Торжественное заседание к 25-летию МИД Абхазии состоялось Кабинете Министров 17 мая

Аԥсны Адәныҟатәи аусқәа рминистрра 25 шықәса ахыҵит

23
(ирҿыцуп 16:38 17.05.2018)
1993 шықәса, лаҵара 17 рзы Владислав Арӡынба инапы аҵеиҩит Адәныҟатәи аусқәа рминистрра аԥҵаразы Аусԥҟа.

АҞӘА, лаҵара 17 – Sputnik, Сариа Кәарацхьелиаԥҳа. Аԥсны Адәныҟатәи аусқәа рминистрра 25 шықәсаа ахыҵра иазкны Аминистрцәа Реилазаара азал ду аҟны имҩаԥысит аныҳәатә еилатәара.

Рколлегацәа ирыдныҳәаларц арахь иааиит Урыстәыла, Аахыҵ Уаԥстәыла, Приднистровиатәи Молдавиатәи ареспублика рҟынтәи адипломатцәа.

Аилатәараҿы иқәгылаз Аԥсны Ахада Рауль Ҳаџьымба иазгәеиҭеит Адәныҟатәи аусқәа рминистрра аԥсуа ҳәынҭқарра ашьақәыргылараҿы алагаламҭа ду шамоу.

"Аԥсны адипломатиатә маҵзура амҩа уадаҩ ианысит. Аԥсуа дипломатцәа русураҿы рхы аадырԥшит апрофессионализм ҳарак рыманы, рыԥсадгьыл амаҵ азура иазыхианы, адунеижәларбжьаратә аренаҿы амилаҭтә интересқәа аԥыжәара рырҭартә. Уаанӡаа ус зуаз рԥышәа шьаҭас иганы иахьатәи аусбарҭа аколлективгьы арҭ атрадициақәа рырҿиара амҩа иқәуп", — иҳәеит атәыла Ахада.

Урыстәыла Адәныҟатәи аусқәа рминистрра ИАР атәылақәа IV рдепартамент адиректор Алексеи Павловски еизаз дырзаԥхьеит Урыстәыла Адәныҟатәи аусқәа рминистр Сергеи Лавров иааишьҭыз адныҳәаларатә шәҟәы.

"25 шықәса аамҭа маҷым. Аԥсны Адәныҟатәи аусқәа рминистрра акыр иуадаҩыз аамҭақәа ирылиааит. Ажәлар аԥсадгьыл ахьчаразы абџьар шьҭыхны иангылаз Владислав Арӡынба ибзианы еиликаауан абџьар еиԥшыз ажәагьы шаҭахыз. Аҳәынҭқарра-ҿа адипломатиатә фронт аҟынгьы еиқәырхатәын. Шәминистрра адунеижәларбжьаратә аренаҟны ауаа идеилнаркаауан шәиашара, шәпозициа. Аԥсуа дипломатиа ахаҿра ҿыц ааԥшит 2008 шықәса рзы Аԥсны ахьыԥшымреи асуверинитети Урыстәылатәи Афедерациа ианазханаҵа ашьҭахь", — ҳәа даԥхьеит адныҳәаларатә шәҟәы атекст Павловский.

Аахыҵ Уаԥстәыла Адәныҟатәи аусқәа рминистр Дмитри Медоев поздравил Аԥснытәи иколлегацәа дрыдныҳәало ҳамҭаны ириҭеит ауаԥс сахьаҭыхыҩ ирҿиамҭа.

"Ҳажәларқәа рҭоурых ажәытәра ҵаула иазцоит. Иаку, еиԥшу аҭагылазаашьақәа ҳамоуп. Иакны иҳамоуп Нарҭтә епос, ашәақәа, акәашарақәа. Аҵыхәтәантәи аамҭақәа рзы еицаҳзеиԥшны иҟалаз арыцҳара еиҳагьы ҳаиднакылеит, ҳаиашьара арӷәӷәеит", — ҳәа азгәеиҭеит иара.

Аԥсны Адәныҟатәи аусқәа рминистрра аусзуҩцәа дрыдныҳәалеит Приднистровиатәи Молдавиатәи ареспублика Адәныҟатәи аусқәа рминистр Витали Игнатьев.

"Арыцхә иаанарԥшуеит аԥсуа дипломатиа аԥышәа амазаара, ашәра, аиҵыҵра. Аҭагылазаашьа уадаҩқәа раан шәусура мҩаԥыжәгон, аха еснагь ишәылшон аиааира, шәпрофессионализм аизырҳара", — иҳәеит иара.

Адныҳәалара ашьҭахь атәылақәа рыҩба рыдәныҟаполитикатә усҳәарҭақәа рнапхгаҩцәа рнапы аҵарҩит Аԥсны Аҳәынҭқарреи Приднестровиатәи Молдавиатәи Ареспубликеи рыбжьара аиҩызареи, аусеицуреи, аилахәыреи рзы Аиқәшаҳаҭра аратификациа азуразы аҳаҭыртә шәҟәқәа реимдаразыАԥкаанҵа.

Аџьынџьтәылатә еибашьра ашыкьымҭаз, 1993 шықәса, лаҵара 17 рзы Владислав Арӡынба инапы аҵеиҩит Адәныҟатәи аусқәа рминистрра аԥҵаразы Аусԥҟа. Еиуеиԥшым аамҭақәа рзы иара анапхгараҿы иҟан: Саид Ҭаркьыл, Сократ Џьынџьал, Леонид Лакербаиа, Константин Озган, Игорь Ахба, Сергеи Шамба, Максим Ӷәынџьиа, Виачеслав Чрыгба.

23