Ашьха ихалеит: Аԥсны имҩаԥысит треилранинг азы аицлабра

23
(ирҿыцуп 16:35 09.09.2019)
Раԥхьаӡакәны Аԥсны имҩаԥысит урыстәылатәи аилазаара "Wild Mountain Race" еиҿнакааз треилранинг азы аицлабрақәа. Уи зҽалазырхәыз 200-ҩык инарзынаԥшуа аспортсменцәа рхыԥхьаӡараҿы иҟан 18-ҩык Аԥсны Аҳәынҭқарра атриатлон Афедерациа ахаҭарнакцәагьы.

Аҟәа, цәыббра 9 – Sputnik, Аинар Ҷыҭанаа. Урыстәылатәи аилазаара "Wild Mountain Race" еиҿнакааз треилранинг азы аицлабрақәа ммҩаԥысуан Аԥсны цәыббра 8 рзы. Аспортсменцәа адистанциақәа ҩба рҟны еицлабуан: 30 километри 65 километри. Ашьхараҿы иҩуаз рымҩа иахымҟьарц азы аиҿкааҩцәа амҩа аҵкарахь адыргақәа дыргылеит.

30 километраҿы еицлабуаз 167-ҩык алахәылацәа рхыԥхьаӡараҿы иҟан 18-ҩык Аԥсны ахаҭарнакцәагьы. Амҩа ахы акит Иаӷьатәи аӡхыҽҽа абжьаларҭаҿы, анаҩс еиԥхныҩлоз аӡиас ирны, Ԥшаӷьышьха ихаланы аӡиа Риҵа инаӡеит.

Ахацәа рыбжьара 30 километр аҩраҿы, 3 сааҭки 45 минуҭи 52 секунди рыла имҩа хыркәшаны аиааира игеит Виачеслав Купыриов. Аҩбатәи аҭыԥ иҽаԥсеитәит Максим Кочергин. Уи илҵшәа – 4 сааҭки 6 минуҭки 42 секунди. 4 сааҭки 9 минуҭки 38 секунди рыла амҩа зегьы данысны, ахԥатәи аҭыԥ ааникылеит Родион Видакас. Аԥсуа спортсменцәа рҟынтәи раԥхьатәи жәаҭыԥк аанызкылаз дрылоуп Саид Аргәын.

30 километр аҩраҿы аҳәса рыбжьара аҩбатәи аҭыԥ лҽаԥсалтәит Аԥсны ахаҭарнак Татиана Ергунова. 65 километра аҩра ахацәа реиндаҭлара Аԥсуа команда аҟынтәи далахәын Денис Саманба имацара.

Аицлабра иалахәыз зегьы рзы аиҿкааҩцәа ишьақәдыргылеит иалкаау аԥҟарақәа. Урҭ ирықәыршәаны аспортсменцәа заанаҵы абаҩрҵәыратә ҽазыҟаҵара иахысыр рыхәҭан, иара убас досу имазар акәын апрофессионалтә цәамаҭәа. Убас, иҷыдоу ашәҵатәы ахьимамыз азы аспортсменцәа руаӡәк аицлабрақәа рахь днашьҭымызт.

"65 километра аҩразы иазыҟаҵам ауаҩы ҩба-хԥа мшы иҭахызар, иазыҟаҵоу аспортсменцәа 12 сааҭ маҷк инеиҵаны ирызхеит. Аԥсназы ари аспорт хкы ҿыцуп, иубартә иҟан заҟа гәахәарыла ҳаспортсменцәа уи рҽаладырхәыз. Сгәыӷуеит ари иаҩызоу аицлабрақәа есышықәса иаҳзымҩаԥгалап ҳәа", - иҳәеит атриатлон азы Афедерациа аиҳабы Борис Барцыц.

Саид Агәын аспорт иҽазикижьҭеи шықәсык роуп иҵуа, убри аҟнытә иааникылаз 7-тәи аҭыԥ иара изы иџьашьатәхеит.

"Уажәаԥхьагьы знык-ҩынтә аиԥхныҩларақәа схы рыласырхәхьан, аха ашьхараҿы раԥхьаӡакәны иахьа сыҩит. Иахьа исылшоз зегьы ҟасҵеит, сымч самеигӡаӡеит, избан акәзар ари ахҭыс ҿырԥштәы бзиоуп зхыԥхьаӡара маҷым аспорт абзиабаҩцәа зегьы рзы", - иазгәеиҭеит аспортсмен.

Иара убас шәаԥхьар ҟалоит:

23

Ҿыц иалху Апарламент адепутатцәа рнапынҵақәа рынагӡарахь ианиасуа атәы рҳәеит

8
(ирҿыцуп 19:12 14.07.2020)
Аԥсны имҩаԥысит Апарламент ахь аиҭалхрақәа. Аҭыԥ хадақәа ԥшьба рҟынтәи руак аҿы ҩаԥхьа аиҭалхра мҩаԥысраны иҟоуп.

АҞӘА, ԥхынгәы 14 - Sputnik, Ренат Ԥачалиа. Аԥсны АКХ ахантәаҩы Ҭамаз Гогьиа Sputnik иазеиҭеиҳәеит иалырхыз адепутатцәа рнапынҵақәа рахь ииасыр анрылшо атәы.

Ацентртә алхратә комиссиаҿы абжьыҭара ашьҭахь бжьымш рыҩныҵҟала адепутатцәа ашәҟәы иҭарыҩуеит. Ашәҟәҭаҩра ашьҭахь адепутатцәа Аԥсны АКХ аӡбамҭаҟынтә алҩаа роуеит. Уи Апарламент ахь инаргоит. Уа имҩаԥгахоит иалху адепутатцәа азинԥҵаратә усбарҭа аилазаара ралаҵара апроцедура.

"Бзыԥҭатәи алхырҭатә ҭыԥ хадаҟны иҟалараны иҟоу аиҭалхра егьырҭ адепутатцәа русура анырра анаҭом", - ҳәа иҳәеит Гогьиа.

Гогьиа иҳәеит аус зуа азакәанԥҵара инақәыршәаны, Бзыԥҭатәи алхырҭатә ҭыԥ хада № 10 аҿы аиҭалхрақәа шымҩаԥысуа. Ҩымчыбжь рыҩныҵҟала АКХ алхрақәа ррыцхә шьақәнаргылоит.

Оҭҳаратәи ҭыԥ хадаҿы иалху Алмасхан Барцыц иҳәеит алхрақәа аиҩызаратә ҟазшьа рыманы имҩаԥган ҳәа.

"Алхраԥхьатә кампаниа зегьы соппоненти сареи еиҩызарыла имҩаԥаагеит. Аихшьаалақәа аныҟаҵаха Робестан Габлиа сиааира сыдиныҳәалеит, ақәҿиарақәа сзеиӷьеишьеит", - ҳәа иҳәеит иара.

Адепутат иҳәеит апандемиа инадҳәаланы Аԥсны ауааԥсыра ақыҭанхамҩахь ихьаԥшит, ари агәыгәҭажьра ҟалом ҳәа. Барцыц иажәақәа рыла,  Апарламент аҿы ақыҭанхамҩа аусхк иацхраауа апроектқәа адгылара риҭалоит.

Кындыӷтәи ҭыԥ хадаҿы иалырхыз Гарри Кокаиа иҳәеит ари аокруг аҿы егьырҭ ирҿырԥшны ауаа рнеира рекордтәын ҳәа. Иара изы зыбжьы зҭииз зегьы ҭабуп ҳәа реиҳәеит.

"Очамчыра идепрессиву раионуп ҳәа иԥхьаӡоуп, аха скомандеи сареи иаҳҭахуп иааҳарԥшырц араион иамоу алшара дуқәа", - ҳәа иҳәеит адепутат.

Аԥсны Жәлар Реизарахь алхрақәа мҩаԥысит ԥхынгәы 12 рзы иҭацәыз амандатқәа ԥшьба рахь - атәыла ахадас иалырхыз Аслан Бжьаниа, аԥыза-министрс иҟарҵаз Александр Анқәаб, Аҩнуҵҟатәи аусқәа рминистрс иҟарҵаз Дмитри Дбар, Гагра араион ахадас иҟарҵаз Иури Хагәышь рҭыԥқәа.

Иара убас шәаԥхьар ҟалоит:

8

Какәыбаа: араион аҿы аспорттә секциақәа шаҟа ирацәоу аҟара, еиҳагьы еиӷьхоит

4
(ирҿыцуп 18:37 14.07.2020)
Гәылрыԥшь араион аспорткомплекс "Агәыӡера" аиҳабы Мурман Какәыбаа арадио Sputnik Аԥсны аефир аҿы еиҭеиҳәеит иарбан спортхкқәоу араион аҿы еиҳарак аҿиара змоу, насгьы ахәыҷқәа разыҟаҵаразы лшарақәас иҟоу атәы.
Раионк аԥсҭазаараҟынтә: Какәыбаа Гәылрыԥшь аспорткомплекс аусура иазкны

"Аспорткомплекс аус ауеит х-спортхкык рыла: ашьапылампыл, акарате, абокс. Ҳахәмарратә зал шьақәҳаргылеижьҭеи еиҭа ҩ-хкык ацаҳҵар ҳҭахуп - анапылампыли, амҵәышәымпыли. Ҳхәыҷқәа аихьӡарақәа рымоуп акарате аҿы, абокс аҿы. Ашьапылампыл акәзар, еиҳа ицәгьоуп, ахәыҷқәа макьана аԥышәа рымам. Рыхә-секциак анаартхалак 150-ҩык, 200-ҩык рҟынӡа ахәыҷқәа ҳадаҳкылартә еиԥш алшара ҳауеит. Асекциақәа шаҟа ирацәоу аҟара, ахәыҷқәа рзы еиҳа еиӷьхоит. Аспорткмплекс аҿы рҽазыҟарҵар ауеит 300-ҩык инарзынаԥшуа ахәыҷқәа сааҭ-сааҭла еихшаны. Азыҟаҵаҩцәа рганахьала ҳаиқәшәоуп, ахәыҷқәагьы бзиа ирбоит, рус иазҟазоуп", - ҳәа еиҭеиҳәеит Какәыбаа.

Иаҳа инеиҵыху аиҿцәажәара шәазыӡырҩы аудио аҿы, мамзаргьы арадио Sputnik Аԥсны аефир аҿы.

Иара убас шәаԥхьар ҟалоит:

4