Ален Аҩӡба "ВТБ Кубок Кремля" аҩбатәи аикәшараҟны даҵахеит

5
Аԥсуа ԥкьаҭасыҩ Ален Аҩӡба XXX аиубилеитә ԥкьаҭасратә турнир "ВТБ Кубок Кремля" далахәуп. Атурнир мҩаԥысуеит аҵаа ахан "Крылатское" аҟны жьҭаара 12 - 20 рзы. ВТБ Кубок Кремля — адунеитә ҩаӡара змоу еиндаҭлароуп.

АҞӘА, жьҭаара 18 – Sputnik, Бадраҟ Аҩӡба. Аԥсуа ԥкьаҭасыҩ Ален Аҩӡба XXX аиубилеитә ԥкьаҭасратә турнир "ВТБ Кубок Кремля" Т аҩбатәи аикәшараҟны даҵахеит сербиатәи аспортсмен Никола Милоевичем даницыхәмаруаз.

Асерб ԥқьаҭасыҩадунеитә реитинг аҿы 164-тәи аҭыԥ никылоит, аԥсуа спортсмен 498-тәи апозициаҿ дыҟоуп. Никола Милоевич 25 шықәса ихыҵуеит, Ален Аҩӡба – 19.

Ален Аҩӡба актәи асет аан 4:2 даиааиит, аха нас асерб спортсмен илшеит 4:5 ҳәа аԥыжәара агара. Актәи асет хыркәшахеит – 7:5 ҳәа Ален иаҵахарала. Аҩбатәи асет аан Ален Аҩӡба 6:0 ҳәа даҵахеит.

Никола Милоевич "ВТБ Кубок Кремля" ахԥатәи аикәшараан дицықәгылоит Егор Герасимов-Андреи Рублев рыхәмарра аан аԥыжәара згаз.

Ален Аҩӡба аԥқьаҭасыҩ Алибек Качмазов иаԥигеит XXX аиубилеитә ԥкьаҭасратә турнир "ВТБ Кубок Кремля" актәи аикәшараан.

Алибек Качмазови Ален Аҩӡбеи рыхәмарраан аиааира згаз диндаҭлараны дыҟан атурнир аҿы аԥыжәара змоу, Шанхаи жьҭаара 13 рзы асериа "Мастерс" иатәу атурнир аҿы актәи аҭыԥ аанызкылаз Даниил Медведев. Аха Даниил Медведев "ВТБ Кубок Кремля" алахәхара мап ацәикит. Адунеитә реитинг аҿы уажәы Медведев ахԥатәи аҭыԥ аҿы дыҟоуп.

XXX аиубилеитә ԥкьаҭасратә турнир "ВТБ Кубок Кремля" аатит жьҭаара 12 рзы.

ВТБ Кубок Кремля — адунеитә ҩаӡара змоу еиндаҭлароуп, Урыстәыла ахьӡ-аԥша аҳәаанырцә ирыланарҵәоит. Абра заҵәык ауп адунеи аҿы ахацәеи аҳәсеи ртурнирқәа ахьеицымҩаԥырго.

5