Сириантәи ахәыҷқәа Риҵа рыԥсшьара

Аиааирамш аламҭалаз Сириатәи ахәыҷқәа 50-ҩык Риҵаҟа аныҟәара рзеиҿкаан

62
(ирҿыцуп 19:16 12.10.2015)
Сириантәи 50-ҩык инареиҳаны ҳџьынџьуаа, аӡиа Риҵаҟа аныҟәарақәа рзеиҿкаан. Урҭ рахьтә иҟан ԥшьышықәса зхыҵуаз инадыркны 20 шықәса зхыҵуаз рҟынӡа. Ахәыҷқәа даара гәахәала ирыдыркылеит ирзеиҿкааз аныҳәатә мшы.

АҞӘА, цәыббра 28 — Sputnik, Сырма Ашәԥҳа. Аԥсны Аиааира 22 шықәса ахыҵреи, Кәырбан-Баирам ныҳәа аҳаҭырази, Сириантәи зҭоурыхтә ԥсадгьыл ахь нхара ҳәа  ихынҳәыз ҳџьынџьуаа хәыҷқәа рзы ауаажәларратә еиҿкаара "Жәларбжьаратәи афонд Аԥсны" ҳтәыла аҭоурыхтә ҭыԥ ԥшӡарақәа рахь аныҟәарақәа еиҿнакааит.

"Жәларбжьаратәи афонд Аԥсны" ахада Сонер Гогәуа иажәақәа рыла, зегь раԥхьаӡа  хықәкыс ирымаз, Сириа, аибашьра иалҵны зҭоурыхтә ԥсадгьыл ахь иааз ҳџьынџьуаа хәыҷқәа, аморалтә цхыраара рыҭара ауп. Иара убас, Аԥсадгьыл абзиабареи аԥсуареи рылааӡара.

"Шәара ибзианы ижәдыруеит Сириатәи Ареспубликаҿы имҩаԥысуа аполитикатә ҭагылазаашьа зеиԥшроу. Уа ицо аибашьра иахҟьаны, ҩмиллионк  инарзынаԥшуа ахҵәацәа,  Сириантә Ҭырқәтәылаҟа иагеит. 20 нызқьҩык инарзынаԥшуа  Европатәи аҳәынҭқаррақәа  рахь рымҩа дырхеит.  Иҟоуп амҩан ирыԥгылаз ауадаҩрақәа ирзымиааикәа зыԥсҭазаара иалҵқәаз. Урҭ рхыԥхьаӡара зықьҩыла иҟоуп", – иҳәеит Сонер Гогәуа.

Сонер Гогәуа иажәақәа рыла, ҳџьынџьуаа хәыҷқәа аныҟәарақәа ззеиҿкааз, аибашьра иалҵыз, ахысбжьы заҳахьоу, ҳацхыраара, ҳадгылара зҭахыу ауаа роуп.

"Ҳара, аԥсуаа ибзианы еилаҳкаауеит ажәа "ахҵәара" иаанаго. Аамҭаказы, ҳара ҳаиҳабацәа уи аҩыза рхыргахьан. Ахҵәара иацу ауадаҩрақәа, аԥсҭбарақәа акырӡа ирацәоуп. Ахеиқәырхаразы, аԥсҭазаара иазықәԥатәуп. Сгәы иаанагоит, ҳара ҷыдала, адиаспора аус ҳазыҟазароуп ҳәа. Ҳара ибзианы еилаҳкаароуп, уаҵәтәи амш изызҳауа ҳара ҳхәыҷқәа шракәу. Убри аҟынтә, досу иҳалшо ала ҳрывагылароуп. Ахәыҷы аиҳабацәа рҟынтәи иоуа ахылаԥшра, ахаҵгылара, ахааназы ихашҭӡом", – ҳәа азгәеиҭеит Сонер Гогәуа.

Сириантәи 50-ҩык инареиҳаны ҳџьынџьуаа, аӡиа Риҵаҟа аныҟәарақәа рзеиҿкаан. Урҭ рахьтә иҟан ԥшьышықәса зхыҵуаз инадыркны 20 шықәса зхыҵуаз рҟынӡа. Ахәыҷқәа даара гәахәала ирыдыркылеит ирзеиҿкааз аныҳәатә мшы.

"Сара Аиман Даӷәыз сыхьӡуп. Ҩышықәса раԥхьа, Сириантәи  сҭаацәеи сареи Аԥсныҟа нхара  ҳааит. Саҳәшьеиҳаб Ҳиба лыхьӡуп, дҭаацәароуп.  Сан Кәыџԥҳауп. Сара Аҟәатәи ахԥатәи абжьаратә школ аҟны аҵара сҵоит, 14 шықәса схыҵуеит. Даараӡа сгәы иахәеит, хаҭалагьы Сонер Гогәуа иҭабуп ҳәа иасҳәоит иаҳзеиҿикааз аныҳәазы. Исхамшҭуа мшны иаанхоит сыԥсҭазаараҿы", – ихәеит Аиман Даӷәыз.

Аныҟәарақәа ззеиҿкааз ҳџьынџьуаа ҳәыҷқәа ирыцын урҭ  рҭаацәагьы. Басмиа Маршьанԥҳа лакәзар,  ԥшьҩык ахшара дрануп. Рыԥшьҩыкгьы аҵара рҵоит Аҟәатәи 4-тәи абжьаратә школ аҟны.

"Сара, анык лаҳасаб ала, ҭабуп ҳәа расҳәарц  сҭахыуп "Жәларбжьаратәи афонд Аԥсны" аусзуцәа. Ари даара аҵакы ӷәӷәа амоуп ҳара ҳзы. Агәаԥхаражәа  зегьы ирыцкыуп ҳара ҳзы. Ҳхәыҷқәа ирбаз рхашҭраны иҟаӡам", – лҳәеит Басмиа Маршьанԥҳа.

"Жәларбжьаратәи афонд Аԥсны" аусзуҩ Сабина  Быҭәԥҳа, ахәыҷкәа ргәалаҟазаара ҳацеиҩшо иазгәалҭеит:

"Ахәыҷқәа даара  аԥсуара рылааӡоуп, аиҳаби аиҵби реихаҵгылашьа рдыруеит. Агәыԥ иалахәыз рахьтә ирацәаҩуп аурыс бызшәа зҳәоз. Раԥсуа бызшәа акырӡа ихьысҳауп. Аха, агәаҳәара аадырԥшит ирҵарц шырҭахыу. Сара излазгәасҭаз ала, ирацәаҩуп аҟазара, арҿиара злоу ахәыҷқәа. Уи дырҵабыргуеит дара рыкәашарақәа, рышәаҳәарақәа, рыжәеинраалаԥхьашьа. Хымԥада, ас еиԥш иҟоу апроектқәа ҳфонд аԥхьаҟагьы аус аднаулалоит", — лҳәеит Сабина Быҭәԥҳа.

"Жәларбжьаратәи афонд Аԥсны", Аиааира 22 шықәса ахыҵра аҳаҭыразы изхаҵгыло ауснагӡатәқәа рацәоуп.  Убарҭ ируакыуп Астол гьежь: "Аԥсни адиаспореи реимадара аизырҳара", иара убас, ахшара рацәа змоу, Аԥсны Аџьынџьтәылатә еибашьра иалахәыз, зегь реиҳа иқәыԥшу аветеран  иҭаацәа абзазаратә маҭәахәқәа рыла ацхыраара иҭара.

Аиааирамш аламҭалаз Сириатәи ахәыҷқәа 50-ҩык Риҵаҟа аныҟәара рзеиҿкаан
© Sputnik Сырма Ашәԥҳа
Аиааирамш аламҭалаз Сириатәи ахәыҷқәа 50-ҩык Риҵаҟа аныҟәара рзеиҿкаан
62

Ажьиԥҳа еиҭалҳәеит Гагра араион аҿы зҭагылазаашьа уадаҩу ашколқәа ртәы

12
(ирҿыцуп 20:25 13.08.2020)
Гагра араион аҵара аҟәша аиҳабы Мадина Ажьиԥҳа арадио Sputnik аефир аҿы еиҭалҳәеит Аԥсны аҵареи абызшәатә политикеи рминистр Инал Габлиа араион аҟны иныҟәараан излацәажәаз азҵаарақәа ртәы.
Раионк аԥсҭазаараҟынтә: Ажьиԥҳа Гагра араион ашколқәеи ахәыҷбаҳчақәеи рҭагылазаашьа атәы

"Ҿыц иргылоу Гагратәи актәи ашкол ҳаҭаан игәаҳҭеит, уи ашәқәа раартразы иагу ыҟоуп, аха ари аамҭа иалагӡаны аусқәа хыркәшахоит. Иара убас иаҭаан ахәыҷбаҳча, иара акапиталтә ремонт азун, аха ашҭаҿы иагу ыҟоуп, уи анагӡаразы адгылара шауа атәы ҳәан. Иааиуа амчыбжь азы ахәыҷқәа рыдкылара ҳалагоит, иахьа уажәраанӡа араион аҿы ахәыҷбаҳчақәа еиуеиԥышм амзызқәа ирхырҟьаны аус руӡом. Арыцхә 20 рзы ахәыҷбаҳчақәа раартразы аҭагылазаашьа ҳауп ҳәа ҳгәыӷуеит. Хшыҩзышьҭра ааҭан иаԥсыуам ашколқәа рҿы аԥсуа бызшәа дырҵаразы аметодика", - ҳәа еиҭалҳәеит Ажьиԥҳа.

Гагра араион аҵара аҟәша аиҳабы еиҭалҳәеит араион аҿы зҭагылазаашьа уадаҩу ашколқәагьы шыҟоу.

"Урҭ руак - Цандрыԥшьтәи аҩбатәи абжьаратә школ ауп, уаҟа 350 инареиҳаны аҵаҩцәа аҵара рҵоит. Аӡымҩангагақәа зынӡагьы инагаӡам, уажәы аҿкы аан ишьақәыргылоу аԥҟарақәа рықәныҟәара даара иуадаҩуп, араион ахадара ҳақәдыргәыӷит ари азҵаара аӡбара адгылара шаиуа ҳәа. Ашкол аартразы иахьӡом, аха мызкы-ҩымз иалагӡаны аусурақәа нагӡахап ҳәа агәыӷра ҳамоуп. Иара убас аҭагылазаашьа уадаҩуп Пицундатәи аурыс школ аҿы, уаҟа аҵара рҵоит 400-ҩык, ашкол ҩ-сменак рыла аус ауан. Аҿкы аҽацәахьчаразы аԥҟарақәа инарықәыршәаны ҩ-сменак зынӡа иаҟәыхтәуп, ари азҵаарагьы ӡбашьак аиуп ҳәа ҳгәы иаанагоит", - ҳәа еиҭалҳәеит Ажьиԥҳа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы.

Иара убас шәаԥхьар ҟалоит:

12

Инал Габлиа Гагратәи аҵара-ааӡаратә обиектқәа рзы: иҟаҵоу маҷым, аха ирыгугьы рацәоуп

1141
(ирҿыцуп 22:41 13.08.2020)
Гагра араион ашколқәеи ахәыҷбаҳчақәеи иааиуа аҵара шықәс ҿыц иахьынӡазыхиоу аилкааразы араион усутә ныҟәарала даҭааит Аԥсны аҵареи абызшәатә политикеи рминистр Инал Габлиа.

Саида Жьиԥҳа, Sputnik

Гагра араион ашколқәеи, ахәыҷбаҳчақәеи аҵара шықәс ҿыц иахьынӡазыхиоу аилкаара иазкын Аԥсны аҵареи, абызшәатә политикеи рзы аминистр Инал Габлиа аԥшьаша, нанҳәа 13 рзы араион иҭаара. Раԥхьаӡа акәны иара дымҩахыҵит ҿыц иргылаз Гагратәи абжьаратә аԥсуа школ №1 ахь. Араҟа изыԥшыз араион ахадара аиҳабы ихаҭыԥуаҩ Асҭамыр Ҵышәбеи, араион аҵара аҟәша аиҳабы Мадина Ажьиԥҳаи, ашкол адиректор Хана Гәынԥҳаи изеиҭарҳәеит аобиект аргылара шхыркәшоугьы, ргәы иҵхо апроблемақәа шыҟоу. Инагӡаны аҭыԥ иқәҵаӡам афымцалашара, аҵакырадгьыл аиҿкаара, ахыбра аҩнуҵҟа уажәнатә акафель ахькыдыҷҷаз ыҟоуп.

© Foto / Саида Жиба
Аҵара аминистр Гагра араион иаҭаара

Гагратәи абжьаратә школ №1 ргылан аинвестпрограмма инақәыршәаны. Аобиект шьаҭанкыла аргыларазы раԥхьанатә ишьақәыргылаз абиуџьет акәзар, 500 миллион шыҟаз, хышәи бжаки рҿынӡа ианыркьаҿха, хымԥада апроект аҿы иҟаҵатәны иарбаз ахьтә ианыххаз ҟалеит, убарҭ иреиуахеит атрансформаторгьы.

"Зегь раасҭа ипроблеманы иҳамоуп апроект аҟнытә атрансформатор ахьаныххаз. Анкьа ахархәара змаз афымцалашара еиқәнаршәоит ааигәа иҟоу аҩнқәагьы, ашкол ҿыц афымца амчхара еиҳахоит азы ахатәы трансформатор амазароуп. Ари азҵаараҿы аекономика аминистр Кристина Озган адгылара шҳалҭо лҳәеит, ҳгәыӷуеит лассы иӡбахап ҳәа", - азгәеиҭеит Гагра араион ахадара аиҳабы актәи ихаҭыԥуаҩ Асҭамыр Ҵышәба.

Инал Габлиа аҵаратә корпусқәа рыҩбагьы, акттә зали, аспорттә зали дрыҩнысны ибеит. Анапынҵақәа ҟаиҵеит, ирҽеитәу зегьы асиа ианҵаны, иақәырӡхо ахарџьи шьақәыргыланы ирҭарц.

"Гагратәи аԥсуа школ шьаҭанкыла иргылоу обиектуп. Аиашазы ашҭа уҭалаанӡагьы улаԥш иԥшӡаӡа иҵашәоит, уи уаҩ игәы иамыхәарц залшом. Амала иҟоуп зыриашареи, зыӡбареи аҭаху азҵаарақәа. Араион анапхгареи, аҵара аҟәшеи, ашкол адиректори еицҿакны иазгәарҭеит ргәы иҵхо рахьтә ихадараны ишыҟоу афымцалашара азҵаара. Ҳаицәажәараҟны еилкаахеит мышқәак рышьҭахь ашкол ахь афымца шнагахо. Атрансформатор азҵаарагьы ирлас иӡбахап ҳәа сгәы иаанагоит. Аиашазы арҽеирақәа ахьаҭаху маҷӡам. Амцаҽацәыхьчаратә система азхәыцрақәак агуп, аԥенџьырқәа аԥардақәа рымаӡам, џьара-џьара акафель кыдыҷҷахьеит, ашкол аҵакыра еиҿкаатәуп. Ажәакала аргылаҩцәа рганахь ацәажәарақәа мҩаԥаагароуп", - ҳәа инаҵишьит аминистр.

Инал Габлиа иҳәеит, ашкол аргылара хылаԥшра азҭоз акомиссиа аҵара аҟәшеи, ашкол адирекциеи рхаҭарнакцәагьы алахәызҭгьы, иахьа абарҭ апроблемақәа цәырымҵар ауан ҳәа. Убас иациҵеит, ҩаԥхьа иргылахо аҵара-ааӡаратә обиектқәа ргәаҭаратә гәыԥқәа анышьақәгылахо аан, Гагратәи аԥышәа ишазхьаԥшуа, уи иднарбаз ҟалеит азы.

Гагра араион аҵара аҟәша аиҳабы Мадина Ажьиԥҳа цәыббра аказы ахәыҷқәа ашкол ахь рааира акагьы аԥырхагамхап ҳәа агәыӷра лымоуп.

Сынтәа Ҳ. Ҳ. Чамагәуа ихьӡ зху аԥсуа школ 50 шықәса ахыҵуеит азы, еиҳагьы иҭоурыхтә хҭысхоит шьаҭанкылатәи аргыларақәа рышьҭахь абри ашҭаҟны раԥхьатәи аҵәҵәабжьы гар. Аҵара аҟәша аиҳабы аҭагылазаашьа лхы иархәаны иҭабуп ҳәа ралҳәеит ашкол аргылара иазааԥсаз зегьы, убас аџьшьара рылҭеит зыԥсшьарамшқәа раан арахь иааины аџьабаа збаз арҵаҩцәа.

Ашкол адиректор Хана Гәынԥҳа аргыларақәа цонаҵы уахи-ҽни лылаԥш рхын аусмҩаԥгатәқәа зегьы. Агәаҭаратә комиссиа дшаламызгьы, лгәы зызхьаауаз, ирҽеитәны илбоз лыбжьы ақәлыргон.

"Амилаҭ-хақәиҭратә қәԥара иалиааз ашкол аиубилеитә рыцхә азы ашәқәа раартра аҵак ду амазаауеит. Ари ахҭыс ҳгәы хыҭ-хыҭуа ҳазыԥшуп хәыҷи-дуи. Аиашазы иҟаҵатәу, насгьы инагӡатәу аусқәа шыҟоугьы агәкажьра ҳамаӡам. Арҭ амшқәа ирылагӡаны акәаԥ ҳаргылароуп", - ҳәа азгәалҭеит лара.

Анаҩс аминистр даҭааит Гагратәи ахәыҷбаҳча №1 "Мрамза". Араҟагьы ааигәа акапиталтә ремонт хырқәшан. Иагу шыҟоугьы, аҭагылазашьа ахәыҷқәа рыдкыларазы иманшәалоуп. Аха зыӡбара хымԥадатәиу ауп агәараанда аԥсахра.

© Foto / Саида Жиба
Аҵара аминистр Гагра араион иаҭаара

"Аҳәара шәысҭоит агәараанда ҿыц ашьақәыргылараҿы ацхыраара ҳашәҭарц. Ахәыҷқәа ашҭахь ианнаҳго ҳалаԥш шырху ирхуп, акәымзар џьара-џьара иахьеилаҳахьоу икылсуеит ҳәа иалагоит. Насгьы хылаԥшрада ақалақь иалоу алақәа ҭалар, ирзыцҟьар ҳәа ҳшәоит", - агәҭынчымра аалырԥшит ахәыҷбаҳча аиҳабы Белла Кәакәасқьырԥҳа.

Аҵареи, абызшәатә политикеи рзы аминистр Инал Габлиа аколлектив рҿаԥхьа иқәгылаз азҵаарақәа рыӡбараҿы адгылара шриҭо иҳәеит. Убас иазгәеиҭеит иахәҭоу аметодикатә цхыраагӡатәқәа рыла ишеиқәиршәо.

Амш иалагӡаны Инал Габлиа аинспекциатә гәаҭарақәа мҩаԥигеит Цандрыԥшьи Пицундеи.

1141