АҞӘА, мшаԥы 3 – Sputnik, Амра Амҷԥҳа. Актәи жәларбжьаратәи акинофестиваль аатит Аҟәа, Фазиль Искандер ихьӡ зху Аурыс драматә театр аҿы мшаԥы 2 рзы. РУСДРАМ аԥхьа икаршәыз ауарҳал ҟаԥшь иқәсит афестиваль алахәылацәеи асасцәеи. Афестиваль аконкурстә программа иалахәуп 32 зметраж кьаҿу афильмқәа.
"Москва иалыркааит ҳусумҭа Аҟәатәи акинофестиваль азы. Уи даара агәахәара ҳнаҭеит", — лҳәеит арежиссиор Ирина Волкова.
Аартра ацеремониа аԥсуа цәа аҟәнын. Асцена иқәыҩуан аԥсуа ашәақәа, удыршанхон амилаҭ кәашарақәа.
Еизаз идырбан аԥсуа кино аҭоурых иазку авидеоролик. Арежиссиорцәа Ада Квираиаԥҳаи Виачеслав Аблоҭиеи еиҭарҳәеит асовет аамҭақәа рмиф: Сталини Нестор Лакобеи Аԥсны "асовет Голливуд" акәны аҟаҵара шырҭахыз.
"Аԥсны акино азы ишоушәоуп ишыҟоу. Амшын, ашьхара, амра, асы — аԥсабара иалшоит иарбанызаалак акино аҭыхра. Акино азы уаҳа назҭахым ҭыԥуп", — иҳәеит Аблоҭиа.
Афестиваль аиҿкааҩ, аҿартә политиказы Аилак аиҳабы Ҭеимураз Кәакәасқьыр иазгәеиҭеит афестиваль алахәразы ишаашьҭыз х-нызқь инареиҳаны арзаҳалқәа. Урҭ рҟынтәи иалхын 32 киносахьа.
Афестиваль алахәылацәа аԥсшәа раҳәо дықәгылеит атәыла Ахада Рауль Ҳаџьымба.
"Асеиԥш иҟоу ауснагӡатә раԥхьаӡа акәны Аԥсны имҩаԥысуеит. Ареспублика ауааԥсыреи асасцәеи рзы ари ныҳәа дууп. Агәра згоит афестиваль алахәылацәа Аԥсны акраамҭа гәахәарыла иҟәандаӡа ргәаҵаҿы ишынхо", — иҳәеит иара.
Амҩаԥгаҩцәа Дамеи Чамбеи Наала Қаҩԥҳаи еизаз иддырдырит ажиури алахәылацәа: Аԥсны жәлар рартист, акинорежиссер, асценарист Виачеслав Аблоҭиа, арежиссер, асценарист Владимир Фенченко, арежиссер Сергеи Пускепалис, акинорежиссер, асценарист, акомпозитор Михаил Местецки, апродиусер, актриса Елена Гликман. Ажиури ахантәаҩы – акинорежиссер, асценарист, апродиусер Анна Меликиан.
Афестиваль апрограмма иалахәуп 32 фильм, Европа, Урыстәыла, Марокко, Тунис, Кореиа, Иран, Узбекистан, Венгриа, ИАР атәылақәа рҟынтәи.
Актәи жәларбжьаратәи акинофестиваль аинформациатә дгылара анаҭоит аинформациатә маҵзуреи арадиои Sputnik Аԥсны.
