Агәамсамеизакырҭа

Агәамсамеизакырҭа аполигон ахьыргылахо адгьыл акатегориа ԥсахуп

67
(ирҿыцуп 13:47 08.05.2019)
Аполигон ҿыц иазыԥхьагәанаҭоит ацрыҵқәа рыҟреи иара убасгьы апластики ацеллофани Аԥсны ралгара.

АҞӘА, лаҵара 8 - Sputnik. Аԥыза-министр Валери Бганба инапы аҵеиҩит ақәҵара "Гәылрыԥшь араион Кациқыҭ 36 гектар иҟоу адгьылҭыԥ" ақыҭанхамҩатә хықәкы змоу адгьылқәа" ркатегориа аҟынтәи " ааглыхра, атранспорт, аимадара, атәылахьчара, аҽа хархарҭа ҷыдак" акатегориахь аиагаразы". Абри атәы аанацҳауеит Аминистрцәа реилазаара апресс-маҵзура.

Анапы зҵаҩу ақәҵара анагӡара хылаԥшра аҭара анапы ианҵоуп адгьылхархәареи акадастри рзы Аԥсны аҳәынҭусбарҭа.

Мшаԥы 4 рзы имҩаԥысыз абрифинг аҿы Аԥсны аԥыза-министр Валери Бганба иазгәеиҭеит аполигон аргылара 2020-2022 шықәсқәа рызтәи Аԥсны аҿиаразы Аинвестициатә программа ишаҵанакуа, аполигон аргыларазы 36 гектар адгьыл шазыԥшаау.

Абҵара 30 2019 шықәса рҟынӡа иргыланы, ахархәарахь ирыҭахоит еихшо абзазаратә црыҵ аҵәахырҭа полигон.

Аполигон аргылараз аԥаразоужьра азҵаара иалацәажәараны иҟоуп 2019 шықәса лаҵарамзазы имҩаԥысраны иҟоу Аԥсныи Урыстәылеи Риеҳабырабжьаратә комиссиа аилатәараҟны.

"2020-2022 шықәсқәа рызтәи Аԥсны аҿиаразы Аинвестициатә программала аполигон аргылара иазоужьхоит 120 миллион мааҭ аԥара. Лаҵарамзазы имҩаԥысраны иҟоуп Аиҳабырабжьаратә комиссиа аилатәара. Аԥаразоужьра шаамҩаԥгахалак апроекттә усурақәа хацыркхоит", - иҳәоит иара.

Аԥсны аԥыза-министр Валери Бганба иажәақәа рыла, агәамсам аус еиҭадырулалоит, убри аан хаз-хазы еихыршалоит.

Рауль Ҳаџьымба Аҟәа ақалақь аҿы абзазаратә црыҵ кьакьақәа рыҵәахра азҵаарақәа инарыдҳәаланы Ашәарҭадаратә хеилак аилатәара мҩаԥигеит. Аилатәара алкаақәа инарықәыршәаны Алашарбага араион аҿы иҟоу агәамсамкаԥсарҭа адыркуеит 2019 шықәса абҵарамза 30 рзы.

Аполигон аргылара, аекологиатә, агиодезиатә, агидрологиатә, агеологиатә ҭҵаарақәагьы абрахь иналаҵаны фымз рҟынӡа иадхалоит.

 

67

Аԥсны ААР раԥхьатәи ахада иҩны иақәкны ахысра иалахәыз рыԥшаара иашьҭоуп

8
(ирҿыцуп 11:47 03.06.2020)
Ахҭыс ахьыҟаз аҭыԥ аҟны иԥшаан агильзақәа. Заанаҵтәи аусҭҵаара мҩаԥнагоит Аҟәа араион аҩныҵҟатәи аусқәа рыҟәша.

АҞӘА, рашәара 3 - Sputnik. Аԥсны Аҩныҵҟатәи Аусқәа Рминистрра аусзуҩцәа раԥхьатәи ахада Владислав Арӡынба иҩны иақәкны ахысраан иалахәыз рыԥшаара иашьҭоуп ҳәа аанацҳауеит аусбарҭа апресс-маҵзура.

Аусҭҵаара адыррақәа рыла, лаҵара 29 асааҭ 20:00 рзы Алада Ешыра Папба имҩахь иааит идырым ахаҿқәа ргәыԥ. Урҭ руаӡәк раԥхьатәи ахада иҩны иақәкны ахысра далагеит.

Уаанӡа, Аԥсны ААР аминистр Дмитри Дбар аҳәамҭа ҟаиҵахьан раԥхьатәи ахада иҩны деихсит ҳәа агәҩара ззыҟоу дшаанкылоу азы.

Иара убас шәаԥхьар ҟалоит:

  • Аԥсны раԥхьатәи ахада Ешыра иҩны иақәкны ихысуаз ҳәа агәҩара ззыҟоу даанкылоуп

 

8
Флаги

Аԥсны аҿиаразы аинвестициатә программа 2020 шықәсазы еиҵахаӡом

1
(ирҿыцуп 11:33 03.06.2020)
Аԥсны ахада Аслан Бжьаниа иажәақәа рыла, Урыстәылатәи Афедерациа Аԥсны афинанстә цхыраара еиҵанатәуам ахатә биуџьет аркьаҿрақәа шаланагалазгьы.

АҞӘА, рашәара 3 - Sputnik. Аԥсны асоциал-економикатә ҿиаразы аинвестициатә программа 2020 шықәсазы еиҵахаӡом ҳәа аҳәамҭа ҟаиҵеит Аԥсны ахада Аслан Бжьаниа Апарламент адепутатцәа данырԥылоз.

"Аҵыхәтәантәи мызки бжаки рыҩныҵҟа сара ҩынтә Москваҟа сцеит. Актәи аныҟәара аԥыза-министри сареи еицымҩаԥаагеит, аҩбатәи аныҟәара иалахәын афинансқәеи аекономикеи рминистрцәа. Урыстәылатәи агани ҳареи ҳаилацәажәеит аинвестпрограмма ахышәа-ҵышәа ишагымхо азы. Уи анаҩсгьы зыргылара хыркәшам аобиектқәагьы рыргылара ари ашықәс ахь ииаганы ихыркәшахоит. Ԥарала ари 400 миллион мааҭ артәоит", - иҳәеит Бжьаниа.

Иара убасгьы иазгәеиҭеит аҵыхәтәантәи ашықәсқәа рзы Аԥсны зныкгьы инхарҭәааны Аинвестициатә программа шазынамыгӡаз. Уажәы уи анализ азыҟаҳҵоит иҳәеит иара. Иҟалоит сынтәагьы аобиективтә мзызқәа ирхырҟьаны иалмыршахар. Бжьаниа игәаанагарала, амзызқәа иреиуоуп апроектқәа рысмета ииашоу аекспертиза азура ахьыҟам. Уи Урыстәылоуп иахьыҟарҵо, аамҭеи аԥареи рацәаны иаҭахуп.

Абри инадҳәаланы Урыстәыла ахадара ақәшаҳаҭхеит аекспертиза атехникатә план ала иуадаҩу аобиектқәа мацара рзыҟаҵара.

2021 шықәса рынахыс абри аҩыза аусура Аԥсны имҩаԥгахалоит.

Бжьаниа иҳәеит ареспублика 2020 шықәсазтәи аобиектқәа реиқәыԥхьаӡа рашәара 30 рҟынӡа иазнархиар шакәу.

"Ҳара иҟаҳҵарц иаҳҭаху ҳәаны уи азы аԥара заҟа ҳҭаххо шьақәҳаргылароуп. Агха ҟалар ҳара ҳрепутациоуп аԥырхага зауа. Аекономикеи афинансқәеи рминистррақәа абри аус рнапы алакуп уажәазы. Сгәыӷуеит еилагара дук ҟаларым ҳәа", - иҳәеит ахада.

Урыстәыла Аԥсны ацхраара еиҵанамтәит, уи акәым Аинвестпрограммала иаарышьҭуа ацхыраара ацҵара азҵаара алацәажәарагьы ҟалоит ҳәа иҳәеит Бжьаниа. Асеиԥш азыҟазаашьа аҭакгьы иашаны иаҭахуп ҳәа ишьоит иара.

Бжьаниа иара убасгьы далацәажәеит Ԥсоу иаԥну аҳәаа аркра азҵаара. Акоронавирус иахҟьаз аԥкрақәа ареспублика ауааԥсыра ирнырит, аиҳаракгьы аҳәаанырцә ахәышәтәра зҭаху ауаа.

Аслан Бжьаниа иажәақәа рыла, иара Урыстәыла аԥыза-министр Михаил Мишустин ихьӡала аҳәаратә шәҟәы азирхиеит арҭ рҩызцәа атәылауаа ԥынгылада урыстәылатәи ахәышәтәырҭақәа рҿы ацхыраара роуларц.

Бжьаниа амчыбжь анҵәамҭаз Мишустин аҭел дизасраны дыҟоуп азҵаара аӡбшьазы.

Ахада иҳәеит Москваҟа Аиааира 75-шықәса ахыҵра амшныҳәа азгәаҭарахь дышнаԥхьоу. Убасҟантәи аныҟәарақәа рҳәаа иҭагӡаны ишышьақәыргылахо Аинвестициатә программа иадҳәалоу азҵаарақәа зегьы рыӡбра.

Иара убас шәаԥхьар ҟалоит:

1

Урыстәыла уахыки-ҽнаки рыла 8 863 коронавирустә хҭыс ҿыц аарԥшуп

0
(ирҿыцуп 12:03 03.06.2020)
Иахьатәи аамҭазы Урыстәыла иахьаҵанакуа 423 741-ҩык акоронавирустә инфекциа рыхьхьеит арегионқәа 85 рыҟны.

АҞӘА, рашәара 3 - Sputnik. Иҳаҩсыз уахыки-ҽнаки рыла Урыстәыла иаарԥшын 8 863 коронавирустә хҭыс ҿыц 84 регион рыҟны ҳәа аанацҳауеит COVID-19 аҿагыларазы аоперативтә штаб.

Иаарԥшыз апациентцәа рахьтә 41,9% ачымазара шрылоу рызгәамҭакәа имҩасуан.

Уахыки-ҽнаки рыла акоронавирус змаз 182-ҩык рыԥсҭазаара иалҵит, ргәабзиара шьақәгылеит 11 108-ҩык. Апандемиа ааҟалеижьҭеи Урыстәыла иахьаҵанакуа 5 037-ҩык рыԥсҭазаара иалҵит, ргәабзиара ҭышәынтәалеит 186 985-ҩык.

Москва уахыки-ҽнаки рыла иаарԥшуп 2 286 хҭыс ҿыц. Акоронавирус змоу реиҳараҩык рықәра 45 шықәса еиҵоуп. Москва иахьаҵанакуа зынӡа 185 374-ҩык акоронавирус рымоуп.

Аԥсны иахьаҵанакуа акоронавирустә инфекциа рыхьхьеит 28-ҩык ауааԥсыра, урҭ рахьтә 26-ҩык ргәабзиара шьақәгылахьеит, аӡәы лыԥсҭазаара далҵит.

Акоронавирус иадҳәалоу ажәабжьқәа зегьы шәрыԥхьар ҟалоит абра>>

0
Атемақәа:
Ачымазара ҿкы – акоронавирус Аԥсни адунеи аҿи: иалкаау