә еизыҟазаашьа еиҳаӡоу ахаҭарнакра азҭаша амаҵурауаҩ - ус еиԥш ареспублика амчраҿ иҟоу Аԥсны ахада, апрезидент иоуп. Аԥсны ахада иуалԥшьоуп аҳәынҭқарратә амчра арӷәӷәара, уи аҳәынҭқарра дагьасимволуп, амилаҭ рыҩнуҵҟа, амчра акәша-мыкәша еимактәқәак, еиҿагыларақәак ҟалозар, апрезидент ихамхабзиарақәа дыриааины, дашьҭазароуп амилаҭ реинраалара, реиқәырхара. Иахьа Аԥсны аполитикцәа рацәоуп, аха апрезидент иоуп аҭакԥхықәра ҷыда зду аԥсуа жәлар рҳәынҭқарратә шьақәгылараҿы ирықәҿиарц, уи иконституциатә уалԥшьоуп.

Ареспублика Аԥсны иахьа апрезидентра аинститут иаҳа иақәнагоуп ҳәа азаҳԥхьаӡоит аԥсуа жәлар ирылаҵәаз аполитикатә культура ҳацклаԥшны, даҽакала иаҳҳәозар, имҩаԥысуа ҳаамҭазтәи аполитикатә процессқәа ҳажәлар "рҽалархәшьатә культура" азгәаҭаны. Аполитикатә наука акатегориақәа ҳхы иархәаны ҳалацәажәозар, аԥсуаа ҳполитикатә практикаҿы макьана аԥыжәара амоуп апатриархалтә, аклантә еизыҟазаашьақәа. Урҭ ирхылымҿиаар залшом аморфра, цқьа еилкаам аполитикатә шьақәгыларақәа, агәаанагарақәа, ахымҩаԥгашьа амодельқәа. Абри ишьақәгылаз аполитикатә ԥсҭазаара азгәамҭакәа Аԥсны анапхгара иахьа иамоу апрезиденттә форма амхра, мамзаргьы, арԥсыҽра - ари иҭакԥхықәрадоу шьаҿахоит, ҳтәыла ҵыхәаԥҵәара змам аилаҩынтра иҭанажьуеит. Иара апарламенттә форма анапхгара ҳалацәажәо иазгәаҭатәуп уи аинститут иаҷыдоу аҭышәынтәаламра, изаамҭанытәым алхрақәа, лассы-лассылатәи амчра аԥсахра.

Насгьы, апарламенттә форма анапхгарахьы аиасразы атәылаҿы ишьақәгылароуп ишәу, еизҳазыӷьоу апартиатә система. Иахьа Аԥсны апартиақәа раԥҵара убас ихҭаркит, рхыԥхьаӡара убас идыррацәеит, наԥшыҩцәак ргәы иаанагар ҟалоит аԥсуаа "апартиатә чымазара ҿкы" рызцәырҵзар ҟалап ҳәа. Ас еиԥш апартиатә "жәылара" зхыԥхьаӡара маҷу амилаҭ рполитикатә ԥсҭазаара арҩашьоит, ишьақәнарҟьоит, рҳәынҭқарратә шьақәгылара ҵнашәаауеит, насгьы, агәрагара уадаҩуп иахьа абас еиԥхьыттоу аполитикатә мчқәа ҳаԥхьаҟа ирылшап ҳәа қәҿиарала аусура зылшо амилаҭтә парламент аԥҵара.

Аҵыхәтәаны, даҽа аргументк Аԥсны апрезидентра аинститут аиқәырхаразы, арӷәӷәаразы. Ҳтәылаҿы иахьа, Анцәа имчала, иапҵоуп аҭагылазаашьа аԥсуаа ҳҭынчны, ҳаинааланы ҳмилаҭ ҳәынҭқарра аргыларазы. Абас еиԥш аҭагылазаашьа аԥҵара ирыбзоуроуп иахьатәи Урыстәыла аиҳабыра, урҭ иҳарҭо ацхыраара, ахылаԥшра. Аха, иаҳԥеиԥшу здыруада, ҳаԥхьаҟа ҳтәыла аполитикатә, ма агеополитикатә кризисқәак ирылашәар ҟалоит, иара Қырҭтәылагьы макьана Аԥсны ишақәмақарыц иақәмақаруеит, реваншк ҳазгозар ҳәа иашьҭоуп. Абас, адәныҟатәи ҳәынҭқаррақәак ҳаԥсадгьыл шәарҭарак иҭадыргылар, Аԥсны ахьчаразы, аиқәырхаразы амилаҭ еидызкыло, амобилизациа рзызуа Аԥсны ахада, апрезидент иоуп.

Апрезидентра аинститут ҳаналацәажәо, ҳара ҳхаҿы иҟоу асимвол мацара змоу атәыла ахада иакәӡам. Аԥсны адекоративтә президент даҭахӡам. Аԥсны даҭахуп, еснагь даҭахызаауеит амчра змоу, адырра змоу, ахьӡ змоу апрезидент. Уи аполитикатә институтгьы ҳтәыла амчратә еилазаараҿы еснагь аԥыжәара амазароуп.

Автори аредакциеи рпозициақәа еиқәымшәозар ҟалоит.

61

Зхьаа згәалақәа ацәызҳәаз апоет: Витали Амаршьан игәалашәара иазкны

45
(ирҿыцуп 15:26 22.09.2021)
Иахьа иԥсы ҭаны дҳалагылазҭгьы 80 шықәса ихыҵуазаарын Аԥсны Жәлар рпоет, апрозаик, Аԥсны акультура зҽаԥсазтәыз аусзуҩ, Д.Гәлиа ихьӡ зху Аҳәынҭқарратә премиеи "Ахьӡ-Аԥша" аорден II аҩаӡареи занашьаз Витали Амаршьан. Уи игәалашәара иазку анҵамҭа азирхиеит Анатоли Лагәлаа.

"Адунеи аҿы зегь реиҳа алахьеиқәра зцу агәырӷьара – поетны аҟазаароуп. Егьырҭ зегьы рацәак ихьааӡам, аԥсрагьы налаҵаны".

Федерико Гарсиа Лорка

Иахьа иԥсы ҭаны дҳалагылазҭгьы, 80 шықәса ихыҵуазаарын Аԥсны Жәлар рпоет Витали Амаршьан. Сара раԥхьаӡа акәны Витали Амаршьан дызбеит саб ажурнал "Алашара" аредакциаҿы саннеигаз. Усҟан аа-класск рҿы стәан. Исхашҭӡом, ажурнал аредактор хада Алықьса Џьениа Аиааира Ашҭаҿы иахьа ибылны игылоу ажәытәтәи Аиҳабыра рыҩны иавагылаз х-еихагылак иҟаз аҩны аҩбатәи аихагылаҿ дтәан. Имаӡаныҟәгаҩ адҵа лиҭеит апоетцәа Мушьни Миқаиеи Витали Амаршьани сзаашьҭ ҳәа. Урҭ ахԥатәи аихагылаҿ итәан, адырра анроу, иаразнак илбааит. Алықьса иреиҳәеит сажәеинраалақәа игәцаракны ирыԥхьарц, "Сымҩашьозар, аҟыбаҩ злоу аӡә иакәзар ҟалап!" ҳәагьы нациҵеит.

© Foto / предоставил Анатолий Лагулаа
Витали Амаршьани Анатоли Лагәлааи

Убри аҽны стетрад хәыҷқәа сымхны ахы инаркны аҵыхәанӡа ирыԥхьеит саби сареи ҳаштәаз, сыгәгьы рызҭарҵеит сҩымҭа хәыҷқәа. Уи нахыстәи даҽа ҭоурыхуп, аха Виталии сареи ҳаибадырра шалагаз абас ауп…

Акыр шықәса анҵы уи ашьҭахь, 2005 шықәса рзы, иара ихаҭа ихәыҷра игәаларшәо хә-томкны иҭыҵыз ишәҟәы аԥхьажәаҿы иҩуеит:

© Foto / предоставил Анатолий Лагулаа
Витали Амаршьан

"Сахьиз, сахьааӡаз Џьгьарда ақыҭан, ҳкәасқьа ахәы ҳарак иқәгылоуп, уи сылацәа анаахыст избаз ауп, аиԥш ҭыԥ ԥшӡа, ҭыԥ џьанаҭ адунеи исзаламызт. Сныҟәо, сцәажәо, избо-исаҳауа гәныскыло саналага инаркны, ҳгәашә сынҭыҵны, Ахықә ҳәа ҳзышьҭоу адгьыл цәхыԥраҿ санааилак, лбааҟа сахьыԥшуаз, лагӡа-ҩагӡа, снапсыргәыҵа ианушәа, ҳқыҭа зегьы ккаӡа салаԥшуан.

© Foto / предоставил Анатолий Лагулаа
Витали Амаршьан

Сара сҿарагьы, аԥхыӡ еиԥш, еишьылкакараӡа, еиҭаҳәашьа змам акы иҳәаԥыӡаԥуа иалан, сгәы сыхон, аха иахьсыхоз ҳәа егьсзеилкаауамызт. Ус-ус, ихҭакны сзыԥхьоз анҭ ашәҟәқәеи, уаанӡатәи ссахьаҭыхрақәеи, сыгәҭахәыцрақәеи, зегьы неилалан, хыма-ԥсыма ақьаади акалами шьҭыхны, ажәақәа реинраалара сҽыназыскит. Уи ҿык-бзык иазымҳәо хаарак наҵызбааит, гьама ссирк нахыскааит, уахынла акәаҷаб садҟәыҟәла, аҵхқәа ԥысҽуагьы сҿаасхеит. Раԥхьаӡа изҩыз ажәеинраалагьы "Аԥсуа поетцәа шәахь" ахьӡын. Абар иаргьы, мшаҽны ишииз еиԥш, кьыс амаӡамкәа.

Ирымаӡамкәа рхатә ԥхьагыла,

Ҵыси жәҵысиҵәҟьа зԥырӡом.

Дырмит Гәлиа шәаԥхьа дангыла,

Ишьҭанеиуаз шәеиҵахаӡом.

 

Аҳәыҳә гәарҭа иԥыруа инеиуаз,

Шәаргьы шәнарԥылеит шәԥыруа.

Шәгәаҵа иҭыҵуаз шәашәа еиуаз,

Аҳауа иналалеит икаууа.

 

Ари уажә акәым, шәнеихьеит шьарда,

Шәымҩа шәықәланы шәцауеит.

Саргьы сыҵԥрааит абра, Џьгьарда,

Сызшәыхьӡозар - сшәыхьӡауеит!.."

Витали Амаршьан ихы-иԥсы ақәҵан иус ԥшьа даҿын, уи аԥсҭазаараҿы дызлаԥшыз, инырыз, дзыблыз ахҭысқәа зегьы ирҿиамҭақәа рахь ииаигеит, рыԥсы ҭеиҵеит, алитературатә ԥсҭазаара риҭеит. Уи иажәеинраалақәеи, ипоемақәеи, иажәабжьқәеи, иповестқәеи, ироманқәеи ажәлар ргәаҿы инеит, ишьҭыркааит, рыгәҭыхакәа ирзааигәахеит.

© Foto / предоставил Анатолий Лагулаа
Витали Амаршьан

Иара апоет иажәақәа рыла иаҳҳәозар: "Схы сыԥхьаӡоит сара, иааиԥмырҟьаӡакәа агармониа иашьҭоу поет лирикны. Апоезиа - уи сара исыԥсҭазаароуп, исыԥсыԥлагаҩагароуп. Аԥсабара зегь реиҳа сгәы зырцыхцыхыз, абҷеиԥш зны исыхьыз раԥхьаӡатәи сыбзиабароуп, сгәы иҭымҵәо ихааӡа ԥсраҽнынӡагьы исыцзааит. Иагьыздыруеит, иреиӷьу сҩымҭақәа, ӡыӷәарӷәалеила акәымкәа, сшьала ишҩу, сыԥсы ишахылҵыз.

Зыхшара аҩны ианыҟоу згәы раҳаҭу ан леиԥш, ианакәызаалак сҩымҭақәа акьыԥхь рбаанӡа еиҳа сгәы рызҭынчуп, еиҳа среигәырӷьоит, знык акьыԥхь иананылалак нахыс, измааноу сыздыруам аха, лахьеиқәҵарак сызцәырҵуеит. Зԥацәа хьыӡрацара изышьҭыз аб иеиԥшгьы, такәаамҭа акы сазыԥшуп. Ицаз шцаз, уаҳа ишыхнымҳәуа аныздырлак, саақәыԥсычҳауеит, уаҳа акымзарак.

© Foto / предоставил Анатолий Лагулаа
Витали Амаршьан

Уи аахыс Аԥсны ахҭыс дуӡӡақәа ҟалахьеит. Зегьы иреицәахеит 1992 шықәсазы ҳзықәшәаз аибашьра. Уи хаҭала исыцрасит, саблит".

Иахьатәи ҳара ҳформат аҿы инарҭбаан узрылаҵәажәом ашәҟәыҩҩы ипрозатәи ипоезиатәи рҿиамҭа дуқәа, урҭ ҳара ҳлитература дырбеиахьеит, иреиӷьӡоу апрозатә ҩымҭақәа рахь ишьоуп, иаҳҳәап, иҭоурыхҭә роман "Аԥсҳа". 

Ипоезиа ҳалацәажәозар, уи иреиҳаӡоу акульминациаҿ ихаргалеит аибашьра иазку иажәеинраалақәа. Апоет иҷкәын заҵә иҭахара, уи иацу агәырҩа инарҩит даара иҵаулоу, иӷәӷәоу, ԥсра зқәым ажәеинраалақәа. Абраҟа иааҳгоит урҭ руак:

Марттәи ажәылараан

Гәымысҭа ирит ахацәа ӷьеиҩқәа,

Аҟәа ргарцаз ԥхьа инеихеит!

Рҭыԥ иахымсит ирышьҭанеишаз,

Шьҭахьҟа ихьаҵны рыԥсы ргеит…

 

Ԥхьаҟа ижәылаз рхы иамеигӡа,

Аԥсра иаԥылеит хацәнымырха.

Рыԥсы ҿызхшаз уаҩ дымнеиӡеит,

Уи даргәырӷьаӡеит ҳаӷа!

 

Аҟәа далҵырц дышдәықәлахьазгьы,

Ҩаԥхьа ишьҭахьҟа дхынҳәит.

Ҳҵеицәа бзиахәқәа иҭахазгьы,

Напыҟьашьыла уаҟа иржит.

 

Иҳарымҭеит рыԥсыбаҩқәаҵәҟьа,

Наҟ-ааҟ иҳалҵырц аҭыӡшәа.

Аха иарбан иҟоу ҳԥызымшәацҳәа,

Адунеиаҿ ҳара абра!

 

Ҳаҽҳрыӷәӷәароуп ҳаӷа ицасҳәагь,

Ҳаиҭазхәыцроуп ҳ-Аԥсынра.

Иҳақәлаз раҵкыс зынӡа ишәарҭоу,

Рҵыхәажә ԥаҳҵәап ҳазҭиуа!..

 

Ҳхацәа ӷьеиҩқәа рхы назқәырҵаз,

Ршьа зызкарҭәаз ҳаҳҭынра,

Уеизгьы-уеизгьы иҳархынҳәырцаз,

Ҳаиҭажәылароуп ԥхьаҟа!

 

Адунеи дуӡӡа ашьа ааргьы,

Ажәҩан ҳақәҳаргь ибганы,

Мнеишьа ҳамам, егьа аамҭа царгьы,

Мнеишьа ҳамаӡам ҳаҩны!!!

1993, Лыхны.

Ас еиԥш иҟоу апоет инысымҩа, уи иҭижьыз ишәҟәқәа, урҭ рҵакы, дарбан аԥсуазаалакгьы идыруазароуп, иныруазароуп, насоуп уаҵәтәи ҳамш аншәарҭамхо, избанзар, уи ҳҵеира ршьала ишаагоу ауп иаҳәо апоет иԥсҭазааратә цәқәырԥара:

© Foto / предоставлены Анатолием Лагулаа
Витали Амаршьани Анатоли Лагәлааи

Аԥсны жәлар рпоет, апрозаик Амаршьан Витали Џьота-иԥа диит Аԥсны, Очамчыра араион Џьгьарда ақыҭа цәыббра 22 1941 шықәса рзы, иԥсҭазаара далҵит хәажәкыра 24 2020 шықәса рзы. Иара СССР Ашәҟәыҩҩцәа реидгылеи, Аԥсны Ашәҟәыҩҩцәареидгылеи, Урыстәыла Ашәҟәыҩҩцәа реидгылеи (1999) дырлахәылан, ашьҭахь – Аԥсны Ашәҟәыҩҩцәа рассоциациа (2003) далахәылан. Аԥсны акультура зҽаԥсазтәыз аусзуҩ (2015) ҳәа ахьӡ ихҵан. Д. И. Гәлиа ихьӡ зху Аҳәынҭқарратә премиеи "Ахьӡ-Аԥша" аорден II аҩаӡареи ианашьан. Дыҩуан аԥсышәала.

© Foto / из личного архива семьи Аджба
Апоетцәа: Таиф Аџьба, Белла Ахмадулина, Витали Амаршьан

Акыр заа иаб диԥхеит (1943 ш.). Витали, иара убас иашьцәа еиҵбацәа Валерии Артури рааӡеит рани ран лаҳәшьеи. В. Амаршьан далгеит Џьгьардатәи абжьаратәи ашкол (1959). 1962 ш. нахыс А. М. Горки ихьӡ зхыз Аҟәатәи аҳәынҭқарратә арҵаҩратә институт афилологиатә факультет аҟны аҵара иҵон. 1965 ш. иҵара ааныжьны А. М. Горки ихьӡ зху Москватәи Алитературатә институт дҭалоит. Иҵара хиркәшоит 1970 шықәсазы. Алитинститут аҟны апоетикатә ҟазара амаӡақәа аҵихуан еицырдыруа аурыс поет, алитератураҭҵааҩ С. С. Наровчатов напхгаҩыс дызмаз асеминар аҟны. Аҵара еицырҵон, иагьеиҩызцәан иналукааша аурыс поет Иури Кузнецови иареи. Аус иухьеит ажурнал "Алашара" аҭакзыԥхықәу амаӡаныҟәгаҩс, ашьҭахь аредактор хада ихаҭыԥуаҩс, Аԥсны Ашәҟәыҩҩцәа рассоциациа амаӡаныҟәгаҩс.

  • Книга Виталий Амаршан
    Книга Виталий Амаршан
    © Sputnik / Бадрак Авидзба
  • Книги Виталия Амаршан
    © Foto / предоставлены Анатолием Лагулаа
  • Виталий Амаршан
    Виталий Амаршан
    © Sputnik / Томас Тхайцук
  • Витали Амаршьан
    © Foto / предоставил Анатолий Лагулаа
  • Книги Виталия Амаршан
    © Foto / предоставлены Анатолием Лагулаа
1 / 5
© Sputnik / Бадрак Авидзба
Книга Виталий Амаршан

В. Амаршьан заа ажәеинраалақәа рыҩра далагеит. Раԥхьатәи иҩымҭақәа кьыԥхьын 1962 шықәсазы агазеҭ "Аԥсны ҟаԥшь" ("Аԥсны") аҟны, уи нахыс - ажурнал "Алашара" (№4) аҟны. Раҧхьатәи иажәабжьқәагьы кьыҧхьын "Алашара" адаҟьақәа рҟны (1966). Апоет ҿа ишьақәгылараҿы акырӡа абзоуроуп Д. И. Гәлиа, И. А. Коӷониа, Б. У. Шьынқәба рырҿиара, иара убас аурыс классикцәа: А. С. Пушкин, М. И. Лермонтов уҳәа рҩымҭақәа. Иҩымҭақәа рнылахьеит иара убас ажурнал "Амцабз", "Аҟәа-Сухум", агазеҭқәа "Аԥсны", "Советская Абхазия", "Еҵәаџьаа", "Правда", "Известия", "Литературная газета", "Литературная Россия" уҳәа. Иҭижьхьеит хыԥхьаӡара рацәала ажәеинраалақәа, апоемақәа, аповестқәа, ароманқәа, аочеркқәа. 20 инареиҳаны ажәеинраалақәеи апрозатә ҩымҭақәеи еидызкыло ишәҟәқәа ҭыҵхьеит.

В. Амаршьан иажәеинраалақәа жәпакы, иҭоурыхтә роман "Аԥсҳа" еиҭагоуп аурыси аҭырқәеи бызшәақәа рахь.

Аԥсшәахь еиҭеигеит В. Н. Соколов, С. С. Наровчатов, З. М. Тхагазитов, И. Ш. Машбаш, К. С.-Г. Џьегуҭанов, Р. Гамзатов ражәеинраалақәа, В.М. Шукшин, Г.Д. Гәлиа, Е.Ф. Басариа ражәабжьқәа, М. Твен ироман "Том Соиер ихҭысқәа" уҳәа егьырҭгьы.

Аҭыжьымҭақәа

Аԥсышәала

Агәеисыбжь. Ажәеинраалақәа. Аҟәа, 1966; Еиуеиԥшым аҟазшьақәа. Ажәабжьқәа. Аҟәа, 1967; Сразҟы. Ажәеинраалақәа. Аҟәа, 1969; Ааԥынтәи ақәа. Ажәеинраалақәа. Аҟәа. 1972; Мрагыларахь зхы хоу акәасқьа. Аповестқәеи ажәабжьқәеи. Аҟәа, 1974; Аигәныҩра. Ажәеинраалақәеи апоемақәеи. Аҟәа, 1975; Амш ахәлара иҳамнахаанӡа. Ароман. Аҟәа, 1981; Ашьхыцқәа ртәыла. Ажәеинраалақәеи апоемеи. Аҟәа, 1983; Аччаԥшь. Ажәабжьқәа. Аҟәа. 1986; Схәыҷра аӡынра. Ажәеинраалақәа. Аҟәа. 1988; Иалкаау. Ажәеинраалақәеи апоемақәеи. Аҟәа, 1991; Аԥсҳа. Аҭоурыхтә роман. Аҟәа, 1994; Уашхәа мақьаԥсыс. Аҭоурыхтә хьӡыртәра. Аҟәа, 1999; Бзиала уаабеит, Том Соиер! Ажәабжьқәа, аиҭагақәа, ажәеинраалақәа. Аҟәа, 2002; Иҩымҭақәа реизга: 6-томкны. Аҟәа, 2005-2010; аурысшәахь аиҭагақәа: Месяц сева. Стихи. М., 1980; Там где люди, там и я. Стихи. Сухуми, 1980; Леон Апсха. Исторический роман. Сухум, 2003; Апсха Леон. Историческии роман. (2-е издание). Сухум, 2012.

Витали аҵыхәтәантәи имҩахь данынаскьаргоз ари ачымазара бааԥс иҳалоу даара аҽырцәгьан иҟан, гәыблыла дызҵәыуашаз аӡәырҩы зымнеиӡеит, аха рыгәқәа рҿы рхы-рыԥсы далырхит. Абра иаазгоит уатәи сцәажәара аҟынтәи хәҭак:

Витали, уара акырынтә Аҟәа агәы ашашараҿ ҳаҷкәынцәа ахьжу утәаны иухугахьан, урҭ гәаныла урацәажәон, урҭ рхы зқәырҵаз ҳаԥсадгьыл шьҭа аӷа иганахьала кьыс шамоуа агәра дургон… Нас, аҩны уанааилак, аҵх агәы иааумнахаанӡа, уи агәырҩа иахылҵыз, ишыԥхоу, ишшу, уаԥхьаҩцәа ҳахь ииаугон, ирылухуан аҩымҭа хатәрақәа… Убас ииз роуп уажәеинраалақәа, упоемақәа, уроманқәа, иара убасгьы ҳхьаақәа зегьы згәылаҵәаху уҭоурыхтә рҿиамҭа "Уашхәа мақьаԥсыс". Аԥсыуак дыҟанаҵ, есымша иқьышә иқәыххло, инарҵаулаӡаны дзырхәыцуа, абырлаш еиԥш ҳпоезиа иалаԥсоу уцәаҳәақәа:

Ашәышықәсқәа рнаҩыс ҳаԥхьаҟа зны,

Аԥсыуак дҭынчӡа дыштәоу иҩны,

Игәиҽанӡамкәа ашә аатуеит,

Аԥша иаанартызшәагь ибауеит,

Аха аԥшакәӡам иаазыртуа,

Са соуп иҩнало усҟан уа!..

Мамзаргьы;

Ауаҩы

Ауаҩы дажәӡом, ауаҩы дааԥсоит,

Ауаҩы дкарахоит бааԥсыла!

Ашәышықәса амҵан ҭынч днатәоит,

Иԥсы ааиҭакны ҿыц дҩагыларц!..

Аха маҷ-маҷ ацәа уи дагоит,

Цәарҭасгьы изыҟалоит адәаӡа…

Ауаҩы дыԥсӡом, ауаҩы дааԥсоит,

Ауаҩы дамхацәоит наӡаӡа!.."

Абриаҟара зхызгаз апоет макьана дҳалагылазар акәын, аха имчқәа зегьы нҵәеит, ихьаақәа дыркит, игәырҩа хьанҭа изышьҭымхит. Инхеит иара иаԥиҵаз ԥсра зқәым арҿиамҭақәа, урҭ уаҵәы игыло аҿар баагәараҵас иахьчалоит…

45

Очамчыра араион ахәҭак лашарада иаанхоит аҩаша цәыббра 28 рзы

3
(ирҿыцуп 19:55 27.09.2021)
Астанциа маҷқәа "Очамчыра-2", "Мықә", "Кәачара" дырцәоит аҩаша цәыббра 28 рзы.

АҞӘА, цәыббра 27 – Sputnik. Очамчыра араион ахәҭак лашарада иаанхоит асааҭ 10:00 инаркны 16:00 рҟынӡа цәыббра 28 рзы. Абри атәы аанацҳауеит "Амшынеиқәафымцамч" апресс-маҵзура.

Ари аамҭазы ирцәахоит астанциа маҷқәа "Очамчыра-2", "Мықә", "Кәачара".

Астанҵиа маҷқәа рырцәара иахҟьаны лашарада иаанхоит:

  • "Кәачара" - ақыҭақәа Ӷәада, Џьгьарда, Кәтол
  • "Мықә" - ақыҭақәа Ҷлоу, Ҭхьына, Маркәыла, Отап, Џьал
  • "Очамчыра-2" - Очамчыра ақалақь ахәҭа.

Аенергетикцәа ражәақәа рыла, аиҭашьақәыргыларатә усурақәа мҩаԥыргоит.

 

 

3