Сариа Кәарцхьиаԥҳа

Кәарцхьиаԥҳа Ҟрым азы: ашьхақәа алаҳамҵозар, Аԥсны ахьҳгәаланаршәо ыҟоуп

51
(ирҿыцуп 19:11 21.04.2019)
Sputnik акорреспондент Сариа Кәарцхьиаԥҳа ҭелла ажәабжь аалыцҳаит Аԥснытәи ажурналистцәа рзы Ҟрымҟа иеиҿкаау атур шымҩаԥысуа. "Ҟрымтәи аекспедициа. Зегьы лабҿаба" апрограмма аҳәаақәа ирҭагӡаны мшаԥы 19 инаркны 23-нӡа Аԥснытәи ажурналистцәа адгьылбжьахалаҟны иҟазаауеит.
Кәарцхьиаԥҳа Ҟрым азы: ашьхақәа алаҳамҵозар, Аԥсны ахьҳгәаланаршәо ыҟоуп

"Амҩа хәыҷык ҳарааԥсеит, избанзар машьынала ацара ус имариам, аха ибзианы ҳрыдыркылеит. Аиашазы, ашьыжь ҳанааи, аԥсуа ҩнаҭа ҳаҭаазшәа агәаанагара соуит, ачеиџьыка ҳадыргалт. Ауаҩы дҳацуп, Ҟрым аҭоурых ҳзеиҭазҳәо. Раԥхьатәи амш азы Севастополь ҳаҟан, аҩбатәи амш азы - Иалта, ахԥатәи амш - Ҟрым иҟоу аҭыԥқәа ҳбоит. Аԥшьаҭыԥқәа, абаашқәа, ауахәамақәа - араҟа зегьы ҳгәаԥхоит, Иалта даараӡа иԥшӡарҭоуп, ганкахьала Аԥснытәи апеизажқәа ҳгәаланаршәеит. Аха ашьхақәа ртәы уҳәозар, Аԥсныи Ҟрыми еиԥшӡам, ашьхақәа ҳәа ирԥхьаӡо ҳара ҳзы ишьхақәам", - ҳәа азгәалҭеит Кәарцхьиаԥҳа.

Инеиҵыху аиҿцәажәара шәазыӡырҩы арадио Sputnik Аԥсны аефир аҿы.

51
Демур Какалия

Какалиа Кәтол асоциалтә проектқәа рынагӡаразы: ацхыраара ҳарҭоит ҳқыҭа иалахәу аҷкәынцәа

1
Агәыҳалалратә фонд "Кәтол ақыҭа аҿиара ацхыраара" анапхгаҩы Демур Какалиа арадио Sputnik аефир аҟны арубрика "Раионк аԥсҭазаараҟынтә" аҿы еиҭеиҳәеит ақыҭаҟны ашьапылампыл маҷ адәы аргылара шаԥшьаргаз, рфонд ахықәкы атәы.
Раионк аԥсҭазаараҟынтә: Какалиа Кәтол ашьапылампылтә дәы аргылара иазкны

"Афонд алахәылацәа ақыҭаҟны инхо аҷкәынцәа роуп зегьы: Џьон Тапаӷәуа, Авҭандил Шьенгьелиа, Гена Ҵлаииа. Еиду амилаҭқәа реиҿкаара Аҿиара апрограмма асоциалтә проектқәа ирыдҳәалоу ахь ашәҟәы алаҳҵеит. Астадион аргыларазы ҳапроект ргәаԥхеит, ирҳәеит аԥара шәаҳҭоит ҳәа. Аргылара ҳалагеит, иаагозар, иацы ахаҳә ҭаҳаԥсон астадион иахьаҵанакуа. Ацхыраара ҳарҭоит ҳқыҭа иалахәу аҷкәынцәа. Аӡәы абылтәы ҳаиҭоит, ҽаӡәы - аԥара, досу ишилшо еиԥш. Апроект анагӡаразы аԥара аноурыжьуаз Еиду амилаҭқәа реиҿкаара Аҿиара апрограммала иҳарҳәеит ахә зегьы шахырымшәаауа. Ҳара иаҳҳәеит иазымхо аԥара, аргыларатә материалқәа роума, ишҳалҳаршо. Ахаҳә акәзар, Тамшьтәи аҵхырҭаҟынтәи иҳаиҭеит ҳқыҭаҟны инхо Асҭамыр Саӡба, иара ибзоурала иахәҭаз ҭаҳаԥсеит", - иҳәеит Какалиа.

Иара иажәақәа рыла, Кәтол ақыҭа аҿиаразы афонд аԥҵан жәабранмзазы, хықәкыс ирымоуп еиуеиԥшым асоциалтә проектқәа аԥсҭазаара раларҵәара.

"Зегьы ижәдыруеит ақыҭақәа рҟны аҭагылазаашьа зеиԥшроу, иҟаӡам иақәнагоу аспорттә ҽазыҟаҵарҭақәа, еиуеиԥшым асекциақәа. Ҳәарада, арҭқәа зегьы зныкала иҳалшаӡом аҟаҵара, аха шьаҿа-шьаҿала ҳамч ақәхоит ҳәа сгәы иаанагоит", - иҳәеит Какалиа.

Иара иазгәеиҭеит ақыҭақәа рҟны еиуеиԥшым асоциалтә проектқәа зынагӡахар, ақалақь ахь нхара ицо рхыԥхьаӡара иаҳа имаҷхон ҳәа.

Иара убас шәаԥхьар ҟалоит:

1

Аҳәынҭқарратә харадҵара Артур Анқәаб жәашықәса аҭакра иқәҵатәуп аҳәеит

3
(ирҿыцуп 14:47 06.06.2020)
2019 шықәсазтәи Аԥсны ахада иалхрақәа раан кандидатс иқәгылаз Артур Анқәаб ауаҩы имҵарсреи уи иоушьҭразы аԥара рацәа риҭарц мчыла идцалареи харас идырҵоит.

АҞӘА, рашәара 6 - Sputnik. Аӡбарҭатә напхгара апрокурор Асида Қәачахьиаԥҳа зхаҿала даарԥшу аҳәынҭқарратә харадҵара Артур Анқәаб хьырхәрас иқәнаҵоит иҟаиҵаз ацәгьоурақәа ааизакны рзы 10 шықәса иџьбароу ҭакрала ихигаразы. Абри атәы аанацҳауеит Аҟәа ақалақьтә ӡбарҭа асаит.

Артур Анқәаб харас идырҵоит Армен Григориан имҵарсра. Ашьаусҭҵаара ишаҳәо ала, уи дырӷьычит абҵара 24, 2019 шықәсазы Аҟәа ақалақь аҿы, шасыс дызгаз иара иоушьҭразы "аԥара рацәаны ириҭарц мчыла дадырцалон". Ирӷьычыз ауаҩы дыԥшаан ԥхынҷкәын 1 азы Гәдоуҭа араион ақыҭақәа руак аҟны.

Аӡбарҭа ыиасит аганқәа реимак-еиҿак ахь, рашәара 5 рзы аилатәаратә уадахь аилацәажәаразы иҩналеит. Зус рыӡбо ихьчаҩцәа уи ихара шьақәзырӷәӷәо зыршаҳаҭуа ыҟам, Анқәаб ихы дақәиҭтәтәуп рҳәоит.

Ари ашьаус ала аӡбара ҟарҵоит рашәара 23 асааҭ 12:00 рзы Аҟәатәи ақалақьтә ӡбарҭа аӡбаратә еилатәарақәа руадаҿы.

Артур Анқәаб 2019 шықәсазтәи Аԥсны ахада иалхрақәа раан кандидатс дықәгылан. Абжьыҭара актәи атур алҵшәақәа рыла, Анқәаб иоуит 1,6% алхыҩцәа рбыжьқәа рахьтә, убри ала аҩбатәи атур ахь дзымнеит.

2017 шықәсазы Анқәаб азинхьчаратә усбарҭақәа ишьҭан ауаҩы игәабзиара ааха ӷәӷәа аҭареи абџьар изакәанымкәа аҵәахреи рзы. Уи ахҭыс ҟалеит нанҳәа 9, 2016 шықәсазы Гагра ақалақь аҟны, усҟан Аԥсны атәылауаа Анри Аргәыни Артур Анқәаби, амцабџьар ала ахаҵа ишьапы иеихсны дырхәит, аҭыԥ аҟынтәи ибналеит.

2018 шықәсазы Анқәаб аӡбарҭа ахара иднаҵеит ахәҭаҷ 107 "деицрашәаны ихы инапаҿы изаамгакәа ауаҩы игәабзиара ааха ӷәӷәеи абжьаратә аахеи рыҭара" инақәыршәаны, убри азы иара иқәҵан ҩышықәса анхара аколониаҿы ихигарц. Убри ашықәсазы амнистиа даҵанакын, доурышьҭит.

Иазгәаҭоуп Артур Анқәаб акгьы ихарам ҳәа ишыԥхьаӡоу уи ихара аӡбарҭа ишьақәырӷәӷәаны азакәантә мчра аиуаанӡа.

Иара убас шәаԥхьар ҟалоит:

3