Шәарах Ԥачалиа

Тҟәарчалтәи атеатр: Шәарах Ԥачалиа игәаларшәара ҳуалуп

92
Тҟәарчалтәи аҳәынҭқарратә комедиатә театр имҩаԥнагоит агастрольқәа ари атеатр ашьаҭаркҩы Шәарах Ԥачалиа диижьҭеи 105 шықәса аҵра инамаданы, иҳәеит атеатр арежиссиор хада Сырбеи Сангәлиа Sputnik Аԥсны апресс-центр аҿы.

Аҟәа, хәажәкыра 19 – Sputnik, Бадрак Авидзба. Агастрольқәа рҳәаақәа ирҭагӡаны, Тҟәарчалтәи аҳәынҭқарратә комедиатә театр раԥхьатәи ақәгылара мҩаԥысуеит Очамчыра, хәажәкыра 21 рзы.

"Ҳтеатр Шәарах Ԥачалиа ихьӡ ахьаху инадҳәаланы, ҳгәы иҭаҳкит агәаларшәаратә гастрольқәа мҩаԥаҳгарц. Ҳалагоит Очамчыра Акультуратә хан аҿы ақәгылараҟынтәи (асааҭ 15:00 рзы). Анаҩс Очамчыра араион ақыҭақәа рахь ацара ҳгәы иҭоуп. Иқәҳаргылоит Шәарах Ԥачалиа ииҩыз апиеса "Мазлоу - зегь злоу", - азгәеиҭеит иара.

Тҟәарчалтәи атеатр Шәарах Ԥачалиа диижьҭеи 105 шықәса азгәанаҭоит

Иара иажәақәа рыла, ари аспектакль рыманы Аԥсны араионқәа зегьы рҟны иқәгыларц ргәы иҭоуп. Уи аус аиҿкараҟны араионқәа рхадацәа адгылара рырҭоит.

2019 шықәса ҭагалан азы ргәы иҭоуп Нхыҵ Кавказтәи ҳаиашьаратә республикақәа рахь ацара.

Тҟәарчалтәи атеатр актиор Нури Џьынџьал дазааҭгылеит ахәаԥшцәа рыспектакльқәа рахь иаадырԥшуа азҿлымҳара атәы.

"Сара атеатр аҟны аусура салагеит аибашьра ҟалаанӡа, 1986 шықәса инаркны. Усҟантәи аамҭақәа рзы ауаа иаҳа ирзыманшәалан, иагьырҭахын атеатр ахь аныҟәара. Иахьазы ҳаспектакльқәа ирҭаауа еиҳарак ахәыҷқәа роуп. Аха ҳара иаҳҭахуп аиҳабацәагьы еиҳа азҿлымҳара арҭаларц", - иҳәеит Џьынџьал.

Тҟәарчалтәи аҳәынҭқарратә комедиатә театр шьаҭаркын 1955 шықәсазы. Уи асценаҟны раԥхьаӡа иқәдыргылаз комедианы иҟалеит аԥсуа актиор, арежиссиор, адраматург, СССР Жәлар рартист Шәарах Ԥачалиа ииҩыз апиеса "Ачара ду". Уи иԥсҭазаара даналҵ ашьҭахь, 2003 шықәсазы ари атеатр ихьӡ ахырҵеит.

Шәарах Ԥачалиа - Аԥснытәи АССР Жәлар рартист, СССР жәлар рартист, диит лаҵара 20, 1914 шықәсазы Гәдоуҭа араион Аацы ақыҭан. 1931 шықәсазы далгеит Аҟәатәи адраматә студиа. 1939 шықәсазы далгеит Шоҭа Русҭавели ихьӡ зху Қарҭтәи атеатр аҟны иҟаз атеатралтә студиа. Инаигӡеит 150 инареиҳаны арольқәа.

1960-тәи ашықәсқәа рылагамҭа инаркны аус иуан Ижевск иҟоу Удмурттәи аҳәынҭқарратә театр аҟны, анаҩс Тҟәарчалтәи атеатр анышьаҭаиркыз ашьҭахь уи арежиссиорс, аиҳабыс акыр шықәса дыҟан.

Шәарах Ԥачалиа инапы иҵыҵит акымкәа-ҩбамкәа апиесақәа: "Ачара ду" (1942), "Гәында" (1957), "Мазлоу - зегьы злоу" уҳәа. Акомедиа "Гәында" ықәыргылан Ужгород иҟоу Закарпаттәи украинатәи амузыка-драматә театр асценаҟны.

Шәарах Ԥачалиа иԥсҭазаара далҵит 2000 шықәса абҵарамзазы. Анышә дамадоуп Аԥсны ашәҟәыҩҩцәеи ауаажәларратә усзуҩцәа Рпантеон аҟны.

 

92

"Князь Владимир" 2020 шықәса рзы Аҟәатәи абаӷәазахь иҭалом

1
Уаанӡа ишазԥхьагәаҭаз ала аӷба "Князь Владимир" Аҟәатәи амшынтә баӷәаза иаҭаар акәын лаҵарамза инаркны цәыббрамзанӡа графикла фынтә.

АҞӘА, ԥхынгәы 6 - Sputnik. Аӷба "Князь Владимир" 2020 шықәса рзы Аҟәатәи абаӷәазахь идгылом ҳәа Sputnik иазеиҭарҳәеит Аԥснытәи амшынӷбарныҟәараҿ.

"ИАЕ "Черноморские круизы" адыррақәа рыла 2020 шықәса ԥхынгәы 3 рзы "Росморпорт" адиректор хада инапынҵала, акоронавирустә инфекциа COVID-19 иадҳәалоу аепидемиологиатә ҭагылазаашьа иахырҟьаны аӷба "Князь Владимир" 2020 шықәсазтәи анавигациахь Аҟәа амшын баӷәаза аҭалара аҵанакуам", - ҳәа рҳәеит аусбарҭаҿы.

"Князь Владимир" 2021 шықәса рзы Аҟәаҟа аара адҳәалахоит Урыстәылатәи Афедерациеи Аԥсны Аҳәынҭқарреи рҿы иҟало аепидемиологиатә ҭагылазаашьа ҳәа рҳәеит аусбарҭаҿ.

Уаанӡатәи адыррақәа рыла аӷба арахь ааира ԥхынгәы абжанӡа иԥкын.

1
Абессалом Кварчия

Кәарҷиа: алхыҩ иазыҟаҵара хьысҳауп

4
Ауаажәларратә палата алахәыла Абессалом Кәарҷиа арадио Sputnik аефир аҟны игәаанагара иҳәеит алхыҩ изы иахьынӡахәарҭоу адепутатрахь акандидатцәа телехәаԥшрала рықәгылара.

Аԥсны Жәлар Реизарахь алхрақәа мҩаԥысуеит алхратә ҭыԥ хадақәа ԥшьба рҿы: Кындыӷтәи, Гәдоуҭатәи, Бзыԥтәи, Оҭҳаратәи.

Кындыӷтәи алхратә ҭыԥ хада №31 аҟнытә Жәлар Реизара адепутатрахь кандидатцәас иқәгылоуп: Аидар Кәыҵниа, Гарри Кокаиа, Џьансыхә Адлеиба; Гәдоуҭатәи алхратә ҭыԥ хада №18 ала - Асҭамыр Ахбеи Алхас Ҳагбеи; Бзыԥтәи алхратә ҭыԥ хада № 10 ала – Ҭамаз Леибеи, Ҭемыр Беиеи; Оҭҳаратәи алхратә ҭыԥ хада №14 аҟнытә Жәлар Реизара адепутатрахь кандидатцәас иқәгылоуп Робесҭан Габлиеи Алмасхан Барцыци.

Алхратә комиссиа хада имҩаԥнагаз аҵәҭаԥсарала адепутатрахь акандидатцәа Аԥсуа телехәаԥшраҟны аефиртә аамҭа рызшоуп. Бзыԥтәи алхратә ҭыԥ хада №10 ала адепутатрахь акандидатцәа Ҭамаз Леибеи, Ҭемыр Беиеи аефир аҟны иҟалоит уаха, ԥхынгәы 6 рзы.

 

Кәарҷиа ателедебатқәа рзы: заанаҵы ибжьы зиҭо здыруа алхыҩ изы иҵакыдоуп

"Ауаҩы уала-ҭахыла, мамзаргьы аиҳабыра идгылоума, ицхраауама, ҳара даҳтәума, егьырҭ дыртәума ҳәа ихәыцны далзхуа изы егьа теледебат ҟауҵаргьы, иара изы зегь дара роуп. Уи ателехәаԥшраҟны иибо спектакльк еиԥш дазыӡырҩуеит, аха игәы иҭеикыз, изиҭараны дыҟоу ибжьы ииҭоит. Ибжьы зиҭо ззымдыруа аӡәыр дыҟазар, Апарламент ахь днеир абри ихаҿсахьа зеиԥшрахои ҳәа ихәыцуа ауаҩы изы ибзиоуп, ихадоуп телехәаԥшрала иибо, аха иҟоуп ауаҩы иаразнакгьы иеилкаара анымариам. Убри аганахьала сгәаанагарала Алхратә комиссиа хада ахымҩаԥгашьа хәыҷык ихьысҳауп ҳәа ажәлар разыҟаҵаразы. Дара ирҳәароуп алхрақәа шус хадоу, абжьыҭара уала-ҭахыла акәымкәа ишазнеитәу ауаа азыҟаҵалатәуп есымша. Ауаа иахьа хәыҷык иҟьалашәа иҟоуп, рыбжьы зырҭара дрыздыруам, џьоукы-џьоук хьаасгьы ирымам, "иаҳнаҭеи Апарламент" зҳәогьы ыҟоуп. Абжьыҭарахь имнеиз ауаа рхыԥхьаӡара анырацәахалак, уи иаанагоит урҭ разыҟаҵара зыхәҭаз ауаа ажәлар рҟынӡа ишахәҭаз ирызнамгаӡеит ҳәа", - азгәеиҭеит Кәарҷиа.

 

Аԥсны Алхратә комиссиа хада иҭацәыз адепутаттә ҭыԥқәа рахь ԥхынгәы 12 рзы алхрақәа рымҩаԥгара ҿҳәарас ишьақәнаргылеит.

Азакәанԥҵаратә мчраҿы амандатқәа ԥшьба ҭацәуп - уаанӡа депутатцәас иҟаз атәыла ахада Аслан Бжьаниа, аԥыза-министр Александр Анқәаб, Аҩнуҵҟатәи аусқәа рминистр Дмитри Дбар, Гагра араион ахада инапынҵақәа назыгӡо Иури Хагәышь рҭыԥқәа.

Инеиҵыху анҵамҭа шәаҳар шәылшоит арадио Sputnik Аԥсны аефир аҟны.

Иара убас шәаԥхьар ҟалоит:

4