АҞӘА, рашә 20 — Sputnik, Наала Аҩӡыԥҳа. Аинвестициатә программа аҳәаақәа ирҭагӡаны иазыԥхьагәаҭоуп ҳаамҭазтәи анормақәа ирықәшәо агәам-сам еизакырҭақәа рыргыларазы 40 миллион мааҭ рҟынӡа аԥара азоужьра ҳәа Sputnik иазааицҳаит Аԥсны аекологиеи аԥсабара ахьчареи рзы аҳәынҭқарратә еилакы аиҳабы Савели Ҷыҭанаа.
Иара иажәақәа рыла иахьазы иҟоу агәам-сам каԥсарҭақәа рцынхәрас иаартхоит х-еизакырҭак.
Ареспубликаҟны иахьазы бжь-каԥсарҭак ыҟоуп, урҭ руак, Цандрыԥшь ақыҭа иахьаҵанакуа, хаԥышәала иаартуп, азгәеиҭеит аеколог.
"Агәамкаԥсарҭақәа иааҳакәыршаны иҟоу аԥсабара ааха арҭоит, урҭ атехнологиа ишақәнаго еиҿкаам азы. Адгьыл ихәшәырку аӡшьарқәа аламларц азы агәамсам аплионка аҵаршәызароуп. Иҟалап урҭ аӡшьарқәа адгьыл аҵатәи аӡқәа ирылалозаргьы",- азгәеиҭеит иара.
Уи адагьы, иазгәеиҭеит аеколог, агәам аилабаараан иалҵуеит ишәарҭоу абиогаз – метан. Уи иалнаршоит ааигәа-сигәа абылрақәа рцәырҵра.
Агәамкаԥсарҭақәа рҭыԥ аҟны аизакырҭақәа рыргылараан аусура ҷыдақәа мҩаԥгатәуп, иҳәеит С. Ҷыҭанаа.
Абарҭ зегь рышьҭахьгьы ацәынхақәа реизакра апроблема зыӡбхом. Иаҭахуп агәамсам аусеиҭадулара зылшо азауад аргылара, аха иахьазы аԥара ҳамам. Зегь раасҭа ихадоу: аус еиҭазыдуло агәам ахархәара ззыруша аалҵ алырхыроуп. Ус иҟамлар – азауад наҟ аԥара ахшәаалатәхоит, иҳәеит иара. Асеиԥш иҟоу азауад аргылара иаҭахуп 1,5 – 2 миллиард мааҭ.
Аиҳабыра рҟны, азаанааҭуаа алацәажәаразы ихианы ишьҭоуп агәамсам аусеиҭадуларазы иакымкәа апроектқәа, иҳәеит С. Ҷыҭанаа.
Ауаажәларратә палата алахәыла Александр Ченгьелиа иажәақәа рыла, шықәсқәак раԥхьа сербиатәи аилак ITC иҳаднагалахьан асеиԥш иҟоу азауад аргылара апроект. Иҳадгалаз атехнологиа Green Power ала уахәаԥшуазар апроект аинтерес аҵан –агәамсам аус адуланы иҳаур алшон адизельтә былтәы. Аха ари апроект ҿиара амоуит.
С. Ҷыҭанаа ихәшьарақәа рыла шықәсык аҩныҵҟа 80-90 тонна абзазаратә црыҵқәа еизоит.
