Лыблақәа Аԥсны рхыубаалон: Ирина Сыҷынааԥҳа лгәалашәаразы

575
(ирҿыцуп 16:54 14.08.2019)
Аԥсны жәлар рфорум "Аидгылара" активла иалахәыз, Аԥсны Аџьынџьтәылатә еибашьраан иҭахаз, "Агәымшәаразы" амедал занашьоу Ирина Иуан-иԥҳа Сыҷынааԥҳа лпатриоттә мҩа атәы дазааҭгылеит лхәыҷаахыс дыздыруаз раԥхьатәи лырҵаҩы, апоетесса Белла Барцыцԥҳа.

Sputnik, Саида Жьиԥҳа

Ирина Сыҷынааԥҳа аҭаацәара ду аҟны илызҳаит. Лан Алла Џьниаԥҳа ршьапы иқәлыргылеит, аҵара длырҵеит хәҩык ахшара.

"Ирина сара раԥхьаӡа данызба, лан лнапы кны Гагратәи абжьаратә аԥсуа школ №1, азыҟаҵаратә гәыԥ ахь данысызналга ауп. Фышықәса зхыҵуаз ахәыҷы убриаҟара лыблақәа ҟәышын, санрыхԥшылоз сцәа сҭаӡыӡаауан, иԥсабаратәым мчык рхыскаауан. Лани сареи уамашәа ибаны еибаҳҳәон, адҵақәа рынагӡараан ҳацхыраара анлыдаҳгалоз, "мап, сара схала" ҳәа шҳаҭалкоз. Илызҳацыԥхьаӡа, лҟазшьеи лхымҩаԥгашьеи ахы злымҟьоз аԥсуа цәа рхалон. Аиҳабыратәи аклассқәа рҿы, дсываҟәыланы, дысҩызаны дызбо салагеит", - аԥҳәызба дылгәалашәоит раԥхьатәи лырҵаҩы Белла Барцыцԥҳа.

Ирина ашкол даналга, арҵаҩы изанаҭ алылхуеит. Имҩаԥылгон афизикеи аматематикеи Бзыԥҭатәи актәии, Пицундатәи актәии, Гагратәи актәии абжьаратә аԥсуа школқәа рҿы.

Усҟантәи аамҭазы, Аԥсны иахаԥаны иҟаз ақырҭуа милаҭ, ҵҟа-ҵҟала ҳажәлар рыхәаҽра иаҿын. Урҭ аҿагылара рызҭоз амилаҭ хақәиҭратә қәԥара активистцәа иреиуаз Борис Кьахьыриԥа, Лева Гыцба, Ҳараз Чамагәуа, Лиуфа Ԥсардиа уҳәа аӡәырҩы Ирина дара дрықәлазшәа, рыгәҭа дгылан.

Зықәра аиаанӡа зыхшыҩ шәыз, зыԥшра зсахьа еинаалаз, ҿыцәаара зқәымз амцабз зхылҵуаз лыблақәа игәаӷьны рхы шьҭыхны ихыԥшыломызт лықәлацәа.

1990 шықәсазтәи аԥсуа-ақырҭуа еиҿыхарақәа раан, аҭыԥҳа гәымшәарыла ҳаӷацәа дырҿагылеит. Лҩызцәа Леила Коӷониаԥҳаи Фатима Қәпалԥҳаи Гагра астадион агәашә илагыланы, ақырҭцәа нарышьҭуамызт. Афырԥҳәызбацәа, зҭаҷкәым раҵәаны ирҿаӷаӷоз ақырҭуа хацәа ирцәымшәакәа, ирықәнагаз аҭак рырҭон.

Ирина аԥсадгьыл ахь абзиабара дшыхәыҷыз илнырхьан. Лан Алла Џьниаԥҳа Аԥсны жәлар рфорум "Аидгылара" Гагратәи аҟәша дахәҭакын. Хымԥада лыхшарагьы ҽакала хәыцшьа рымамызт.

"Ашәҟәазы аизга шырҳәо еиԥш, сара Ирина лыблақәа рзы убас сҳәоит. Шаҟантәи амшын Еиқәа еиԥш иҵаулаз лыблақәа санрыхԥшылоз сҿаԥхьа ицәырҵхьазеи ҳнысымҩа. Иахьа лфотосахьа санахәаԥшуагьы, аҭоурыхтә хаҿы ҳәа дысԥхьаӡоит", - лҳәоит Белла Барцыцԥҳа.

Аԥсны Аџьынџьтәылатә еибашьра аналага, аӡәгьы џьашьатәыз изыҟамлеит Ирина лашьцәа дрыцны аибашьра дахьцаз. Аинрал Сергеи Дбар икомандаҟаҵарала Гәымсҭатәи аштаб аҟны ашәҟәы иҭалгалон ихәызи иҭахази рсиа, арыцҳара иахьақәшәаз аҭыԥи аҭагылазаашьеи арбауа.

Ԥхынгәы 25, 1993 шықәсазы, Ирина лаҳәшьаԥа хәыҷы, Асԥар Қоӷониа имш иира аҽны идылныҳәаларц азы аҩныҟа дцарц иақәылкит. Аха ари агәҭакы анагӡара лразҟымхеит. Аҩадатәи Ешыра ақыҭан, аштаб азааигәара иԥжәаз арҭҟәацга ахыԥҽыха лықәшәаны, 27 шықәса ирҭагылаз аҭыԥҳа лыԥсҭазаара ҿахҵәоит.

Ирина илзааигәаз, дышҭахаз рхаҿы ирзаагомызт, лыԥсыбаҩ рхаҭа ирбаанӡа. Лара лыҟамзаара аныԥшит аибашьра ашьҭахьтәи аамҭа.

"Аԥсабаратә ҟәышра, уи адагьы аҵара бзиеи, ааӡареи змаз аҭыԥҳа, аибашьра ашьҭахьтәи ҳашьақәгылараҿы, иара иахьатәи аԥсҭазаараҿгьы ллагала рацәахон. Ирина леиԥш ԥхьаҟа ихәыцуаз ауаа ҳацәмаҷхеит азоуп ҳабжьара аилибымкаарагьы шыҟоу", - инаҵылшьит апоетесса.

Амилаҭ хақәиҭратә қәԥара активистцәа рыбзоурала Гагра ақалақь иргылаз аԥсуа школ аҿы акыр шықәса аус зуз Белла Барцыцԥҳа, 2010 шықәсазы "Икыдымшәаз аеҵәа" захьӡу, Ирина Иуан-иԥҳа Сыҷынааԥҳа илызкны ашәҟәы ҭлыжьит.

"Иԥсуа зегьы рыеҵәахәқәа кыдшәаны иҟалозҭгьы хаха, ажәҩан ахала аҽазымшьуа еҵәада инхон, ҳаӷеиҭа", - ҳәа иалаго, афилософиатә ҵакы змоу раԥхьатәи ацәаҳәақәа рылагьы еилыукаауеит, апоетесса Ирина лҭахара лгәаҟны ахәра ду шыннажьыз, аха аԥҳәызба лахь илзынхаз агәалашәара ҿыцәаара шақәым.

575

Шьониа Гал араса аҽаҩразы: ашәарҭара иҭагылоуп

10
(ирҿыцуп 20:16 06.07.2020)
Гал араион агроном хада Лери Шьониа арадио Sputnik аефир ала арубрика "Раионк аԥсҭазаараҟынтә" аҿы еиҭеиҳәеит араион аҟны араса хәышәтәымзар, аҽаҩра бзиамахар ҟалоит ҳәа.
Раионк аԥсҭазаараҟынтә: Шьониа Гал араса ахәшәтәра иазкны

"Араса аганахьала апроблема дуқәа ыҟоуп сҳәар имцхоит, избанзар ауаа рхатә џьабаалеи иара убас араион ақыҭанхамҩа иазоужьыз амармалташьтә пты иаҿагыланы ақәԥаразы 500 литра ахәшәи рзаҳшеит. Ахәшә ирызшаз азхаӡом, избанзар араион аҟны 18 қыҭа ыҟоуп, быжь-нызқь гектар инацны арасаҭрақәа ыҟоуп. Ҳәара аҭахума, ацхыраара иҵегьы иҳаур ибзиахон, избанзар акәыкәбаачымазара иаҿагыло ахәшә ҳақәгәыӷуан, иахьа ишҳаҳауа ала, Аԥсны ахадара азҵаара аӡбара иаҿуп. Иҳаҩсыз амчыбжь азы араион ҳалсуан, ачымазара хәыҷык идәықәлахьеит, араса аус даара ашәарҭара иҭагылоуп. Анхацәа хәыҷык ацхыраара ҳазрыҭар, аура ҟалап ҳәа ҳгәы иаанагоит", - иҳәеит Шьониа.

Иара иажәақәа рыла, ҵыԥх араион аҟны 4 нызқь гектар араса вертолиотла ихәшәтәын, сынтәагьы ахәшәтәра арбан.

"Хәыҷык аус ҳарццакыр цәгьаӡам, ианаамҭоу ахәшәқәа ҳаур акәыкәбаачымазара аҟынтә, алҵшәа бзиахон. 2017 шықәсазы араса аҽаҩра 20 % ҳамаӡамызт, 2019 шықәсазы 50-80 процент рҟынӡа аҽаҩра аанашьҭит. Иаҳхысыз ашықәсқәа рзы иҟаҵаз ахәшәтәрақәа рылҵшәақәа ҳцәыӡыр ҟалоит шықәсык бжьаҳажьыр, ажәлар рџьабаа аӡы иагеит ауп. Араион ахадара ирдыруеит, аиҳабырагьы ирарҳәахьеит ацхыраара ҳаур, кәыркәамза ахәшәтәра иара иатәуп, ихымԥадатәуп. Иахьа ачымазарақәа ҳбоит, амармалташьтә птгьы иаҳа иацло иалагеит уажәтәи ашоурақәа раан, акәыкәбаачымазара аԥхьа инаргыланы еиҭазго иара ауп", - иҳәеит Шьониа.

Шәазыӡырҩы аудио. Иаҳа инеиҵыху анҵамҭа шәаҳар шәылшоит арадио Sputnik Аԥсны аефир аҟны.

Иара убас шәаԥхьар ҟалоит:

10

Иазҟазатәым ашьапылампыл азы Аԥсны ачемпионат аҿы аиааира згаз алкаауп

14
(ирҿыцуп 19:53 06.07.2020)
Иазҟазатәым ашьапылампыл азы Аԥсны ахԥатәи ачемпионат 2019 шықәса жьҭаарамзазы иалагеит, аха акоронавирус иахырҟьаны 2020 шықәса ԥхынгәымзанӡа ихыркәшамхеит.

АҞӘА, ԥхынгәы 6 – Sputnik, Ренат Ԥачалиа. Иазҟазатәым ашьапылампыл азы Аԥсны ахԥатәи ачемпионат афинал мҩаԥысит Аҟәа.

Аԥсны ашьапылампылтә Лига адиректор Васили Федоренко ишиҳәаз ала, сынтәатәи ашықәс аинтерес зҵаз ахҭысқәа аман. Иазҟазатәым ашьапылампыл азы Аԥсны ахԥатәи ачемпионат 2019 шықәса жьҭаарамзазы иалагеит, аха акоронавирус иахырҟьаны 2020 шықәса ԥхынгәымзанӡа ихыркәшамхеит.

Атурнир аҿы аиааира агеит акоманда "Рубин-2", аҩбатәи аҭыԥ – "Кьараз", ахԥатәи - "Гәылрыԥшь".

"Иазҟазатәым ашьапылампыл азы Аԥсны ачемпионат хынтәуп имҩаԥысуеижьҭеи. Ари аамҭала акомандақәа рхыԥхьаӡара аҽаԥсахит. Аԥхьатәи ашықәс азы 18 команда ыҟан, сынтәа – 8", - иҳәеит Федоренко. Еиуеиԥшым амзызқәа ирыхҟьаны афинал ахь 6 командак неиит.

Ф-командак атурнир аханатә иалахәын, "7-тәи арратә базеи" "Алекси" – раԥхьаӡа акәны иалахәхеит.

Федоренко иазгәеиҭеит иаиааиз акомандақәа ахраҿақәа шранашьаз, зҽалызкааз ахәмарыҩцәа – аҳаҭыртә шәҟәқәеи амедалқәеи.

"Ари ахԥатәи турнируп. Ачемпионат аиҩызаратә ҟазшьа аманы имҩаԥысуан. Командала ҳаибадыруеижьҭеи акыр ҵуеит. Агәахәара ҳнаҭоит акоманда ҿыцқәа ҩба ахьалахәхаз", - иҳәеит ииааиз акоманда аиҳабы Едуард Аршба. Иара ҭабуп ҳәа иеиҳәеит ашьапылампылтә клуб "Алекс" азыҟаҵаҩ Алексеи Иваненко ачемпионат аиҿкааразы.

Ԥхынгәы 15 рзы имҩаԥысраны иҟоуп атурнир аминистррақәеи аусбарҭақәеи рыбжьара.

Иара убас шәаԥхьар ҟалоит:

 

14