Ишыдыдуеиԥш ақәа леиуам, мамзаргьы "Аԥсны жәлар рконгресс" азы гәаанагарак

260
(ирҿыцуп 13:01 24.04.2021)
Мшаԥы 17 рзы Олег Дамениа напхгара зиҭо Асоциал-економикатә ҭҵаарақәа рцентр еиҿнакааит аилацәажәара - иаԥҵахарц ауаажәларратә еиҿкаара "Аԥсны жәлар рконгресс". Абри азы лгәаанагара ҳамалдоит Sputnik аколумнист Елеонора Коӷониаԥҳа.

Иахьа ҵҩа змам аполитикатә партиақәеи ауаажәларратә еиҿкаарақәеи анҳамоу, ҳәарада, азҵаара цәырымҵыр ауам, урҭ излареиԥшымхои Аконгресс ҳәа. Аиашазы, акыр исзааигәоуп уи зыӡбахә амоу аидеиа, аха даҽа ганкахьала сзыцәшәақәогьы ыҟоуп.

Зегь раԥхьаӡа иргыланы аполитикатә олигархтә мчқәа ахаҩар алшоит, усҟан уи ԥеиԥш дук аиуам. Ҿырԥштәыс иаазгарц сылшоит "Амцахара", "Аруаа" анаԥырҵоз аибашьра аветеранцәа еидызкылоз ауаа урҭ рзинқәа рыхьчара иазкушәа ҳдырҳауан. Анаҩс, иахьа уажәраанӡа еиҿагылоу аполитикатә гәыԥқәа ирҵәатәышьаҟахеит. Убарҭқәа ирыхҟьаны, Аԥсны Аџьынџьтәылатә еибашьра анцоз хықәкык змаз ауаа аҭынч ԥсҭазаараҿы еиҩшаны иааҟалеит.

Аконгресс аԥҵара азҵаара иазкыз аиԥылараҿы иқәгылоз Олег Дамениа ицәажәараҿы иҳәеит "Аконгресс хықәкыс иаиуроуп ажәлар реидкылара" ҳәа. Аиҿкааҩцәа ргәаанагарала, анырра аҭатәуп ҽааны имҩаԥысраны иҟоу Жәлар Реизара адепутатцәа ралхра. Аидеиа шьахәуп, аха Олег Нестор-иԥа анкьа зымаҵ иуаз "Аидгылара" ахаан аԥсуа жәлар рхеиқәырхара азҵаатәы ихадаз цәаҳәазҭгьы, иахьа ахатә бзазара аиқәырхара азҵаатәы аԥхьагылара агахьеит ҳаԥсҭазаараҿ. Иалшарыма еиҿыркаарц ргәы иҭоу Аконгресс иахьа ҳҿаԥхьа иқәгылоу ауадаҩрақәа риааира алхрақәа рзакәан кьыс амҭаӡакәа? Даара иуадаҩуп аҳәара, избанзар, алхрақәагьы абизнестә ҟазшьа аархәахьеит.

© Sputnik / Михаил Воскресенский

Ҳара ҳалхрақәа раамҭазы ицоит акандидатцәеи алхыҩцәеи реилахәаахәҭра. Ишәгәаласыршәоит 2019–тәи апрезиденттә алхрақәа раамҭазы, еиҳаракгьы амчра иатәыз аган Аԥсны ахи аҵыхәеи бетонла иҭарҭәо ишаҿысуаз. Усҟан апрокуратурагьы ҿнамҭит. Сгәанала, ԥҟараны иҟалароуп алхрақәа раамҭазы аргыларатә усқәа реиԥш иҟоу аанкылазарц. Зсоциалтә ԥсҭазаара уадаҩу алхыҩцәа алхрақәа раамҭазы атрансформатор, амҩақәа, аӡы, афымца иазгәышьуа иҟоуп азы, акандидатцәа ирылахәаахәҭуеит. Олег Дамениа дызхагылоу ацентр ибзиаӡаны еилнакаауеит ас цашьа шамам, убри азакәхап ари аҩыза аидеиа заԥшьыргаз.

Сара ҭелла сыҽимаздеит ауаажәларратә усзуҩ, Аконгресс аиҿкааразы ахаԥшьгаратә гәыԥ иалахәу Абессалом Кәарҷиа. Хымԥада, иаргьы шә-процентк уи ҳаԥсҭазаара арӷьарахь иаргьежьыр алшоит ҳәа изышьақәырӷәӷәом, аха усгьы акыр деигәыӷуеит алҵшәа аиуп ҳәа. Кәарҷиа сиазҵааит иахьатәи адепутатцәа ралхразы азакәан шыҟоу иааныжьны, Аконгресс ишԥалшари алхрақәа анырра рыҭара ҳәа. Иара исеиҳәеит "Аконгресс еиднакылароуп знысымҩа бзиоу, аҵара змоу ауаа. Политикатә мчрак ари анырра анаҭо ианыҟала, аус ҵакыдахоит, саргьы маҷк уи сацәшәоит" ҳәа.

Кәарҷиа ииҳәаз ала, иаҭахуп ауаа рацәажәара, рыхдырраҿы анагара, ҳаԥсҭазаара ҭышәынтәаларц азы адепутатрахь кандидатцәас ишалхтәу иреиӷьу ауаа.

Аиашазы, гәыӷрада иԥсхьада, маҷк сгәы бжьажьозаргьы, Олег Дамениа иеиԥш иҟоу ауаҩы инапы злеикыз аус алҵшәа аанашьҭрашәа сыҟоуп, акызаҵәык, Аконгресс ашҭа мгәала ихәыцуа, акоррупциа знысымҩа иалоу ауаа ашҭа иҭамлароуп…. Еилкаау усуп, иахьатәи ҳзакәанқәа шыҟоу ала, Аконгресс еиҿкаахаргьы, рекомендациатә мчуп иаиуа. Аибашьра ашьҭахьтәи аԥсуа ԥсҭазаара ареформа зҭаху ак акәны ишыҟоу убаратәы иҟоуп, ҳазҭагылоу аамҭаҟынтәи шьҭахьҟа ҳхьаԥшыр. Амилаҭтә хдырра акыр аҭагәҭасрақәа зныԥшуа акәны иҟалеит.

Сазааҭгыларц сҭахуп аабыкьа ҳ-Парламент акомитеттә еилатәараҿы аԥсуа депутат аҳәынҭқарратә бызшәа идыруазароуп ҳәа алхрақәа рзакәан алагалақәа рзуразы апроект иахьалацәажәоз, "уи макьана ҳаззыҟаҵам акоуп" ҳәа ацәажәара ицәырҵыз. Алагала ҳәа изҿу иааиуа 2022 шықәсазтәи алхрақәа рзакәмызт, анаҩстәи рзакәын. Убас акәзаргьы, иахьазы уи алагала инахоуп. Ари иаҳнарбоит, ҳҳәынҭқарра иахаҿроу ахатәы бызшәа аиаӡаара амҩа ишану шаҳбогьы, изырҿио акгьы ҟаҳҵарц ҳгәы ишҭам.

Ари адагьы, ҳтәыла акоррупциа ахыҵәаны излаҟоу ала, ҳҳәынҭқарра аҿиара агәрагара ҳцәыӡуа ҳалагеит, акоррупциа алацәажәара ада, уи аҿаԥҽразы амҩақәа ахьыҭшәахаз азы. Ачынуаа рмал ашәҟәы арбаразы ахаԥшьгаратә гәыԥ 20-тәи ахәҭаҷ алагаларазы азҵаатәы ықәдыргылоижьҭеи маҷ ҵуама, аха акәаԥ макьанагьы иргылам. Ажәлар агәынамӡара рымоуп Жәлар Реизара аусуразы, уахь анеира рзымариам ҳәа ирыԥхьаӡоит аҵара змоу ахатәрақәа. Аҵарауаҩ Олег Дамениа иқәгылараҿы иҳәахьан "адепутатразы ԥынгылак ыҟазароуп" ҳәа.

Аабыкьа имҩасыз аҭыԥантәи ахаланапхгаратә усбарҭақәа рдепутатцәа ралхра иккааӡа иаанарԥшит ауаа уамак хшыҩзышьҭра шарымҭо алхрақәа. Зегь реиҳа ауаа рацәаҩны иахьынхо Аҟәа ԥшьыџьара алхарақәа ҟамлаӡеит, 25 процент ауааԥсыра рнеира шазхозгьы. Ари иаҳнарбоит ауаа иалырхуа адепутатцәа ринтересқәа рыхьчара, рсоциалтә бзазара ашьҭыхра ишахаҵгыло азы агәрагара шрымам. Ас цашьа амамзар акәхап.

Ажәеи ажәеи еихҳәаало, исгәаласыршәарц сҭахуп, аибашьра ҟалаанӡа еиҿкааз ауаажәларра-политикатә еиҿкаара "Аидгылара" ҳара ҳҭоурых аҿы ихадоу ароль шааннакылаз имариамыз аамҭазы – асоветтә система аилаҳара иаҿын, даҽа ганкахьала ақырҭуа фашизм аҿиара иаҿын. Ҳара иаҳҭахын ҳетнос еиқәзырхоз амчра. "Аидгылара" ахадацәа ракәын усҟантәи ҳполитикатә ԥсҭазаара алахьынҵа зыӡбозгьы. Исгәалашәоит адепутатцәа ралхра инаркны, ажәлар рлахьынҵа анырра азҭоз ахҭысқәа зегьы аидгылараа рхы еилаҵаны ишырыӡбоз.

1989 шықәсазы СССР Иреиҳаӡоу ахеилак ахь депутатцәас иқәдыргылада, иагьалырхыда? Владислав Арӡынба, Алықьса Гогәуа, Фазиль Искандер реиԥш иҟаз ахатәрақәа. Агха ҟарҵама? Анаҩсан, Арӡынба иакәзар - ҳара дҳаԥхьагыланы дҟалеит. "Ахьтәы парламент адепутатцәа" ҳәа иахьа уажәраанӡа зыӡбахә ҳҳәалогьы "Аидгылара" иаӡрыжәыз роуп.

Иахьатәи аамҭахь ҳгьежьуазар, зегь акоуп ианшәарҭахалакгьы, уи "Ахьтәы парламент" иалаз рӷьырак рыбжьы дыргоит. Абас иҟалеит уажәгьы. Аконгресс ҳаԥсҭазаара нырра бзиак анаҭап ҳәа сызгәыӷуа еиҳаракгьы уи аԥшьызго рнысымҩа саԥшноуп. Иааихҵәаны уи ауп изылшо ҳаԥсҭазаара ииашаны амҩақәҵара ҳәа аҳәара сцәыуадаҩзаргьы, Дамениа ицентр арҭ иҳаҩсыз ахәышықәса имҩаԥыргоз иаӷьыз, ашәара зцымыз ақәгыларақәа рыла ажәлар рҿы авторитет бзиагьы рымоуп.

Аконгресс аԥшьго, аидеиа авторцәа гәҭакыс ирымоуп ҳаԥхьаҟатәи алхрақәа рхы иоужьны акәымкәа, анырра арҭарц ажәлар рацәажәара мҩас ишьҭыхны. Ажәлар рацәажәара акәын шьаҭас иамазгьы амилаҭ-хақәиҭратә қәԥара аамҭазы "Аидгылара" аиҿкаарагьы. Ус ахьышәҭҳәа акгьы алыршамхеит. Иҟан аҽазыҟаҵаратә аамҭа, ажәлар рыхдырра арцыхцыхразы. Имгәыӷкәан иԥсхьада. Издыруада, иалшар арыӷьарахь агьежьра. Ишыдыдуеиԥш ақәа леиуам рымҳәои…

Автори аредактори ргәаанагарақәа еиқәымшәозар ҟалоит.

Иара убас шәаԥхьар ҟалоит:

260

Ҳаԥсуа бызшәа аҵаулара ҳӡаазырԥшылаз: Баграт Шьынқәба игәаларшәаразы

6
(ирҿыцуп 20:38 15.05.2021)
Ҳаԥсуа литератураҿы Баграт Шьынқәба иҟаиҵаз хәызмаӡам алагала атәы дазааҭгылоит апоет, ажурнал "Алашара" аредактор хада Анатоли Лагәлаа.

Ҳаԥсуа литератураҿы апоезиа иреиҳаӡоу аҩаӡараҿы ихазгалаз ҳпоетцәа дуқәа рыӡбахә анаҳҳәо, зегь раԥхьаӡа ихьӡ ҳаргылоит Аԥсны Жәлар рпоет, академик Баграт Уасил-иԥа Шьынқәба. Уи ҳаԥсуа бызшәа иалшоз зегьы алзыршаз, ахьыршәыгә еиԥш еилазцалаз, ахаара-бзаара зегьы цәырганы иаҳзырбаз, агьама ҳзыркыз, уи аҵаулара ҳӡаазырԥшылаз поет дуӡӡоуп.

Иаахҵәаны иуҳәар ҟалоит, маҷк игәаӷьыуацәоуп ҳәа зшьо ыҟазаргьы, Баграт ицәаҳәа ахьынӡахалаз, уи иаанартыз аԥшӡарақәа, даҽа аԥсыуа поетк ицәаҳәа зымнаӡаӡацт, иазаамыртӡацт ҳәа. Уи дшыхәыҷӡаз ишьҭикааит, аԥсы шҭаз дахьӡеит иреиӷьӡаз жәлар рҳәамҭақәа, рфольклор, рлакәқәа, рашәақәа, рлегендақәа, ибеит изҭагылаз ргәаҟра-рҵәаҟра, далагылеит рыԥсра-рчара, ирыцеиҩишеит ажәлар ргәырӷьареи ргәырҩеи.

Шьынқәба Баграт Уасил-иԥа (12.05.1917, Аԥсны, Очамчыра араион Ҷлоу ақыҭа, – 25.02.2004, Аҟәа) – апоет, апрозаик, аҵарауаҩ-алингвист, афольклорист, ауаажәларратәи аҳәынҭқарратәи усзуҩы. Афилологиатә ҭҵаарадыррақәа ркандидат (1945). Аԥсны аҭҵаарадыррақәа Ракадемиа академик (1997). Аԥсны жәлар рпоет (1967), Ҟабарда-Балкариеи Адыгатәылеи жәлар рышәҟәыҩҩы (1990), Асоциалисттә Џьа Афырхаҵа (1988). Ианашьоуп Ленин иорден (1966), Алитература азы Д.И. Гәлиа ихьӡ зху Аҳәынҭқарратә премиа (1967, ароман "Ахра ашәа" азы), Ш. Русҭавели ихьӡ зху Қырҭтәылатәи ССР Аҳәынҭқарратә премиа, "Ахьӡ-аԥша" аорден актәи аҩаӡара. СССР-и Аԥсни Рышәҟәыҩҩцәа реидгылақәеи Урыстәыла Ашәҟәыҩҩцәа реидгылеи (1999) рлахәыла. Дыҩуан аԥсышәала.

© Foto / Предоставлено Анатолием Лагулаа
Адемократиатә Республика Виетнам ахада Хо Ши Мини Аԥсны Иреиҳаӡоу Ахеилак Ахантәаҩы Баграт Шьынқәбеи 1959 ш. Аԥсны.

Ҷлоу ақыҭантәи алагарҭатә школ дҭан (1926-1928), нас - Џьгьарда ақыҭантәи быжь-шықәсатәи ашкол (1930 ш. инаркны). Дрылгеит Аҟәатәи арҵаҩратә техникум (1935), А.М. Горки ихьӡ зхыз Аҟәатәи аҳәынҭқарратә арҵаҩратә институт афилологиатә факультет аԥсуа бызшәеи алитературеи рыҟәша (1939), Қырҭтәылатәи ССР Аҭҵаарадыррақәа ракадемиа абызшәадырра аинститут аспирантура (1944). Аџьынџьтәылатә еибашьра Дуӡӡа анҵысы, Аԥсныҟа дхынҳәит, 1943 ш. азынӡагьы рҵаҩыс аус иуан, анаҩс – агазеҭ "Аԥсны ҟаԥшь" аредакциаҿы, Н.И. Марр ихьӡ зхыз абызшәеи аҭоурыхи Аԥснытәи рыҭҵаарадырратә институт аҟны. 1943-1944 шш. раан иҵара иациҵон Қарҭ Абызшәадырра аинститут аҟны.

1947 ш. февраль 25 рзы Б.У. Шьынқәба, Гь.А. Ӡиӡариа, К.С. Шьаҟрыл ашәҟәы дәықәырҵеит ВКП(б) Ацентртә Комитет (Ацентр Комитет амаӡаныҟәгаҩ А. А. Кузнецов ихьӡала) ашҟа, уаҟа иаахтны иадырбеит аԥсуа жәлар рзинқәа реилагареи ркультура аицакреи шымҩаԥысуаз. Б. Шьынқәба дналаҵаны ашәҟәы авторцәа ирышьклаԥшуа иалагеит, ашәҟәыҩҩы усҟан дызлеиқәхаз џьашьахәуп.

1954-1958 шш. раан Б. Шьынқәба Аԥсны Ашәҟәыҩҩцәа реидгыла дахантәаҩын, 1958-1979 шш. рзы – Аԥсны Иреиҳаӡоу Ахеилак Ахантәаҩыс дыҟан. 1959, 1978, 1984 шш. раан СССР Иреиҳаӡоу Ахеилак адепутатс далырххьан, 1989 ш. - СССР жәлар рдепутатс. 10 шықәса инареиҳаны Аԥсны Аминистрцәа Рхеилак Д.И. Гәлиа ихьӡ зху Аҳәынҭқарратә премиа рыҭаразы акомиссиа дахантәаҩын. Аԥсны Аџьынџьтәылатә еибашьра (1992-1993) ашьҭахь акыр шықәса хадара азиуан Аԥсны Ахада иҟны иҟаз Ауаажәларратә хеилак.

© Foto / Предоставлено Анатолием Лагулаа
Адемократиатә Республика Виетнам ахада Хо Ши Мини Аԥсны Иреиҳаӡоу Ахеилак Ахантәаҩы Баграт Шьынқәбеи 1959 ш. Аԥсны.

Дышхәыҷыз жәлар рҿаԥыц рҿиамҭақәа дрызҿлымҳахеит, иара убас раԥхьатәи аԥсуа поетцәеи апрозаикцәеи, Д.И. Гәлиа, И.А. Коӷониа, С.И. Ҷанба уҳәа, рҩымҭақәа. Дышнеишнеиуаз уи иажәеинраалақәеи, ипоемақәеи, ибалладақәеи жәпакы шьаҭас ироуит афольклортә сиужетқәа.

Ажәеинраалақәа рыҩра далагеит акыр заа. Раԥхьатәи иажәеинраалақәа ируакуп 1935 ш. ажурнал "Аԥсны ҟаԥшь" ианылаз "Ахаҵара". Уи нахыс иҩымҭақәа ркьыԥхьуан ажурналқәа: "Алашара", "Амцабз", "Абаза", "Аҟәа-Сухум", "Дружба народов", "Новый мир", агазеҭқәа: "Аԥсны ҟаԥшь", "Советская Абхазия", "Сабҷоҭа Аԥхазеҭи", "Республика Абхазия", "Сухум вечерний", "Абхазия" (Москватәи аҭыжьымҭа), "Еҵәаџьаа", "Нарҭ", "Федерация", "Литературная Россия", "Литературная газета"; аизгақәа: "Литературная Абхазия", "Ерцахә"; ашәҟәқәа: "Памятник нам сыновей не заменит… Ажәеинраалақәеи ашәақәеи" (Аҟәа, 1994), "Ахаҵарашәа. Ажәеинраалақәа. Ажәабжьқәа. Астатиақәа – Песнь мужества. Стихи. Рассказы. Статьи" (Аҟәа-Сухум, 1995); "Аԥсуа поезиа антологиа. ХХ ашә." (Аҟәа-Москва, 2001; аиҭаҭыжьра – Аҟәа-Москва 2009).

© Foto / Предоставлено Анатолием Лагулаа
Наҟ-ааҟ игылоуп Баграт Шьынқәбеи Чилитәи апоет Пабло Нерудои. Аҟәа, асасааирҭа "Абхазия". 1957 ш.

1938 ш. Аҟәа иҭыҵит раԥхьатәи иажәеинраалақәа реизга "Раԥхьатәи ашәақәа".

1940-тәи ашықәсқәа ралагамҭеи – 1960-тәи ашықәсқәеи раан апоет иаԥиҵоит ажәеинраалақәа: "Амҳаџьыраа ргарашәа" (1940), "Апартизан" (1942), "Сыԥшалас" (1958), "Аӡынтәи ашьыжь" (1959) уҳәа егьырҭгьы; абалладақәа: "Ахәыҷра" (1940), "Аҿырпын" (1947), "Риҵа" (1948), апоема "Иаирума" (1960), аԥсуа литература аклассика акәны иагьыҟалеит.

Арҭ ашықәсқәа раан Б. Шьынқәба иҽԥишәоит апоезиа аепикатә форма дуқәа рҟны, иҩуеит апоема "Аҳәачаԥа", иажәеинраалоу ароманқәа "Аҿатә уаа", "Ахра ашәа".  Иажәеинраалақәа "Амҳаџьыраа ргарашәа", "Апартизан", "Сыԥшалас", "Кофта шкәакәа зшәу" уҳәа ирылхны иаԥҵан ашәақәа, лассы-лассы урҭ жәлар рашәақәа ракәынгьы ирыдыркылоит.

© Foto / Предоставлено Анатолием Лагулаа
Баграт Шьынқәбеи Аԥсны Жәлар рартист, раԥхьатәи аԥсуа композитор Ражден Гәымбеи

1960-тәи ашықәсқәа раан Б. Шьынқәба дырзыхынҳәуеит алирикатә жәеинраалақәа, аурыс, ақырҭуа, европатәи апоезиа уҳәа рҟнытә аиҭагара инапы алакын. Апоет апрозаҿы раԥхьатәи ишьаҿақәа ҟаиҵоит. Раԥхьатәи ипрозатә ҩымҭа – аповест "Чанҭа дааит" анылеит ажурнал "Алашара" 1969 шықәсазы (№4). Абри ашықәс азы уи еиҭаган аурысшәахь, Е. Герасимов ибзоурала, иагькьыԥхьын ажурнал "Новый мир" (№6) аҟны. Уинахыс Б. Шьынқәба иҩуеит ароман "Ацынҵәарах", раԥхьаӡа акәны ианылеит ажурнал "Алашара" (№1-8) 1974 шықәсазы; хаз шәҟәны иҭыжьын уи ашықәс анҵәамҭазы.

Аԥсны Жәлар рпоет Баграт Шьынқәба
© Foto / Из архива музея им. Баграта Шинкуба

Ироман "Ахаҳә еиҩса" актәи ашәҟәы иҩит 1979-1981 шш. раан, иагькьыԥхьын ажурнал "Алашара" (1982 ш. (№4,5,6,7) аҟны, хаз шәҟәны иҭыҵит 1983 шықәсазы. Хара имгакәа аурысшәахь еиҭеигеит И. Бехтерев, иагьҭнажьит аҭыжьырҭа "Советский писатель" (М., 1986). Аҩбатәи ашәҟәы аҩра далагеит 1987 шықәсазы, иагьхиркәшеит 1991 ш. маи мзазы. Аҵыхәтәантәи авариант кьыԥхьуп Б. Шьынқәба иҩымҭақәа реизга 4-тәи атом аҟны (1998).

Б. Шьынқәба иҩымҭақәа реиҳарак (ажәеинраалақәа, апоемақәа, абалладақәа, ароманқәа, аповест) аурысшәахь еиҭагоуп (еиҭаргеит И. Козловски, С. Липкин, Р. Козакова, А. Межиров, И. Неиман, Л. Длигач, Д. Голубков, В. Луговскои, В. Потапова, В. Державин, Р. Рожденственски, К. Симонов, В. Ахмадулина, С. Куниаев, Л. Мигдалова, Е. Балашов, Б. Брик, Л. Озеров, Г. Павловскаиа, Б. Серебриаков, М. Луконин, Е. Николаевкаиа, И. Кушак, Е. Евтушенко, М. Алигер, Е. Герасимов, И. Бехтерев, Д. Чачхалиа уҳәа егьырҭгьы), иҩымҭақәа жәпакы (еиҳаракгьы "Ацынҵәарах") еиҭагоуп адунеи акыр абызшәақәа рахь.

Б. Шьынқәба авторс дрымоуп иара убас аҭҵаарадырратә усумҭақәа жәпакы, урҭ рызкуп аԥсуа бызшәеи, афольклори, аетнографиеи. Еиқәиршәеит афольклортә текстқәа реизга, урҭ иреиуоуп: "Абхазские сказания" (аурысшәахь еиҭеигеит С. И. Липкин, Аҟәа, 1961), "Нарҭ Сасрыҟәеи ԥшьынҩажәи зеижәҩык иашьцәеи рыхҭысқәа" (еиқәдыршәеит Ш.Д. Иналиԥеи, К. С. Шьаҟрыли, иареи); аурысшәахь еиҭаргеит Г. Гәлиа, В. Солоухин; Аҟәа, 1988), "Ахьырҵәаҵәа; Аԥсуа жәлар рҿаԥыц ҳәамҭақәеи аетнографиатә материалқәеи" (Аҟәа, 1990) уҳәа егьырҭгьы.

Б. Шьынқәба деицырдыруеит еиҭагаҩык иаҳасабалагьы. Уи аԥсшәахь еиҭеигеит А.С. Пушкин, М.И. Лермонтов, Н.А. Некрасов, Џь. Баирон, И.В. Гиоте, Ш. Бодлер, П. Верлен, Ш. Петефи, Ш.М. Бараташвили, А.Р. Ҵереҭели, Г.В. Табиӡе ражәеинраалақәа, Ш. Русҭавели ипоема "Абжьас-цәа зшәу" ацыԥҵәахақәа уҳәа.

Аҭыжьымҭақәа

Аԥсышәала: Раԥхьатәи ашәақәа. Ажәеинраалақәа. Аҟәа, 1938; Аҳәачаԥа. Аҟәа, 1943; Ажәеинраалақәа. Аҟәа, 1948; Аҿатә-уаа. Иажәеинраалоу ароман (Альманах. Аҟәа, 1951, №2. (2-тәи аҭыжьымҭа – Аҟәа, 1955; инхарҭәаау авариант – Аҟәа, 1963); Ажәеинраалақәеи апоемақәеи. Аҟәа, 1956; Иаирума. Амшәкәашара. (Ахәыҷқәа рзы апоема). Аҟәа, 1961; Аԥхын. Аҟәа, 1962; Ахра ашәа. Иажәеинраалоу ароман. Аҟәа, 1965; Иалкаау иҩымҭақәа: 2-томкны. Аҟәа, 1967-1968; Ацынҵәарах. Аҭоурыхтә роман: 3-шәҟәыкны. Аҟәа, 1974; Ажәа. Ажәеинраалақәеи аиҭагақәеи. Аҟәа, 1975; Иҩымҭақәа реизга. 3-томкны. Аҟәа, 1977-1979; Ахаҳә еиҩса. Ароман. Аҟәа, 1983; Аӡыхь. Ахәыҷқәа рзы ажәеинраалақәеи алакәқәеи. Аҟәа, 1985; Ааԥынтәи ашәахәақәа. Ажәеинраалақәа. Аҟәа, 1986; Иҩымҭақәа реизга: 4-томкны. Аҟәа, 1987-1988; Иҩымҭақәа реизга. 5-тәи атом. Иацы. Иахьа. Уаҵәы. Ажәеинраалақәа, ажәабжьқәа, астатиақәа, ақәгыларақәа (Аԥсышәалеи урысшәалеи). Аҟәа, 2003; Иҩымҭақәа реизга. 6-тәи атом. Есымшааира ашьха схалоит: Ажәеинраалақәа, аҭҵаамҭақәа, ақәгыларақәа. (Аԥсышәалеи урысшәалеи). Аҟәа, 2008; Ажәеинраалақәа. Аҟәа, 1988. (Асериа "Иалкаау аԥсуа лирика" ала).

Аурысшәахь аиҭагақәа: Мои земляки. Роман в стихах. М., 1953. (аиҭаҭыжьра - Қарҭ, 1958; М., 1967); Стихотворения (и поэмы "Домой". – "Песня о скале" ацыԥҵәаха). М., 1959; Сыновний долг. Стихи. М., 1962; Где бы я ни был… Стихи. Тбилиси, 1963; Медвежья пляска. Сказка (в стихах). (Для младшего школьного возраста). М., 1963; Песня о скале. М., 1967; Стихи и баллады. Сухуми, 1971; Избранное. М., 1976; Последний из ушедших. Роман. 1976; (переиздания – М., 1978, 1979); Сухуми, 1985; Избранные произведения; в 2 томах. М., 1982; Рассеченный камень. Роман. М., 1986; Мое дерево. Стихи. М., 1987; Праздник большой семьи. Стихи. (Для младшего школьного возраста). М., 1987; Проза. Романы, повесть. М., 1988; Сказка о капризном козленке. Стихи и сказки (в стихах).  (Для младшего школьного возраста). М., 1989; Последний из ушедших. Романы. Повести. Нальчик, 1994; Избранные произведения: в 2-х томах. Сухум, 2011.

Аукраин бызшәахь: Аӡыс гәымшәа. Ашколқәра иаҵанакуа рзы алакә. Киев, 1967: Ацынҵәарах. Ароман. Киев, 1983.

Аҟабарда бызшәахь: Ацынҵәарах. Ароман. Нальчик, 1989.

Аҟазах бызшәахь: Ацынҵәарах. Ароман. Алма-Ата, 1981.

Англыз бызшәахь: Ацынҵәарах. Ароман. Москва, 1986.

Анемец бызшәахь: Ацынҵәарах. Ароман. Берлин, 1981.

Аҭырқәшәахь: Ацынҵәарах. Ароман. Сҭампыл, 1990.

Ақырҭшәахь: Ажәеинраалақәа. Апоемақәа. Қарҭ, 1969.

Араб бызшәахь: Ацынҵәарах. Ароман. Амман, 1987.

6
Владислав Ардзинба

Ҳадгьыл еиԥш дыԥшьоуп: Владислав Арӡынба диижьҭеи 76 шықәса ҵит

47
(ирҿыцуп 13:53 14.05.2021)
Аԥсны Раԥхьатәи ахада, жәлар рԥыза, иахьатәи Аԥсуа Ҳәынҭкарра ашьаҭаркҩы Владислав Григори-иԥа Арӡынба иԥсы ҭаны ижәлар дрылагылазҭгьы иахьа ихыҵуазаарын 76 шықәса.

Наала Гәымԥҳа, Sputnik

Аԥсны Раԥхьатәи ахада Владислав Арӡынба диит лаҵарамза 14, 1945 шықәсазы Алада Ешыра ақыҭан. Иара акыр шықәса инеиԥынкыланы Москва аус иуан Асовет Еидгыла Аҭҵаарадыррақәа ракадемиа иатәыз Мрагылараҭҵаара аинститут аҿы.

© Sputnik / Владимир Федоренко

Владислав Григори-иԥа Арӡынба аполитикахь диасаанӡа акыраамҭа инапы злакыз аус аҿы иман аихьӡара дуқәа. Иара аполитикаҿы дцәырҵит Аԥсны иаҳа иуадаҩыз аамҭазы. Жәлар рдепутат СССР Иреиҳаӡоу Асовет алахәылаҩны даныҟаз, автономтә еиҿкаарақәеи Асовет Еидгыла ажәлар маҷқәеи рзинқәа рыхьчара иазкыз аусӡбатәқәа рыдкылара дацхраауан Аԥсуа жәлар рмилаҭ-хақәиҭратә қәԥара.

1988 шықәсазы Москва иус ааныжьны, иԥсадгьыли ижәлари реиқәырхаразы, иҩызцәа ражәа ҩбамтәкәа, Аԥсныҟа дхынҳәит Владислав Арӡынба. Уи ашықәсан Д.И. Гәлиа ихьӡ зху Аԥсуа бызшәеи, алитературеи, аҭоурыхи ринститут (иахьа - Аԥсуаҭҵааратә институт) аиҳабыс даиуеит.

1989 шықәса рзы Владислав Арӡынба Асовет Еидгыла Иреиҳаӡоу Асовет Жәлар рдепутатс, автономтә еиҿкаарақәа рҳәынҭқарратә статус азы акомиссиа далан. Ԥхынҷкәынмза 1990 шықәса рзы Владислав Григори-иԥа Арӡынба далырхуеит Аԥснытәи АССР Иреиҳаӡоу Асовет ахантәаҩыс. Убри инаркны аԥсуа жәлари аҳәынҭқарреи рзинқәа рыхьчараҿы иус иҵегьы еихеиҳауеит. Иара Аԥсны Иреиҳаӡоу Асовет дахагыланы уи аҳәынҭқарратә суверенитет аиҭашьақәыргылара ахырхарҭа шьҭихит.

Владислав Арӡынба Аԥсны Аџьынџьтәылатә еибашьраан (1992–1993) напхгара аиҭон Атәылахьчаразы аҳәынҭқарратә хеилак, Аԥсны архәҭақәа Рыдҵаҟаҵаҩ Хадас дыҟан.

Ашьа анахьыкьасуаз, ҳаԥсадгьыл амца анақәҵәашоз, ахьтәы даҷқәа дырныргылан Анцәа ду даҳзылбааишьҭит Владислав. Аибашьцәа драԥхьагылан, ажәа ҟәышла, ажәа хаала ргәы ирӷәӷәон, анацәа ргәыӷрақәа идырҳәалон, ибла ихырбаалон Аиааира, игәра ргон, Анцәа иеиԥш имҵаныҳәон. Фырхаҵак иҭахара иара изыҳәан ихьаа дуун, ҵәымӷҵас игәы иналалон, ахаан ӷьара зқәым гәырҩаны изаанхон.

Владислав инапхгарала ҳаԥсуа жәлар ирылшеит ақырҭуа мпыҵахаларатә архәҭақәа аԥсуа дгьыл рықәцара, аибашьра Аԥсны жәлар риааирала ахыркәшара.

Ҳаԥсадгьыл амца еибафара иалигеит, иаҳгеит Аиааира: "Ҳарҭ аибашьра ҳацрарҳәеит. Ҳрымпыҵархаларц, ҳақәырхырц рыӡбеит. Аха ҳара ҳажәлар аиашара иазықәԥон, иагьаиааит", - ҳәа иҳәон иара иԥсы ҭанаҵы.

Анацәа, зыҷкәынцәа зыцәҭахазгьы, ргәы еизнарҳаит Аиааира, мраны ирықәыҷҷеит уи зыла иамбаз афырхацәа.

Ицәгьан аибашьра ашьҭахь ҿыц анхара, аҳәынҭқарра аиҭашьақәыргылара. Зыжәлар ргәыӷрақәа зыршаҳаҭыз Владислав, Аԥсны Аҳәынҭқарра ахадас далырхуеит абҵара 26, 1994 шықәсазы. 1999 шықәса жьҭаара 3 рзы жәлары зегьы рыбжьыҭирала ҩынтәны деиҭалырхуеит. 

Владислав Арӡынба даара илагала дууп Аԥсны аибашьра ашьҭахь аекономика ашьҭыхраҿы, акультуреи анаукеи реиҭашьақәыргылараҿы, Аԥсны Аҳәынҭқарра аҳәаақәа рырӷәӷәараҿы. Зегьы илиршеит, игәабзиара дамеиҷаҳаит. Иара иаԥшьгарала имҩаԥысуан ихьыԥшым Аԥсны Аконституциа ҿыц ашьақәыргылара, Аԥсны адәныҟатәи аусқәа Рминистрреи, Аԥсны Арбџьар Мчқәеи, амчратә структурақәеи реиҿкаара.

Владислав Арӡынба ибзиаӡаны идыруан дызну амҩа, уи шыуадаҩыз, аԥсуа жәлар рзинқәа рыхьчара усҟак ишымариамыз атәы. Аԥынгылақәа шырацәазгьы, зегьы акоуп иара илшеит ижәлар реидкылара, игәра ргартә еиԥш аусқәа рымҩаԥгара, рзинқәа рыхьчара, ҳажәҩан арлашара, ашәышықәсақәа рҵеи ҳгерби ҳбираҟи дырсимвалхеит, ҳгәашьамх, ҳ-Абраскьыл.

Иԥсадгьыл ахақәиҭра - уи иара иԥсҭазаара аҵакы акәын. Владислав имҩаԥигоз аполитика иабзоураны, шәышықәсала аҵарауаа иҭырҵааша афырхаҵаратә епос аԥиҵеит.

Владислав Арӡынба илшеит Аԥсуа Ҳәынҭқарра ашьақәыргылара, уи Аԥсни иааидкыланы Кавкази рҭоурых ианхалоит еицакра ақәымкәа, зхақәиҭра иазықәԥо ажәларқәа зегьы ҿырԥштәыс изықәныҟәаша иакәны наӡаӡа даанхоит.

Ауаҩы дзиуа баша адәы дықәзарц акәӡам, дани, адгьыл данаднакыла, ижәлар рзы ихы дамеигӡароуп, иԥсы ахьынӡаҭоу абзиара ҟаиҵалароуп, адунеи аниԥсахлак, ишьҭахь иаанхо ажәа хаала дыргәаладыршәартә еиԥш. Владислав Григори-иԥа Арӡынба хьтәы бираҟны ҳҭоурых адаҟьақәа дырнылеит, ахаан даныҵрангьы дыҟаӡам. Уи ҳадгьыл еиԥш дыԥшьоуп!

Иагьа шәышықәсақәа ҵыргьы, Аԥыза ихьӡ кашәаӡом.

Иагьа шәышықәсақәа ҵыргьы, ихьӡ ижәлар ирыԥхом!

Иара убас шәаԥхьар ҟалоит:

47

COVID-19 злаз даҽа пациенткак лыԥсҭазаара далҵит Гәдоуҭатәи ахәышәтәырҭаҿы

14
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 15006-ҩык ыҟоуп, ргәы бзиахеит 14025-ҩык, рыԥсҭазаара иалҵит 226-ҩык.

АҞӘА, лаҵара 15 – Sputnik. Иҳаҩсыз уахыки-ҽнаки рыла COVID-19 рылоу ирыламу аилкааразы 176-ҩык атестқәа рзыҟаҵан, урҭ рахьтә 22-ҩык рцәа акоронавирус шалаз аадырԥшит ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Гәдоуҭатәи ахәышәтәырҭаҿы лаҵара 14 рзы лыԥсҭазаара далҵит 1939 шықәса рзы ииз акоронавирус злаз апациентка.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 51-ҩык, урҭ рахьтә 41-ҩык акоронавирус адиагноз рзышьақәыргылоуп, рҭагылазаашьа бааԥсуп 28-ҩык, ибжьаратәуп - 12-ҩык.

Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 31-ҩык апациентцәа, рҭагылазаашьа бааԥсуп хәҩык. Очамчыра ирхәышәтәуеит 16-ҩык, Гагратәи ахәышәтәырҭаҿы - 17-ҩык, Тҟәарчалтәи ахәышәтәырҭаҿы - ԥшьҩык апациентцәа.

Акоронавирус иазку ажәабжьқәа зегьы шәрыԥхьар ҟалоит абра>>

14
Атемақәа:
Аҿкычымазара – акоронавирус Аԥсни адунеи аҿи: иалкаау