Аҟәатәи аҳаирбаӷәаза

Аҟәатәи аҳаирбаӷәаза аинвестор ихарџь алоуп излашьақәдыргыло

46
(ирҿыцуп 15:30 21.08.2019)
Аҳәынҭқарра аинвестор изицхрааӡом Аҟәатәи аҳаирбаӷәаза аиҭашьақәыргылараҟны, абри атәы иҳәеит аԥыза-министр Валери Бганба, Аԥсны Аминистрцәа Реилазаараҟны имҩаԥысыз аԥсуа-аурыс еиԥылара ашьҭахь.

АҞӘА, нанҳәа 21 – Sputnik, Бадраҟ Аҩӡба. Аҟәатәи аҳаирбаӷәаза аинвесторцәа рхарџь мацаралоуп излеиҭашьақәыргылахо, аҳәынҭқарра алахәра аӡбахә ыҟаӡамызт, абри атәы иҳәеит аинвестициатә проект "В.Г. Арӡынба ихьӡ зху Жәларбжьаратәи аеропорт "Аҟәа" анапхгаҩы Егор Соломатин Аԥсны Аминистрцәа Реилазаараҟны имҩаԥысыз аԥсуа-аурыс еиԥылара ашьҭахь.

Аҟәатәи аҳаирбаӷәаза аиҭашьақәыргылара мҩаԥнагоит акомпаниа "Аирон", иҳәеит Соломатин.

Аԥсны аԥыза-министр Валери Бганба иазгәеиҭеит аҳаирбаӷәаза аиҭашьақәыргылареи аартреи азҵаара изныкымкәа ишышьҭырххьоу.

"Анцәа имч ала, уажәшьҭа ари азҵаара аӡбаразы аԥхьатәи ашьаҿақәа ҳрылагеит. Агәыӷра ду ҳамоуп, Аԥсны аҳаирбаӷәаза шаартхо. Ҳара аинвестор ҳицхраартә алшарақәа ҳамаӡам, хаҭалатәи аинвестициақәа роуп иазԥхьагәаҭоу", - иҳәеит Бганба.

Аԥыза-министр зегьы иргәалаиршәеит Аминистрцәа Реилазаара аилатәараҟны аҳаирбаӷәаза аицхархәаразы аӡбамҭа шрыдыркылаз.

"Аҳаирбаӷәаза рхы иадырхәар ҟалоит авиациа егьырҭ ахкқәагьы - Аҭагылазаашьа ҷыдақәа рминистрра, Аҩнуҵҟатәи аусқәа рминистрра уҳәа иртәу. Уи аиҳабыра аӡбамҭоуп", - инаҵшьны иҳәеит Валери Бганба.

Авиациатә ҟазауаа роушьҭраҟны аԥышәа змоу урыстәылатәи аҵараиурҭақәа Аҟәатәи аҳаирбаӷәазазы аҟазауаа аҵара дырҵара иазыхиоуп, абри атәы ааицҳауеит Аҳаиртә транспорт азы афедералтә агентра "Росавиация" аиҳабы ихаҭыԥуаҩ Олег Сторчевои, иаргьы Аԥсны Аминистрцәа Реилазаара аилатәара далахәын.

Владислав Арӡынба ихьӡ зху Жәларбжьаратәи аҳаирбаӷәаза "Аҟәа" аеродром иаиуит аицгылара астатус, ари аҩыза аӡбамҭа аднакылеит Аԥсны Аминистрцәа Реилазаара ԥхынгәы 26 рзы. Ас еиԥш астатус иалнаршоит аграждантәи аҳәынҭқарратәи (арратә, аҳәаахьчаратә, аҳазалхратә, аҳәынҭқарратә уснагӡатәқәа рынагӡаразы даҽа авиациа хкык - азгә.) авиациақәа аеродром ахархәара.

"Жәларбжьаратәи аҳаирбаӷәаза "Аҟәа" анбантә код аҭаразы" Ақәҵара инақәыршәаны Аԥсны Аҳәынҭқарра иаҭан жәларбжьаратәи ԥшьынбанк рыла ишьақәгылоу акод "URAS", анаҩс уи Урыстәылатәи Афедерациа Аҳаирнавигациатә информациа аизак (AIP) ахь алагаларазы.

Аҟәатәи аҳаирбаӷәаза ргылан 1960-тәи ашықәсқәа рзы. Иара 18 километра Аҟәа инацәхыкны иҟоуп, Бабышьра аҳаблаҿы. 1990-тәи ашықәсқәа рҟынӡа арантәи аҳаирпланқәа ԥыруан СССР ақалақьқәа жәпакы рахь. Аԥхынразы уахыки-ҽнаки рыла имҩаныргон хә-нызқьҩык рҟынӡа апассаџьырцәа.

Аԥсны Аџьынџьтәылатә еибашьраан аҳаирбаӷәаза аԥхасҭа ду аиуит. Уи акәша-мыкәша аминақәа шьҭаҵан. 1993 шықәса рзы иадыркит. 2000 шықәса рзы ахыбреи абаӷәаза аҵакыреи аминақәа рҟынтәи идрыцқьеит.

Иара убас шәаԥхьар ҟалоит:

 

 

46
Атемақәа:
Аҟәатәи аҳаирбаӷәаза (10)
Микрофон

Раионк аԥсҭазаараҟынтә: Барцыцԥҳа Гәдоуҭа ашколқәа рҿы аҿкы чымазаразы аҭагылазаашьазы

6
(ирҿыцуп 20:00 25.09.2020)
Гәдоуҭа араион аҵара аҟәша аспециалист хада Диана Барцыцԥҳа арадио Sputnik аефир аҿы еиҭалҳәеит иахьатәи аамҭаз ашколқәа рҿы аҵара апроцесс амҩасшьа атәы, насгьы ачымазара зманы иалкаау рхыԥхьаӡара атәы.
Раионк аԥсҭазаараҟынтә: Барцыцԥҳа Гәдоуҭа ашколқәа рҿы аҿкы чымазаразы аҭагылазаашьазы

"Аҵара апроцесс цоит араион 29 школ рҿы, иара убас ахәыҷбаҳчақәа фба рҿы. Акласстә уадақәа ҳарзҩыдоит, ашәқәа, аԥенџьырқәа аартны аԥша ҩнадырсуеит, арҵаҩцәа асабрадақәа ныҟәыргоит. Ашоурашәагақәа ҳамоуп, зегьы ршоура гәаҭаны аклассқәа рахь иҩнаҳҵоит. Иахьатәи амш азы 450-ҩык ахәыҷқәа ныҟәаӡом ашколқәа рахь еиуеиԥшым амзызқәа ирхырҟьаны. Иара убас иҳамоуп ичмазаҩцәоу арҵаҩцәа. Уи Гәдоуҭатәи актәи абжьаратә школ аҟнытә рҵаҩык, аҩбатәи ашкол аҿы хҩык арҵаҩцәа, Приморсктәи абжьаратә школ аҿы - аӡәы. Класск аужьны иҳаман актәи ашкол аҿы аҿкы чымазара иахҟьаны, аха урҭгьы шьҭа иҭыҵуеит. Аҵаҩцәа рыбжьара макьана аӡәгьы дычмазаҩымхацт. Арҵаҩцәа рыԥсахуеит егьырҭ арҵаҩцәа, аҵара процесс аҿы аиԥҟьара ҳәа акгьы ыҟаӡам", - еиҭалҳәеит Барцыцԥҳа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы.

Иара убас шәаԥхьар ҟалоит:

6

Аԥсны ашколқәа рҟны акарантин рылаҳәоуп

11
(ирҿыцуп 20:05 25.09.2020)
Аԥсны Аҳәынҭқарра акоронавирус алаҵәареи аҽарҭбаара иахьалагази инамаданы ашколқәа зегьы рҟны акарантин рылаҳәоуп жьҭаара 16, 2020 шықәса рҟынӡа.

АҞӘА, цәыббра 25 – Sputnik. Аԥсны ашколқәа зегьы рҟны цәыббра 25 инаркны акарантин рылаҳәоуп ҳәа аанацҳауеит Аԥсны Агәабзиарахьчара аминистрра апресс-маҵзура.

Аԥсны асанитартә ҳақьым хада Лиудмила Скорик лажәақәа рыла, ари аҩыза аӡбамҭа Аминистрцәа Реилазаара иаднакылеит Агәабзиарахьчара аминистрреи Асанитартә епидемиологиатә станциеи иҟарҵаз абжьгара инамаданы.

"Аԥсны Аҳәынҭқарраҿы COVID-19 амҽхак арҭбаауа иалагеит, уи мзызс иаиуит аҿкы цәыббра 1, 2020 шықәса инаркны аиҿкааратә коллективқәа ирҭаауа иалагаз ахәычқәа рыбжьара иалаҵәо иахьалагаз. Арҵаҩратә коллективқәа уи иазыҟаҵамызт, аҳәынҭқарратә санитартә маҵзура иҟанаҵаз абжьгарақәа аԥхынтәи аамҭазы иахьрықәымныҟәаз, хырҩа ахьрырҭаз. Раԥхьа арҵаҩцәа чмазаҩхо иалагеит. Убри аҟнытә Аԥсны Аҳәынҭқарра аиҳабыра Агәабзиарахьчара аминистрреи Асанитартә-епидемиологиатә маҵзуреи иҟарҵаз абжьгарақәа инарықәыршәаны ирыӡбеит иахьа инаркны Аԥсны ашколқәа зегьы рҿы акарантин рыларҳәарц", - ҳәа азгәалҭеит Скорик.

Лара еиҭалҳәеит акарантин алагарала атәыла аиҳабыра ишырҭаху иахьынӡауа идырмаҷырц ачымазара зызшәарҭоу ахаҿқәеи иара зыдбалоу ауааи реигәныҩрақәа.

Аԥсны ашколқәа зегьы рҟны акарантин рылаҳәоуп 2020 шықәса жьҭаара 16 рҟынӡа.

Скорик иазгәалҭеит ашколқәа русзуҩцәа зегьы аҽыԥхьакра иқәныҟәаларц шрабжьагоу.

Иара убас шәаԥхьар ҟалоит:

11
Атемақәа:
Ачымазара ҿкы – акоронавирус Аԥсни адунеи аҿи: иалкаау