Пресс-конференция ко Дню борьбы за права инвалидов

Алхас Ҭҳагәышь: Аԥсны иҟоу ахамыхәацәа ирзымхо рацәоуп

16
(ирҿыцуп 15:48 04.05.2018)
Аинвалидцәа рзинқәа рзы ақәԥара Жәларбжьаратәи амш аламҭалаз Sputnik апресс-центр аҿы имҩаԥган апресс-конференциа. Иара азкын зылшарақәа ԥку ауаа Аԥсны рҭагылазаашьа.

Бадраҟ Аҩӡба, Sputnik.

"Асовет еидгыла уаанӡатәи атәылақәа ирҿырԥшны уҳахәаԥшуазар иуҳәар алшоит урҭ раасҭа акыр ҳашьҭаханы ҳаҟоуп зылшара ԥку ауаа ацхыраареи адгылареи рыҭара аус аганахь ала" ҳәа иҳәеит ассоциациа "Инва-содействие" ахантәаҩы Алхас Ҭҳагәышь.

Иара убри аан иазгәеиҭеит Аԥсны ишыҟам ауаа ҷыдала иалкааны реилыхра.

"Сгәы иаанагоит иахьазы иҟоу апроблемақәа аӡбра роуп ҳәа. Уажәы шьаҿа-шьаҿала урҭ раԥыхра амҩа ҳақәуп, аха аҳәынҭқарратә ҟазшьа аҭаны макьаназы иаабом", — ҳәа азгәеиҭеит иара.

Зылшара ԥку ауаа рзы асоциалтә процессқәа рылахәра зыда ԥсыхәа ыҟам акакәны иҟоуп.

"Уи иаанаго зегьы иреиӷьны аҭагылазаашьа рыҭара акәӡам, зегь шыҟоу еиԥш рхы рбартә рыҟаҵара ауп: ашколқәа рахь анеира, атеатр аҭаара, аҵара ашьҭахь аусурҭаҭыԥ аиура", — иҳәеит Ҭҳагәышь.

"Инва-содействия" ахада Алхас Ҭҳагәышь иазиԥхьаӡоит аиҳабыреи, абизнеси, ауаажәларратә еиҿкаарақәеи русеицура шакәу аинвалидцәа рыԥсҭазаара армариара зылшоны иҟоу. Аинвалидцәа рзы атранспорт ахархәара залшом, апандусқәа ракәзаргьы ишахәҭоу иҟам ҳәа иҳәоит иара.

"Иҳазҵаар ираҳҳәоит анорматив иақәшәо апандусқәа шеиҿкаатәу. Иҟоу аԥара рыхҭынҵоуп, арахь рхархәара залшом", — иҳәеит иара.

Ҭҳагәышь иажәақәа рыла акыр ишәарҭоуп Аҳәынҭқарратә музеи аҿы иҟоу апандус. Уи ала ахаларагьы албаарагьы уадаҩуп. Алхас Ҭҳагәышь иазгәеиҭеит зылшара ԥку рзы аус ду шыҟанаҵо Аҟәатәи ахәыҷтәы реабилитациатә центр. Иҳәеит иаарласны уи аҩыза ацентр Гәдоуҭагьы иаадыртраны ишыҟоу.

Аҟәатәи ашкол №3 аҵаҩы Наала Чегиаԥҳа илҳәоит лара дызҭоу ашкол аҟны ахымҩаԥгара шылцәыуадаҩым, уаҟа иҟоу апандус акыр ишыманшәало. Наала Москва ареабилитациатә курсқәа дырхысуеит. Бзиа илбоит ашәаҳәара, ашколтә театрқәа рҟны аспектакльқәа ахрылархәра.

Быжьшықәса зхыҵуа Гриша иан Изабелла Пупариани далацәажәеит аҵара аиура ауадаҩрақәа шацу. Иара макьаназы ашкол ахь дныҟәом.

"Ашкол ахь дцар ҳҭахуп, аха ауаа рыҿиара аиԥшымзаарақәа амоуп: амахашьахатә, аԥсихологиатә", — лҳәеит лара.

Аинвалидцәа рзинқәа рзы ақәԥара Жәларбжьаратәи амш есышықәса иазгәарҭоит 1992 шықәса лаҵара 5 раахыс.

16
Абессалом Кварчия

Кәарҷиа: алхыҩ иазыҟаҵара хьысҳауп

4
Ауаажәларратә палата алахәыла Абессалом Кәарҷиа арадио Sputnik аефир аҟны игәаанагара иҳәеит алхыҩ изы иахьынӡахәарҭоу адепутатрахь акандидатцәа телехәаԥшрала рықәгылара.

Аԥсны Жәлар Реизарахь алхрақәа мҩаԥысуеит алхратә ҭыԥ хадақәа ԥшьба рҿы: Кындыӷтәи, Гәдоуҭатәи, Бзыԥтәи, Оҭҳаратәи.

Кындыӷтәи алхратә ҭыԥ хада №31 аҟнытә Жәлар Реизара адепутатрахь кандидатцәас иқәгылоуп: Аидар Кәыҵниа, Гарри Кокаиа, Џьансыхә Адлеиба; Гәдоуҭатәи алхратә ҭыԥ хада №18 ала - Асҭамыр Ахбеи Алхас Ҳагбеи; Бзыԥтәи алхратә ҭыԥ хада № 10 ала – Ҭамаз Леибеи, Ҭемыр Беиеи; Оҭҳаратәи алхратә ҭыԥ хада №14 аҟнытә Жәлар Реизара адепутатрахь кандидатцәас иқәгылоуп Робесҭан Габлиеи Алмасхан Барцыци.

Алхратә комиссиа хада имҩаԥнагаз аҵәҭаԥсарала адепутатрахь акандидатцәа Аԥсуа телехәаԥшраҟны аефиртә аамҭа рызшоуп. Бзыԥтәи алхратә ҭыԥ хада №10 ала адепутатрахь акандидатцәа Ҭамаз Леибеи, Ҭемыр Беиеи аефир аҟны иҟалоит уаха, ԥхынгәы 6 рзы.

 

Кәарҷиа ателедебатқәа рзы: заанаҵы ибжьы зиҭо здыруа алхыҩ изы иҵакыдоуп

"Ауаҩы уала-ҭахыла, мамзаргьы аиҳабыра идгылоума, ицхраауама, ҳара даҳтәума, егьырҭ дыртәума ҳәа ихәыцны далзхуа изы егьа теледебат ҟауҵаргьы, иара изы зегь дара роуп. Уи ателехәаԥшраҟны иибо спектакльк еиԥш дазыӡырҩуеит, аха игәы иҭеикыз, изиҭараны дыҟоу ибжьы ииҭоит. Ибжьы зиҭо ззымдыруа аӡәыр дыҟазар, Апарламент ахь днеир абри ихаҿсахьа зеиԥшрахои ҳәа ихәыцуа ауаҩы изы ибзиоуп, ихадоуп телехәаԥшрала иибо, аха иҟоуп ауаҩы иаразнакгьы иеилкаара анымариам. Убри аганахьала сгәаанагарала Алхратә комиссиа хада ахымҩаԥгашьа хәыҷык ихьысҳауп ҳәа ажәлар разыҟаҵаразы. Дара ирҳәароуп алхрақәа шус хадоу, абжьыҭара уала-ҭахыла акәымкәа ишазнеитәу ауаа азыҟаҵалатәуп есымша. Ауаа иахьа хәыҷык иҟьалашәа иҟоуп, рыбжьы зырҭара дрыздыруам, џьоукы-џьоук хьаасгьы ирымам, "иаҳнаҭеи Апарламент" зҳәогьы ыҟоуп. Абжьыҭарахь имнеиз ауаа рхыԥхьаӡара анырацәахалак, уи иаанагоит урҭ разыҟаҵара зыхәҭаз ауаа ажәлар рҟынӡа ишахәҭаз ирызнамгаӡеит ҳәа", - азгәеиҭеит Кәарҷиа.

 

Аԥсны Алхратә комиссиа хада иҭацәыз адепутаттә ҭыԥқәа рахь ԥхынгәы 12 рзы алхрақәа рымҩаԥгара ҿҳәарас ишьақәнаргылеит.

Азакәанԥҵаратә мчраҿы амандатқәа ԥшьба ҭацәуп - уаанӡа депутатцәас иҟаз атәыла ахада Аслан Бжьаниа, аԥыза-министр Александр Анқәаб, Аҩнуҵҟатәи аусқәа рминистр Дмитри Дбар, Гагра араион ахада инапынҵақәа назыгӡо Иури Хагәышь рҭыԥқәа.

Инеиҵыху анҵамҭа шәаҳар шәылшоит арадио Sputnik Аԥсны аефир аҟны.

Иара убас шәаԥхьар ҟалоит:

4

Пицунда амҩатә машәыр аҭыԥ аман

24
Пицундатәи амҩаҿы ашьыжь асааҭ 4:20 рзы автомашьына Toyota Сrown аԥсҟы зкыз имч ақәымхазт, имҩа дахҟьаны аҵла даахеит.

АҞӘА, ԥхынгәы 6 - Sputnik. Ҩыџьа ауаа амҩатә машәыр иахҟьаны рыԥсҭазаара иалҵит ҳәа аанацҳауеит Апрокуратура хада апресс-маҵзура.

"1991 шықәса рзы ииз Агәмаа Ремиз зыԥсҟы икыз амҩа атранспорттә хархәага Toyota Сrown имч ақәымхакәа, амҩа даныҵны аҵла даахеит. Агәмаа Ремизи ипассаџььыр Агрба Алхаси аҭыԥ аҟны рыԥсҭазаара иалҵит", - ҳәа аанацҳауеит Апрокуратура хада апресс-маҵзура.

Ахҭыс инамаданы аусҭҵаара мҩаԥысуеит.

24