акциа Ԥсра зқәым архәҭа

Лаҵара 9 рзы имҩаԥгахоит маланыҟәала аиндаҭлареи "Ԥсра зқәым архәҭа" амҩасреи

36
Лаҵара 9 рзы имҩаԥысраны иҟоуп бжьынтәны имҩаԥырго маланыҟәала аиндаҭлара, "Ԥсра зқәым архәҭа" амҩасра аԥшаҳәаҟынтә ақалақь амҩадуқәа рахь ииагахоит.

АҞӘА, мшаԥы 24 – Sputnik, Бадраҟ Аҩӡба. Аџьынџьтәылатә еибашьра Дуӡӡа аиааира амш аҽны, лаҵара 9 рзы имҩаԥысраны иҟоуп маланыҟәала аиндаҭлара "Иҭабуп аиааиразы", акциа "Ԥсра зқәым архәҭа" амҩасреи ҳәа иҳәеит Аԥсны иҟоу Россотрудничество ахаҭарнакра анапхгаҩы Евгени Павлов Sputnik аҿы имҩаԥысыз апресс-конференцииаҿы.

"Традициала ишышьақәгылаз ала Аԥсны иҟоу Россотрудничество ахаҭарнакреи атриатлон азы Афедерациеи, аспорттә клуб "Sport Apsny" еицымҩаԥыргараны иҟоуп аныҳәаәт уснагӡатәқәа ркомплекс", - ҳәа иҳәоит Павлов.

Актәи ауснагӡатә, маланыҟәала аиԥхныҩлара бжьынтәуп Аԥсны имҩаԥысуеижьҭеи.

"Традициак аҳасаб ала ишьақәгылеит "Иҭабуп аиааиразы" ҳәа хьӡыс изауз маланыҟәала аиндаҭлара амҩаԥысра. Иара иалахәуп атриатлон азы Афедерациеи, аспорттә клуб "Sport Apsny". Адгылара руеит ақалақь ахадара, Аԥсны иҟоу Урыстәыла Ацҳаражәҳәарҭа", - ҳәа азгәеиҭеит иара.

Аиԥхныҩлара амаршрут Москва Аҩны инаркны Гәылрыԥшь, асовет ар риашьаратә ԥсыжырҭаҟынӡа инаӡоит. Уахьынтә ихынҳәуа Идырым асолдаҭ ибаҟа аҿаԥхьа ашәҭшьыҵәрақәа рышьҭаҵаразы инеиуеит.

Аиндаҭлара адагьы акциа "Ԥсра зқәым архәҭа" амҩасра ҟалоит.

"Сынтәа "Ԥсра зқәым архәҭа" алахәылацәа рыҳәарала амаршрут еиҭакхоит, ақалақь амҩадуқәа рахь ииагахоит", - ҳәа иҳәоит Павлов.

Уажәы, дарбанызаалак илшоит Россотрудничество ашҟа изааигәоу ауаа рфотосахьа иманы днеирц. Уа иара акциа иаладырхәуа афотосахьақәа рформат ахь ииаганы иркьыԥхьуеит.

 

36