Открытие чемпионата по шахматам

Ҭыжәба: ашахматқәа Аԥсны ирылаҵәоуп

5
(ирҿыцуп 12:26 15.05.2018)
Жәларбжьаратәи ашахматтә турнир "Аквафон-open 2018" мҩаԥысит лаҵара 12 - 13 рзы.

АҞӘА, лаҵара 15 – Sputnik. Аԥснытәи ахәыҷқәа рыбжьара ашахматтә еиндаҭларақәа акыр аҭаххара рыманы иҟоуп, иҳәеит радио Sputnik аинтервиу азҭаз Аԥсны ашахмат азы Афедерациа апрезидент Константин Ҭыжәба, атурнир "Аквафон-open 2018" аихшьаалақәа мҩаԥго.

"Жәеизантәуп атурнир мҩаԥаагоижьҭеи. Аԥсназы ари рекордуп. Аԥхьатәи аиндаҭларақәа 60-70-ҩык рылахәызҭгьы, сынтәа 220-ҩык атурнир иалахәын", — иҳәоит иара.

Асеиԥш ашахмат хәмаррақәа рылаҵәара алзыршаз араионқәа зегьы рыҟны азыҟаҵаҩцәа ибзианы аус ахьыруоуп ҳәа азгәеиҭоит Ҭыжәба.

"Атренерцәа ишьахәны аус руеит. Аҟәатәи ашколқәа рҿы акәзар, ашахмат азы афакультативтә зыҟаҵаарқәа мҩаԥыргоит", — иҳәеит ашахмат азы Афедерациа апрезидент.

Ашахмат азы Аԥсны аҭагылазаашьа маншәалақәа аԥҵоуп иҳәеит Ҭыжәба. Атурнир "Аквафон-open 2018" далацәажәо Ҭыжәба иҳәеит аиҿкаара бзиа шамаз.

"Аԥхьаҵәҟьа ауадаҩрақәа ыҟан. Ҳара 160-ҩык ашахматистцәа ҳарзыԥшын, иааит 220-ҩык. Аиҭакрақәа ҟаҵатәхеит, аха нас зегь маншәаланы имҩаԥысит. Ҽааназы адырра раҳҭоит заа азыҳәақәа ҟазҵо шракәу атурнир иалахәхо", — иҳәеит Ҭыжәба. Атурнир иалахәыз ахәыҷқәа еиуеиԥшымыз ацәаныррақәа рызцәырнагеит. Иҟан аччаԥшьгьы, иҟан алаӷырӡгьы".

Жәларбжьаратәи ашахматтә турнир "Аквафон-open 2018" мҩаԥысит лаҵара 12 — 13 рзы.

5