Аибашьра иацынҵәаз Арасаӡыхьтәи ашәаҳәаратә гәыԥ аҭоурых

Аибашьра иацынҵәаз: Арасаӡыхьтәи ашәаҳәаратә гәыԥ аҭоурых

199
(ирҿыцуп 14:40 15.09.2018)
Афырхацәа рхаҿсахьақәа ажәлар ирдыруазар ауп. Еиҳаракгьы аибашьра ашьҭахьтәи аҿар иахьеи-уахеи ҳабла ихгыло, ҳлымҳа иаҳауа аибашьра аҭоурых адаҟьақәа зегьы ҳаргәыламԥшӡац, ирацәоуп иҳарымҳәац афақтқәагьы. Алашара зқәырԥхам адаҟьақәа иреиуоуп аибашьра аамҭазы Арасаӡыхь ақыҭан еиҿкааз, 12- ҩык злаз ахаԥшьгаратә гәыԥ аҭоурых.

Аинар Ҷыҭанаа, Sputnik

Агәыԥ "Арасаӡыхь" шеиҿкаахаз атәы еиҭалҳәеит алахәылацәа реидкылара алзыршаз, арепертуар азы ашәақәа зыҩуаз Белла Ламиаԥҳа. Лара лажәақәа рыла, аибашьра актәи амшқәа инадыркны аибашьцәа рҟынтә ираҳауа иалагеит ааԥхьарақәа, ахысыбжьы иардагәеит, аԥсуашәак дырҳанда ҳәа. Ажәлар ашьаарҵәыра ианалагылаз аамҭазы ашәаҳәара кыр иуадаҩын, агәы ақәкра цәгьан, аха дара еилыркаауан аҷкәынцәа маҷк иадымзаргьы аԥсуа ашәа ргәы шырханаршҭуаз, мчык шрыланаҵоз. Белла Ламиаԥҳа лхәыҷаахыс амузыка дазҿлымҳан, ачамгәыр алырҳәон, лхатәы ашәақәакгьы аԥылҵахьан. Убри аҟнытә агәыԥ аизгарагьы лара илыдырҵеит.

Аибашьра иацынҵәаз Арасаӡыхьтәи ашәаҳәаратә гәыԥ аҭоурых
© Фото : предоставлено Музеем Боевой Славы им. В. Ардзинба
Аибашьра иацынҵәаз Арасаӡыхьтәи ашәаҳәаратә гәыԥ аҭоурых

"Аамҭа кьаҿк иалагӡаны ҷкәыни-ӡӷаби 12-ҩык ҳанеиза аҽазыҟаҵарақәа ҳрылагеит. Сани-саби зынӡаскгьы иақәшаҳаҭмызт снапы зласкыз аус, аха сара маӡала суалԥшьа насыгӡон. Сҩызцәеи сареи амузыкатә мыругақәа ҳаманы аҭабиақәа ҳанырҭаауаз, ачамгәыр акәымкәа абџьар ҳнапы иакызшәа ҳрыдыркылон, ҳазҿыз аус ахә ҳаракны иршьон. Мрагыларатәи афронт, шамахамзар, ацәаҳәа зегьы ҳахысит, ҳахьымнеиз хырӷәӷәарҭак ыҟан ҳа сгәы иаанагом. Лассы-лассы аибашьцәа рхаҭагьы амашьына ду ала иааны ҳаргалон. Ашәаҳәацәа реизакрагьы еснагь имариамызт, избанзар ҳгәыԥ иалаз арԥарцәагьы еибашьцәан. Ԥыҭҩык Арасаӡыхь иҟан, аха ԥыҭҩык егьырҭ ақыҭақәа рҿы еибашьуан", — илгәалалыршәоит Ламиаԥҳа.

Аибашьра иацынҵәаз Арасаӡыхьтәи ашәаҳәаратә гәыԥ аҭоурых
© Фото : предоставлено Музеем Боевой Славы им. В. Ардзинба
Аибашьра иацынҵәаз Арасаӡыхьтәи ашәаҳәаратә гәыԥ аҭоурых

Ҽнак, Тҟәарчалнтәи ирышьҭаланы иааит, Ҭырқәтәылантәи еибашьра иааз ҳашьцәа рзы ақәгылара еиҿыркаарц. Убри аҽны агуманитартә цхыраара аазгоз авертолиотқәа Тҟәарчал иаараны иҟан, ажәлар астадион дырҭәит. Уаанӡа ҳахьышәаҳәоз аҭабиақәа рҿы ауаа рацәаӡамызт, аха уи аҽны дара ирырҭеит ахәаԥшцәа жәпаҩык злахәны сааҭки бжаки ицоз аконцерт. Рықәгылара аныхдыркәша анапеинҟьабжьқәа кыр аамҭа еихсыӷьуамызт.

Аибашьра иацынҵәаз Арасаӡыхьтәи ашәаҳәаратә гәыԥ аҭоурых
© Фото : предоставлено Музеем Боевой Славы им. В. Ардзинба
Аибашьра иацынҵәаз Арасаӡыхьтәи ашәаҳәаратә гәыԥ аҭоурых

"Иҟоуп сгәалашәараҿы наунагӡа инхаз даҽа хҭыскгьы. Ҽнак ҳҽааидаҳкылан, Кәтол ақыҭан еиҿкааз "Бзана" захьӡыз абыргцәа рхырӷәӷәарҭахь ҳцеит. Уа ҳахьнеиз Резо Сақаниа иҩнаҭахьы ҳамҩахырган, ашәа рзаҳҳәарц иҳаҳәеит. Аха аҷкәын қәыԥш иншьан ахьыкҿаз ҳалаԥш анақәшәа, ашәаҳәара иаразнак мап ацәаҳкит. Ари заҳаз аԥшәма дааҳадгылан, ус наҳаиҳәеит: "Дад, шәара ишәҳәо ашәа ԥхьацагоуп, аибашьцәа иҳазкуп. Араҟа ашәаҳәара зынӡагьы иаҭыԥуп. Сыҷкәынгьы иашьцәеи иаҳәшьцәеи шәыбжьы иаҳар, иԥсы ҭынчхап. Шәалага!" — иҳәеит иара. Ашәа анаҳҳәа, аԥсуак ишихәҭоу еиԥш пату ҳақәҵаны ҳандәықәиҵа, аиааиразы ажәа ҳәаны абџьар ҭирҟьеит. Усҟан сара даҽа зныкгьы агәра згеит аԥсуа идоуҳа аӷәӷәара", — лҳәоит Белла Ламиаԥҳа.

Аибашьра анеилга Белла Иван-иԥҳа лырҵаҩратә занааҭ дазыхынҳәит: 1985 шықәса раахыс ашкол аҟны аус луан. Лара лажәақәа рыла, аҭынчра аамҭазгьы агәыԥ "Арасаӡыхь" аибашьра иалиааз ашәақәа ирызкыз аконцертқәа рахь иаарыԥхьон, аха уи азҿлымҳара зынӡа имаҷӡан. Иҟоуп иахьа уажәраанӡагьы ауаа ирмаҳац лхатәы ашәақәа. Абџьар мца иацәыхьчаны аҭынч ԥсҭазаара иахьыгӡоу ацәаҳәақәа ас иԥхьакны ишԥаҟалеи ҳәа санлызҵаа, дааччан, "сара смиссиа аибашьра иацынҵәеит" ҳәа аҭак сылҭеит.

Аибашьра иацынҵәаз Арасаӡыхьтәи ашәаҳәаратә гәыԥ аҭоурых
© Фото : предоставлено Музеем Боевой Славы им. В. Ардзинба
Аибашьра иацынҵәаз Арасаӡыхьтәи ашәаҳәаратә гәыԥ аҭоурых

Дубап аӡәы зылшара маҷӡоу, аха зыҽӡырганы ахьырҵәаҵәа еиԥш зхы узырбо. Аха сара дызбоит даҽаӡәы, зыжәлар ирзааԥсахьоу, аха зџьабаа зҵәахуа, гәык-ԥсык ала зус иазнеиуа ауаҩы. Сара исаҳаз аҟнытә узызхәыцша рацәаӡоуп, аха ҩашьарада еилсыргеит акы: хымԥада, абри ауп изахьӡу "абзиа уны аӡы иаҭ".

199

Латипов Егры аҳәаа аамҭала аартразы: ҳтәылауаа ринтересқәа рыхьчара иазырхоуп

18
(ирҿыцуп 18:52 13.07.2020)
Аԥсны ашәарҭадаратә маҵзура ахантәаҩы ихаҭыԥуаҩ, аҳәаахьчаратә маҵзура аиҳабы Рустам Латипов арадио Sputnik аефир аҿы еиҭеиҳәеит Аԥсни Қырҭҭәылеи рҳәааҿы аамҭалатәи акоридор аус шауа атәы.
Раионк аԥсҭазаараҟынтә: Латипов Аԥсныи-Қырҭтәылеи рҳәаа аамҭала аартра иазкны

"300-ҩык инареиҳаны иахьа еиуеиԥшыма амзызқәа ирыхҟьаны Қырҭтәыла иҟоуп. Асааҭ 9 инаркны асааҭ 15:00 рҟынӡа иахьатәи аамҭа иалагӡаны аҳәаа иахысхьеит 70-ҩык инареиҳаны. Урҭ рахьынтә иҟоуп згәамбзиара иахҟьаны ицазгьы, аха ус еиԥш иҟаз хәҩык роуп, аиҳараҩык уахьынтә иаауа Гал иқәынхо, еиуеиԥшым азҵааракәа рыла Қырҭтәыла инанагаз роуп. Уа дыҟан аҵара зҵо, аԥсра иақәшәаз, зҭаацәа збоит ҳәа ицаз уҳәа. Хынтә иаартыз акоридор иабзоураны 1500-ҩык инареиҳаны рыҩнқәа рахь ихынҳәит. Ари аҭагылазаашьа ауааԥсыра гәахәарыла ирыдыркылоит, ҳтәылауаа ринтересқәа рыхьчаразы Аԥсны атәыла анапхгара ари аус анагӡара хымԥадатәны иахәаԥшуеит", – ҳәа азгәеиҭеит Латипов.

Иаҳа инеиҵыху аиҿцәажәара шәазыӡырҩы аудио аҿы, мамзаргьы арадио Sputnik Аԥсны аефир аҿы.

Иара убас шәаԥхьар ҟалоит:

 

 

18

Акоронавирус змаз ҩыџьа апациентцәа Гәдоуҭатәи ахәышәтәырҭа илрыҩаараны иҟоуп

14
(ирҿыцуп 18:41 13.07.2020)
Аҵыхәтәантәи уахыки-ҽнаки рыла Аԥсны акоронавирустә инфекциа амазааразы агәаҭара иахысит 36-ҩык ауааԥсыра.

АҞӘА, ԥхынгәы 13 - Sputnik. Гәдоуҭатәи ахәышәтәырҭаҟны ишьҭоу акоронавирус зцәа иалаз акурсантцәа ҩыџьа аҩашаҽны, ԥхынгәы 14 рзы рылҩаара иаздырхиоит ҳәа адырра ҟанаҵоит Ауааԥсыра акоронавирус рацәыхьчаразы аоперативтә штаб.

Ари амш иалагӡаны агәаҭара иахрыжьыз 36-ҩык рҟынтә аӡәгьы иҿы акоронавирус  шьақәырӷәӷәамхеит

Иахьазы Аԥсны зынӡа акоронавиурс рыдырбалахьеит 38-ҩык. Урҭ рахьтә ҩыџьа макьанагьы Гәдоуҭатәи ахәышәтәырҭа иҭоуп, 35 ргәы бзиахеит, аӡәы лыԥсҭазаара далҵит.

Адунеизегьтәи агәабзиарахьчаратә еиҿкаара аҵыхәтәантәи адыррақәа рыла, адунеи аҿы ишьақәдырӷәӷәахьеит 12,5 миллион хҭыс инареиҳаны, рыԥсҭазаара иалҵит 561 нызқьҩык инарзынаԥшуа.

Акоронавирус иазку ажәабжьқәа зегьы шәрыԥхьар ҟалоит абра>>

14
Атемақәа:
Ачымазара ҿкы – акоронавирус Аԥсни адунеи аҿи: иалкаау