Аныҳәатә чысны ирԥхьаӡо: ҳџьынџьуаа ируа аԥсуа бысҭеи, аҟәыдыршьшьи

© Foto / Саида Жиба абысҭа
абысҭа - Sputnik Аҧсны
Анапаҵаҩра
Доусы имилаҭтә чыс хкқәа бзиа ибоит. Аха аԥсуаа адгьыл акалҭ ахь ицаргьы, егьа илыԥшааху афатә раԥхьа иқәгылазаргьы- аҟәыди, абысҭеи ирыцназго ҽа гьамак ҟалом дара рзы.

Sputnik, Саида Жьиԥҳа

Иахьа Аԥсны инхо, есыҽнытәи ҳакрыфараан аԥсуа чыс хкқәа ҳаишәа иқәгылоуп, мамзаргьы уи иахәҭаку акы. Егьа атәым чыс хкы ҟаҳҵаргьы, ма асыӡбал адаҳкылоит, мамзар аџьыка. Ус ауп ишыҟоу Ҭырқәтәыла инхо ҳџьынџьуаагьы. Дареи, ҳареи 155 шықәса ҳаиҟәыҭханы ҳшыҟоугьы, ҳчыс ахь иаҳзеиԥшу агьама мыӡӡеит. 

© Foto / Саида ЖибаСаида Жьиԥҳа сасра зҿы дыҟоу Иуџьаль Сергегьиаԥҳа лҭаацәа. Ҭырқәтәыла 2019 шықәса.
Аныҳәатә чысны ирԥхьаӡо: ҳџьынџьуаа ируа аԥсуа бысҭеи, аҟәыдыршьшьи - Sputnik Аҧсны
Саида Жьиԥҳа сасра зҿы дыҟоу Иуџьаль Сергегьиаԥҳа лҭаацәа. Ҭырқәтәыла 2019 шықәса.

Арҭ амшқәа рзы Ҭырқәтәыла сыҟазаара иалагӡаны, игәасҭеит, абысҭеи аҟәыдыршьшьи (ус иашьҭоуп дара) илыԥшааху, аныҳәатә чысны ирыԥхаӡоит.

"Иахьа абысҭа ҳуеит" ҳәа амш алхны, рыуацәа аҩныҟа иаарыԥхьоит. Аишәа иқәдыргылоит абысҭа, аҟәыдыршьшьы, акәтысыӡбал (арашы акәтыжь алаҵаны), абҳәасасыӡбал, ахарҵәысыӡбал акәтаӷь алаҵаны, мамзар аҳаршьыл аҭаны, ахәылчаԥа, арҵәы, ашә, акәац ӡны.

Афара саауеит: Ҭырқәтәыла аԥсуа џьықәреи шылаҳҵаз

Шықәсык аԥхьа, Адаԥазар ақалақь азааигәара аԥсуа қыҭа Калдахәара инхо ҩ-ҭаацәарак исырҭаз аҳәарала, Аԥснынтәи ирызназгеит аџьықәреи шкәакәа ажәла. Уи ирнаҭаз аҽаҩра уамашәа ибзиахеит. Иахьатәи аамҭа зҿы сасра сыҟоу аԥшәмаԥҳәыс Иуџьаль Ҷықьԥҳа исзылуит уи ашыла иалхыз абысҭа.

Аџьықәреи, аҟәыд, ахәыл: Ҭырқәтәыла ииз аԥсуа ауҭраҭых аҽаҩра ҭаргалеит - Sputnik Аҧсны
Аџьықәреи, аҟәыд, ахәыл: Ҭырқәтәыла "ииз" аԥсуа ауҭраҭых аҽаҩра ҭаргалеит

"Саида, ианылаҳҵоз бҳацхраа анаҳҳәа, "хшыҩла акрызуа, маха-шьахала дааԥсар ҟалом, афараан саар еиӷьуп" ҳәа алаф ҳабҳәон, абар уажәы уи аҩыза алшара анцәа иҳаиҭеит, ҳҿы иаҳарҳәо абзиарақәа нагӡахааит", - лҳәан сажәақәагьы аасгәалалыршәеит.

Мышқәак раԥхьа, саргьы сбысҭа агьама шәсырбароуп ҳәа расҳәан, аура сҽазыскит, аха абар амықәшәатә, ашыла маҷхеит, ахрыӷ ааганы саԥхьа инықәдыргылеит.

Ахаан абжьыуаа рбысҭа (Бзыԥаа, Очамчыраа рбысҭа ҳәа ҳзышьҭоу) зымуцызт, аԥышәара сахысыр акәхеит.

"Абысҭа ҳаҿыԥсааит, убриаҟара иоуман" анырҳәа, сгәы сырҭынчит.

Уажәы дҵас исымоуп ачашә аӡра. Маӡала сан сылзасны слазҵаароуп амажәа шыҟарҵо, Ҭырқәтәылатәи сыԥсшьарамшқәа схы ԥырԥыруа иҟарҵан, исхашҭзар ҳәа сшәоит.

 

Ажәабжьқәа зегьы
0