Амармалташьтә пты анырҵәара

Амармалташьтә пты анырҵәаразы ахәшәқәа ааргеит

39
(ирҿыцуп 14:16 04.05.2019)
Амармалташьтә пты анырҵәаразы ахәшәқәа ааргеит агуманитартә зҵаарақәа рзы жәларбжьаратәи аиҿкаарақәа ирымадоу Аԥсны ахада ихаҭарнак ицхыраарала.

АҞӘА, лаҵара 4 – Sputnik, Бадраҟ Аҩӡба. Амармалташьтә пты ақәхразы 10 000 литра ахәшәи 500 феромон кыгеи Аԥсныҟа иаагоуп жәларбжьаратәи аиҿкаарақәа рҟынтәи ҳәа Sputnik иазеиҭеиҳәеит Аԥсны ақыҭанхамҩа аминистрра агроҟәша аиҳабы Дмитри Хагәышь.

"Иахьазы иҳауз ахәшәқәа араионқәа рыла еихаҳшеит. Урыстәылатәи агангьы иаҳзаанашьҭит 4 800 литра ахәшә гуманитартә цхыраарак аҳасаб ала", - иҳәоит Хагәышь.

Жәларбжьаратәи аиҿкаарақәа иаарышьҭыз ахәшә резервк аҳасабала иааныжьхоит макьаназы. Аминистрра азыԥшуп араионқәа рхадарақәа рҟынтәи азыҳәақәа. Ахәшә ақәҭәара ауааԥсыра рхаҭақәа имҩаԥыргалар рылшоит иацу аинструкциа инақәыршәаны.

"Араионқәа ирҭахны ианыҟала, азыҳәақәа ҳзаарышьҭыр рылшоит. Ахимиатә усадулара макьаназы изаауп, аҵлақәа макьаназ ишәҭуеит, ашәыр аҿалара ишалагалак ахәышәтәратә усурақәа ирылагоит" ҳәа иҳәеит Хагәышь.

Иара убасгьы иазгәеиҭеит напыла апты аизгара алҵшәа бзиақәа шаанарԥшыз, сынтәа иалагӡаны ԥшь-тоннак шеизыргахьоу.

Жәабран 27 рзы Аԥсны аԥыза-министр Валери Бганба инапы аҵеиҩит ақәҵара ҷыда, Аԥсны ақыҭанхамҩа аԥхасҭа азҭо амармалташь пты ақәхразы ауснагӡатәқәа инарыдҳәаланы.

Шәачаа Аԥсны амармалташь пты ишаҿагыло ргәаԥхоит>>

 

39