Аҵак ду змоу архивтә документқәа Аибашьратә фырхаҵара амузеи иаҭоуп

85
Владислав Арӡынба ихьӡ зху Аибашьратә фырхаҵара амузеи иаҭо архивтә документқәа руак инапы аҵаҩуп Аԥсны ЦИК ахантәаҩы Нестор Лакоба.

АҞӘА, ԥхынҷкәын 20 – Sputnik, Сариа Кәарцхьиаԥҳа. Раԥхьатәи аԥсуа ԥырҩы Виктор Аргәын идҳәалоу архивтә документқәа ҩба Владислав Арӡынба ихьӡ зху Аибашьратә фырхаҵара амузеи иаҭоуп.

Адокументқәа имԥыхьашәеит, амузеи ахьгьы инеигеит аҭоурыхдырыҩ Геннади Ларин. Владислав Арӡынба ихьӡ зху Аибашьратә фырхаҵара амузеи иаҭоу архивтә документқәа руак инапы аҵаҩуп Аԥсны ЦИК ахантәаҩы Нестор Лакоба.

"Арҭ адокументқәа рыҟазаара закәаншьаҭа аманы избоит. Сҩызцәа, аус сыцызуа ибзианы ирдыруеит Аԥсны сшаҩыза гәакьоу. Убас сҩызцәа руаӡәк арҭ адокументқәа сзааиҭиит, амузеи иасҭарцгьы аҳәара ҟаиҵеит – ауаа ирбаразы", - ҳәа еиҭеиҳәоит Евгени Ларин.

Нестор Лакоба инапы зҵаҩу адокумент шьақәыргылан иара иҭахара мызқәак шагыз. Уаҟа Лакоба Аграждантә ҳаиртә флот аиҳабы Ткачиов диҳәоит Аҟәатәи аҳаиртә клуб ахь Виктор Аргәын ииагара алиршарц.

"Адокумент иаанарԥшуеит Нестор Лакоба Виктор Аргәын илахьынҵа дшахӡыӡоз, иара убасгьы амилаҭтә кадрқәа рыҟазаара хыс ишимаз", - иҳәоит аҭоурыхдырыҩ Николаи Медвенски.

© Foto / предоставлено Саида Жиба

Адокумент аҷыдара азгәеиҭеит Аԥснытәи аҳәынҭқарратә музеи адиректор Аркади Џьапуа. Иара иҳәеит Нестор Лакоба 1936 шықәса, ԥхынҷкәынымзазы данҭаирха ашьҭахь Бериа иара ихьӡ зҳәоз адокументқәа зегьы рықәхра иҽшазишәаз.

"Ас еиԥш иҟоу адокументқәа, архив ду злаблыз ала, акы-ҩба инхақәазгьы ҳнапаҿы излаҟам ала, аҭоурых азы аҵак ду аманы сахәаԥшуеит. Лакоба цәгьаԥсышьа иҭаны дыныршьыз ашьҭахь, ихаҭара иаҵанакуаз зегьы иҟаӡамшәа иқәыргеит, ихьӡ зҳәоз ҳәа ак аанмыжькәа, иара ихаҭа ишилгоз еиԥш, ҳҭоурых ишалгоз еиԥш, инапы зҵаҩыз адокументқәагьы ықәыргон. Ас еиԥш ашәҟәы абла ҷыҵ еиԥш ихьчатәу ауп. Аҩбатәи – иара ахаҭа ҩуп алатынтә шрифт ала, аԥсышәала ианыҩуаз аамҭа арҵабыргуеит, ахԥатәи – Аҟәа ақалақь усҟантәи аамҭазы ишахьӡыз еиԥш иахьагьы иахьӡуп, ақырҭцәа ишырхәыцыз акәымкәа. Абасала ари адокумент иаҳәо рацәоуп", - иҳәеит Џьопуа.

Виктор Аргәын имоҭа Есма Аргәынԥҳа аԥшаах зыбзоуроу ҭабуп ҳәа иалҳәеит.

Владислав Арӡынба ихьӡ зху Аибашьратә фырхаҵара амузеи арҭ адокументқәа рыхкьыԥхьаа рырҭеит Аԥснытәи аҳәынҭқарратә музеии Виктор Аргәын иҭаацәеи.

Иара убас шәаԥхьар ҟалоит:

85
Судебный молоток и весы правосудия

"Аԥсныбылтәы" уаанӡатәи аиҳабы аҩнтәи абаандаҩраҿы дшыҟац дааннажьит

4
(ирҿыцуп 12:23 06.06.2020)
"Аԥсныбылтәы" уаанӡатәи аиҳабы иганахьала ашьаус хацыркуп ацәгьоурақәа ԥшьба рыла Аԥсны Ашьаустә закәанеидкыла ахәҭаҷ "Инапы ианҵаз аҳәынҭқарратә мазара мҽахы ҭбаала ахатәтәреи аныхреи" ахәҭаҷ инақәыршәаны.

АҞӘА, рашәара 6 - Sputnik. Аҟәатәи ақалақьтә ӡбарҭа "Аԥсныбылтәы" уаанӡатәи адиректор хада Беслан Аҩӡба иганахьала аҩнтәи абаандаҩраҟантәи аанкыларҭахь нанҳәа 3 рҟынӡа днагазарц азы Аԥсны Апрокуратура хада иҟанаҵаз азашшра мап ацәнакит. Абри атәы аанацҳауеит Апрокуратура хада асаит.

Аӡбарҭа аӡбарала Беслан Аҩӡба аҩнтәи абаандаҩраҿы дыҟазаауеит ԥхынгәы 20 рҟынӡа.

"Аԥсныбылтәы" уаанӡатәи адиректор хада хәажәкыра 20 инаркны Аҟәатәи ақалақьтә ӡбарҭа аӡбарала аҩнтәи абаандаҩраҿы дыҟан, уи иаанаго ашьаусҭҵааҩ ҩыралатәи иақәшаҳаҭра имамкәа иҩны ддәылҵыр (сааҭки бжаки иҩны азааигәара анеиааира аламҵакәа), инхарҭа ҭыԥ иԥсахыр, аимадара ихы иаирхәар, асаламшәҟәқәа, анашьҭымҭақәа, абандерольқәа иоулар ма ишьҭлар ҟалом ҳәа ауп.

Аха рашәара 3 рзы Апрокуратура хадахьы инеит аинформациа Аҩӡба аҩнтәи абаандаҩра аԥҟарақәа еилеигеит ҳәа, убри азоуп аӡбарҭахьгьы изашшыз.

"Аԥсныбылтәы" уаанӡатәи аиҳабы иганахьала ашьаус хацыркуп ацәгьоурақәа ԥшьба рыла Аԥсны Ашьаустә закәанеидкыла ахәҭаҷ "Инапы ианҵаз аҳәынҭқарратә мазара мҽахы ҭбаала ахатәтәреи аныхреи" ахәҭаҷ инақәыршәаны. Ашьаусҭҵаара излаԥхьаӡаз ала, Аҩӡба ицәгьоура иалҵшәаны аҳәынҭқарра иаиуз аԥхасҭа иааизакны иартәоит 31 миллион 438 нызқь мааҭ, аха ари аԥхасҭа аԥхьаӡара макьана ихыркәшаӡам. Ашьаусҭҵаара аҳәаақәа ирҭагӡаны Аҩӡба Аҳәынҭнаплакы анапхгаҩыс иусура аамҭа зегьы ҭырҵаауеит аԥхасҭа зегьы амҽхак аилкааразы.

Иара убас шәаԥхьар ҟалоит:

4

Озган анардадаҩцәа рус ҟарымҵар Апрокуратура хадахь дшырзашшуа лҳәеит

11
(ирҿыцуп 11:40 06.06.2020)
Аԥыза-министр ихаҭыԥуаҩ, аекономика аминистр Кристина Озган Гәдоуҭа араион ахадара злахәыз аилатәара мҩаԥылгеит, дареи Гагра араион ахадареи лыманы Аҟәа ацрыҵқәа ррыцқьарҭа ахьыҟоу Алада Ешыра ақыҭа даҭааит.

АҞӘА, рашәара 6 - Sputnik. Аԥыза-министр ихаҭыԥуаҩ, аекономика аминистр Кристина Озган Гәдоуҭа араион ахь аусуратә гәаҭара анымҩаԥылгоз Аинвестпрограмма аобиектқәа рҵыхәала зус ишақәнагоу иназмыгӡо анардадаҩцәа рзы Апрокуратура хадахь дшашшуа атәы лҳәеит, абри атәы аанацҳауеит Аекономика аминистрра апресс-маҵзура.

Аусбарҭа пресс-маҵзура ишаҳәо ала, ари аҩыза аҳәамҭа Озган иҟалҵеит Аԥсны Аҳәынҭқарра асоциал-економикатә ҿиара ацхрааразы 2017-2019 шықәсазтәи Аинвестициатә программа иаҵанакуа ҳаԥхьаҟа ииасуа аобиектқәа ирызкыз Гәдоуҭа араион ахадареи лареи реилацәажәараан.

"Кристина Озган Гәдоуҭа араион ахада инапынҵақәа назыгӡо Баграт Боџьгәуа инарҵауланы изеиҭалҳәеит арҭ аобиектқәа рҟны аҭагылазаашьа зеиԥшроу, урҭ рзы иҷыдоу агәцаракра ааирԥшырц иалҳәеит. Лара инаҵшьны иазгәалҭеит анардадаҩцәа рхыдҵақәа нармыгӡо иалагар, урҭ рзы адыррақәа Апрокуратура хадахь инашьҭны дшырзашшуа", - ҳәа аанацҳауеит Аекономика аминистрра апресс-маҵзура.

Аԥсны ахада Аслан Бжьаниа аԥыза-министр ихаҭыԥуаҩс, аекономика аминистрс Кристина Озган дҟаиҵеит лаҵара 4, 2020 шықәсазы.

Иара убас шәаԥхьар ҟалоит:

11