Сухумская крепость

"Диоскуриа" арендазы аилаӡара аекспертиза харҭәаа иахыжьтәуп

19
(ирҿыцуп 13:56 18.04.2016)
Акультура аминистрраҟны иҟоу анаука-методикатә хеилак аилатәра ҭбааҟны ирыдыркылеит аӡбра аресторан "Диоскуриа" арендазы еиҳа инарҭбааны, ирҵауланы аекспертиза мҩаԥгазарц азы.

АҞӘА, мшаԥымза 18 – Sputnik, Наала Аҩӡыԥҳа. Акультуреи аҭоурыхтә-культуратә ҭынха ахьчареи рзы аминистрра мап ацәнакит Аҟәатәи абаа аҵакырадгьыл аҟны иҟаз аресторан "Диоскуриа" аиҭарҿыцразы аилаӡара ацҵара. Абри атәы лҳәеит Акультура аминистр Ельвира Арсалиаԥҳа Акультура аминистрраҟны иҟоу анаука-методикатә хеилак аилатәра ҭбаа амҩаԥысра ашьҭахь.

Уаанӡа, Акультура аминистрраҟны имҩаԥыргахьан азинтә експертиза аҭҵаара. Уажәы, анаука-методикатә хеилак иаднакылеит аӡбра ҿыц – аилаӡара азакәаншьаҭа аҭҵааразы аекспертиза цҵа мҩаԥгазарц азы.

Инарҭбааз аилатәара иалахәын Аминистрцәа Реилазаара, атәыла Ахада Иусбарҭа, жәлар Реизара рхаҭарнакцәа, Акультура аминистрра азиндырыҩцәа, ЗҲӘА "Абхазскаиа Ривиера" ахаҭарнакцәа.

Иара убасгьы ирыдкылан аӡбра Акультура аминистрраҟны Ауаажәларратә хеилак шьаҭаркызарц, аҳәынҭқарратә ҵакы змоу, аҭоурыхтә ҭынха абаҟақәа зыхьчо инструментны.

2011 шықәса рзы ЗҲӘА "Абхазскаиа Ривиереи" аҭоурых-культуратә ҭынха ахьчаразы Аусбарҭеи рыбжьара арендатә еилаӡара бжьаҵан, аресторан "Диоскуриа" 49 шықәса ҿҳәарас иаҭаны арендла агаразы. Уажәы уи аилаӡара иацҵатәын, аха ауаажәларра аминистррахь инарышьҭыз ашәҟә-ҿагыла ари аус ҿыц аиҭахәаԥшрахь икылнагеит.

19