Аԥсны акоманда Чамериа ианаиааиз ашьҭахь

Аԥсны акоманда Чамериа иаиааит ConIFA-2019 ала Европа Ачемпионат актәи ахәмарраҿы

136
(ирҿыцуп 19:24 02.06.2019)
ConIFA-2019 аеигида иаҵанакуа Европа Ачемпионат аԥхьатәи ахәмарра Аԥсныи Чамериеи рыбжьара имҩаԥысит Аскеран ақалақьтә стадион аҟны.

АҞӘА, рашәара 2 – Sputnik, Бадраҟ Аҩӡба. Аԥсны иеизгоу акоманда Чамериа акоманда иаиааит 3:1 ҳәа Ашьха Ҟарабах имҩаԥысуа ConIFA-2019 ала Европа Ачемпионат аԥхьатәи ахәмарраҟны амҽыша, рашәара 2 рзы.

Атурнир актәи ахәмаррахь ицәырҵит - амбахьчаҩ Инал Қацәба, ахьчаҩцәа - Георги Жанаа, Лев Бабурин, Ҭемыр Агрба, Дмитри Маскаев, Шабаҭ Логәуа, Гига Бениӡе, Виктор Ԥимԥиа, Даур Ҷанба, Алан Хугаев, Георги Дгебуаӡе.

Угәы иамыхәашаз жәабжьхеит ари ахәмарра аламҭалазтәи аҽазыҟаҵараан Аԥснытәи акоманда ахьчаҩ Роман Зикрач ааха ахьиоуз. Аха уи иԥсахра Чамериеи Аԥсныи рыхәмарра анырра анаҭом ҳәа иҳәахьан азыҟаҵаҩ хада Беслан Аџьынџьал.

Ахәмарра ишалагазҵәҟьа Аԥсны акоманда активла ахы аанарԥшуа иалагеит. Иҟан ишәарҭаз амоментқәа. Ахәаԥшцәагьы ркомандақәа ргәы шьҭырхуан .

Аԥыжәара шрымамызгьы, Чамериа ахәмарыҩцәа 30-тәи аминуҭ азы ампыл ҵаҟала идырхәмарын, афбатәи аномер Флавио Пренди амба иҭаиршәит. Уи ашьҭахь дара лассы-лассы ҳамбахь еихо иалагеит.

Актәи атаим иҭагӡаны аԥсуа шьапылампыласыҩцәа акырынтә Чамериаа рымбахь ижәылон, аха ампыл аҭаршәра рылымшеит.

Аҩбатәи атаим ахь Аԥсны акоманда цәырҵит аԥсахрақәа ҟаҵаны. Дцәырҵит ахьчаҩ Асҭамыр Ҵышәба, уи Даур Ҷанба диԥсахит. Ахәмарра ишалагазҵәҟьа, 48-тәи аминуҭ азы Виктор Ԥимԥиа арӷьарахьтәи аган аҟынтәи ампыл наишьҭын, Дмитри Маскаев деиҿамскәа хыла амба иҭаиршәит.

Минуҭк ааҵуанеиԥш ахьчаҩбжа Шабаҭ Логәуа даҽа мпылк амба иҭаиршәит.

Абарҭқәа рышьҭахь Чамериа акоманда ԥхьаҟа ицо иалагеит, изныкымкәа амба иажәлон, аха амбахьчаҩ Инал Қацәбеи ахьчаҩцәеи урҭ ааныркылон.

74-тәи аминуҭ аан Шабаҭ Логәуа аҩынтәраан ампыл ҭаиршәит. Абасала ари ахәмарра хыркәшан 3:1 ҳәа Аԥсны аиааирала.

Агәыԥ "А" иаҵанакуеит: Аԥсны, Чамериа (Албаниа), Сапми (Лапландиа), Арцах. Агәыԥ "Б": Паданиа (Италиа), Секеитәи атәылаҿацә (Румыниа), Мраҭашәаратәи Ермантәыла (Ҭырқәтәыла), Аахыҵ Уаԥстәыла.

Аԥсны иеизгоу акоманда агәыԥ "А" аҟны изацлабуа Сапмии Ашьха Ҟарабахи рыхәмарра мҩаԥысуеит рашәара 2 рзы асааҭ 17:30 рзы.

Официалла FIFA иалахәым Ихьыԥшым ашьапылампылтә ассоциациақәа рконфедерациа шьаҭаркын рашәара 7, 2013 шықәсазы. Уи иалоуп 40 инареиҳаны акомандақәа. 2016 шықәсазы Аԥсны имҩаԥысуан, усҟан аиааира агеит Аԥсны иеизгоу акоманда.

 

136
Атемақәа:
ConIFA- 2019 (36)