Sputnik, Сырма Ашәԥҳа
Аамҭаказы ахҵәара иақәшәаны Ҭырқәтәылаҟа иахгаз ҳауаажәлар рхылҵшьҭрақәа маҷ-маҷ акәзаргьы рҭоурыхтә ԥсадгьыл ахь ахынҳәра иаҿуп, ҿыц рхәышҭаарамцақәа еиқәырҵоит. Урҭ дреиуоуп Али Кәыџбагьы.
"Аибашра аԥхьа акәын. Мызкы инеиҳаны Аԥсны сыҟан. Аиаша шәасҳәап, сгәы-сыԥсы зегьы ааныжьны сцар акәхеит Ҭырқәтәылаҟа. Аха, усҟан схазы иҟасҵеит алкаа. Мышкымзар мышкы, сыԥсадгьыл ахь схынҳәуеит ҳәа", —дцәажәон Али.
Ииашаҵәҟьаны, усҟантәи аамҭазы Али игәҭакы, ҳазшаз дахыимбааит. Шықәсқәак раԥхьа Али Кәыџба иҭаацәа иманы Аԥсныҟа нхара дааит. Лӡаа ақыҭаҿ инхарҭа ҭыԥ ылихит. Ҭырқәтәыла даныҟаз абизнес инапы алакын. Аԥсны акәзар, атуризм аганахь ала ихатә ус еиҿикааит. Иԥшәма ԥҳәыс Ҳандан Шәанӡааԥҳа, иусқәа зегьы рҿы дарӷьажәҩаны дидгылоуп. Ҳандан излалҳәо ала, имаҷҩым леиҳабацәа рҟынтә илдыруа аҭоурых.
"Сара саб иан Ебжьноуԥҳауп, уи лан Ашәԥҳан, саб ианду Аҩӡԥҳан, сабду ианду Анқәабԥҳан, Рабиа лыхьӡын. Лара Аԥснынтә ахҵәара данақәшәа, амҩан илыԥгылаз агәаҟрақәа дырзымиааикәа лыԥсҭазаара далҵит. Ҩыџьа аҷкәынцәа лыман. Убарҭ руаӡәк имаҭа соуп сара. Раԥхьаӡа акәны, аҳәаа сшьапы анықәсыргыла, аԥсуа шьҭыбжьы ансаҳа, аԥхыӡ салазшәа сааҟалеит. Иаразнак схаҿы иааиз сандуцәеи сабдуцәеи роуп. Изакәытә гәнаҳароузеи урҭ атәым дгьыл аҿы изҵаз?.. Аха, урҭ ргәыхәтәы ҳарҭ инаҳагӡеит. Ҳгәы ҭынчуп, ҳанхоит ҳаԥсадгьыл аҿы. Иахьа уажәраанӡагьы лаԥшыла сеимдоит, иҳаиԥшу сҭаҳцәа џьаракыр ӡәыр дызбозар ҳәа", — гәыблыла еиҭалҳәон Ҳандан.
Али иҭаацәа Аԥснытәи аԥсҭазаара ирласны иашьцылеит. Рԥацәа Алхаси Бараси ракәзар, рхатәы бызшәла аҷҷаҳәа ицәажәоит. Аиҳабы, Урыстәыла иреиҳау аҵараиурҭа дҭоуп, аиҵбы абжьаратә школ ахь дныҟәоит, амузыка абзиабара илоуп, апианино арҳәара дазҟазоуп. Рырҵаҩцәеи, рҩызцәеи, рҭаацәеи ргәы рыладууп.
Абасала, Пицунда, Лӡаа ақыҭан даҽа аԥсыуа ҭаацәарак рхәышҭаарамца еиқәырҵеит. Уи еиҳау иарбан насыԥу иҟоу?!
