Амилаҭтә музыкеи акәашареи рфестиваль

XXII ареспубликатә фестиваль "Аӡыхь": жәларбжьаратәи астатус аиуеит

15
(ирҿыцуп 14:42 14.05.2019)
Афестиваль "Аӡыхь" мҩаԥысраны иҟоуп лаҵара 16 - 17 рзы.

АҞӘА, лаҵара 14 – Sputnik, Бадраҟ Аҩӡба. Ахәыҷтәы хореографиатә коллективқәа XXII рреспубликатә фестиваль-еиндаҭлара "Аӡыхь" мҩаԥысраны иҟоуп Аҳәынҭқарратә филармониаҟны лаҵара 16 - 17 рзы.

"Алахәылацәа ҩ-гәыԥкны еихаҳшеит рышықәс иақәыршәаны. Актәи агәыԥ ахь иаҵанакуеит 6-12 шықәса зхыҵуа, аҩбатәи агәыԥ ахь – 12 шықәса инаркны изхыҵуа. Актәи агәыԥ алахәылацәа лаҵара 16 рзы иқәгылоит, аҩбатәи – лаҵара 17 рзы", - иҳәеит Жәлар рҟазара ареспубликатә центр адиректор Нури Кәарҷиа.

Аиндаҭлараҿ иазԥхьагәаҭоуп: аԥсуа милаҭтә кәашарақәа, адунеи ажәларқәа рыкәашарақәа, ҩыџьа реицыкәашарақәа, асоло анагӡара аноминациақәа. Аноминациақәа зегьы рҟны иреиӷьу алыркаараны иҟоуп, аиааира зго иахәҭоу аҳамҭақәа ранашьахоит. Сынтәатәи афестиваль жәларбжьаратәи афестиваль астатус аиуеит, избанзар уи иалахәхоит урыстәылатәи аколлективқәагьы.

Ауснагӡатә хықәкы хадас иамоуп амилаҭтә хореографиа аҿар рыларҵәареи радԥхьалареи.

Кәарҷиа еиҭеиҳәеит сынтәатәи аицлабра "Аӡыхь" аԥҟарақәа ртәы>>

Ажиури аилазаара макьаназ ирзам, аха идыруп урҭ аҳәынҭқарратә ансамбльқәа ишрылахәылацәоу.

Ахәыҷтәы хореографиатә коллективқәа XXII рреспубликатә фестиваль-еиндаҭлара "Аӡыхь" мҩаԥысраны иҟоуп Аҳәынҭқарратә филармониаҟны, иалахәхараны иҟоуп 30 коллектив рҟынӡа.

 

15