Аԥсны АҶА: ашкол амцаҽацәыхьчаратә дырраҟаҵага амамызт

36
(ирҿыцуп 13:12 02.05.2019)
Иахьа ашьыжь амцакра ахьыҟалаз абжьаратә школ №2 аҟны аҵара рҵоит 1250 –ҩык аҵаҩцәа.

АҞӘА, лаҵара 2 – Sputnik. Ашкол амцаҽацәыхьчаратә дырраҟаҵага амамызт, иара убасгьы амцаҽацәыхьчаратә хьшьтәы ахьшьымызт ҳәа иҳәоит Аҟәа ақалақьи Аҟәа араиони рҟны амцарцәаҩцәа-аиқәырхаҩцәа ргәыԥ аиҳабы Ҭимур Кәыҵниа.

"Ҳара изныкымкәа агәҽанҵара ҟаҳҵахьан арҭ аусқәа нагӡатәуп ҳәа, аха исзымдыруа амзызқәа ирыхҟьаны ҽырҵысы ҟаҵамызт. Ԥшьымзҟа раԥхьа апрокуратура аусзуҩцәеи ҳареи абри ашкол агәаҭара иахҳажьуан", - ҳәа иҳәоит Кәыҵниа.

Ҭимур Кәыҵниа иажәақәа рыла дара агәаҭарақәа рышьҭахь иахәҭоу атәы шәҟәыла ишьақәдыргылоит, уи анагӡара хымԥадазароуп.

Ашкол аҿы амцакра ҟалеит ҳәа адырра ҟаҵан АҶА аҷаԥшьаратә хәҭахьы ашьыжь, асааҭ 6:40 рзы.

"Амцарцәара иалахәын 130-ҩык амцарцәаҩцәеи 14 машьынеи. Иара убасгьы ацхырааразы иаашьҭын урыстәылатәи аҳәаахьчаҩцәа. Очамчыра араион аҟынтәи амашьынақәа хԥа, Гәылрыԥшь араион аҟынтәи машьынак, Гәдоуҭа араион аҟынтәи машьынак амцарцәара иалахәын", - ҳәа радио Sputnik иазеиҭеиҳәеит Аԥсны АҶА аминистр ихаҭыԥуаҩ Саҭбеи Гындиа.

Асааҭ 9:30 рзы амца ырцәан. Уа уажәы акомиссиа аус руеит, амцакра амзыз ашьақәыргыларазы, иҳәеит аминистр ихаҭыԥуаҩ.

Аҟәатәи ашкол №2 ахыбра ргылан 1870 шықәса рзы. Аԥхьанатә аҳәса рпрогимназиа ҳәа акәын ишыҟаз, хылаԥшра алҭон аҳкәажәԥҳәыс Мариа Федор-иԥҳа.

1904 шықәса рзы аҩбатәи аихагыла хагалан. 1909 шықәса рзы аа-класски иҟаз агимназиа ҳәа ахьӡырҵеит, аимператор Александр III иԥҳа, аҳкәажәҭыԥҳа Ксениа Александр-иԥҳа хылаԥшра азылуан.

ХХ ашәышықәса 20-тәи ашықәсқәа рзы Аҟәатәи аҩбатәи абжьаратә школ ҳәа еиҭаркит.

1942 шықәса рзы Александр Сергеи-иԥа Пушкин ихьӡ зху аурыс школ ахьыӡҵахеит. Асовет аамҭақәа раан ашкол азеиԥшҵаратә усҳәарҭаны иҟалеит.

1992-1993 шықәсқәа рызтәи аԥсуа-ақырҭуа еибашьраан ахыбра блит.

2008 шықәса рзы ашкол № 2 Урыстәылатәи Афедерациа афинанстә цхыраарала еиҭашьақәыргылан.

 

36
Атемақәа:
Аҟәатәи ашкол абылра (15)