Финальный концерт - Споем вместе.

Апроект "Сара сашәа" аихшьаалатә концерт мҩаԥысит

41
(ирҿыцуп 00:55 26.12.2015)
Аԥсуа радио еиҿнакааз апроект "Сара сашәа" аҟны 2015 шықәсазы аиааира згақәаз ашәаҳәаҩцәа злахәыз аконцерт мҩаԥысит.

АҞӘА, ԥхынҷкәын 25 – Sputnik, Бадраҟ Аҩӡба. Ашәаҳәаратә проект "Сара сашәа" аихшьаалатә концерт мҩаԥысит Ражден Гәымба ихьӡ зху Аԥснытәи аҳәынҭқарратә филармониа ахыбраҿы ахәаша, ԥхынҷкәын 25 рзы.

Апроект "Сара сашәа" аихшьаалатә концерт иалахәын 2015 шықәса аҩнуҵаҟа аԥсуа радио азыӡырҩцәа иреиӷьу ҳәа иалыркааз ашәақәа.  

Ари ахәылԥаз азы рышәаҳәарала ахәаԥшцәа дыргәырӷьеит ашықәс иалагӡаны апроект аҟны актәи аҭыԥқәа аанызкылаз ашәаҳәаҩцәа: Хатуна Ҭарԥҳа, Ильда Кәыҷбериаԥҳа, Анатоли Алҭеиба, Саида Агырԥҳа, Саида Габниаԥҳа уҳәа аԥсуа естрада ашәаҳәаҩцәа.

"Иазгәасҭарц сҭахуп ари апроект раԥхьаӡа акәны ишцәырҵыз 2013 шықәсазы. Убри ашықәс инаркны, ҳара иазаҳаӡбеит ашәақәа аԥсышәала ҳажәлар рызнагара, аԥсуа ашәақәа аизҳара рымазарц азыҳәа", — лҳәеит апроект "Сара сашәа" автор, Аԥсуа радио аиҳабы Сусанна Саӡԥҳа.

Сусанна Саӡԥҳа иазгәалҭеит, апроект аиҿкаара ахықәкы хадақәа ишреиуоу аԥсуа бызшәа ашьҭыхра.

"Апроект аԥҟарақәа рыла, азыӡырҩцәа иргәаԥхаз ашәазы рыбжьы рҭиуеит есымза ател аҟынтәи инарышьҭуа асмс ала. Еиҳа ирацәаны абжьқәа зауа, апроек иаиааиуеит", — ацылҵеит уи.

Аиааира згаз ашәаҳәаҩцәа рзы Аԥсуа радио ирызнархиеит аҳамҭа ҷыдақәа. 

"Ари ашықәс азы апроект ахәаԥшҩык иаҳасаб ала салахәуп. Иахьа аиааира згақәаз ашәаҳәаҩцәа ирызку аконцерт мҩаԥысуеит. Сгәы иаанагоит, ашықәс ҿыц аламҭалаз дара аиҳарак ргәы иаахәап ҳәа. Даараӡа иҭабуп ҳәа ласҳәар сҭахуп апроект "Сара сашәа" аиҿкааҩ Сусана Саӡԥҳа. Ҳаамҭазы, асеиԥш иҟоу апроектқәа реиҿкаара даара имариам", — иҳәеит ашәаҳәаҩ Асҭамыр Кәыҵниа.

Апроект "Сара сашәа" ҩы-шықәсоуп имҩаԥысуеижьҭеи.

41

Аԥснытәи аушьҭымҭацәа ахьтәи араӡни медалқәа ранашьан

30
(ирҿыцуп 20:28 03.07.2020)
2020 шықәса рзы Аԥснытәи ашколқәа ирылгеит 1791-ҩык аҵаҩцәа. Урҭ рҟынтәи 11-ҩык амедалқәа рыманы иалгеит, 64-ҩык "ибзиаӡоуп" ҳәа иалгеит.

АҞӘА, ԥхынгәы 3 – Sputnik, Ренат Ԥачлиа. Абжьаратә школқәа роушьҭымҭацәа амедалқәа ранашьара мҩаԥысит Аԥсны Акультура аминистрраҿы ахәаша, ԥхынгәы 3 рзы.

Аԥсны аҵареи абызшәатә политикеи рзы аминистр ихаҭыԥуаҩ Медеиа Ченгьелиаԥҳа илҳәеит сынтәатәи ашықәс уаанӡатәиқәа ишреиԥшым, аепидемиологиатә ҭагылазаашьа иахырҟьаны аҵаратә процесс шыԥсаххаз. Ус шакәугьы, аминистрра официалла аҵарашықәс хнаркәшеит.

"2020 шықәса рзы Аԥснытәи ашколқәа ирылгеит 1791-ҩык аҵаҩцәа. Урҭ рҟынтәи 11-ҩык амедалқәа рыманы иалгеит, 64-ҩык "ибзиаӡоуп" ҳәа иалгеит. Иаҳҳәар ҳалшоит, медалла ашкол иалгаз аҵаҩцәа ԥхьаҟазы ҳҿар рыхьтәы фонд иалахәхо роуп ҳәа. Абас иҟоу аҿар роуп уаҵәтәи ҳԥеиԥшгьы знапаҿы иҟало", - ҳәа лҳәеит  Ченгьелиаԥҳа.

Аԥсны арккареи абызшәатә политикеи рзы аминистр Инал Габлиа аушьҭымҭацәа ирыдиныҳәалеит, иазгәеиҭеит раԥхьаҟа имариам амҩа шышьҭоу аха аҿар ирус хаданы иҟоу аҳәынҭқарра аҿиара рлагала алаҵара шакәу.

"Шәаԥхьаҟатәи шәыԥсҭазаараҿ зегь раԥхьа иргыланы ишәхашәмыршҭыроуп иреиҳаӡоу аҟазшьақәа: ауаҩреи аламыси» ҳәа иҳәеит Габлиа. 
Ахада ихаҭыԥуаҩ Бадра Гәынба Аԥснытәи арҵаҩцәа ҭабуп ҳәа реиҳәеит 11 шықәса дуӡӡа аҵаҩцәа  аԥсҭазаара ду амҩахь  иахьнаргоз азы, иуадаҩыз рџьазы. Иара агәрагара ааирԥшуеит рџьабаа баша ишмыӡуазы.

Аҳәынҭқарра ахада Аслан Бжьаниа ихьӡала ихаҭыԥуаҩ аҵаҩцәа рыхьӡала иааишьҭыз адныҳәаларатә шәҟәы даԥхьеит.

Араӡны медал занашьоу Данил Кәыҵниа Sputnik акорреспондент даниҿцәажәоз иҳәеит  Москватәи аҵараиурҭақәа руак аҭалара игәы ишҭоу. Амедицина азанааҭ шалихуа. Аҵара ашьҭахь иара Урыстәыла аԥышәа иманы Аԥсныҟа ахынҳәра игәы иҭоуп.

Нестор Лакоба ихьӡ зху Пицундатәи абжьаратә школ №1 хьтәы медалла иалгаз аҵаҩы Дамеи Ҳагба иазгәеиҭеит Урыстәылатәи аҵараиурҭа дҭаларц дшыҟоу, Аԥсны анџьныр-аргылаҩ ҳәа афакультет ахьыҟам азы. Иара иҳәеит иаԥхьаҟазы иԥсҭазаара Аԥсны мацара ишадиҳәало.

Аԥсны арккареи абызшәатә политикеи рзы аминистр ихаҭыԥуаҩ Медеиа Ченгьелиаԥҳа далацәажәеит ахьтәы ма араӡны медал аиушьа атәы.
Лара лажәақәа рыла, "Ахьтәи араӡни медалқәа рзы" аԥҟара инақәыршәаны ахьтәы медал аиуразы 10-11 аклассқәа рҿы "хәба" ҳәа аҵара ҵатәуп, араӡны медал аиуразы  ҩ-ԥшьбак умазар ҟалоит.

© Sputnik / Марианна Кубрава
Аушьҭымҭацәа амедалқәа ранашьара ацеремониа

"Аҵаҩцәа агәаҭара цҵатә усурақәа мҩаԥыргоит.  Актәи аетап азеиԥшҵаратә школқәа рҟны имҩасуеит. Убри аан аԥышәарақәа хԥа – ахатәы бызшәа, алгебра, нас ашкол иалнахуа рҭиироуп "хәба" ҳәа. Аҩбатәи аетап Аԥсны араионқәеи ақалақьқәеи рҿы имҩаԥысуеит", – ҳәа лҳәеит Ченгьелиаԥҳа.

Ахыркәшаратә етап мҩаԥыргоит Аҵара аминистрраҿы. Арҭ ах-етапк ирхысыз амедалқәа ранашьаразы иқәдыргылоит.

Иара убас шәаԥхьар ҟалоит:

 

30

Габниа еиҭеиҳәеит Гәдоуҭа аҽыкәабарҭатә ҭыԥқәа аԥҟарақәа иахьынӡарықәшәо атәы

183
(ирҿыцуп 19:48 03.07.2020)
Гәдоуҭа апарк-плиажтә нхамҩа аиҳабы Даниил Габниа арадио Sputnik Аԥсны аефир аҿы еиҭеиҳәеит араионтә плиажқәа аӡҭаларазы ашәарҭадара аԥҟарақәа иахьынӡарықәшәо атәы.
Раионк аԥсҭазаараҟынтә: Габниа Гәдоуҭа аҽыкәабарҭатә ҭыԥқәа аԥҟарақәа иахьынӡарықәшәо атәы

"Ацентралтә амшын цәаҳәа атәы ҳҳәозар, уажә ааигәа еилҳаргеит. Ҩ-машьынак рызна агәам-сам ықәаҳгеит, амшын ацәаҳәа излаҳалшоз ала иҳариашеит. Иргылан атәарҭақәеи агәам-сам ҭаԥсарҭақәеи. Излаҳалшо ала арыцқьара ҳаҿуп, араион ауааԥсыреи асасцәеи рзы. Аӡиасқәа амшын иахьалало аҭыԥқәа рҿы адыргақәа ҳәа акгьы ыҟам, убас аӡҳәаа арбагақәагьы. Аха аԥҟарақәа зегьы ахьарбоу ақьаад уажә ааигәа ҳнапы иаркын, аҽазыҟаҵарақәа цоит. Аплиажқәа рҿы аиқәырхаҩцәа ҳамам, иара уи адагьы аиқәырхаратә нышьқәагьы, арҭ азҵаарақәа зегьы араион ахадараҿы ирылацәажәан, аҭагылазаашьа ариашаразы аусурақәа цоит", - ҳәа еиҭеиҳәеит Габниа.

Иаҳа инеицыху аиҿцәажәара шәазыӡырҩы аудио аҿы, мамзаргьы арадио Sputnik Аԥсны аефир аҿы.

Иара убас шәаԥхьар ҟалоит:

 

183