Аимҳәаҿкы змоу рҭаацәеи рыуацәеи апрофилактикатә хәышәтәыра иахысит

Аимҳәаҿкы змоу рҭаацәеи рыуацәеи апрофилактикатә хәышәтәыра иахысит

41
(ирҿыцуп 15:32 30.01.2019)
Аштамм H1N1 (свиной) иаҵанакуа аимҳәаҿкы Аԥсны ицәырҵит ҳәа азгәаҭоуп.

АҞӘА, ажьырныҳәа 30 – Sputnik, Бадри Есиава. Аимҳәаҿкы зманы ахәышәтәырҭақәа ирҭоу ачымазцәа рҭаацәеи рыуацәеи апрофилактикатә хәышәтәыра иахысит ҳәа Sputnik иазеиҭалҳәеит Аԥсны асанитартә ҳақьым Лиудмила Скорик.

Аԥсны аимҳәаҿкы цәырҵит
© Sputnik / Sergey Venyavsky

"Аимҳәаҿкы зманы ахәышәтәырҭақәа ирҭоу ачымазцәа рҭаацәеи рыуацәеи апрофилактикатә хәышәтәыра иахысит. Аинфекциа ирласны еиҭаҵуа акоуп, убри азы аҳәара ҟаҳҵоит ахәышәтәырҭа иҭоу рбара ҳәа анеира иаҟәыҵырц, аиҳаракгьы ачымазара аҿиара ҳарак анамоу", - ҳәа азгәалҭеит Скорик.

Лара лажәақәа рыла иарбанызаалак аимҳәа еиԥшны аӡәы иҟынтәи аҽаӡәы иахь ииасуеит, аха ари аштамм еиҳа иҿкуп. Иара зыхьуа ауаҩы иааигәара уҟазар, секундқәак роуп иаҭаху иухьразы. Скорик илҳәеит згәы бзиоуи ичмазаҩуи ауаа реиҿцаара ԥктәуп ҳәа.

Есышықәса, авирустә инфекциақәа ирымҽхакны ианыҟоу аамҭазы амедицинатә усҳәарҭақәа рҿы иаԥырҵоит аԥкырақәа.

"Аимҳәаҿкы еиҳарак изызшәарҭо ахәыҷқәеи, абыргцәеи роуп. Зиммунитет ҳараку ауаа рзы ишәарҭаӡам", - ҳәа лҳәеит Лиудмила Скорик.

Иҟоуп аҭаацәарақәа зхәыҷқәа ашколқәеи ахәыҷбаҳчақәеи рахь рышьҭра иаҟәызхыз. Макьаназ усеиԥш азы шәарҭара ыҟам. Авирус иаҿагыло ауснагӡатәқәа аплантә режим инақәыршәаны имҩаԥыргоит.

Аԥсны ашәарҭадаратә маҵзура Аԥсныи Қырҭтәылеи рыбжьара аҳәаа ахысра ԥнакуеит ҩымз рыҩныҵҟа, ажьырныҳәа 10 асааҭ 20.00 инаркны.

Аҳәаа ахысра ԥкын агәыларатә ҳәынҭқарраҿы аҭыԥ змоу аимҳәачымазара аштамм H1N1 ахьрылаҵәаз иахырҟьаны.

Ирыдыркылаз аӡбра инақәыршәаны Қырҭтәыла аҵакыраҟынтәи аҳәаанырцә атәылауаа Аԥсныҟа ралалареи Аԥсны атәылауаа Қырҭтәыла аҵакыра ралалареи ԥкуп.

41