Аԥсны Апрокурор хада Зураб Ачба имаҵура дамхуп

Аԥсны Апрокурор хада Зураб Ачба имаҵура дамхуп

37
Аԥсны Аҳәынҭқарра Жәлар Реизара - Апарламент изаамҭанытәим аилатәара мҩаԥысит ашәахьа, ԥхынҷкәын 2 рзы.

АҞӘА, ԥхынҷкәын 2 - Sputnik, Бадри Есиава. Аԥсны Апарламент азыразхеит ахада ирыдигалаз апрокурор хада Зураб Ачбеи уи ихаҭыԥуаҩ Ешсоу Какалиеи рмаҵураҟынтәи рамхразы азҵаара, абри атәы аҭыԥ аҟынтәи иааицҳауеит Sputnik акорреспондент.

Жәлар Реизараҟны иазгәарҭеит Ачбеи Какалиеи рхатәгәаԥхарала рмаҵура шаанрыжьуазы арзаҳалқәа шырҩыз ахада ихьӡала, ахада уи азы Апарламент ахь азҵаара рыдигалеит.

Адепутат Валери Агрба иргәалаиршәеит иҳаҩсыз амчыбжь азы Апарламент ишымҩаԥнагаз изаамҭанытәим аилатәара, ААРи Апрокуратура хадеи рнапхгара адԥхьаланы. Усҟан ҳтәылаҟны акриминогентә ҭагылазаашьа иалацәажәон. Уи аилатәараан адепутатцәа дҵас иқәдыргылеит аҿҳәара кьаҿ иалагӡаны Аҟәа аԥшаҳәаҿы ацәгьоура ҟазҵаз рыԥшаара, аха алҵшәа ҳәа акгьы ҟамлеит, иҳәеит Агрба.

Апарламент адепутат Дмитри Дбар иажәақәа рыла, апрокурор ҿыц уаанӡатәи апрокурор инапынҵақәа ишақәнагоу рынамыгӡаразы ашьаус идиҵароуп ҳәа.

Маӡалатәи абжьыҭара алҵшәақәа рыла, адепутатцәа ирыӡбеит апрокурор хадеи уи ихаҭыԥуаҩи рмаҵурақәа рҟынтәи рамхра.

Ачба Зураб Шоҭа-иԥа диит абҵара 18, 1958 шықәсазы. Апрокуратура аусбарҭақәа рҟын аус иуеит 1994 шықәса инаркны. Ажьырныҳәа 18, 2017 шықәсазы уи Аԥсны Апрокурор хадас дҟаҵан.

Какалиа Ешсоу Иван-иԥа диит лаҵара 23, 1974 шықәсазы. 1995 шықәсазы иара далгеит Аԥснытәи аҳәынҭқарратә университет аҭоурых-зиндырратә факультет "Азиндырра" азанааҭ иманы. Апрокуратура аусбарҭақәа рҟны аус иуеит 1995 шықәса инаркны. Жьҭаара 13, 2016 шықәсазы иара Аԥсны Апрокурор хада ихаҭыԥуаҩыс дҟаҵан.

Иара убас шәаԥхьар ҟалоит:

37