Аԥсуа драматә театр актиорцәа Адыгатәыла зҽаԥсазтәыз артистцәа ҳәа ахьӡ рыхҵоуп

Аԥсуа драматә театр актиорцәа Адыгатәыла зҽаԥсазтәыз артистцәа ҳәа ахьӡ рыхҵоуп

23
(ирҿыцуп 15:24 31.01.2019)
Аспектакль "Кавказский меловой круг" дырбан Маиҟәаԥ, ахаша, ажьырныҳәа 30 рзы.

АҞӘА, ажьырныҳәа 31– Sputnik, Асмаҭ Ҵәыџьԥҳа. Самсон Ҷанба ихьӡ зху Аԥсуа ҳәынҭқарратә драматә театр актиорцәа Кьасоу Ҳагба, Роза Дбарԥҳа, Ҭеимураз Чамагәуа Ареспублика Адыгатәыла зҽаԥсазтәыз артистцәа ҳәа ахьӡ ҳаракқәа рыхҵоуп, ҳәа Sputnik иазеиҭалҳәеит атеатри ауаажәларреи АИХқәеи реинырразы адиректор Щарида Ҭыжәԥҳа.

Ҳагба Хачегогу изкны: Кавказ иреиӷьу арежиссиорцәа иреиоу ҳәа дыԥхьаӡоуп

Адыгатәыла ахада аԥсуа актиорцәа ахьӡ ҳаракқәа рхиҵеит атеатртә ҟазара аҿаиараҿы рлагалазы, аспектакль "Кавказский меловой круг" ашьҭахь.

Аспектакль "Кавказский меловой круг" дырбан Маиҟәаԥ, ахаша, ажьырныҳәа 30 рзы. Аспектакль мҩаԥысит х-бызшәакны – абазин, аурыс, аԥсуа бызшәақәа рыла.

Самсон Ҷанба ихьӡ зху Аԥсуа ҳәынҭқарратә драматә театр актиор Кьасоу Ҳагба иажәақәа рыла аспектакль аԥхьарбара мҩаԥысит иҭәыз азал аҟны.

"Ҳашьцәа ртәылаҿы гәаартра дула ҳрыдыркылеит. Аспектакль акәзар, зыӡбахә акраамҭа иуҳәаша қәыргыламҭоуп", - иҳәеит иара.

Кьасоу Ҳагба –1976 шықәса рзы Русҭавели ихьӡ зху Қарҭтәи атеатртә институт доушьҭымҭоуп. 1999 – 2000 шш. рзы–Аԥсны акультура аминистр. Аспектакльқәа "Амза амҵарсра", "Зыхшыҩ зызрыцҳароу", "Аԥсҳа Леон", "Ацынҵәарах", "Махаз" уҳәа егьырҭгьы рҿы дыхәмархьеит.

Ҭеимураз Чамагәуа –1976 шықәса рзы Русҭавели ихьӡ зху Қарҭтәи атеатртә институт доушьҭымҭоуп. Иахьа уажәраанӡа Аԥсуа театр аҿы аус иуеит. Аспектакльқәа "Амра аԥҳа", "Аԥсҭазаара ԥхыӡуп", "Кьоџьаа рҭыӡшәа" уҳәа рҟны еиуеиԥшым арольқәа неигӡахьеит.

Роза Дбарԥҳа – 1975 шықәса рзы Русҭавели ихьӡ зху Қарҭтәи атеатртә институт доушьҭымҭоуп. Аспектакльқәа "Иули Цезарь", "Аҽшьҩы", "Аӡыхь абжьы ", "Амра аԥҳа" уҳәа рыҟны дыхәмархьеит.

23