Sputnik, Анжелика Бениаԥҳа
Жәларбжьаратәи ашоу "Ты супер!" аиҿкааҩцәа ирыӡбеит ашоу аҟны иаиааиз Валериа Адлеиаԥҳа лгәазыҳәара нарыгӡарц. Лара лакәзар, лгәы иааинагомызт асеиԥш иаарласны лгәазыҳәара ҟалап ҳәа.
Аҟәатәи аҩнқәа руак абыжьбатәи аихагылахь данхалоз Лера лгәы иаанагон уи ара апродиусеро Виктор Дробыш иԥыларахь днеиуеит ҳәа.
Аҩны ауадақәа руак ашә иахьаахыҵыз, Иван Саввиди игәыҳалалратә фонд ахаҭарнакцәа ашәаҳәаҩ қәыԥш лнапы иадыркит ауада ацаԥхақәа. Лера иҟалаз лзымдыруа дгылан, лан лакәзар, лылаӷырӡқәа аауан.
"Ҳаԥсҭазаара убас аҽеиҭанакит, иҟалаз сзеилмырго. Аха издыруа акы заҵәык ауп – Лера лашәаҳәара ԥхьаҟа иацылҵарц азы слывагылароуп. Уажәраанӡа Лерагьы саргьы уи уаҵәтәи лымш зеԥшрахаша ҳаздыруамызт, аха уажәы уи ашәаҳәара ишадҳәалахо аадыруеит", — лҳәеит Лера лан, Мадина Ешԥҳа.
Лера лакәзар, ауадақәа днарыҩныс-аарыҩнысуа игәалҭон, лгәырӷьарагьы ҳәаа амамызт.
Аҟәа агәаны х-ҿык змоу ауада Лера лзы апроект "Ты супер!" аҟынтәи иҳамҭахеит.
Аԥсны Ахада Рауль Ҳаџьымба иакәзар, аҭаацәа рыҩны аиҭашьақәыргыларазы афинанстә цхыраара ҟаиҵеит.
