Аԥсны Ашәҟәыҩҩцәа Реидгыла иӡырнагеит ҩ-шәҟәык

© SputnikБиобиблиографический словарь "Абхазские писатели" и сборник произведений молодых поэтов Абхазии "Ашацкыра"
Биобиблиографический словарь Абхазские писатели и сборник произведений молодых поэтов Абхазии Ашацкыра - Sputnik Аҧсны
Анапаҵаҩра
Иван Папасқьыр ихьӡ зху Амилаҭтә библиотека аҟны иӡырган ҩ-шәҟәык: "Абхазские писатели. Биобиблиографический словарь" , аҿар рҩымҭақәа знылаз ахԥатәи аизга "Ашацкыра".

АҞӘА, цәыббра 18 – Sputnik, Анжелика Бениаԥҳа. Аԥсны Ашәҟәыҩҩцәа Реидгыла аԥшьгарала Аҟәа иӡырган ҩ-шәҟәык "Абхазские писатели. Биобиблиографический словарь", иара убас ахԥатәи аизга "Ашацкыра".

"Абхазские писатели. Биобиблиографический словарь" – Аԥсны раԥхьаӡа акәны иҭыҵыз аԥсуа ашәҟәыҩҩцәа рбиографиақәеи, рбиблиографиақәеи зну шәҟәуп, ҳәа иҳәеит Аԥсны Ашәҟәыҩҩцәа Реидгыла ахантәаҩы, ашәҟәы авторцәа руаӡәк Вахтанг Аԥҳазоу.

"Ашәҟәы, хымԥада, иаҭахын. Ахархәаразы даара иманшәалоуп. Амилаҭтә литература иазҿлымҳау рзы ихәарҭоуп. Ашәҟәы авторс исыцамоу Виачеслав Бигәаа – афилологиатә ҭҵаарадыррақәа рдоктор, Аԥсны анаукақәа ракадемиа алахәыла-корреспондент иаԥхьажәаҟны иарбоуп аԥсуа литература аира инаркны аҿиара амҩақәа 2012 шықәсанӡа", – иҳәеит Аԥҳазоу.

Абиографиақәеи абиблиографиақәеи рыдагьы, ашәҟәы иагәылоуп Аԥсны Ашәҟәыҩҩцәа Реидгыла аниеҿкааха нахыс изнысхьоу амҩа, Ашәҟәыҩҩцәа рассоциациа аҭоурыхгьы.

Иӡыргаз аҩбатәи ашәҟәы – ахԥатәи аизга "Ашацкыра" ианылеит алитература ааигәа знапы алазкыз аҿар рҩымҭақәа.

"Ашәҟәыҩҩцәа реидгыла аҟны 2009 шықәсазы абас аиԥш аизга аҭыжьра аԥаҳҵеит. Избан акәзар, апоет, ашәҟәыҩҩы, дарбанызаалакгьы иаразнак дзышьақәгылаӡом. Агазеҭқәа, ажурналқәа, акьыԥхь аҟны амҩа раҳҭоит, ҳархаҵгылоит аҿар. Аԥхьаҩцәа ибзианы ирыдыркылоит «Ашацкыра». Хықәкыс иҳамоуп аԥсуа аԥхьаҩ бзиа иааӡара", – иациҵеит иара.

Ашәҟәыҩҩцәа Реидгылаҿы хазы, ҷыдала еиҿкаауп ашәҟәыҩҩцәа ҿарацәа аус рыдуларазы акомиссиа, напхгаҩыс дамоуп Аидгылара аконсультант, апоетесса Заира Ҭҳаиҵыкәԥҳа. Акомиссиа Аԥсны ашколқәеи араионқәеи рыҟны азеиԥшсеминарқәа мҩаԥнагоит.

"Ашацкыра" шьақәгылоу х-хәҭак рыла: апоезиа, апроза, акритика. Ашәҟәы аҟны еидкылоуп акьыԥхь збахьоу рыда, иҿыцны ицәыргоу аҩымҭақәагьы, ҳәа лҳәеит аизга "Ашацкыра" аиқәыршәаҩ Заира Ҭҳаиҵыкәԥҳа.

"Авторцәа рхыԥхьаӡараҟны иҟоуп аус зуа реиԥш, аҩҩрахьы раԥхьаӡа акәны зшьаҿа еихызго аҿаргьы. Рҩымҭақәа ҳрықәгәырӷьоит. Уалны избоит – рывагылара, амҩа иаша рзылхра ҳлитература ду ахь. Аԥшьбатәи ашәҟәы аиқәыршәара саҿуп. Аҩымҭақәа хәыҷы-хәыҷла еизоит, иҵегьы сырзыԥшуп. Иаарласны аҿыцгьы ҭҳажьуеит. Ажурнал «Алашареи» ҳареи ҳаимадоуп. Иҟоуп ишиашоу сара сахь иаарго аҩымҭақәа, иҟоуп «Алашара» аҟны ианыркьыԥхьлакгьы сара сахь иааиуагьы. Аҩбатәи ашәҟәы анҭҳажьуаз иҟан аредколлегиа, уа иалан Даур Начҟьебиа, Вахтанг Аԥҳазоу, Анатоли Лагәлаа, Гәында Сақаниа. Исыцхыраауан аҩымҭақәа ралԥшаараан. Ахԥатәи ашәҟы аредколлегиа амаӡамызт. Анаҩсгьы сара сакәхоит аҭакԥхықәра ду здызаауа", – ҳәа иазгәалҭеит Ҭҳаиҵыкәԥҳа.

Ашәҟәыҩҩцәа Реидгылаҟны аус адулара иаҿуп асаит. Ашәыҟәқәа Вахтанг Аԥҳазоу иажәақәа рыла, хара имгакәа, асаитгьы аартхоит, аҿыц шәыҟәқәагьы асаит ахь иҭагалахоит.


Ажәабжьқәа зегьы
0