АҞӘА, мшаԥы 22 – Sputnik, Бадри Есиава. Ашахматтә турнир "Амшен" мҩаԥысит мшаԥы 20-21 рзы. Уи шхыркәшахаз атәы Аԥсны Ашахматтә федерациа ахада Константин Ҭыжәба Sputnik акорреспондент изеиҭеиҳәеит:
"Аԥсны инхо аерманцәа реилазаареи ареспублика ашахматтә Федерациеи есышықәса еицымҩаԥырго ашахматтә турнир рҽаладырхәит шәҩык инарзынаԥшуа ахәыҷқәеи адуқәеи. Актәи аҭыԥ ааныркылеит Роланд Бигәаа (Аҟәа), аҩбатәи – Даниель Гаспариан (Гагра), ахԥатәи - Ҭемыр Лакербаиа (Гәдоуҭа)", – иҳәеит Ҭыжәба.
Аԥсны Ашахматтә федерациа ахада Константин Ҭыжәба иазгәеиҭеит атурнир "Амшен" мҩаԥысуеижьҭеи 10 шықәса шҵуа. Есышықәсагьы иалахәу рхыԥхьаӡара ишацло. Иаҳҳәозар, ҵыԥх уи 80-ҩык инарзынаԥшуа рхы ԥыршәазҭгьы, сынтәа 100-ҩык инареиҳаны иалахәын.
Атурнир аатит мшаԥы 20 рзы.
