Аҩбатәи ашкол аҟны аҵыхәтәантәи аҵәҵәабжьы

Амцакра иақәшәаз абжьаратә школ №2 ашҭаҟны аҵыхәтәантәи аҵәҵәабжьы геит

73
Аҟәатәи абжьаратә школ №2 аҟны аҵыхәтәантәи аҵәҵәабжьы шгази аушьҭымҭацәа ргәалаҟазаара шыҟази шәаԥхьар шәылшоит Sputnik аматериал аҿы.

Бадраҟ Аҩӡба, Sputnik

Ааигәа амцакра ахьыҟаз аҩбатәи ашкол ашҭаҿы аҵыхәтәантәи аҵәҵәабжьы аргара аидеиа рыдкылан ашкол амца иамҽханакны ианыбылуаз амш азыҵәҟьа ҳәа еиҭалҳәоит ашкол адиректор Ирина Повирскер.

"Иахьа зегь шаҭаху иҟаҳҵоит, акызаҵәык, егьырҭ аклассқәа абзиараз ҳәа раҳәара ацеремониа ҳагхоит, избанзар ашкол ахыбра макьаназ ишәарҭоуп, ахәыҷы рацәа реизгара ҳҭахым. Ашкол ашҭа аныҳәатә ҟазшьа аҭаны еиҿкаауп, ирԥшӡоуп", - лҳәоит адиректор.

© Sputnik / Томас Тхайцук
2-тәи ашкол адиректор Ирина Повирскер

Адиректор аушьҭымҭацәа дрыдныҳәалеит, ирзеиӷьалшьеит ԥхьаҟатәи амҩа лаша. Лара лажәақәа рыла, даҽа ҭыԥк аҿы аҵыхәтәантәи аҵәҵәабжьы аргара иашамызт.

Абылра ахҟьа-ԥҟьақәа раԥыхразы: Рауль Ҳаџьымба аилацәажәара мҩаԥигеит>>

Адиректор ишылҳәаз ала, ашкол аиҭашьақәыргылара апроцесс цоит. Ахыб ықәырҵахьеит. Хара имгакәа аҩнуҵҟатәи аусурақәа ирылагоит. Ашкол ашҭа амузыкабжь, агәырӷьабжь ҭыҩуеит. Аушьҭымҭацәа аамҭак азы игәырӷьоит, аҽа аамҭак азы ргәы рыхьуеит рырҵаҩцәеи рышколи ахьынрыжьуа азы.

"Сара жәеиза шықәса абра аҵара сҵон. Даара агәахәара соуит аҵыхәтәантәи ҳаиԥырҵра абра иахьазгәаҳҭо. Даҽаџьара акәызҭгьы, ҳцәаныррақәа ҽакала иҟалон", - лҳәоит аушьҭымҭа Алика Касланӡиаԥҳа.

© Sputnik / Томас Тхайцук
11-тәи акласс аушьҭымҭацәа

Аԥсны абираҟ шьҭыхны агимн анадырҳәа ашьҭахь ашкол адиректор ареспубликатәи ақалақьтәи Олимпиадақәа рҿы зҽалызкааз аҵаҩцәа рыхьӡ ҳәаны аҳаҭыршәҟәқәа рылҭеит.

Адлеиԥҳа: Аҟәа иблыз аҩбатәи ашкол аҿы актәи акласс ахь ахәыҷқәа рыдыркылоит>>

Сынтәа Александр Пушкин ихьӡ зху ашкол №2 иалгеит 38-ҩык аҵаҩцәа.

Аушьҭымҭацәа дрыдныҳәало, Аԥсны аҵареи аҭҵаарадырреи рминистр ихаҭыԥуаҩ Дмитри Гәарамиа иҳәеит аҵарашықәс ҿыц азы ашкол хымԥада ихиахоит ҳәа.

Иара аҵаҩцәа ирзеиӷьеишьеит қәҿиарала аԥышәарақәа рыҭира.

"Шәырҵаҩцәа ирылшо зегь ҟарҵон ауаҩра шәылхразы, шәдырра аизырҳаразы. Сара избон шәышкол абылра иананиа заҟа шәгәы шәыхьуаз, зегь аӡәк иеиԥш ишәҳәоз уи бзиа ишыжәбоз акәын. Агәра шәсыргар сҭахуп ашкол ишыҟаз аасҭагьы ишеиӷьхо", - иҳәеит Гәарамиа.

© Sputnik / Томас Тхайцук
1-тәи акласс аушьҭымҭацәа

Аушьҭымҭацәа рыхьӡала ажәҩан иаҵәарахь ихалаҵан ԥшшәырацәала еидкылаз ампышҭа ҭарчқәа.

73

Акоронавирус змаз даҽа пациентк лыԥсҭазаара далҵит Гәдоуҭатәи ахәышәтәырҭаҿы

31
(ирҿыцуп 19:24 26.09.2020)
Иахьазы Аԥсны иахьаҵанакуа иаарԥшу акоронавирустә хҭысқәа рхыԥхьаӡара 1286 ыҟоуп. Ргәы бзиахахьеит 369-ҩык, жәҩык рыԥсҭазаара иалҵит.

АҞӘА, цәыббра 26 - Sputnik. Ԥшьынҩажәи жәаба шықәса зхыҵуаз, акоронавирус ззышьақәыргылаз Гәдоуҭатәи ахәышәтәырҭа апациент лыԥсҭазаара далҵит цәыббра 25 рзы ҳәа аанацҳауеит Ауааԥсыра COVID-19 рацәыхьчаразы оперативтә штаб.

Аԥҳәыс бырг Гәдоуҭатәи ахәышәтәырҭахь дааргеит цәыббра20 рзы, аԥсыԥлагаҩагара лцәыуадаҩны, ҩ-ганкахьалатәи агәаҵәкра лыманы.

"Атерапиа шылзыҟарҵозгьы лҭагылазаашьа еиҳа-еиҳа еицәахон, арыԥҳа-аҳауаҭарсгатә аппаратгьы даҿаркит, аха уигьы лмыхәеит, ахәашаҽны лыԥсҭазаара далҵит. Апациентка агәачымазарақәа лыман, иара убас ашьақәыӷәӷәара ҳараки атеросклерози", - аҳәоит аоперштаб аацҳамҭа. 

Аҵыхәтәантәи уахыки-ҽнаки рыла игәаҭаз 216-ҩык ауаа рахьтә акоронавирус рыдбалан 41-ҩык.  

Абыржәтәи аамҭазы Гәдоуҭатәи ахәышәтәырҭаы ишьҭоуп 118-ҩык ауааԥсыра, урҭ рахьтә 114-ҩык адиагноз COVID-19 рзышьақәыргылоуп. 14-ҩык апациентцәа рҭагылазаашьа хьанҭоуп, 25-ҩык – бжьаратәуп. Хҩык згәы бзиахаз ылҩаауп.

Акоронавирус иадҳәалоу аҵыхәтәантәи ажәабжьқәа шәрыԥхьар ҟалоит абра>>

31
Атемақәа:
Ачымазара ҿкы – акоронавирус Аԥсни адунеи аҿи: иалкаау

Анаплакҩы Ԥлиа апандемиа аамҭазы иусзуҩцәа рзы: сыҩнапык рыларԥаны искызаауеит

9
(ирҿыцуп 18:40 26.09.2020)
Анаплакҩы Давид Ԥлиа арадио Sputnik аефир аҟны еиҭеиҳәеит апандемиа аамҭазы аԥкрақәа шынарыгӡо, аусутә иахьагхаз инапаҵаҟа аус зуа ишырныԥшуа атәы.
Анаплакҩы Ԥлиа апандемиа аамҭазы иусзуҩцәа рзы: сыҩнапык рыларԥаны искызаауеит

Аԥсны ахада ауааԥсыра акоронавирус рацәыхьчаразы акоординациатә штаб аӡбара шьаҭас иаҭаны аусԥҟа инапы аҵаиҩит. Уаҟа иазгәаҭоуп жьҭаара 5 инаркны ауаажәларратә крыфарачаратә обиектқәа хымԥада аишәақәа рыбжьара метраки бжаки еиҵамкәа адистанциа рыбжьазароуп, амаҵзуратә персонал ахыхьчагатә хархәагақәа ныҟәыргозароуп ҳәа.

"Ас еиԥш иҟоу аԥҟара анрыдыркыла, иҟаҳҵари, ҳхы ақәҳаршәароуп… Уи усҟангьы иҟаҳҵеит (мшаԥымзазы иалагалаз аԥкрақәа раан – аред.), уажәгьы ауаа рсоциалтә дистанциа ҟаҳҵартә еиԥш аамҭа ҳамоуп, акрахьырфо азал дууп", - иҳәеит Ԥлиа.

Убри аан иара иазгәеиҭеит ауадаҩрақәа цәырҵыр шауа аус ахьыруа ашколқәа рыкрыфарҭақәа рҟны.

Анаплакҩы иазгәеиҭеит апандемиа русура акыр ишаныԥшыз, аха иагьа ус акәзаргьы иусуцәа уалафахәыда ишаанимыжьуа.

"Сҭаацәа ирыгыжьны аԥара сшәозаргьы, сусуцәа нхартә еиԥш, аус руртә еиԥш схы ныҟәазгароуп. Аԥхын иҳадаҳкыло, нас аӡын аусура иамҳхо ҳәа асистема ыҟаӡам ҳа ҳҿы. Сара даара зегьы срықәгәыӷуеит (инапаҵаҟа аус зуа рзы), убри аҟынтә сыҩнапык рыларԥаны ишыску жәдыруазааит",- иҳәеит Ԥлиа.

Шәазыӡырҩы аудио. Иаҳа инеиҵыху анҵамҭа шәаҳар шәылшоит арадио Sputnik Аԥсны аефир аҟны.

Иара убас шәаԥхьар ҟалоит:

9