Ҭаҭартәи артистцәа Аԥсны имҩаԥыргараны иҟоу атәы далацәажәоит Ҭаҭартәи аҳәынҭқарратә адрамеи акомедиеи ртеатр адиректор Фанис Мусагитов.
– Фанис Наил-иԥа аԥсуа хәаԥшҩы дызлашәыршанхарц ишәҭахузеи?
– Ақәыргыламҭақәа рыҩбагь аԥсҭазаара иазааигәоуп. Урҭ авторс дрымоуп Исламиа Махмутова — Ҭаҭар Жәлар рартистка, Урыстәыла зҽаԥсазтәыз артистка. Аспектакльқәа рсиужет аԥсҭазаараҟынтәи игоуп. Атеатр аҟны иҟоуп ашәақәагьы, акәашарақәагьы, ацәажәарақәагьы. Иҟоуп асиужет.
– Аԥсуа сценаҟны рықәыргыларазы абарҭ аспектакльқәа залышәхызеи?
– Ҳара аклассика аагарц ҳҭахымхеит. Ҳара иаҳҭаххеит ишәҳарбарц иахьа ҳазланхо. Аспектакльқәа рыҩбагь рҟны цәаҳәа ҟаԥшьла иалсуеит: "аибашьра ада зегьы ухугар улшоит. Аибашьра зегь агоит".
– Шәытруппаз ари раԥхьатәи гострольума?
– Ааи. Сгәыӷуеит иҵыхәтәантәихарым ҳәа.
– Шәтеатр арепертуар шәаҳзалацәажәа.
– Ҳрепертуар акыр иҭбаауп. Иахьазы 32 спектакль ҳамоуп. Еснагь иҿыцу акы ҳашьҭоуп. Иҳамоуп амилаҭтә драматургиа, адрама, амелодрама, Шекспир и-"Гамлет", Лорка еиҭагамҭақәа…
– Шәара Аԥсуа театр атәы жәдыруазар акәхап. Арҭ атеатрқәа, аԥснытәии ҭаҭарсҭантәии еиԥшрас ирымоузеи, ҷыдарақәасгьы ирымоузеи?
– Аԥсуа театр ақәыргыламҭақәа аинтернет аҿоуп иахьызбахьоу. Цәыббразы ҳгәы иҭоуп амилаҭтә драматургиа жәларбжьаратәи афестиваль аиҿкаара. Сынтәа уи аабатәиуп. Афестиваль аҳәаақәа ирҭагӡаны ҳрылацәажәоит ҳақәҿиарақәа, ҳапроблемақәа. Ҳԥышәа еимаадоит.
– Шәаԥхьаҟатәи шәыпланқәа шәрылацәажәар?
– Аамҭа иақәшәо аусуроуп планны иҳамоу. Ахәаԥшҩы дузнеирц уҭахызар аамҭа маҷкгьы иаԥугалароуп.
– Шәыпланқәа Аԥсны рылоума?
– Ҳәарада. Агастрольқәа рышьҭахь иаҳгәиҭоуп ҭынч ԥсшьара ҳәа аара. Ҳаргьы инаҳаԥхьоит аԥсуа актиорцәа. Аиҩызара аԥсҭазаара шьаҭаны иазыҟазароуп. Ҳара уажәы ҳҟазара шәҳарбоит. Нас ҳазыԥшуп шәара шәҟазарагьы ҳахәаԥшцәа ирбарц.
