АҞӘА, ԥхынҷкәын 30 - Sputnik. Аԥсны Апарламент адепутатцәа ашәахьа, ԥхынҷкәын 30 рзтәи реилатәараҟны ирыдыркылеит "2020 шықәсазтәи Ареспубликатә биуџьет азы" азакәан апроект ҳәа аҭыԥ аҟынтәи иааицҳауеит Sputnik акорреспондент.
Апарламент аиҳабы Валери Кәарҷиа иҳәеит ԥхынҷкәын 27 рзы ишымҩаԥгаз абиуџьети, акредиттә еиҿкаарақәеи, ашәахтәқәеи, афинансқәеи рзы аилак аилатәара, ишалацәажәаз адепутатцәа ражәалагалақәа рыла иҟаҵаз аиҭакрақәа.
Апарламент абиуџьети, акредиттә еиҿкаарақәеи, ашәахтәқәеи, афинансқәеи рзы аилак ахантәаҩы Натали Смыр иазгәалҭеит абиуџьет инарҭбааны ишалацәажәаз.
Ареспубликатә биуџьет иалагалаз аиҭакрақәа иалдыршоит урыстәылатәи атәанчахәы змауа атәанчаҩцәа 100 процентк рыла ртәанчахәы ацҵара лҳәеит лара.
Аиҭакрақәа азԥхьагәаҭаны ареспубликатә биуџьет иартәоит 8 миллиардки 115 миллион мааҭи. Аныхрақәа – 8 миллиардки 397 миллион мааҭ. Адефицит иартәоит 281 миллион мааҭ.
Адепутат Рауль Лолуа ааԥхьара ҟаиҵеит ажәлар ирҿагыло абиуџьет адкылара дшақәшаҳаҭым.
Аилацәажәара ашьҭахь, аҩбатәи, аҵыхәтәантәи аԥхьарала азакәан апроект рыдкылан. Иара азы рыбжьы рҭиит - 20-ҩык адепутатцәа.
Уаанӡа, Аԥсны Жәлар Реизара - Апарламент адепутатцәа аҩбатәи аԥхьарала ирыдрымкылеит 2020 шықәсазтәи ареспубликатә биуџьет.
Абиуџьет апроект азы усҟан рыбжьы рҭиит 16-ҩык адепутатцәа, 11-ҩык мап ацәыркит, ҩыџьа рыҽныркалеит.
Адепутатцәа рыхәҭак рықәгыларақәа раан иазгәарҭеит абиуџьет асоциалтә ҭахрақәа ирықәшәом ҳәа. Апроект иадгалан ариашарақәа, аха абжьыҭираан дара зегьы мап рыцәкын.
Иара убас шәаԥхьар ҟалоит:
-
Абиуџьет аусзуҩцәа ркатегориақәак руалафахәы аицԥаразоужьра аҿҳәара иацҵоуп
