АҞӘА, жәабран 20 – Sputnik. Апарламент адепутат Баҭал Тапаӷәуа Sputnik аинтервиу аҭо иҳәеит апарламентарицәа ргәыԥк Аԥсны Иреиҳаӡоу аӡбарҭахь ашәҟәы азырхиара ишаҿу, Алиса Бигәааԥҳа Аконституциатә ӡбарҭа аӡбаҩыс лалхраан абжьыҭира амҩаԥысшьа иашоу ииашаму ашьақәыргыларазы ҳәа.
Апарламент аилатәараан имаӡоу абжьыҭирала Алиса Бигәааԥҳа лзы рыбжьы рҭиит 23-ҩык адепутатцәа, аӡәы уи лкандидатура даҿагыланы ибжьы иҭиит. Иԥхасҭатәыз биулитен ыҟамызт. Баҭал Тапаӷәуа иазиԥхьаӡоит Алиса Бигәааԥҳа лалхразы иахәҭаны иҟан 24 бжьы, 23 бжьы ракәымкәа ҳәа.
"Угәы унархьуеит Алиса Зураб-иԥҳа асеиԥш иҟаз апарламентҩныҵҟатә проблемақәа дахьрыниаз, аха иҟоу ыҟоуп. Асессиаан депутатцәақәак, иара саргьы снарылаҵаны аԥхьаӡаратә комиссиа ахантәаҩы иаҳҳәеит абжьыҭира аихшьаалақәа шиашам. Аԥсны Аконституциа ахәҭаҷ 44 аҟны иаҳәоит, аконституциатә закәан адкылараан иара убасгьы аквалификациатә бжьеиҳа аҭахны ианыҟоу адепутатцәа зегь рхыԥхьаӡараҟынтә 2/3 бжьы ахәҭаны иҟоуп", — ҳәа иҳәеит адепутат.
Иара убасгьы иазгәеиҭеит Апарламент ииашам аӡбрақәа аднакыло иалагар, уи ҵоурахом ҳәа.
"Апарламент адепутатцәа 35-ҩык ыҟазар, 2/3 урҭ рыхәҭа иартәоит 23,3-ҩык. 23-ҩык 23,3 раасҭа еиҵоуп. Ус анакәха 23 иашьҭанеиуа ацифра 24 ауп. Абри асессиаҿгьы иҳәан. Апарламент аиҳабгьы ашәҟәы ҩны изықәҵан. Ҳазыԥшын аҭагылазаашьа аҭыԥ иқәҵахоит ҳәа, аха уи зхьаԥшра амоуит", — иҳәеит Баҭал Тапаӷәуа.
Иара убасгьы иазгәеиҭеит иуҭаху шыуҭаху ианыҟауҵоз аамҭақәа шиасыз, азакәан ҵаҵӷәы змам аӡбрагьы адкылара шзалмыршахо.
"Апарламент азакәанеиҿкаара аус ауа иҟаларц аҭахызар, иара ахаҟынтә ауп уи иахьалагатәу", — иҳәеит адепутат.
Алиса Бигәааԥҳа жәабран 12 рзы Аԥсны Жәлар Реизара адепутатцәа Аконституциатә ӡбарҭа аӡбаҩыс далырхит. Ашәахьаҽны лара ҭоуба шьҭалҵеит.
