Адокументалтә фильм "Мрагыларатәи афронт" аӡыргара мҩаԥысит

© Фото : Амра ЏьынџьалԥҳаАдокументалтә фильм "Мрагыларатәи афронт" аԥҵаҩцәа аҭыхрақәа раан
Адокументалтә фильм Мрагыларатәи афронт аԥҵаҩцәа аҭыхрақәа раан - Sputnik Аҧсны
Анапаҵаҩра
Ажурналист Амра Аџьынџьалԥҳаи, асахьаҭыхҩы, Аԥсны Аџьынџьтәылатә еибашьра анцоз Мрагыларатәи афронт архәҭақәа ргәыԥ еиҳабыс иҟаз Баҭал Џьапуеи рхатә инициативала еицаԥырҵаз адокументалтә фильм "Мрагыларатәи афронт" аҭыхрала хықәкыс ирыман архивтә кадрқәа рхы иархәаны, аҭыхымҭа ҿыцқәа ҟаҵаны, Мрагыларатәи ахырхарҭала ицоз ахроника ашьақәыргылара.

АҞӘА, рашә 30 — Sputnik, Сырма Ашәԥҳа. Адокументалтә фильм "Мрагыларатәи афронт" аӡыргара иалахәыз зегьы рықәгыларақәа рҟны иазгәарҭон аԥхьаҟагьы ишацҵатәу аибашьра аазырԥшуа ахҭысқәа реиҭаҳәара.

Ажурналист Амра Аџьынџьалԥҳаи, асахьаҭыхҩы, Аԥсны Аџьынџьтәылатә еибашьра анцоз Мрагыларатәи афронт архәҭақәа ргәыԥ еиҳабыс иҟаз Баҭал Џьапуеи рхатә инициативала еицаԥырҵаз адокументалтә фильм "Мрагыларатәи афронт" аҭыхрала хықәкы хадас ирыман архивтә кадрқәа рхы иархәаны, аҭыхымҭа ҿыцқәа ҟаҵаны, Мрагыларатәи ахырхарҭала ицоз ахроника ашьақәыргылара.

Афильм зну адискқәа х-нызқь цыра ҭыжьуп. Иара аԥҵоуп урысшәала, аха аибашьра иазкыу атерминалогиа аҵарауаа аус адырулар, хымԥада аԥсшәахь ишеиҭагатәу рҳәеит афильм авторцәа.

Аԥсны Аҳәынҭқарра раԥхьатәи Ахада Владислав Арӡынба идҵала, Баҭал Џьапуа, Мрагыларатәи афронт иазкыз ашәҟәы ҭижьхьан "Фронт восходящего солнца" ҳәа хьӡыс иаманы. Убри шьаҭас иаҭаны иаԥҵан адокументалтә фильмгьы. Афильм шьақәгылоуп хы-хәҭакны, х-сааҭк ицоит.

"Афильм еиҿкаауп афактқәа рыла. Мрагыларатәи афронт мраҭашәаратәи афронт иаҿырԥшны ҳахәаԥшуазар, еиҳа иӡыргоуп. Мраҭашәаратәи афронт иазкны, хымԥада, афильм аԥҵатәуп.  Иҟаҵоу шмаҷымгьы, ҳаззааҭгылаша еиҳагьы еиҳауп. Сара гәҭакыс исыман Мрагыларатәи афронт аҟны апартизантә еибашьра акәымкәа, мҽхакы ҭбаала аибашьра шцоз аарԥшра. Афильм х-сааҭк ишцогьы, зегь рыӡбахә ҳәаӡам, аха ари раԥхьатәи шьаҿоуп. Анаҩс иҵегь иацҵатәуп", — ҳәа азгәеиҭеит Баҭал  Џьапуа.

Ажурналист Амра Џьынџьалԥҳа излалҳәо ала, аибашьра иазкыз атематика ала афильмқәа аус рыдлымулацызт. Ҳәарада, акырӡа ауадаҩрақәа ацын.

"Аԥсуа телехәаԥшра архивтә материалқәа сышрыхәаԥшуаз избеит, аефир ала ателехәаԥшцәа ирымбацыз акадрқәа. Урҭ акадрқәа Баҭал Џьапуа исырбеит, избанзар Мрагыларатәи афронт аҟны дыҟан, идыруан уи атәы. Лассы-лассы ҳаицахәаԥшлон. Нодар Џьынџьал аибашьра анцоз иҭихыз акадрқәа ицәырӷьычит. Убас еиԥш иҟалеит, афильм аԥҵара ҳгәы ианҭаҳк, издырхынҳәит икассетақәа. Нодар икассетақәа жәаба сара исиҭеит. Иара убас, Рамин Қаџьаиа уаанӡа аԥсуа телехәаԥшра иаимҭацыз авидеоҭыхымҭақәа сиҭеит. Уахгьы ҽынгьы ҩышықәса аус рыдаҳулон арҭ аматериалқәа", — лҳәеит Амра Џьынџьалԥҳа.

Афильм аҟны ахархәара рымоуп, аԥсуа телехәаԥшра арежиссиор Анатоли Шьониа, аоператорцәа Рамин Қаџьаиа, Нодар Џьынџьал  Аԥсны Аџьынџьтәылатә еибашьра анцоз иҭырхыз авидеоматериалқәа.  Афильм режиссиорс дамоуп Даур Логәуа, акомпиутерттә графика аиқәыршәыҩцәас иҟоуп Анна Тесликовеи Сергеи Корпеикини, ҳаамҭазтәи акадрқәа ҭихуан аоператор Зорро Бигәаа.

© Фото : Амра ЏьынџьалԥҳаАдокументалтә фильм "Мрагыларатәи афронт" аԥҵаҩцәа аҭыхрақәа раан
Адокументалтә фильм Мрагыларатәи афронт аԥҵаҩцәа аҭыхрақәа раан - Sputnik Аҧсны
Адокументалтә фильм "Мрагыларатәи афронт" аԥҵаҩцәа аҭыхрақәа раан

 

Ажәабжьқәа зегьы
0