Али Аншба: аԥсуа дахьыҟазаалак иҩн ду ахь, Аԥсныҟа даароуп

99
Ҳџьынџьуаҩ Али Аншба Ҭырқəтəылантəи иԥсадгьыл ахь дызқəылаз амҩа аҭоурых дазааҭгылоит ажурналист Сырма Ашəԥҳа.

Сырма Ашәԥҳа, Sputnik

Жəаха шықəса инарзынаԥшуеит Ҭырқəтəылантəи иааз Али Аншба иԥсадгьыл аҿы дынхоижьҭеи. Аԥсныҟа аара анаԥшьига, арахь амҩа данықəла, гəыҩбаракгьы изцəырымҵит шьҭахьҟа схынҳəуеит ҳəа. Избанзар идыруан дахьаауаз, дыззаауаз.

Алии сареи ҳаибадыруеит Аԥсныдгьыл ишьапы анықəиргыла аамҭа инаркны. Усҟан иара ихала дыҟазҭгьы, иахьа сазгəыдуны исҳəарц сылшоит рынасыԥ шеиларҵаз Амра Агрԥҳаи иареи, ҩыџьа ахшара дышрабу. Хымԥада, ас еиԥш иҿырԥшыгоу аԥсуа ҭаацəарақəа урмеигəырӷьарц залшом.

"Сара, Ҳендеқь иаҵанакуа аԥсуа қыҭа Каилак сеиуоуп. Изларҳəо ала, сышьҭра иатəу сеиҳабацəа Ԥсҳəынтə иҭыҵқəаз роуп. Ҭырқəтəылоуп сара ашкол ахь сахьцаз, алицеи сахьҭалаз, анаҩс иреиҳау аҵараиурҭа сахьҭалазгьы. Кəҭаҳиа иатəу афилологиеи абаҩрҵəыреи рфакультет салгеит, хырхарҭала еиуеиԥшымыз амаҭəарқəа сырхысуан, иара убас ҷыдала ашьапылампыл иатəыз акурсқəа рҿы сҵара иацысҵон", - ҳəа азгəеиҭоит Али Аншба.

Али Аншба аспорт аганахьала Ҭырқəтəыла иоуз аҵарадырра иабзоураны, шықəсқəак Сҭампыл абаҩрҵəыра арҵаҩыс аус иуан, анаҩс ашьапылампыл азы ахəыҷқəа азыҟаиҵон. Иара убас, ааԥхьара ирҭеит зыхьӡ нагоу еиуеиԥшым ашьапылампылтə командақəа рахь, қəҿиаралагьы ихы ааирԥшуан. Аха зегь раԥхьа иргылаз акакəны иҟалеит иԥсадгьыл ахь ахынҳəра.

"Сара Аԥсныҟа сааит 2007 шықəса рзы, гəаныла еснагь исҭахын арахь аара, сгəаҳəарагьы наӡеит. Санааҵəҟьаз ҩышықəса Гагратəи Башаран-коллеџь аҟны аус зуан абаҩрҵəыра арҵаҩыс, нас Аҟəаҟа сиасит. Слахьынҵа убас еиԥш исыцныҟəеит, шықəсык ааҵуаны, 2008 шықəса рзы аҭаацəара салалеит, иахьа схы-сгəы сақəгəырӷьо сыԥсадгьыл аҿы сынхоит, изласылшо ала сыуаажəлар саӡəыкны срылагылоуп, саԥсыуаҵəҟьаны схы сыԥхьаӡоит", - ҳаиҿцəажəара иациҵон Али.

Иазгəаҭатəуп, Али Аншба иԥшəмаԥҳəыс Амра Агрԥҳа аҭаацəара даналалоз, Аԥсны Жəлар Реизараҿы депутатс дшыҟаз, аҳəаанырцə инхо ҳџьынџьуаа рыԥсадгьыл ахь архынҳəра иадҳəалоу азҵаарақəа еснагь дышрызҿлымҳаз.

Али Аншба иакəзар, ҳазҭагылоу аамҭазы ашьапылампылтə команда "Нарҭ-Сухум" аҟны зыҟаҵаҩ хадас дыҟоуп. Ари акоманда еиҳабыс дамоуп Геннади Ҵнариа.

"Нарҭ" азыҟаҵаҩ хада аҿар еиҳа дрықәгәыӷуеит>>

Уи аԥхьа, Али Аншба ақəыԥшцəа ршьапылампылтə федерациа аҟны аус иуан, ашьҭахь Шамиль Аӡынба хадас дызмоу ашьапылампылтə команда "Абазг" ахь зыҟаҵаҩыс диасит. Аԥснытəи ашьапылампыл аусхк ахҳəаа азуа, Али Аншба игəаанагара ҳацеиҩишеит.

"Ашьапылампыл аус ҳалацəажəозар, аиаша шəасҳəоит, шықəсқəак раԥхьа еиҳа еиӷьын сгəаанагарала. Аԥарагьы еиҳа имаҷын, аха азҿлымҳара еиҳа еиҳан. Ашьапылампыласыҩцəа иахəҭоу амҩа рыҭатəуп. Ашьапылампыл аҿиара аԥара аҭахуп, ҳтəылаҿы иҟоу аекономикатə ҭагылазаашьа ари аусхкгьы ианымԥшырц залшом. Арԥарцəа ракəзар, абаҩхатəра бзиа рылоуп, иӡыргатəуп, ирхаҵгылатəуп, техникалагьы, маха-шьахалагьы, ццакрылагьы ҳаҷкəынцəа алҵшəа бзиақəа аадырԥшуеит, уи хымԥада агəахəара унаҭоит, зегьы ирыцкуп", - иҳəоит иара.

Али Аншба излаиҳəо ала, иара дызлыҵыз иҭаацəа акыр аԥсуара иазҿлымҳан, аҩнаҭаҿы еиҳарак аԥсуа бызшəа аҳра ауан. Уи ус шакəу агəра угаратəы иҟоуп Али ихымҩаԥгарала, идунеихəаԥшышьа ала.

"Сан Чачԥҳауп, Баақьизе лыхьӡуп. Сан лан Қапԥҳан, саб иан Ҭамбиаԥҳан, убых хылҵшьҭроуп, аха лара дзааӡаз Екбақəоуп, лара лан Абӷаџьааԥҳан, лаб даныԥсы Екбақəа ааӡара дрырҭеит. "Ибыжəлоузеи?" - ҳəа улазҵааргьы, дзааӡаз рыжəла акəын илҳəоз еснагь. Саб ааигəа иԥсҭазаара далҵит, сан лыԥсы ҭоуп. Ҳара хҩык аишьцəа ҳаҟоуп, сара сгəыбжьанытəуп", - иҭаацəа рҭоурых дазааҭгылеит ҳџьынџьуаҩ.

Аҳəаанырцəынтəи Аԥсныҟа нхара ҳəа Аншба зыжəланы иаахьоу Али Ҳаириҭҭин-иԥа иоуп. Аха, агəыӷра ҳамоуп уи иҿыԥшша ижəлантəқəа, иашьцəа шыҟало аԥхьаҟа.

"Сҩызцəеи сареи Ҭырқəтəыла еиҿкаау аԥсуаа ркультуратə хеидкылақəа лассы-лассы ҳарҭаауан, ҳаԥсуара ҳашьҭан, ҳаԥсадгьыл ҳазҿлымҳан. Анцəа иџьшьаны сааратəы иҟалеит. Абра санааи ауп ианеилыскаа Аԥсны сыԥсадгьылҵəҟьа шакəу. Араҟа знык ушьапы адгьыл ианықəургыла, уоунашьҭӡом... Ахцəажəарагьы сцəыуадаҩуп... Аԥсныҟа саара сҭаацəа азыразхеит. Ҭырқəтəылаҟа сҭаацəа рбара сцаргьы, Аԥсныҟа лассы ахынҳəра сҭаххоит, арахь исыхоит", - ҳəа азгəеиҭоит Али Аншба.

Али Аншба иԥсадгьыл аҿы, ииашаҵəҟьаны, ихы-игəы дақəгəырӷьо дынхоит. Ахныҟəгаразы, хымԥада дарбанызаалак ауаҩы усда-ҳəысда дымтəароуп, инапаҟынтə иааиуа ҟаиҵароуп ҳəа азиԥхьаӡоит.

Еркәыт Аӡынба
© Foto / Афото Еркәыт Аӡынба иархив аҟынтәи

"Адунеи зегьынџьара уадаҩра ахьыҟам ыҟаӡам, аԥсҭазаара мариаӡам. Ауадаҩрақəа уриааины, анхашьа уақəшəароуп. Аԥсны аҳəынҭқарреи ауаажəларреи сырзыразуп, даара ахаҵгылара ҳарҭоит, ҭабуп ҳəа расҳəоит. Аԥсуаа жəытəаахыс аԥсҭазаара ҳаԥнашəахьеит, ахеиқəырхара ҳалшоит. Ҳаԥсуа бызшəеи ҳаԥсуареи бзанҵы рыԥсы ҭазааит, уи ауп ҳара милаҭк аҳасабала ҳаӷəӷəаӡа ҳҟазҵаз. Ҳара ԥсадгьылк ауп иҳамоу - Аԥсны. Убри аҟынтə, аԥсуа дахьыҟазаалак иҩн ду ахь даароуп. Аԥсадгьыл амч ахьуныруа Аԥсноуп!" - иҳəоит Али Аншба.

Али Аншба иԥсадгьыл иацу игəҭахəыцрақəа акыр ахшыҩҵак ҵаула рыҵоуп, аԥхарра рхылҵуеит, уи илаԥшҳəаа ҭбаауп. Аԥсҭазаараҿы ихықəкы хада наӡеит ҳəа азиԥхьаӡоит, избанзар иԥа Амири иԥҳа Аилинеи рџьынџьдгьыл аҿы ирызҳауеит. Уи еиҳау иарбан насыԥу иҟоу?!

Иара убас шәаԥхьар ҟалоит:

99

Валериа Адлеиԥҳа ҷыдала афестиваль "Аԥсны" азы ашәа ҿыц ҭалҩит

3
(ирҿыцуп 10:32 01.12.2020)
Валериа Адлеиԥҳа – жәларбжьаратә авокалтә шоу "Ты супер!" актәи асезон аҿы аиааиҩы.

АҞӘА, ԥхнҷ 1 – Sputnik. Валериа Адлеиԥҳа ҷыдала афестиваль "Аԥсны", Москватәи аԥсуа диаспора еиҿыркааз азы иҭалҩит аԥсышәала ашәа "Сыҟоуп уааигәара" (Я с тобой). Абри атәы  Sputnik иазеиҭалҳәеит лара ашәаҳәаҩ лхаҭа.

"Афестиваль "Аԥсны" ҩынтәуп салахәхоижьҭеи. Ҵыԥх Москва сықәгылан, сынтәа апандемиа иахҟьаны иҳаӡбеит онлаин амҩаԥгара. Азыӡырыҩцәа рзы ашәа-аҳамҭа ҭааҩит",- лҳәоит лара.

Валериа лажәақәа рыла ашәа аҩызареи аицхыраареи ирызкуп.

"Ашәаҿ уҩыза  ҭагылазаашьак иахҟьаны инапқәа аниваҳауа, имч анымхо ушивагылаша атәы аҳәоит. Зегь шыбзиахо агәра иуыргароуп. Ашәа ахьӡгьы "Сыҟоуп уааигәара" ҳәоуп ишыҟоу",- лҳәоит лара.

Ажәақәеи амузыкеи иҩит Анри Гәымба, ашәа акустикатә версиа иалахәын амузыкантцәа - Алхаси Алмасхани Марколиаа, Ҭимур Агрба. Абек вокал – аԥсуа блогер Сандро Аблоҭиеи Ирена Сымсымԥҳаи.

Афестиваль "Аԥсны", Москватәи аԥсуа диаспора еиҿыркааит цәыббра 30 2018 шықәса рзы.

2020 шықәсазы акоронавирустә пандемиа иахырҟьаны онлаин-формат ала имҩаԥгахоит.

Валериа Адлеиԥҳа – жәларбжьаратә авокалтә шоу "Ты супер!" актәи асезон аҿы аиааиҩы афестиваль лҽалалырхәырц анаԥхьара лыҭан.

Иара убас шәаԥхьар ҟалоит:

3

Аслан Бжьаниа ақалақьқәеи араионқәеи рхадацәа алархәны аилацәажәара мҩаԥигеит

4
(ирҿыцуп 09:31 01.12.2020)
Аиԥылараҿы ирылацәажәан атәылаҿ аҭагылазаашьа, аҭыԥантәи абиуџьетқәа рынагӡашьа, аепидемиологиатә ҭагылазаашьа.

АҞӘА, ԥхынҷ 1 - Sputnik. Аԥсны ахада Аслан Бжьаниа ақалақьқәеи араионқәеи рхадацәа алархәны аилацәажәара мҩаԥигеит ҳәа аанацҳауеит ахада исаит.

Абиуџьет анагӡара шымҩаԥысуа, акоронавирустә инфекциа иаҿагыланы ақәԥара шцо, ақыҭанхамҩеи асоциалтә усхки рҟны аҭагылазаашьа атәы атәыла ахада изеиҭарҳәеит Аҟәа ақалақь, Гал, Тҟәарчал, Очамчыра, Гәылрыпш, Аҟәа, Гәдоуҭа, Гагра араионқәа рхадацәеи Афон Ҿыци Пицундеи ақалақьқәа рхадацәеи.

Аԥсны ахада ааԥхьара ҟаиҵеит напхгара зырҭо ақалақьқәеи араионқәеи рҿы иныҭкааны аҭагылазаашьа ҭырҵаарц.

"Арегионқәа рпаспортқәа аԥҵатәуп. Шәара ишәымазароуп аинформациа ақыҭанхамҩатә хархәара змоу адгьылқәа рзы. Аусуралшара змоу ауааԥсыра рхыԥхьаӡараз уҳәа ихадоу егьырҭ аусхкқәа рзы", - иҳәеит Бжьаниа, иара убасгьы иазгәеиҭеит абизнес маҷи абжьаратә бизнеси ацхыраара шрыҭатәу.

Уи адагьы ахада иазгәеиҭеит арегионалтә напхгаҩцәеи азинхьчаратә усбарҭақәеи еиҳа ибзианы еинырлар шакәу.

Аиԥылара далахәын ахада Иусбарҭа анапхгаҩы Алхас Кәыҵниа, ихаҭыԥуаа Саида Быҭәԥҳа, Џьансух Нанба, Зураб Қаџьаиа, Аԥсны АШәМ ахантәаҩ ихаҭыԥуаҩ Тимур Ахьиба.

Аилацәажәара хыркәшо Аслан Бжьаниа ақалақьқәеи араионқәеи рхадацәа иреиҳәеит атәылаҿ аепидемиологиатә ҭагылазаашьа шааиӷьхалак арегионқәа рҿы аиԥыларақәа рымҩаԥгара ишациҵо атәы.

4