Храм в Мокве

Мықә, Ҷлоу, Отаԥ: Аԥсны Мрагыларатәи ахәҭа сыхнахит

279
Раԥхьаӡакәны, Очамчыра араион, Мықәи, Ҷлоуи, Отаԥи ақыҭақәа мышкы иалагӡаны ирҭааз, уаҟа аҭыԥ ԥшӡарақәа ихырхыз Sputnik акорреспондент Саида Жьиԥҳа, аԥхьаҩцәа лцәаныррқәа рыцеиҩылшоит.

Sputnik, Саида Жьиԥҳа

Мықәтәи аныхабааи, "Абраскьыл иҳаԥыи" сырҭаарц сҭахижьҭеи акрааҵуан. Аха, Гагра ақалақь инхо, насгьы аус зуо сзы аамҭа аԥшаара мариамхеит, ари аҭагылазаашьа агәыҩбара сызцәырнагон. Иҳаҩсыз аԥсшьарамшқәа рзы, аԥынгылақәа зегьы санрыхан, сҩыза, абжьыуаа рҭаца, (Кәтол абжьаларҭа иахымсыц) Зарина Коӷониа даашьҭхны, ҳҿынаҳхеит Аԥсны Мрагыларатәи аган ахь.

Саида Жьиԥҳа
Саида Жьиԥҳа

Аӡиасқәа

Бзыԥ аӡиас ацҳа ҳақәсны Гәдоуҭа араион ҳналалеит, ҳашьҭахьҟа акурорт хазына ныжьны. Шьҭрала Мгәыӡырхәа ақыҭа иалҵыз, сгәаҵаҿы ҽакы иузадымкыло ацәанырра ԥхақәа цәырнагоит Гәдоуҭа араион. Аха, уажәазы, схәыцрақәа хан, ахааныз исымбацыз, Аԥсны Мрагыларатәи ахәҭа аҭыԥ ԥшӡарақәа рахь. Абар, еснагь аибашьра аҿаԥшылара сгәалазыршәо Гәымсҭа аӡиас ацҳагьы нҳажьит, Аҟәа ҳалсит, иалагеит Гәылрыԥшь араион.
Ацәажәара иаҿыз Заринеи, сареи, аамҭакы ҿымҭкәа, доусы ҳхәыцрақәа ҳрыланы, акәша-мыкәша блала иҭаҳҵаауа ҳалагеит. "Саида, бнаԥши, аӡиасқәа рыхьӡқәа зыԥшӡоу, насгьы х-бызшәакны иануп, аԥсышәала, урысшәала, англыз бызшәала" ҳәаны, сҩыза аҭынчра еилалгеит, саргьы иџьасшьаз ласҳәеит. Аӡиас "Кәыдры хәыҷы", урысшәалагьы "Кудры хучы" ҳәа ианын. Уи даара ҳгәы иаахәеит. "Малая Кудры" акәымкәа. Ас еиԥш иҟоу аҩыра, аурысшәа здыруа атәым милаҭгьы, аԥсышәала иарцәажәоит. Ажәакала, ари раԥхьаӡа ҳгәы иахәаз акәхеит.

Аԥынгылақәа

Амҩан, амашьынақәа ццакны имныҟәарц азы, ауаа рацәа реизарҭа ҭыԥқәа рҿы, еизааигәаны аԥынгылақәа шьақәыргылан. Аҳәынҭавтоинспекциа агәаҭаратә ҭыԥк аҿгьы ишьҭаҵан. Уи ииашоуп ҳәагьы азаҳԥхьаӡеит, изныкымкәа "STOP" адырга шгылоугьы, иара аинспектор итыршәгьы хьаас имкыкәа, ахыкәлаа еиԥш амашьынаныҟәцаҩцәа шымҩасуа збахьоу ҳарҭ ашаҳаҭцәа.

"Бзиала шәаабеит"

Мықә ақыҭа ҳанаабжьала, амҩа аҽеиҩнашеит. Ҳамҩашьарц азы, раԥхьа иаҳԥылаз машьынак аанаҳкылан, аԥсҟы зкыз ҳиазҵааит, "аныхабаахь ииашаны амҩа ҳанума" ҳәа. "Бзиала шәаабеит, шәцәажәашьала Аԥсны Мраҭашәаратәи ахәҭантәи шәаҳзааит, ҳазшаз илԥха шәымазааит, шәышиашоу шәнеиуеит" иҳәан, саншьа еиԥшнысшьылаз, зҿабызшәа хааз ахаҵа ҳамҩақәиҵеит. "Бзиала шәаабеит" - шаҟа иҟәандоузеи, ауаҩы изааигәоузеи арҭ ажәақәа. Абжьыуа қыҭақәа рҿы "Бзиала шәаабеит" ҳәа иаҳбоз акыдҩылақәа ҳгәы аздырҳаит. Ари ҿырԥштәы бзиоуп Гаграа ҳзы. Иҭабуп!

Мықәтәи аныхабаа
© Foto / Саида Жьиԥҳа
Мықәтәи аныхабаа

Мықәтәи аныхабаа

Зқьы шықәса ирҭысхьоу, Мықәтәи аныхабаа ашҭа ҳанааҭала, иаразнак иаҳнырит доуҳатә мчык. Аҳауагьы акалашәа имариахеит албаадара. Азнык азы ҳхала ари аҵакыраҟны ҳаҟазшәа ҳгәы иабеит, аха ахыбра, аҭоурых ҭҵаауа иавагьежьуан Ростовынтәи иааз аԥсшьаҩцәа. Дареи ҳареи ажәақәак неибыҳәаны, ҳкасқәа рыла ҳхы ааҭаҳәҳәаны аҩнуҵҟа ҳныҩналеит. Сааҭбжак, аҟәардәқәа рҟны ҳҭыԥқәа аанкыланы, гәаныла, ҳазшаз ҳагәнаҳарақәа ҳанаижьарц, амҩа иаша ҳақәиҵарц, агәабзиареи, анасыԥи ҳаҭәеишьарц ҳнаиҳәан, ацәашьцәа аркны, ашҭахь ҳдәылҵит.

Мықәтәи аныхабаа
© Sputnik / Саида Жьиԥҳа
Мықәтәи аныхабаа

"Джульбарс"

Аныхабаа ҳанаадәылҵ, ҳаԥхьа аҵыхәа ршәшәо иаагылеит ласбак. Ахьӡ ҳаздыруамызт, аха "Шарик" анаалошәа ԥхьаӡаны, ус иазҿаҳҭит, иаргьы иагәаԥхазшәа аҽыргәыбзыӷра иалагеит. Ашҭа агәҭаны иҟоу аҵеиџь аҿынтә, аӡы хьшәашәа ыжәны, аԥша ахәхәаҳәа иахьасуаз, Мықәтәи аҽырҩырҭа аханы, еилашьшьы игылоу аҵлақәа рганахь ҳҿынаҳхеит "Шарики" ҳареи. Ашәшьыраҿы ишьақәыргылаз аҟәардәқәа рҿы ҳамҩаныфа нықәҵаны, шьыбжьхьа ҳнапы аҳаркит. Хымԥада "Шарик" алымкаа акразфодаз. Уажәы-уажәы ахыу-хыуҳәа ишоз ала, ҳааигәара арахә аанашьҭуамызт, уимоу харантәи ауаа анабоз аҽарцәгьон. Аԥстәқәеи, аԥсаатәқәеи бзиа избо сзы, ҳазхьчоз "Шарик" ааныжьра сцәыуадаҩхеит. "Уи аԥшәма дамоуп, иаргьы ииҭахыуп, ибымбои ицырцыруа ишыҟоу, ажьгьы шаку" лҳәан, саалырҭынчит Зарина. Аамҭакы ашьҭахь, аныхабаа иахылаԥшуаз ахаҵагьы дааит, ари ала иара итәызаарын. "Шарик" ҳәа ҳзышьҭаз аласба "Джульбарс" ахьӡзаарын. "Ҳҩыза" ахы аашьышьны, аԥшәма ҩаԥхьа ҳшеиқәшәо наиаҳәаны Отаԥҟа ҳдәықәлеит.

Мықә илԥылаз аласба Джульбарс
© Sputnik / Саида Жьиԥҳа
Мықә илԥылаз аласба "Джульбарс"

Аҳәаа

Отаԥ унеиуеит Мықәи, Ҷлоуи ақыҭақәа урылсны. Заринеи сареи ҳарлахҿыхит, насгьы алаф ахаҳҳәааит, ақыҭақәа рҳәаа. Аанда зыбжьоу аигәылацәа, аӡәы Мықә дынхоит, егьи Ҷлоу. Ашьыжь, "сара акаҳуажәра Мықәҟа сцеит, мамзар Ҷлоуҟа", рҳәозар акәхап ҳәа, ҳааччеит.

Ҷлоу
© Sputnik / Саида Жьиԥҳа
Ҷлоу

Аԥсабара

Иазгәасҭарц сҭахыуп, арҭ ақыҭақәа рҿы раԥхьаӡакәны ишаҳбаз, ашҭақәеи, амҩа авареи зырԥшӡоз, зыфҩы хаа аҳауа иалаз аҵла ссир, уи ахьӡ "душистыҟ асмантус" ауп ҳәагьы ҳарҳәеит. Акырӡа ҳгәы иахәеит аҭыԥантәи анхацәа рынхара, рынҵыра, ҷыдала иалҳкааит рымҩақәа рҭагылазаашьа бзиа.

зыфҩы хаау аҵла - асмантус
зыфҩы хаау аҵла - асмантусзыфҩы хаау аҵла асмантус

"Саиа, арҭ ббоума", ҳәа Зарина аӡаҩа иҭатәаз акамбашьқәа рахь санхьалырԥш, рфото ҭысымхыр сгәы иамуит. Уи аҽны еилыскааит, акамбашьқәа рцәеижь иамоу анышәаԥшь, аӡаҟны - амаҵақәа ԥсуеит ҳәа.

акамбашьқәа
акамбашьқәа

"Абраскьыл иҳаԥы"

Абар, Отаԥ ақыҭа, "Абраскьыл иҳаԥы" ҳнадгылеит. "Бзиала шәаабеит, сабашәыцхраауа" ҳәа дааҳадгылеит анаҩс излеилкаахаз аекскурсиамҩаԥгаҩ, Аҟәатәи иаарту аинститут астудент Игорь Адлеиба. Ааӡара бзиа змоу, аԥсуа ҷкәын хазына иҽазишәеит Гагрантәи инеиз ҩыџьа ҳзы мацара аҳаԥы аартны, аекскурсиа амҩаԥгара. Азнык азы мап ҳкит, аха иара имукәа, дҳаԥхьагыланы, аԥсабара иарҿиаз ашанахь ҳиманы ддәықәлеит.
Ассир ҳбеит сҳәар, уи акагьы аанамгар ҟалап. Иҳауз ацәаныррақәа реиҭагаразы, иақәнагоу ажәақәа сзыԥшаауам.

Агәалаҟазаара бзиа ҳаманы, ҽазны аара ҳгәаԥхо ахәылбыҽхан аҩныҟа ҳдәықәлеит. Ақыҭақәа ҳрылсцԥхьаӡа, ашьыжь "Бзиала шәаабеит" ҳәа иаҳбоз аҩырақәа, егьи аган аҿы "Амҩа бзиа" ҳәа ҳрыԥхьон. Ҳара, ҳабжьы ҭыганы, иҭабуп ҳәа ҭакс иҟаҳҵон.

Аԥсны Мрагыларатәи аган нҳажьит, иаарласны Бедиатәи ауахәамахь ҳаароуп ҳәа ҳгәы иҭакны!

Саида Жьиԥҳаи Зарина Коӷониеи.  Оҭап. Абраскьыл иҳаԥы.
© Foto / Саида Жьиԥҳа
Саида Жьиԥҳаи Зарина Коӷониеи. Оҭап. Абраскьыл иҳаԥы.

 

 

279

Раионк аԥсҭазарааҟынтә: Аҩӡба Гәдоуҭатәи аџьармыкьа акәша-мыкәша ахәҳаахәҭра иазкны

0
(ирҿыцуп 19:29 18.06.2021)
Гәдоуҭа араион ахада ихаҭыԥуаҩ Валери Аҩӡба арадио Sputnik аефир аҿы еиҭеиҳәеит араионтә џьармыкьа акәша-мыкәша ахәҳаахәҭра азҵаатәы аҭыԥ ишықәырҵо.
Раионк аԥсҭазарааҟынтә: Аҩӡба Гәдоуҭатәи аџьармыкьа акәша-мыкәша ахәҳаахәҭра иазкны

"Араион ахада иҟаиҵаз адҵа инақәыршәаны аџьармыкьа акәша-мыкәша еиҿкааз ахәҳаахәҭра аанкылатәын. Араион ахадара, амилициа аузуҩцәа, асанитартә маҵзура аусзуҩцәа зегьы ҳаицны знык-ҩынтә ҳнеит. Ақыҭаҟнытә иаарго рыҭитә зегьы адәахьы ирҭиуан, аџьармыкьа аҩныҵаҟа аӡәгьы днеиӡомызт, абри уадаҩраны иҟан. Зегьы еиқәҷаб иҟоуп ҳәа сызҳәом, аха аҭагылаазаашьа уажәы хар амам. Ауаа идеилыркаан, адәыхьы афатә ргыланы аҭира шиашам. Адәқьанқәа змаз уахь иҩналеит, егьырҭ аџьармыкьа аҩныҵҟахь инаган", - еиҭеиҳәеит Аҩӡба.

Аиҿцәажәара шәазыӡырҩыр шәылшоит аудиофаил аҿы.

0

Урыстәылатәи атанкныҟәцаҩцәа Краснодартәи атәылаҿацә аҿы аҽазыҟаҵарақәа мҩаԥыргеит

1
(ирҿыцуп 18:39 18.06.2021)
Аҽазыҟаҵаратә уснагӡатәқәа ирылахәын шәҩык аруаа, ахархәара рыҭан 30 ак арратә техника, акәылӡы зқәу автомашьынақәа КамАЗ "Мустанг" реиԥш иҟақәаз.

АҞӘА, рашәара 18 - Sputnik. Аԥсны иҟоу Урыстәыла Аладатәи арратә база атанкныҟәцаҩцәа Краснодартәи атәылаҿацә аполигон аҿы ахысрақәа мҩаԥыргеит ҳәа аанацҳауеит аокруг апресс-маҵзура.

Аекипажқәа 200 рҟынӡа ицәырҵуаз, еиҭаҵуаз ацәҟьарақәа ахы рықәдыршәеит ҳаамҭазтәи атанкқәа Т-72Б3 рҟынтәи. Ацәҟьараҟынӡа иреиҳаӡоу ахарара ҩ-нызқь метра иҟан.

Уахынлатәи ахысрақәа раан ахархәара рыҭан уахынларбагатә хархәагақәа ТВН-5.

Т-72Б3 амеханик-ныҟәцаҩцәа рдырреи рԥышәеи еиздырҳауан аԥынгылақәа рхысраан, амина-ԥжәага ԥкырақәа рхысраан.

Ахсрақәа раан иныхын 300 танктә рҭҟәацгақәа.

Инарҭбаау аҽазыҟаҵарақәа мҩаԥгахараны иҟоуп акоманда-штабтә зыҟаҵарақәа ирылахәны.

1