Давид Дасаниа

АКХ Давид Дасаниа ирзаҳал аднакылеит

64
(ирҿыцуп 14:56 13.08.2019)
Аԥсны ахада ихаҭыԥуаҩыс зкандидатура ықәгылаз Давид Дасаниа нанҳәа 9 рзы Sputnik иеиҭаз аинтервиу аҿы иҳәеит икандидатура шықәиго азы.

АҞӘА, нанҳәа 13 – Sputnik. Аԥсны Ацентртә алхратә комиссиа Аԥсны ахада ихаҭыԥуаҩыс зкандидатура ықәгылаз Давид Дасаниа иҟаиҵаз аҳәарала икандидатура ықәыргеит. Абри атәы Sputnik иазаарыцҳаит АКХ аҟынтәи.

"Аԥсны ахада ихаҭыԥуаҩыс зкандидатура ықәгылаз Давид Дасаниа АКХ ахь арзаҳал наишьҭит икандидатура шықәиго азы. 2019 шықәса нанҳәа 12 рзы АКХ икандидатура аԥнахит", - ҳәа Sputnik иазаалыцҳаит Аԥсны АКХ амаӡаныҟәгаҩ Ануш Хоџьикиан.

Дасаниа дицықәгылан Аԥсны ахадас зкандидатура ықәгылоу Асҭамыр Оҭырба.

Ацентртә алхратә комиссиа ахантәаҩы Ҭамаз Гогьиа иҳәеит "Атәыла ахада иалхразы" азакәан ажәабатәи ахәҭаҷ инақәыршәаны Аԥсны ахадас зкандидатура ықәгылоу ихаҭыԥуаҩыс иццо ауаҩы икандидатура ықәигар азин имоуп АКХ ахь ашәҟәы ҩны ҳәа.

Атәыла ахада иалхрақәа мҩаԥысраны иҟоуп 2019 шықәса нанҳәа 25 рзы.

Аԥсны Ацентртә алхратә комиссиа аҵыхәтәантәи адыррақәа рыла алхрақәа ирылахәхар алшоит 117 000-ҩык алхыҩцәа. Аԥсны ахы аҵыхәа иаартхоит 152 алхырҭатә ҭыԥ.

Иара убас шәаԥхьар ҟалоит:

64
Флаги

Аԥсны аҿиаразы аинвестициатә программа 2020 шықәсазы еиҵахаӡом

0
(ирҿыцуп 11:33 03.06.2020)
Аԥсны ахада Аслан Бжьаниа иажәақәа рыла, Урыстәылатәи Афедерациа Аԥсны афинанстә цхыраара еиҵанатәуам ахатә биуџьет аркьаҿрақәа шаланагалазгьы.

АҞӘА, рашәара 3 - Sputnik. Аԥсны асоциал-економикатә ҿиаразы аинвестициатә программа 2020 шықәсазы еиҵахаӡом ҳәа аҳәамҭа ҟаиҵеит Аԥсны ахада Аслан Бжьаниа Апарламент адепутатцәа данырԥылоз.

"Аҵыхәтәантәи мызки бжаки рыҩныҵҟа сара ҩынтә Москваҟа сцеит. Актәи аныҟәара аԥыза-министри сареи еицымҩаԥаагеит, аҩбатәи аныҟәара иалахәын афинансқәеи аекономикеи рминистрцәа. Урыстәылатәи агани ҳареи ҳаилацәажәеит аинвестпрограмма ахышәа-ҵышәа ишагымхо азы. Уи анаҩсгьы зыргылара хыркәшам аобиектқәагьы рыргылара ари ашықәс ахь ииаганы ихыркәшахоит. Ԥарала ари 400 миллион мааҭ артәоит", - иҳәеит Бжьаниа.

Иара убасгьы иазгәеиҭеит аҵыхәтәантәи ашықәсқәа рзы Аԥсны зныкгьы инхарҭәааны Аинвестициатә программа шазынамыгӡаз. Уажәы уи анализ азыҟаҳҵоит иҳәеит иара. Иҟалоит сынтәагьы аобиективтә мзызқәа ирхырҟьаны иалмыршахар. Бжьаниа игәаанагарала, амзызқәа иреиуоуп апроектқәа рысмета ииашоу аекспертиза азура ахьыҟам. Уи Урыстәылоуп иахьыҟарҵо, аамҭеи аԥареи рацәаны иаҭахуп.

Абри инадҳәаланы Урыстәыла ахадара ақәшаҳаҭхеит аекспертиза атехникатә план ала иуадаҩу аобиектқәа мацара рзыҟаҵара.

2021 шықәса рынахыс абри аҩыза аусура Аԥсны имҩаԥгахалоит.

Бжьаниа иҳәеит ареспублика 2020 шықәсазтәи аобиектқәа реиқәыԥхьаӡа рашәара 30 рҟынӡа иазнархиар шакәу.

"Ҳара иҟаҳҵарц иаҳҭаху ҳәаны уи азы аԥара заҟа ҳҭаххо шьақәҳаргылароуп. Агха ҟалар ҳара ҳрепутациоуп аԥырхага зауа. Аекономикеи афинансқәеи рминистррақәа абри аус рнапы алакуп уажәазы. Сгәыӷуеит еилагара дук ҟаларым ҳәа", - иҳәеит ахада.

Урыстәыла Аԥсны ацхраара еиҵанамтәит, уи акәым Аинвестпрограммала иаарышьҭуа ацхыраара ацҵара азҵаара алацәажәарагьы ҟалоит ҳәа иҳәеит Бжьаниа. Асеиԥш азыҟазаашьа аҭакгьы иашаны иаҭахуп ҳәа ишьоит иара.

Бжьаниа иара убасгьы далацәажәеит Ԥсоу иаԥну аҳәаа аркра азҵаара. Акоронавирус иахҟьаз аԥкрақәа ареспублика ауааԥсыра ирнырит, аиҳаракгьы аҳәаанырцә ахәышәтәра зҭаху ауаа.

Аслан Бжьаниа иажәақәа рыла, иара Урыстәыла аԥыза-министр Михаил Мишустин ихьӡала аҳәаратә шәҟәы азирхиеит арҭ рҩызцәа атәылауаа ԥынгылада урыстәылатәи ахәышәтәырҭақәа рҿы ацхыраара роуларц.

Бжьаниа амчыбжь анҵәамҭаз Мишустин аҭел дизасраны дыҟоуп азҵаара аӡбшьазы.

Ахада иҳәеит Москваҟа Аиааира 75-шықәса ахыҵра амшныҳәа азгәаҭарахь дышнаԥхьоу. Убасҟантәи аныҟәарақәа рҳәаа иҭагӡаны ишышьақәыргылахо Аинвестициатә программа иадҳәалоу азҵаарақәа зегьы рыӡбра.

Иара убас шәаԥхьар ҟалоит:

0
Пограничный пункт Ингур в Гальском районе Абхазии

Аслан Бжьаниа: Аԥснынтәи Қырҭтәылаҟа миллиард мааҭ рыхә аалыҵ цоит

0
(ирҿыцуп 11:04 03.06.2020)
Аслан Бжьаниа хаҭала далацәажәеит аԥсуа-аурыси аԥсуа-ақырҭуеи ҳәынҭқарратә ҳәаақәа рҟны аушьҭырҭатә ҭыԥқәа русура апроблема хадақәа.

АҞӘА, рашәара 3 - Sputnik. Аԥснынтәи Қырҭтәылаҟа миллиард мааҭ рыхә аалыҵ цоит ҳәа иҳәеит адепутатцәа рԥылараан Аԥсны ахада Аслан Бжьаниа.

"Миллиард мааҭ рыхә аалыҵ аҳәаа иахыргоит. Аҳазалхратә еилаки ақыҭанхамҩа аминистрреи рдыррақәа рыла, ашықәс аҩныҵҟа иаадрыхуа араса 11-12 нызқь тонна ыҟоуп. Ианеиҳаха 10% ауп абри аҟынтәи Урыстәылаҟа ирго. Егьи зегьы Қырҭтәылаҟа ицоит, аԥарақәагьы ззаанхо аконтрабанда знапы алаку ауаа роуп", - ҳәа азгәеиҭеит Бжьаниа.

Ахада агәыӷра ааирԥшит аҳәынҭқарратә ҳәаа иахәҭоу ахылаԥшра аиуп ҳәеи абарҭ азҵаарақәа рызнеишьа еиҭакхап ҳәеи.

Аслан Бжьаниа игәаанагарала, иара убасгьы еиҭактәуп аушьҭырҭатә ҭыԥ "Ԥсоу" иҟоу арежим. Уи хы аманы иҟам. Иара игәаанагарала, уантәи иқәгатәуп иахәҭам ахылаԥшратә усбарҭақәа.

"Урыстәылатәи аган абриаҟара хылаԥшратә усбарҭа ргыларазы рхатә гәаанагара рымоуп. Дара ацәшәоит Аԥснынтәи абџьар ахыгара. Ус анакәха ҳара уи абџьар ахылаԥшра аҳҭароуп", - ҳәа иҳәеит Бжьаниа.

Убри аан иара иазгәеиҭеит излацәажәо ауааԥсыра абџьар рымхра шакәым, иара ашәҟәҭагалареи, аҵәахразы аҭагылазаашьақәа раԥҵареи, арҭ аԥҟаррақәа реилагаразы аҭакԥхықәреи шракәу. Абри азҵаара аӡбра ашьҭахь акәхоит аԥсуа ган Урыстәылахь аҳәааҿы арежим арԥсыҽразы ажәадгала ҟанаҵар аналшо.

Иара убас шәаԥхьар ҟалоит:

0