Дмитри Ӷәазаа "Шесть часов Ле-Мана" аҿы аиааира игеит

29
Аԥснытәи аспортсмен Дмитри Ӷәазаа дызлахәыз аиԥхныҩлара "Шесть часов Ле-Мана" мҩаԥысит абҵара 17 рзы.

АҞӘА, абҵара 19 – Sputnik, Бадри Есиава. Дмитри Ӷәазаа франциатәи акоманда "Speed Car" далахәны автоеиԥхныҩлара "Шесть часов Ле-Мана" аҿы аиааира игеит.

"Зегьы аӡбахә шәаҳахьазар акәхап автоеиԥхныҩлара "24 часа Ле-Мана", уажәы ҳара уажәы иара абри атрассала ҳамҩасуан, аха ф-сааҭктәи аамҭа ҳахьаҵанакуаз азы аконфигурациа маҷк еиҭакын. Ари сааҭрацәалатәи Франциа ачемпионат – ендуранс афиналтә еиԥхныҩлара акәын. 21 позициа рҟынтәи ҳаҵҟьеит еиуеиԥшым апроблемақәа ирхырҟьан, аха аиааира агара ҳалҳаршеит", - еиҭеиҳәоит Ӷәазаа.

Иареи иколлегацәа: Евгени Кирееви Владимир Чарчииани автомашьына Mercedes-Benz GT4 ала иқәгылон. Амашьына амчра 580-ҽы рымчра иҟоуп. Апилотцәа ес 45-минуҭ рҽырыԥсахуан. Ф-сааҭк рыла 154 еикәшара ирхысит.

"Ари амодель ала раԥхьаӡа акәны сықәгылеит. Амашьына шьахәӡоуп, 100 километрак аццакра 4 секундк рыла иаиуеит. Франциа ачемпионат аангьы иарала сықәгылоит", - иаԥхьаҟатәи ипланқәа дрылацәажәеит Ӷәазаа.

© Foto / предоставлено Дмитрием Гвазава
Дмитри Ӷәазаа "Шесть часов Ле-Мана" аҿы аиааира игеит

"Ле-Ман" аура 4,5 километра иҟоуп. Аиԥхныҩлараан ақәа леиуан, ауадаҩрақәагьы ацын. Убри аан аӡбаҩцәа акыр иашьклаԥшуеит аԥҟарақәа реиламгара.

Дмитри Ӷәазаа хәажәкыра 16 1988 шықәса рзы Гәдоуҭа ақалақь аҿы диит. Профессионала абри аспортхкы инапы алакуп 2010 шықәса раахыс. 2018 шықәса рзы Mitjet 2L акатегориа PRO аҟны Урыстәыла Ахраҿа иоуит.

2019 шықәса рзы Франциаҟа диасит. Акласс GT4 ала Франциа Ачемпионат далахәуп.

© Foto / предоставлено Дмитрием Гвазава
Дмитри Ӷәазаа "Шесть часов Ле-Мана" аҿы аиааира игеит

Иара убас шәаԥхьар ҟалоит:

 

29