МОСКВА, цәыббра 8 – Sputnik, Анжелика Кьахьырԥҳа. Алхырҭатә ҭыԥ хада №6 иаҵанакуа Москва иҟоу алхырҭатә ҭыԥ №4 асааҭ 15:00 рзы рыбжьы арҭахьан 600-ҩык алхыҩцәа, абри атәы еиҭеиҳәеит алхырҭатә ҭыԥ акомиссиа ахантәаҩы Беслан Кобахьиа.
"Аԥснынтәи абиуллетенқәа 200 ҳаур акәын, иаҳзаарышьҭит 2004 цыра. Акомиссиа алахәылаҩцәа асааҭ 6:00 рзы рҭыԥ аҿы иҟан. Асаат 8:00 рҟынӡа иаҭахыз ауснагӡатәқәа мҩаԥган: абиуллетенқәа ԥхьаӡан, актқәа еиқәыршәан, аҵәҭаршәра апроцедура ҟаҵан, абиуллетенқәа знапы рнызҵаша акомиссиа алахәылацәа ҩыџьа алхын. Ҩаԥхьа абиуллетенқәа ԥхьаӡаны, адокументқәа нап рыҵаҩны, асааҭ 8:00 рзы алхырҭатә ҭыԥ ааҳартит", – иҳәеит Беслан Кобахьиа.
Москватәи алхырҭатә ҭыԥ аҟны аҩбатәи атур аан алхыҩцәа рааира еиҳауп актәи атур аан аасҭа. Усҟан Москва рыбжьы арҭеит 498-ҩык Аԥсны атәылауаа.
"Зегьы ҭынч имҩасып ҳәа ҳгәыӷуеит. Анаԥшыҩцәа макьана еилагара ҳәа акгьы азгәарымҭацт. Ауаа рааира еиҳауп нанҳәа 25 рзы аасҭа. Абиуллетенқәа рзы агәарангьы аныҟало убап. Актәи атур аан ауаа еиҳа ахьмаҷыз зыхҟьаз аԥхын иахьақәшәаз ауп, Москва инхо аԥсуаа реиҳарак Аԥсны ԥсшьара иҟоуп, уажәазы ауаа еиҳа активла рхы аладыхәып ҳәа ҳахәаԥшуеит", – ҳәа азгәеиҭеит Беслан Кобахьиа.
Иара убас зыбжьы азҭоз рхыԥхьаӡара иацлеит актәи атур аан Аԥсны иҟаз москватәи астудентцәа рыбзоурала.
Амилаҭқәа реиҩызара урыстәылатәи ауниверситет астудент Адгәыр Џьынџьал раԥхьаӡа акәны ахада иалхрақәа раан ибжьы аиҭоит. Иара агәра ганы дыҟоуп еиҳаракгьы аҿар аполитикатә позициа активла иаадырԥшыр шакәу.
"Сара схала смааӡеит. Сҩызцәеи сареи ҳгәаанагарала, алхрақәа рахь зегь неироуп, еиҳарак аҿар. Ҳабжьы анаҳҭо, гәахәарак ҳауеит. Ҳабжьы аҳамҭар, анаҩс амчрақәа рхымҩаԥгашьа ҳгәамԥхаргьы, ҽԥныҳәас ираҳҭар иҳалшои, дара ралхраан ҳхы алаҳмырхәызар?!" - иҳәеит Адгәыр Џьынџьал.
Аҳақьым-аԥҟаҩы Леонид Гәлиа ишазгәеиҭаз ала аҳәынҭқарра ахада иалхра – дарбанзаалак атәылауаҩы изы аҭакԥхықәра зцу шьаҿоуп.
"Исҭахуп Аԥсны иқәынхо атәылауаа атәыла анҭыҵ имцакәа атехнологиа ҳарак змоу ацхыраара роулар, изҭаху зегьы зыҩаӡара ҳараку амедицина ахархәара рылшарц. Аԥсны ԥхьаҟа иҿиалароуп, уи аус аҟны ҳаргьы активла ҳхы алаҳархәыроуп. Ҳтәыла аԥеиԥш ҳнапы иануп, убри азы раԥхьа иргыланы ахада иалхрақәа рахь ҳааины, ҳабжьы аҳҭароуп. Дарбанзаалак илагала ҟаиҵароуп ари ахҭыс аҟны", – азгәеиҭеит Леонид Гәлиа.
Жәҩык акандидатцәа злахәыз Аԥсны ахада иалхрақәа актәи ртур мҩаԥысит нанҳәа 25 рзы. Уажәтәи ахада Рауль Ҳаџьымба 24,83% алхҩцәа рыбжьқәа иоуит, аоппозициатә партиа "Амцахара" анапхгаҩы Алхас Кәыҵниа – 22,91%. Азакәан ишаҳәо ала 50% еиҳаны акандидатцәа аӡәгьы имоуӡеит аҟнытә, ирылаҳәан алхрақәа аҩбатәи ртур, арҭ ҩыџьа акандидатцәа ралахәхарала. Уи мҩаԥысуеит цәыббрамза 8 рзы.
Иара убас шәаԥхьар ҟалоит:
-
Ҭамаз Гогьиа: Черқьесскынтәи ҿырҳәалатәи ашшыԥхьыӡ ҳзааит
