АҞӘА, жәабран 22 – Sputnik. Урыстәылантәи алашара ҳауа ҳалагап ҳәа ҳгәыӷуеит. Ус ишааҟалалак, ареспублика иахьаҵанакуа аамҭа-аамҭалатәи афымцарцәара аанкылахоит ҳәа Аԥсуа телехәаԥшра аинтервиу аиҭеит АУН "Амшынеиқәафымцамч" адиректор хада Аслан Басариа.
"Урыстәылатәи Афедерациаҟынтәи афымцалашара ҳауа ҳшалагалак, АИХ рыла адырра ҟаҵаны, алашара арцәара аанаҳкылоит", - ҳәа иҳәеит иара.
Басариа иазгәеиҭеит иҟоу аҭагылазаашьа зыхҟьо Џьуартәи аӡеизакырҭаҿы аӡы аҩаӡара ахькаҳаз азы шакәу. Иара иажәақәа рыла, уажәтәи аҭагылазаашьа иалнаршоит миллионки 200 киловатт-сааҭ аекономиа аҟаҵара.
"Ҳәарада, ҳара ибзианы еилаҳкаауеит ауааԥсыра рҭагылазаашьа уадаҩ, аха аекономиа заҟа ҳзыҟаҵо аҟара, ҳауадаҩрақәагьы аԥыххоит", - ҳәа иҳәоит иара.
Иара убасгьы, иазгәеиҭеит афымцамч аушьҭраан астанциаҟәшақәа амчхара рзымычҳакәа, ишыԥхасҭахо.
"ЕгрыГЕС аусура аанкылатәхоит аӡы аҩаӡара 420 метра рҟны ианнеилак. Усеиԥш ҟамларц азы иӡбоуп жәабран 20 инаркны (асааҭ 11:00-14:00 рзы) Аԥсны иахьаҵанакуа аҭыԥқәа рҿы афымцаларашара арцәара. Ари аҩыза аҭагылазаашьа аанкылахоит Урыстәылантәи афымцалашара ҳауа ҳалагаанӡа", - ҳәа азгәаҭан "Амшынеиқәафымцамч" апресс-маҵзура аҳәамҭаҿ аамҭа-аамҭалатәи алашара арцәара амзызқәа азгәаҭо.
Жәабран 19, 2019 шықәса рзы иҟоу азыԥхьагәаҭарала, ЕгрыГЕС хәажәкыра-мшаԥы амзақәа рзы 310 миллион киловатт-сааҭ афымцамч арҿиара алшоит. Убри аан Аԥсны афымцамч ахархәара 366 миллион киловатт-сааҭ итәоит. Адефицит 56 миллион киловатт-сааҭ шьақәнаргылоит.
"Аԥсныбылтәы" афымцалашара арцәаразы: агаз азхара ҳамоуп
ЕгрыГЕС ахархәарахь ирыҭан 1978 шықәса рзы. ГЕС агидроагрегатқәа Аԥсны аҵакыраҿы иҟоуп, аӡеизакырҭа – Қырҭтәыла.
ЕгрыГЕС алшара 1300 мегаватт инаӡоит.
