Сабина Ԥачлиаԥҳа аамҭа мгакәа аоперациа лзутәуп

51
Быжьшықәса зхыҵуа Сабина Ԥачлиаԥҳа диижьҭеи асколиоз лымоуп. Лыбӷашшара, лвакьыцқәа, иааизакны лгәышԥы зегьы рформақәа рҽеиҭаркуеит, уи азы лгәышԥы иаҵанакуа ацәеижьхәҭақәа зегьы иахьрыхәҭоу аҭыԥ аҿы иҟаӡам. Ахәыҷы лчымазара иаиааир зылшо аоперациа заҵәык ауп.

Акультура-гәыҳалалратә фонд "Ашана" Сабина Ԥачлиаԥҳа лыхәышәтәразы аԥареизгара хацнаркит.

Сариа Кәарцхьиаԥҳа, Sputnik

Сабинеи ҳареи ҳаиқәшәеит апарк аҿы. Сабина лыкьанџьақәа лгәыдкыла дахьгылаз ажурналистцәа рааигәара ааира дацәыԥхашьон, аха минуҭқәак рышьҭахь дҳашьцылеит.

"Ԥақәашьтәи ашкол аҿы аҩбатәи акласс ахь сныҟәоит. Ашкол бзиа избоит", - лҳәеит лара ҳаицәажәараан, лхы ҳардыруа.

Ашкол аҿы зегь раасҭа Сабина бзиа илбо аԥсуа бызшәеи алитературеи рурокқәа роуп. Илҭахуп лаԥхьаҟа лхатәы бызшәа арҵаҩыс дҟалар, аха уи азы ҳара ҳацхыраара лҭахуп.

Сабина дхәыҷаахыс асколиоз лымоуп. Деизҳацыԥхьаӡа лчымазара еиҳа-еиҳа аҽаруадаҩуеит.

Сабина ашкол ахь дныҟәоит, аха аурокқәа рҿы акраамҭа атәара лцәыуадаҩуп ҳәа ҳаиҳәеит лаб Сурам Ԥачлиа.

"Акраамҭа атәара лылшаӡом. Сабина лхы дшахымышшаауагьы, ахьаа шлымоу ҩашьом", - иҳәоит Сурам Ԥачлиа.

Сабина лҭагылазаашьа аҭышәныртәаларазы аоперациа лзутәуп, аха аҭаацәара уи ахәшәара изаҵагылом.

"Ԥшьҩык ахәыҷқәа ҳамоуп. Ҳхала аоперациа ахә ашәара ҳалшаӡом. Убри азоуп афонд "Ашана" ахь аҳәара зыҟаҳҵаз", - иҳәоит Сурам Ԥачлиа.

Сабина илзыԥшуп Новосибирск, аортопедиеи анеирохирургиеи рыклиникаҿы. Лыхәышәтәразы иаҭахуп 792 000 мааҭ.

Ансамбль "Ерцахә" имҩаԥнагаз агәыҳалалратә концерт абзоурала еизгоуп 138 650 мааҭ. Иаанханы иҟоуп 653 350 мааҭ.

Ацхыраара аҟаҵаразы аинформациа шәоур шәылшоит афонд "Ашана" аофициалтә саит аҿы.

Иара убас шәаԥхьар ҟалоит:

51

COVID-19 рзықәыргылоуп даҽа 26-ҩык Аԥсны ауааԥсыра

10
(ирҿыцуп 19:06 14.08.2020)
Апандемиа ҟалеижьҭеи Аԥсны акоронавирус здырбалахьоу рхыԥхьаӡара 182-ҩык ыҟоуп. Урҭ рахьтә 66-ҩык ргәы бзиахеит, хҩык рыԥсҭазаара иалҵит.

АҞӘА, нанҳәа 14 - Sputnik. Ииасыз уахыки-ҽнаки рыла акоронавирустә чымазара амазааразы агәаҭара иахысит 235-ҩык ауааԥсыра. Урҭ рахьтә адиагноз COVID-19 рзықәыргылоуп 26-ҩык, ҳәа аанацҳауеит Ауааԥсыра акоронавирустә ҿкы рацәыхьчаразы аоперативтә штаб.

Апандемиа ҟалеижьҭеи Аԥсны акоронавирус здырбалахьоу рхыԥхьаӡара 182-ҩык ыҟоуп. Урҭ рахьтә 66-ҩык ргәы бзиахеит, хҩык рыԥсҭазаара иалҵит.

Абри аамҭазы Гәдоуҭатәи ахәышәтәырҭаҿы ишьҭоуп акоронавирус зцәа иалоу 24-ҩык апациентцәа. Уахыки-ҽнаки рыла ахәышәтәырҭаҟнытә илыҩҩауп згәабзиара ҭышәынтәалахаз ааҩык атәылауааи, урыстәылатәи ахаҿи, ԥсшьаҩык Шәачаҟа диагоуп идиагноз хада ала иҷыдоу амедицинатә цхыраара иҭаразы.

Ауааԥсыра акоронавирустә ҿкы рацәыхьчаразы аоперативтә штаб ажәлар рахь ааԥхьара ҟанаҵоит ачымазара рымкырц азы ахыхьчаратә ԥҟарақәа ирықәныҟәаларц, асоциалтә дистанциа ркызарц.

Акоронавирус иадҳәалоу ажәабжьқәа зегьы шәрыԥхьар ҟалоит абра>>

 

10
Атемақәа:
Ачымазара ҿкы – акоронавирус Аԥсни адунеи аҿи: иалкаау

Аԥсны АҶА аусзуҩцәа Питертәи атуристка лыԥшаара ишаҿыц иаҿуп

1
Аԥшаарақәа мҩаԥысуеит Аԥсны АҶА аминистр Лев Кәыҵниа инапхгарала, аволонтиорцәеи иӡыз лҭаацәеи алархәны.

АҞӘА, нанҳәа 14 – Sputnik. Аԥсны Аҭагылазаашьа ҷыдақәа рминистрра аҟазауаа хымш ирықәуп аквадроцикл аҟынтәи Бзыԥ аӡы иагеит ҳәа иршьо атуристка лыԥшаара иаҿуижьҭеи, абри атәы Sputnik иазеиҭеиҳәеит АҶА рминистр ихаҭыԥуаҩ Тигран Делибалтиан.

Иара иажәақәа рыла аԥшаарақәа мҩаԥыслоит аԥҳәызба дрыԥшаанӡа.

"Амшқәа цәгьаханы ақәоура ҟалар аамҭакала ҳаԥшуеит. Макьаназы аԥшаарақәа ирыцаҳҵоит", - иҳәеит иара.

Аԥшаарақәа ирылахәуп Гагреи Гәдоуҭеи араионқәа рымцарцәара-еиқәырхаратә бригадақәеи Аҳәынҭқарратә инспекциа аӡыҵалаҩцәеи. Анеира ахьыуадаҩу аҭыԥқәа рҿы авиациа ахархәара амоуп.

1998 шықәса рзы ииз арԥыси аԥҳәызбеи Аԥсныҟа ԥсшьара ҳәа иааит Санкт-Петербургнтә. Аквадроцикл қьырала иргеит.

Аӡиа Риҵахь узго амҩа ажәбатәи акилометр иахьаҵанакуа аҷкәын аԥсҟы импыҵҟьеит, аквадроцикл ааҳәын аӡиас иалаҳаит.

Аҷкәын ибыргәым аахақәа иоуит, аквадроцикл Бзыԥ аҟәараҿы ирбеит.

Аӡӷаб амҩатә машәыр ахьыҟалаз аҭыԥ аҿы дрымбеит, убри азы аӡаҿы лыԥшаара иалагеит.

1