АҞӘА, мшаԥы 6 – Sputnik, Амра Амҷԥҳа. Адует "Адекватное Мнение" амузыкантцәа Абел Миносиани Адамыр Аҩардани рклип "Аԥсуа ԥҳәызба хцәеиларҳә" ("Кудрявая Абхазка") аӡыргара мҩаԥысит мшаԥы 2 рзы. Уи ашьҭахь YouTube аҟны 8000-ҩык рҟынӡа ахәаԥшит, Fackebook аҿы – 10 000-ҩык.
Авторцәа ражәақәа рыла ашәа анаԥырҵоз ирҭахын амилаҭ калорит аларҵәара.
"Иаҳҭахын ҳаамҭазтәи амузыка Кавказтәи аинтонациа аҭара, амилаҭ цәа аҟәынҵара", — иҳәеит авокалист Абел Миносиан.
Абел Миносиан Аҟәатәи амузыкатә ҵараиурҭа 4 акурс аҟны аҵара иҵоит. Адамыр Аҩардан Аԥсны жәлар рашәаҳәареи рыкәашареи рансамбль дасолиступ.
"Еиуеиԥшым аҭыԥҳацәа ашәақәа рзыркуеит. Ҳара иаҳҭаххеит аԥҳәызба хцәеиларҳә ашәа лзаҳкырц", — иҳәеит иара.
Аклип ҭихит арежиссер Диониси Кочкониан.
"Асценари зегьы еицааҩуан. Ахәыҷы изы алакә аиҭаҳәара атәы Адамыр ихәыцит. Маҷк алакә ҟазшьа аҭара ҳҭаххеит. Аклип далахәуп акультуратә фонд "L-star" амодель Анисиа Қаԥшьԥҳа, Олесиа Габлиаԥҳа (аклип аперсонаж хада) — ансамбль "Кавказ" акәашаҩ. Амассовка иалахәуп акәашаҩцәа", — ҳәа еиҭеиҳәоит Абел Миносиан.
Аҭыхрақәа мҩаԥысуан Баграт ишьхаҿ, Анаҟәаԥиатәи абааш аҟны, Баслатәи ацҳаҿ, Мысра аԥшаҳәаҿы.
"Ҳара ҳҽазаҳшәеит аклип ала Аԥсны акультура ауаа рыларҵәара", — иҳәеит Адамыр Аҩардан.
Аклип "Аԥсуа ԥҳәызба хцәеиларҳә" ("Кудрявая Абхазка") аӡыргара мҩаԥысит мшаԥы 2 рзы. Уи ашьҭахь иутиуб аҟны 8000-ҩык рҟынӡа ахәаԥшит, Феисбук аҿы – 10 000-ҩык.
