Ашот Екшиан ашьаҵаӡахҩы

Аҟәатәи ашьаҵаӡахҩы ифилософиа

18
Ашот Екшиан шьаҵаӡахҩыс аус иуеит 22 шықәса инарзынаԥшуа. Иара иажәақәа рыла изанааҭ иахьазы даара иаҭахны иҟоуп.

Бадраҟ Аҩыӡба, Sputnik

Аҟәа ирацәоуп ашьаҵеимаа ахьырӡахуеи аремонт ахьазыруеи аҭыԥқәа. Уа аус зуагьы иазгәарҭоит рзанааҭ иахьа ахархәара маҷымкәа ишамоу. Урҭ ԥхынгьы ӡынгьы рус ԥкым. Ирацәоуп зҟазарҭақәа аҩнеихагылақәа рыҵаҟа иҟазҵаз. Урҭ аҩнқәа рҟны инхо уи агәахәара рнаҭоит, избанзар аҩнқәа рподвалқәа еснагь ицқьоуп уи адагьы ианаарҭахха ршьаҵа налбааган аҟаза ирҭоит.

Ашот Екшиан иҟазарҭаҿ ҳаннеиз аҭааҩ дизгылан, иааигаз ишьаҵа шыҟаҵатәу далацәажәо. Ашотгьы изымдыруаз ак иаҳауазшәа дӡырыҩуан. Ҳәарада уҭааҩ ииҳәо, ииҭаху узеилымкаауа ариаҟара шықәса аусура залшомзар акәхап. Уи ус шакәу ааирԥшуан ҳара ҳҟазагьы.

Сапожник Ашот Экшиян
© Sputnik / Томас Тхайцук
Сапожник Ашот Экшиян

Сара сакәзар аганахь сгыланы сазыԥшуан ажә аҿыцрахь ахы шархоз апроцесс.

"Ашьаҵаӡахҩы изанааҭ ижәытәӡатәиқәоу ишреиуамгьы ауаа акыр ирҭахуқәа иреиуоуп", — иҳәоит Ашот.

Ашот иажәақәа рыла аибашьра ҟалаанӡа аиҿцәажәаратә станциаҟны еимадаҩыс аус иуан. Нас аԥсҭазаара ианаҭахха абри азанааҭ инапы алеикит.

"Сара схәыҷаахыс аӡахыга машьынкала аус зуан. Саб сицхраауан. Уи амашьынаҭаршәқәа иӡахуан. Убри азы азанааҭ ҿыц ахь аиасра рацәак исцәыуадаҩымхеит", ҳәа иҳәоит Ашот.

Аибашьра ашьҭахь аҭиҩцәа арахь иаарго иалагеит зынҵыра маҷӡаз ашьаҵеимаа. Ибзиоу ашьаҵатәы аархәартә еиԥш аҭагылазаашьа ахьрымамыз иахҟьаны ауаа уи аархәар ада ԥсыхәа рымамызт, ҳәа азгәеиҭоит Ашот.

"Иарбанызаалак ашьаҵа аамҭа иаражәуеит. Сара исуалу уи аамҭа ароуроуп. Иҟоуп Тҟәарчал ма Гәдоуҭантәи исзаауа. Исылшо ала срыцхраауеит", — иҳәоит иара.

Сапожник Ашот Экшиян
© Sputnik / Томас Тхайцук
Сапожник Ашот Экшиян

Ашот изанааҭ аамҭа рацәа шицәагоугьы бзиа ибоит.

"Лассы-лассы аџьармыкьаҿ ахәаахәҭра ма аҽа усурак сыдыргалалоит, аха сара сақәшаҳаҭхом. Уа аԥара еиҳа ирацәаны ишурҳауагьы ҭынчымҩа уоуӡауам. Ара еиҳа исызгьамоуп. Сгәы иаахәоит сызҿу", — иҳәоит иара.

Сапожник Ашот Экшиян
© Sputnik / Томас Тхайцук
Сапожник Ашот Экшиян

Сара сахьихәаԥшуа еилыскаауеит Ашот насыԥ змоу ауаа дшырхыԥхьаӡалоу. Иара игәы ззыҳәо инапы алакуп. Ихи иареи реизыҟазаашьа ҭышәынтәаланы ибоит.

18
Атемақәа:
Sputnik апроект ҷыда "Аҟазацәа ртәыла" (20)

Ҿыц иалху Апарламент адепутатцәа рнапынҵақәа рынагӡарахь ианиасуа атәы рҳәеит

4
(ирҿыцуп 19:12 14.07.2020)
Аԥсны имҩаԥысит Апарламент ахь аиҭалхрақәа. Аҭыԥ хадақәа ԥшьба рҟынтәи руак аҿы ҩаԥхьа аиҭалхра мҩаԥысраны иҟоуп.

АҞӘА, ԥхынгәы 14 - Sputnik, Ренат Ԥачалиа. Аԥсны АКХ ахантәаҩы Ҭамаз Гогьиа Sputnik иазеиҭеиҳәеит иалырхыз адепутатцәа рнапынҵақәа рахь ииасыр анрылшо атәы.

Ацентртә алхратә комиссиаҿы абжьыҭара ашьҭахь бжьымш рыҩныҵҟала адепутатцәа ашәҟәы иҭарыҩуеит. Ашәҟәҭаҩра ашьҭахь адепутатцәа Аԥсны АКХ аӡбамҭаҟынтә алҩаа роуеит. Уи Апарламент ахь инаргоит. Уа имҩаԥгахоит иалху адепутатцәа азинԥҵаратә усбарҭа аилазаара ралаҵара апроцедура.

"Бзыԥҭатәи алхырҭатә ҭыԥ хадаҟны иҟалараны иҟоу аиҭалхра егьырҭ адепутатцәа русура анырра анаҭом", - ҳәа иҳәеит Гогьиа.

Гогьиа иҳәеит аус зуа азакәанԥҵара инақәыршәаны, Бзыԥҭатәи алхырҭатә ҭыԥ хада № 10 аҿы аиҭалхрақәа шымҩаԥысуа. Ҩымчыбжь рыҩныҵҟала АКХ алхрақәа ррыцхә шьақәнаргылоит.

Оҭҳаратәи ҭыԥ хадаҿы иалху Алмасхан Барцыц иҳәеит алхрақәа аиҩызаратә ҟазшьа рыманы имҩаԥган ҳәа.

"Алхраԥхьатә кампаниа зегьы соппоненти сареи еиҩызарыла имҩаԥаагеит. Аихшьаалақәа аныҟаҵаха Робестан Габлиа сиааира сыдиныҳәалеит, ақәҿиарақәа сзеиӷьеишьеит", - ҳәа иҳәеит иара.

Адепутат иҳәеит апандемиа инадҳәаланы Аԥсны ауааԥсыра ақыҭанхамҩахь ихьаԥшит, ари агәыгәҭажьра ҟалом ҳәа. Барцыц иажәақәа рыла,  Апарламент аҿы ақыҭанхамҩа аусхк иацхраауа апроектқәа адгылара риҭалоит.

Кындыӷтәи ҭыԥ хадаҿы иалырхыз Гарри Кокаиа иҳәеит ари аокруг аҿы егьырҭ ирҿырԥшны ауаа рнеира рекордтәын ҳәа. Иара изы зыбжьы зҭииз зегьы ҭабуп ҳәа реиҳәеит.

"Очамчыра идепрессиву раионуп ҳәа иԥхьаӡоуп, аха скомандеи сареи иаҳҭахуп иааҳарԥшырц араион иамоу алшара дуқәа", - ҳәа иҳәеит адепутат.

Аԥсны Жәлар Реизарахь алхрақәа мҩаԥысит ԥхынгәы 12 рзы иҭацәыз амандатқәа ԥшьба рахь - атәыла ахадас иалырхыз Аслан Бжьаниа, аԥыза-министрс иҟарҵаз Александр Анқәаб, Аҩнуҵҟатәи аусқәа рминистрс иҟарҵаз Дмитри Дбар, Гагра араион ахадас иҟарҵаз Иури Хагәышь рҭыԥқәа.

Иара убас шәаԥхьар ҟалоит:

4

Какәыбаа: араион аҿы аспорттә секциақәа шаҟа ирацәоу аҟара, еиҳагьы еиӷьхоит

2
(ирҿыцуп 18:37 14.07.2020)
Гәылрыԥшь араион аспорткомплекс "Агәыӡера" аиҳабы Мурман Какәыбаа арадио Sputnik Аԥсны аефир аҿы еиҭеиҳәеит иарбан спортхкқәоу араион аҿы еиҳарак аҿиара змоу, насгьы ахәыҷқәа разыҟаҵаразы лшарақәас иҟоу атәы.
Раионк аԥсҭазаараҟынтә: Какәыбаа Гәылрыԥшь аспорткомплекс аусура иазкны

"Аспорткомплекс аус ауеит х-спортхкык рыла: ашьапылампыл, акарате, абокс. Ҳахәмарратә зал шьақәҳаргылеижьҭеи еиҭа ҩ-хкык ацаҳҵар ҳҭахуп - анапылампыли, амҵәышәымпыли. Ҳхәыҷқәа аихьӡарақәа рымоуп акарате аҿы, абокс аҿы. Ашьапылампыл акәзар, еиҳа ицәгьоуп, ахәыҷқәа макьана аԥышәа рымам. Рыхә-секциак анаартхалак 150-ҩык, 200-ҩык рҟынӡа ахәыҷқәа ҳадаҳкылартә еиԥш алшара ҳауеит. Асекциақәа шаҟа ирацәоу аҟара, ахәыҷқәа рзы еиҳа еиӷьхоит. Аспорткмплекс аҿы рҽазыҟарҵар ауеит 300-ҩык инарзынаԥшуа ахәыҷқәа сааҭ-сааҭла еихшаны. Азыҟаҵаҩцәа рганахьала ҳаиқәшәоуп, ахәыҷқәагьы бзиа ирбоит, рус иазҟазоуп", - ҳәа еиҭеиҳәеит Какәыбаа.

Иаҳа инеиҵыху аиҿцәажәара шәазыӡырҩы аудио аҿы, мамзаргьы арадио Sputnik Аԥсны аефир аҿы.

Иара убас шәаԥхьар ҟалоит:

2